Munakwanisa Kuthimbana Na Sathani Mbamuwina!

1. (a) Thangwi yanji nkhondo yathu yakuthimbana na Sathani ndi yakufunika kakamwe lero? (b) Tisadziwa tani kuti tinakwanisa kuwina nkhondo yakuthimbana na Sathani?

SATHANI akumenya nkhondo na anyakudzodzwa akusalikira na “mabira anango.” (Jwau 10:16) Mu ndzidzi wakucepa udasala na iye, Dyabo asafuna kufudza cikhulupiro ca atumiki azinji a Yahova. (Lerini Apokalipse 12:9, 12.) Tinawina mu nkhondo yathu yakuthimbana na Sathani? Inde! Bhibhlya isalonga: ‘Khondani Dyabo, penepo iye anadzathauka kwa imwe.’​—Tgo. 4:7.

2, 3. (a) Maonero akuti Sathani nee alipodi asaphedzera tani pifuno pya Dyabo? (b) Musadziwa tani kuti Sathani alipodi?

² Anthu azinji asapwaza maonero akuti Sathani alipo. Kwa iwo Sathani na mademonyo asagumanika basi ene m’mabukhu, mafilimu anapangiza pyauphanga, na mavidyu game. Anthu anewa asanyerezera kuti nkhabeko munthu waudziwisi anakhulupira kuti mizimu yakuipa iripo. Musanyerezera kuti Sathani asadzudzumika na pinanyerezera anthu kuti iye na mademonyo ace nee alipo? Nkhabe! Munjira ineyi, mphyakukhonda nentsa kuti Sathani aphophe manyerezero a anthu anapenula kuti iye alipo. (2 Akor. 4:4) Manyerezero akuti mizimu nee iripo, ndi ibodzi mwa njira zizinji zinaphatisira Sathani toera kupeusa anthu.

³ Ninga atumiki a Yahova, ife nee tiri pakati pa anthu anewa anapeuswa. Tisadziwa kuti Dyabo alipo, thangwi ndiye adalonga na Eva mu kuphatisira nyoka. (Gen. 3:1-5) Sathani axola Yahova, mu kupenula kukhulupirika kwa Yobe. (Yobe 1:9-12) Pontho ndiye adayesera Yezu. (Mat. 4:1-10) Pidamala kukhazikiswa Umambo wa Mulungu mu caka 1914, ndi Sathani adatoma ‘kumenya nkhondo’ na anyakudzodzwa adasalikira. (Apok. 12:17) Nkhondo ineyi ikupitiriza thangwi Sathani asafuna kufudza cikhulupiro ca anyakudzodzwa adasalikira na ca mabira anango. Toera kuwina nkhondo ineyi, tisafunika kukhala akuwanga mu cikhulupiro kuti tithimbane na Sathani. Nsolo uno unadinga njira zitatu toera kucita pyenepi.

KUCALIRA KUDZIKUZA

4. Kodi Sathani asapangiza tani kuti ndi wakudzikuza kakamwe?

⁴ Sathani ndi wakudzikuza kakamwe. Mwandimomwene, Sathani apokanya kuthema kwa Yahova toera kutonga, mbayesera kucitisa anango toera kulambira iye, mbuto mwakulambira Yahova. Natenepa, njira ibodzi toera kuthimbana na Sathani, ndi kucalira kudzikuza na kukulisa nzimu wakucepeseka. (Lerini 1 Pedro 5:5.) Mphapo kudzikuza ninji? Kodi kudzikuza ndi kwakuipa ndzidzi onsene?

5, 6. (a) Kodi kudzikuza ndi kwakuipa ndzidzi onsene? Fokotozani. (b) Ndi ntundu upi wakudzikuza wakuti ndi wakugopswa, na ndi pitsandzo pipi pya Bhibhlya pinapangiza pyenepi?

⁵ Disionaryo inango isafokotoza kudzikuza ninga “manyerezero akupasika mbiri na akulemedzeka,” na “mabvero akukomerwa anakhala na imwe thangwi yakuti imwe peno acibale anu acita cinthu cadidi peno ali na cinthu cadidi.” Mabