Mudabuluswa Matawiro a Umaso Wathu Wacikristu na Utumiki
SUMANA 5-11 YA AGOSTO
MPFUMA ZA MAFALA A MULUNGU | 2 TIMOTI 1-4
“Mulungu Nee Atipasa Nzimu Wakugopa”
(2 Timoti 1:7) Thangwi Mulungu nee atipasa nzimu wakugopa, mbwenye atipasa nzimu wamphambvu, waufuni na wamanyerezero adidi.
Sentinela 15/05/09 tsa. 15 ndima 9
Aphale na Atsikana—Citisani Kuthambaruka Kwanu Kuoneke Pakweca
9 Toera kuphedza Timoti, Paulu ankumbusa: “Mulungu nee atipasa nzimu wakugopa, mbwenye atipasa nzimu wamphambvu, waufuni na wamanyerezero adidi.” (2 Tim. 1:7) Kukhala na ‘manyerezero adidi’ kusaphataniza kudziwa kunyerezera mwadidi, pontho mwandzeru. Kusaphatanizambo kucita pinthu ninga munacitirwa ipyo, tayu ninga munafunira imwe. Aphale na atsikana anango asapangiza nzimu wakugopa, pontho angathimbana na pinentso asayesera kuzithawa mukuona televizau mwakupiringana midida, kumwa kakamwe peno kuphatisira mitombwe yakuledzeresa, kucita maphwando peno ulukwali. Akristu asafunika ‘kukhonda pinthu pyakuipa na pifuno pya dziko, mbakhala na ndzeru zadidi mu umaso, akhale anthu akulungama na akuperekeka kuna Mulungu pakati pa anthu a dziko ino.’—Tito 2:12.
(2 Timoti 1:8) Natenepa, leka kukhala na manyadzo pakupereka umboni unalonga pya Mbuyathu peno pya ine, wakuti ndiri nkaidi thangwi ya iye; mbwenye nyindira mphambvu ya Mulungu, mbutawira kuona nyatwa thangwi ya mphangwa zadidi.
Sentinela 1/3/03 tsa. 9 ndima 7
‘Khala Wacipapo na Wamphambvu’
7 Pidalembera iye Timoti, Paulu alonga: “Thangwi Mulungu nee atipasa nzimu wakugopa, mbwenye atipasa nzimu wamphambvu . . . Natenepa, leka kukhala na manyadzo pakupereka umboni unalonga pya Mbuyathu.” (2 Timoti 1:7, 8; Marko 8:38) Pakuleri mafala anewa tinakwanisa kubvundzika: ‘Ndisakhala na manyadzo kulonga pinakhulupira ine peno ndine wacipapo? Ndisapanga andzanga akubasa peno akuxikola kuti ndine Mboni wa Yahova peno ndisaabisira? Ndisakhala na manyadzo kukhala wakusiyana na anango peno ndisakomerwa kulonga pya uxamwali wanga na Yahova?’ Khala munthu ali na maonero akuphonyeka thangwi ya basa yakumwaza mphangwa peno asagopa kukhala wakusiyana na anango, asafunika kukumbuka uphungu udapereka Yahova kuna Yoswa: ‘Khala wacipapo na wamphambvu.’ Ndzidzi onsene kumbukani kuti maonero akufunika kakamwe ndi a Yahova na a Yezu Kristu, tayu maonero a andzanu akubasa peno akuxikola.—Agalata 1:10.
Kusaka Mpfuma Zauzimu
(2 Timoti 2:3, 4) Ninga nyankhondo wadidi wa Kristu Yezu, tawira kuona nyatwa. Munthu anaphata basa ninga nyankhondo nkhabe kucita malonda ninga pinacita anthu mu umaso wa ntsiku na ntsiku, thangwi iye asafuna kukomeresa ule adansankhula toera kukhala nyankhondo.
Kusaka Mpfuma Zandimomwene
13 Timoti akhali mamuna wacipapo. Pidamala Paulu kucemera Timoti kuti “nyankhondo wadidi wa Kristu Yezu,” iye athimiza: ‘Nee munthu m’bodzi wa anyankhondo a Mulungu asatsalakana pya malonda a pantsi pano, mbwenye anafuna kukomeresa ule adampasa basa ya unyankhondo.’ (2 Timoti 2:3, 4) Atowereri a Yezu lero, kuphatanizambo atumiki ali m’basa ya ndzidzi onsene akupiringana miliyau ibodzi, asacita pyonsene toera kuphatisira uphungu wa Paulu. Iwo asacalira pinthu pyakutundusa pya dziko ino yaumbirimi. Iwo asakumbuka uphungu uyu: ‘Nyamangawa asakhala bitcu wa nyakufiyarisi.’ (Misangani 22:7) Sathani asafuna tibvunge ndzidzi na mphambvu zathu zonsene n’dziko yace ya mpfuma. Anango asafiyari kobiri toera kulipa nyumba, motokala, xikola, peno phwando yakumanga banja. Tingakhonda kucita mphole-mphole, tinakwanisa kukhala na mangawa pyaka pizinji. Ife tisapangiza udziwisi wakukwana tingalulupisa umaso wathu, kucalira mangawa na kuphatisira kobiri yakucepa. Tingacita pyenepi, tinatumikira mwadidi Mulungu m’mbuto mwakukhala bitcu wa dziko ya mpfuma.—1 Tim. 6:10.
(2 Timoti 2:23) Kusiyapo pyenepi, calira makani aupswiru na akusowa basa, thangwi iwe usadziwa kuti pyenepi pisasosa kuketesana.
Ncenjezi 1/7/14 tsa. 16 ndima 10
Atumiki a Yahova ‘Asakhonda Pyakuipa’
10 Lero, kazinji kene atumiki a Yahova nee asathimbana na anyakupanduka mu mpingo. Ngakhale tenepo, tingagumana na pipfundziso pyakuphonyana na Bhibhlya, tisafunika kupicalira, mwakukhonda tsalakana kudabuluka ipyo. Si pyandzeru tayu kuketesana na anyakupanduka, mwakukhonda tsalakana khala tikucedza nawo nkhope na nkhope, kubulukira mu Interneti, kutawira matsamba awo, peno njira zinango zakupita nazo ncibverano. Ngakhale kuti cifuno cathu ndi kuaphedza, makani anewa mbadaphonyana na citsogolero ca Bhibhlya cidamala ife kudinga. Mbuto mwace, ninga atumiki a Yahova, tisakhonda, mbaticalira anyakupanduka munjira yonsene.
SUMANA 12-18 YA AGOSTO
MPFUMA ZA MAFALA A MULUNGU | TITO 1–FILIMONI
“Ukhazikise Akulu a Mpingo”
(Tito 1:5-9) Ine ndakusiya ku Kreta toera ulungamise pinthu pyakuti pikhafunika kusasanyirwa, pontho toera ukhazikise akulu a mpingo mu nzinda ubodzi na ubodzi, mwakubverana na pitsogolero pidakupasa ine: 6 Nkulu wa mpingo asafunika kukhala munthu wakusowa mathangwi akusandikwa nawo, mamuna wa nkazi m’bodzi basi, akhale na ana akukhulupira akuti nee asapambizirwa kuti ali na makhaliro akuipa peno akukhonda bvera. 7 Thangwi ninga muimiriri wa Mulungu, muyang’aniri asafunika kukhala wakusowa mathangwi akupambizirwa nawo, wakukhonda kukakamira pinafuna iye basi, wakukhonda kucimbiza na kuipirwa, akhonde kukhala nyamwera, akhonde kumenya anthu, akhonde kufuna kuwina pinthu mwakukhonda kulungama, 8 mbwenye asafunika kukhala wakutambira alendo, wakufuna pinthu pyadidi, wa manyerezero adidi, wakulungama, wakukhulupirika, wakuphata ntima, 9 atoweze mwadidi mafala akukhulupirika pakupfundzisa kwace mwaluso, toera akwanise kuwangisa kubulukira mu cipfundziso cadidi, mbakwanisambo kusandika ale anapokanya cipfundziso ceneci.
Sentinela 15/11/14 tsa. 28-29
Mibvundzo Inacitwa na Anyakuleri
Maseze malemba nee asafokotoza pinthu pikhacitwa mu ndzidzi unoyu toera kukhazikisa munthu, tinakwanisa kukhala na maonero akuti anthu akakhazikiswa tani. Paulu na Bharnabhe pikhabwerera iwo kunyumba buluka ulendo wawo wakutoma waumisionaryo “iwo akhazikisa amuna toera kutumikira ninga akulu a mpingo. Iwo aphembera mbacita jejuu, buluka penepo aapereka kuna Yahova, thangwi amuna anewa akakhulupira Mulungu.” (Mabasa 14:23) Mukupita kwa ndzidzi, Paulu alembera Tito wakuti akhali ndzace akhacita na iye ulendo: “Ine ndakusiya ku Kreta toera ulungamise pinthu pyakuti pikhafunika kusasanyirwa, pontho toera ukhazikise akulu a mpingo mu nzinda ubodzi na ubodzi, mwakubverana na pitsogolero pidakupasa ine.” (Tito 1:5) Munjira ibodzi ene, Timoti wakuti akhacita ulendo kazinji kene na mpostolo Paulu, pisaoneka kuti iye akhalimbo na cidzo. (1 Tim. 5:22) Pyenepi pisapangiza pakweca kuti kukhazikiswa kweneko kukhacitwa na ayang’aniri a cisa tayu na apostolo na akulu a mu Yerusalemu.
Mwakubverana na ntsonga zidadinga ife pakutoma, Mathubo Akutonga a Mboni za Yahova acita macinjo thangwi ya njira yakukhazikisa akulu a mpingo na atumiki akutumikira. Kutomera ntsiku yakutoma ya mwezi wa Setembro wa 2014, kukhazikiswa kwa akulu a mpingo na atumiki akutumikira kusacitwa tenepa: Muyang’aniri wa cisa asadinga ale adasankhulwa mu cisa cace. Mu ndzidzi unacedzera iye mipingo, asasaka kudziwa abale adasankhulwa mbabuluka nawo mu utumiki pingakwanisika. Pakumala kudinga ale adasankhulwa pabodzi na nsoka wa akulu a mpingo, muyang’aniri wa cisa ali na basa yakukhazikisa akulu a mpingo na atumiki akutumikira a mipingo ya mu cisa cace. Munjira ineyi, asatowezera masasanyiro akhacitwa mu pyaka dzana yakutoma.
Ninji pinaphatanizwa m’mabasa anacita m’bodzi na m’bodzi wa iwo? Ndzidzi onsene, “m’bandazi wakukhulupirika na wandzeru” ali na basa ikulu yakudyesa anyabasa a panyumba pace. (Mat. 24:45-47) Pyenepi pisaphataniza kufufudza Malemba na ciphedzo ca nzimu wakucena, toera kubvesesa midida ya m’Bhibhlya inapangiza kuti mipingo yonsene pa dziko yapantsi isafunika kukhala tani. Buluka penepo, asapereka pitsogolero pyakuti midida ineyi isafunika kuphatisirwa tani. M’bandazi wakukhulupirika na wandzeru asakhazikisambo ayang’aniri a cisa onsene na abale anacita khundu ya Komiti ya Filiali. Natenepa filiali ibodzi na ibodzi isapereka ciphedzo toera pitsogolero pyenepi pikwanise kuphatisirwa. Nsoka wa akulu a mpingo ali na basa ikulu kakamwe yakudinga mwacidikhodikho khala abale adasankhula iwo asapangiza makhaliro adidi akuti asabverana na Bhibhlya toera kutambira miyai yakutumikira mu mpingo wa Mulungu. Muyang’aniri wa cisa m’bodzi na m’bodzi ali na basa ikulu yakudinga mwacidikhodikho na phembero, ale adasankhulwa na akulu a mpingo, buluka penepo mbakhazikisa abale adathema.
Kusaka Mpfuma Zauzimu
(Tito 1:12) M’bodzi wa iwo, wakuti ndi mprofeta wawo, alonga: “Anthu a ku Kreta ndzidzi onsene asalonga pyauthambi, iwo ndi ninga pikala, anthu akudyesa na akupolola.”
Sentinela 15/5/89 tsa. 31 ndima 5
Mibvundzo Inacitwa na Anyakuleri
Iye nee akhaphedzera pinthu pyakuipa pikhalonga anthu thangwi ya dzindza ya Kreta. Tinakwanisa kuphedzera pyenepi thangwi Paulu akhadziwa kuti ku Kreta kukhali na Akristu adidi akuti akhali akutawirika kuna Mulungu, mbadzodzwa na nzimu Wace wakucena. (Mabasa 2:5, 11, 33) Akhalipo Akristu akukwana akuti ndi aphinga toera kukhazikisa mipingo mu “nzinda ubodzi na ubodzi.” Ngakhale Akristu anewa nee akhali aungwiro, tinakwanisa kukhala na cinyindiro cakuti iwo nee akhali authambi na akudyesa; munjira inango, iwo nee mbadakhala akutawirika kuna Yahova. (Afilipi 3:18, 19; Apokalipse 21:8) Ninga pinacitika lero na madzindza onsene, panango akhalipo ku Kreta anthu adidi akuti akhatsukwala na makhaliro akuipa akhacitwa pakati pawo, akuti akhali dzololo toera kutambira mphangwa Zacikristu.—Ezekyele 9:4; landanisani na Mabasa 13:48.
(Filimoni 15, 16) Panango ndi pyenepi pidancitisa kukhala kutali na iwe mu ndzidzi wakucepa, toera angabwerera kuna iwe, akhale na iwe kwenda na kwenda, 16 tayu ninga bitcu, mbwenye ninga munthu wakupiringana bitcu, ninga m’bale wakufunika, makamaka kuna ine, mbwenye wakufunikambo kakamwe kuna iwe, ninga bitcu, pontho ninga m’bale mwa Mbuya.
Sentinela 15/10/08 tsa. 31 ndima 5
Ntsonga Zikulu za Matsamba Adalemberwa Tito, Filimoni na Ahebheri
Filim. 15, 16—Thangwi yanji Paulu nee aphemba Filimoni toera asudzule Onesimo? Paulu akhafuna kakamwe basa yace ‘yakumwaza mphangwa za Umambo wa Mulungu, na kupfundzisa pinthu pinalonga thangwi ya Mbuya Yezu Kristu.’ Natenepa, iye asankhula kukhonda kucita khundu ya dziko, ninga pya ubitcu.—Mabasa 28:31.
SUMANA 19-25 YA AGOSTO
MPFUMA ZA MAFALA A MULUNGU | AHEBHERI 1-3
“Funa Ulungami, Mbuida Kusowa Ulungami”
(Ahebheri 1:8) Thangwi ya Mwanace, iye asalonga: “Mulungu ndiye anakupasa mphambvu toera utonge kwenda na kwenda, pontho ndodo ya Umambo wako ndi yaulungami.
Ncenjezi 1/2/14 tsa. 10 ndima 8
Simbani Kristu, Mambo wa Mbiri!
8 Mu caka 1914, Yahova aikha Mwanace ninga Mambo Waumesiya kudzulu. Yezu anadzatonga ‘mbumba yace na cilungamo,’ natenepa tinakwanisa kunyindira kuti ndzidzi onsene mu utongi wace munadzakhala ulungami. Utongi wace ndi wandimomwene, nakuti ‘Mulungu ndiye adampasa mpando waumambo.’ Pyenepi pisabveka kuti Yahova ndiye adatomesa umambo wace. Natenepa, mpando wa umambo wa Yezu ‘unadzakhaliratu’ kwenda na kwenda. Kodi imwe musadzikuza kutumikira Yahova pantsi pa citsogolero ca Mambo wakusankhulwa na Mulungu?
(Ahebheri 1:9) Iwe wafuna ulungami, mbuida kusowa ulungami. Na thangwi ineyi, Mulungu akudzodza na mafuta, mbakucitisa kukhala wakutsandzaya kakamwe kupiringana andzako.”
Ncenjezi 1/2/14 tsa. 9-10 ndima 7
Simbani Kristu, Mambo wa Mbiri!
7 Lerini Masalmo 45:6, 7. Yezu afuna kakamwe cilungamo mbaida pinthu pyonsene pyakuti mbipidaxola Babace, na thangwi ineyi, Yahova ansankhula ninga Mambo wa Umambo Waumesiya. Yezu asankhulwa mu kudzodzwa na mafuta kupiringana ‘amambo andzace’ Aciyuda akubulukira ku ubalwi wa Dhavidhi. Mu njira ipi? Njira ibodzi, Yezu asankhulwa na Yahova ekhene. Kusiyapo pyenepi, Yahova ansankhula toera kukhala ninga Mambo na Nyantsembe Wankulu. (Masal. 2:2; Aheb. 5:5, 6) Mwakuthimizira, Yezu nee asankhulwa kubulukira mu kudzodzwa na mafuta ninga amambo a Israele, mbwenye asankhulwa na nzimu wakucena. Umambo wace si wa pantsi pano tayu mbwenye wakudzulu.
Kusaka Mpfuma Zauzimu
(Ahebheri 1:3) Mwana ndi cipangizo ca mbiri ya Mulungu na cipangizo candimomwene ca makhaliro ace, iye asacitisa kuti pinthu pyonsene pipitirize kukhalapo kubulukira mu mphambvu ya fala yace. Pidamala iye kucenesa madawo athu, iye akhala kunkono wamadyo wa Mulungu Wankulu.
Perspicaz vol. 2 tsa. 382 ndima 1
Dzimunthu
Kodi Yezu ndzidzi onsene apangiza makhaliro a Babace munjira ibodzi ene?
Mwana wautombo wa Mulungu wakuti mukupita kwa ndzidzi adzadziwika ninga Yezu, ndi cithundzithundzi ca Babace. (2 Akor. 4:4) Mu ndzidzi wakuti Mwana unoyu akhalipo, ndiye adapangwa na Mulungu kuti: ‘Tende ticite munthu ninga ife,’ kulandana kweneku kwa mwana na Babace, Nciti, kukhalipo kutomera ndzidzi udacitwa Mwana. (Gen. 1:26; Juw. 1:1-3; Akol. 1:15, 16) Pikhali iye pa dziko yapantsi, ninga munthu waungwiro apangiza makhaliro na uunthu wa babace, m’makhundu onsene, mwakubverana na pinakwanisa kucitwa na anthu, natenepa mbadalonga kuti “ule anandiona akuonambo Baba.” (Juw. 14:9; 5:17, 19, 30, 36; 8:28, 38, 42) Kulandana kweneko, kwapangiza pakweca mu ndzidzi udalamuswa Yezu na umaso wauzimu, pontho ‘mudapaswa iye mphambvu zonsene kudzulu na pa dziko yapantsi’ na Babace, Yahova Mulungu. (1 Ped. 3:18; Mat. 28:18) Nakuti Mulungu akuza Yezu pa “mbuto yapadzulu kakamwe,” Mwana wa Mulungu apangiza mbiri ya Babace munjira ya padzulu kakamwe kupiringana idapangiza iye mbadzati kubwera pa dziko yapantsi. (Afil. 2:9; Aheb. 2:9) Cincino iye ndi “cipangizo candimomwene ca makhaliro a [Mulungu].”—Aheb. 1:2-4.
(Ahebheri 1:10-12) Iye alongambo kuti: “Imwe Mbuya, pakutoma mwacita matomero a dziko yapantsi, pontho kudzulu ndi basa ya manja anu. 11 Pyenepi pinadzamala, mbwenye imwe munadzapitiriza; pontho ipyo pinadzasakala ninga nguwo, 12 imwe munadzapifunya ninga kapoti, mbamupicinja ninga nguwo. Mbwenye imwe nee munadzacinja, pontho pyaka pya umaso wanu, cipo pinadzamala.”
Perspicaz vol. 1 tsa. 491 ndima 2
Kudzulu
Mafala a Masalmo 102:25, 26 asaphatisirwa kuna Yahova Mulungu, mbwenye mpostolo Paulu aaphatisirambo kuna Yezu Kristu. Pyenepi ndi thangwi mwana wautombo wa Mulungu akhali Muimiriri wa Mulungu adaphatisirwa toera kucita pinthu pyonsene. Paulu asiyanisa kukhalapo kwa Mwana na kucitwa kwa pinthu, kwakuti Mulungu mbadafuna, ‘mbadapifunya ninga kapoti,’ mbapiikha pakhundu.—Aheb. 1:1, 2, 8, 10-12; landanisani 1 Ped. 2:3.
SUMANA 26 YA AGOSTO–1 YA SETEMBRO
MPFUMA ZA MAFALA A MULUNGU | AHEBHERI 4-6
“Wangisirani Toera Kupita M’mbuto Yakupuma ya Mulungu”
(Ahebheri 4:1) Natenepa, nakuti iciripo pikiro toera kupita m’mbuto idakhunganya iye toera kupuma, citani mphole-mphole kuti pakati panu pakhonde kuoneka munthu wakuti anaoniwa kukhala wakukhonda thema toera kupitamo.
(Ahebheri 4:4) Thangwi pa khundu inango ya Malemba, iye alonga mafala awa thangwi ya ntsiku yacinomwe: “Mulungu apuma pa ntsiku yacinomwe, pidamala iye kucita mabasace onsene,”
Sentinela 15/07/11 tsa. 24-25 ndima 3-5
Kodi Ninji Kupuma Kwa Mulungu?
3 Pana pinthu piwiri pyakuti pisapangiza kuti ntsiku yacinomwe ikhapitiriza kuphata basa mu ndzidzi wa apostolo. Cakutoma, onani mafala a Yezu kwa anyamalwa ace akuti akhansandika thangwi yakuwangisa anthu pa ntsiku ya Sabudu, kwakuti iwo akhaona kuti ineyi ndi basa. Mbuya aapanga: “Babanga asapitiriza kuphata basa mpaka lero, inembo ndisapitiriza kuphata basa.” (Juw. 5:16, 17) Ndi ipi ntsonga? Yezu akhapambizirwa thangwi yakuphata basa pa ntsiku ya Sabudu. Pidaatawira iye kuti: “Babanga asapitiriza kuphata basa,” amalisa kupambizirwa kukhacitwa iye. Mwandimomwene, Yezu akhalonga tenepa kuna anyakupambizira: ‘Ine na Babanga tisacita basa ibodzi ene. Nakuti Babanga asapitiriza kuphata basa pa pikwi na pikwi pya ma Sabudu, pyenepi pisapangiza kuti ndi pyakutawirika kuti ndiphate basa, ngakhale pa ntsiku ya Sabudu.’ Natenepa, Yezu akhafuna kupangiza kuti thangwi ya dziko yapantsi, ntsiku ikulu ya Sabudu ndi ntsiku yakupuma ya Mulungu, pontho ntsiku yacinomwe nee ikhadasiya kuphata basa mu ndzidzi wace.
4 Caciwiri capangizwa na mpostolo Paulu. Pidalonga iye mafala a Genesi 2:2 thangwi ya kupuma kwa Mulungu, Paulu apumirwa toera kulemba: “Ife akuti tiri na cikhulupiro, tisapita m’mbuto idakhunganya iye toera kupuma.” (Aheb. 4:3, 4, 6, 9) Natenepa ntsiku yacinomwe ikhapitiriza kuphata basa mu ndzidzi wa Paulu. Ntsiku ineyi yakupuma inapitiriza kuphata basa mpaka lini?
5 Toera kutawira mbvundzo unoyu, tendeni tikumbuke cifuniro ca ntsiku yacinomwe. Genesi 2:3 isafokotoza cifuniro ceneci: ‘Mulungu apasa nkhombo ntsiku yacinomwe mbaicitisa kukhala yakucena.’ Ntsiku ineyi yacitiswa ‘kukhala yakucena’—peno kuikhwa pakhundu na Yahova—toera kukwanirisa cifuniro cace. Cifuniro ceneci ndi cakuti dziko ikhale na amuna na akazi akubvera akuti anadzaitonga, pabodzi na pinthu pyonsene pinagumanika mwenemo. (Gen. 1:28) Thangwi yakukwanirisika kwa cifuniro ceneci, Yahova Mulungu na Yezu Kristu wakuti ndi “Mbuya wa Sabudu,” ‘asapitiriza kuphata basa mpaka lero.’ (Mat. 12:8) Ntsiku yakupuma ya Mulungu, inapitiriza mpaka cifuniro cace thangwi yakupuma Kwace, cikwanirisike mwakukwana kunkhomo kwa Utongi wa Kristu wa Pyaka Cikwi.
(Ahebheri 4:6) Natenepa, nakuti aciripo anthu anango toera kupitamo, pontho ale adamwazirwa mphangwa zadidi pakutoma nee apitamo thangwi yakukhonda kubvera kwawo,
Sentinela 15/07/11 tsa. 25 ndima 6
Kodi Ninji Kupuma Kwa Mulungu?
6 Mulungu afokotoza mwakubveka mwadidi kuna Adhamu na Eva kuti ndi cipi cifuniro cace, mbwenye iwo nee aphedzera toera kukwanirisa cifuniro ceneci. Mwandimomwene, Adhamu na Eva akhali anthu akutoma adasankhula kukhonda bvera. Kutomera penepo paonekambo anango pikwi na pikwi. Ngakhale mbumba yakusankhulwa na Mulungu, dzindza ya Izraeli kazinji kene nee ikhabvera. Ndi thangwi yace Paulu acenjeza Akristu a ndzidzi wa apostolo kuti maseze angasi a iwo mbadakwanisa kugwa mu nsampha ninga udagwera Aizraeli akale. Iye alemba: “Natenepa, tendeni ticite pyonsene pinakwanisa ife toera tipite m’mbuto ineyi yakupuma, toera akhonde kuoneka munthu anafuna kugwa m’makhaliro mabodzi ene akukhonda kubvera.” (Aheb. 4:11) Paulu alandanisa kukhonda bvera na kukhonda kupita mu ntsiku yakupuma ya Mulungu. Pyenepi pisabvekanji kwa ife? Tingakhonda kubvera cifuniro ca Mulungu, tinaluza mwai wakupita mu ntsiku yakupuma ya Mulungu? Inde, ntawiro wa mbvundzo unoyu ndi wakufunika kakamwe kuna ife, pontho tinadzautawira ntsogolo. Pa ndzidzi uno, tendeni tione kuti citsandzo cakuipa ca Aizraeli cisatipfundzisanji thangwi ya ntsiku yakupuma ya Mulungu.
(Ahebheri 4:9-11) Natenepa, kuna mbumba ya Mulungu, iciripo ntsiku ya Sabudu toera kupuma. 10 Thangwi munthu adapita m’mbuto idakhunganya Mulungu toera kupuma, iye apumambo m’mabasace, ninga Mulungu apuma pidamala iye kucita mabasace. 11 Natenepa, tendeni ticite pyonsene pinakwanisa ife toera tipite m’mbuto ineyi yakupuma, toera akhonde kuoneka munthu anafuna kugwa m’makhaliro mabodzi ene akukhonda kubvera.
Sentinela 15/07/11 tsa. 28 ndima 16-17
Kodi Ninji Kupuma Kwa Mulungu?
16 Akristu akucepa lero asapitiriza kutowezera Mwambo wa Mose toera kuwina cipulumuso. Mafala akupumirwa kuna Aefesi ndi akubveka kakamwe: “Thangwi ya kukoma ntima kweneku, imwe mwapulumuswa kubulukira mu cikhulupiro canu, pyenepi nee pisabuluka kuna imwe, mbwenye ndi muoni wa Mulungu. Nkhabe, imwe nee mwapulumuswa thangwi ya mabasa anu, toera akhonde kuoneka munthu wakukhala na mathangwi akudzikuza.” (Aef. 2:8, 9) Mphapo Akristu anapita tani mu ntsiku yakupuma ya Mulungu? Yahova akoya ntsiku yacinomwe yakuti ndi ntsiku yace yakupuma, toera cifuniro cace na dziko yapantsi cikwanirisike. Tinakwanisa kupita, peno kucita khundu mu kupuma kwa Yahova tingaphata basa mwakubvera, pontho mwakubverana na cifuniro cace, cinaperekwa na gulu yace.
17 Munjira inango, kupwaza uphungu wa m’Bhibhlya unaperekwa na m’bandazi wakukhulupirika na wandzeru, mbatisankhula kucita pinafuna ife, pisabveka kupingiza kukwanirisika kwa cifuniro ca Mulungu. Pyenepi mbapidaikha pangozwi uxamwali wathu na Yahova. Mu nsolo unatowera tinadzaona makhundu mangasi akuti anakwanisa kukhuya mbumba ya Mulungu. Pontho pisankhulo pyathu pya kubvera peno nzimu wakutongeka tekhene unapangiza khala mwandimomwene tapita mu ntsiku yakupuma ya Mulungu.
Kusaka Mpfuma Zauzimu
(Ahebheri 4:12) Thangwi mafala a Mulungu ndi amaso na amphambvu, pontho ndi akutwa kakamwe kupiringana supada yakuceka uku na uku. Asapita nkati kakamwe mwa munthu mpaka kusiyanisa piri kunja kwa munthu na piri nkati mwa munthu, pontho iwo asapita nkati mwa mphindo na m’mafuta a m’magogodo a munthu, mbakwanisa kupangiza manyerezero a munthu na pifuno pya muntima mwace.
Mibvundzo Inacitwa Na Anyakuleri
Lemba ya Ahebheri 4:12 isalonga kuti ‘mafala a Mulungu ndi amaso na amphambvu.’ Kodi mpostolo Paulu akhalonga pya Bhibhlya?
▪ Mavesi a nduli na a kutsogolo kwa lemba ineyi asatiphedza toera kubvesesa pikhafuna kulonga mpostolo Paulu. Mwandimomwene, iye akhalonga pya mapikiro onsene a Yahova. Mapikiro anewa asatiphedza toera kubvesesa cifuniro ca Mulungu. Anango mwa mapikiro anewa acitwa mu ndzidzi wakuti Bhibhlya nee ikhalipo.
Midzidzi inango, mabukhu athu asaphatisira lemba ya Ahebheri 4:12 toera kupangiza kuti Bhibhlya iri na mphambvu toera kucinja umaso wa anthu. Pyenepi ndipyodi, mbwenye mphyadidi kakamwe kudziwa kuti ninji pikhafokotoza Paulu pidalemba iye mafala anagumanika pa Ahebheri 4:12. Iye akhawangisa Akristu Acihebheri toera kucita pinthu mwakubverana na cifuniro ca Mulungu. Pizinji mwa pifuniro pyenepi pikhagumanika m’malemba akucena. Paulu aphatisira citsandzo ca Aisraele adaombolwa na Mulungu ku Ejito. Iwo akhali na cidikhiro cakuenda ku dziko yakupikirwa ‘ya nkaka na uci,’ kwakuti mbadakwanisa kugumana kupuma kwandimomwene.—Eksodo 3:8; Deuteronomyo 12:9, 10.
Ceneci cikhali cifuniro ca Mulungu. Mbwenye Aisraele nee abvera Yahova, pontho nee apangiza cikhulupiro. Na thangwi ineyi, azinji a iwo nee apita mu kupuma kweneku. (Numero 14:30, Yoswa 14:6-10) Natenepa, Paulu aphatisira Genesi 2:2 na Masalmo 95:11 toera kupangiza kuti uciripo mwai toera ‘kupita mu kupuma’ kwa Mulungu. Iye aphatisira malemba anewa toera kupangiza kuti mapikiro anewa akhacita khundu ya ‘mafala a Mulungu’ anagumanika m’Bhibhlya. (Ahebheri 3:16-19; 4:1) Mbwenye ife tisadziwa kuti kupita mu kupuma kwa Mulungu ndi ibodzi mwa mapikiro anapangiza cifuno ca Yahova. Natenepa, ninga Akristu a mu ntsiku za Paulu, ife tinakwanisambo kudziwa mapikiro anewa. Kusiyapo pyenepi, tisafunika kupangiza kuti cifuno ca Mulungu cinadzacitika.
Mphyadidi kudziwa kuti ‘iciripo pikiro toera kupita mu kupuma kwa Mulungu.’ Ife tisakhulupira pikiro ineyi. Pontho tisacita pyonsene pinakwanisa ife toera kupita mu kupuma kweneku, tayu basi mukucita pinthu pyadidi peno kubvera Mwambo wa Mose, mbwenye mu kupangiza cikhulupiro kuna Mulungu na kupangiza kuti tisafunadi kuti cifuno cace cicitike. Kusiyapo pyenepi, pikwi na pikwi pya anthu pa dziko yonsene asapfundza Bhibhlya mbadziwa cifuno ca Mulungu. Anthu anewa asacinja umaso wawo, kupangiza cikhulupiro na kubatizwa. Pyenepi pisapangiza kuti ‘mafala a Mulungu ndi amaso na amphambvu.’ Mapikiro a Mulungu acinjambo umaso wathu, pontho tisafuna kupitiriza kucita pyenepi.
(Ahebheri 6:17, 18) Munjira ibodzi ene, Mulungu pikhafuna iye kupangiza pakweca kuna ale adacitirwa pikiro ya unthaka kuti cifuniro cace nkhabe kucinja, iye adumbira toera kupangiza kunyindirika kwa pikiro ineyi, 18 toera kubulukira mu pinthu piwiri pyenepi pyakuti nkhabe kucinjika, pinapangiza kuti nkhabe kwanisika kuti Mulungu alonge uthambi, ife adathawira m’mbuto yakubisalira titambire ciwangiso cikulu toera tiphatisise na manja mawiri cidikhiro ciri patsogolo pathu.
Perspicaz vol. 2 tsa. 24 ndima 5
Cidikhiro
Cidikhiro ceneci na umaso wakukhonda mala na ca ale “adacemerwa toera kuenda kudzulu,” (Aheb. 3:1) ndi cakunyindirika kakamwe. Pyenepi pisaphedzerwa na pinthu piwiri pyakuti mphyakucimwanika kuna Mulungu kulonga uthambi, pikiro yace na dumbiro yace na cidikhiro ciri mwa Kristu, wakuti cincino ali kudzulu, pontho nkhabe kufabve. Na thangwi ineyi, pisalongwa thangwi ya cidikhiro ceneci kuti “ninga nangula ya umaso wathu, cakunyindirika na cakuwanga, pontho cisatitsogolera mpaka nkati, kuntsi kwa nguwo ya mu templo, [ninga pikhapita nyantsembe wankulu pakupita mu mbuto Yakucena Kakamwe pa Ntsiku Yakuphimbira Madawo], kwakuti Yezu ndiye adatoma kupitako toera kutifungulira njira. Iye adzakhala nyantsembe wankulu wakwenda na kwenda ninga Melekizedheki.”—Aheb. 6:17-20.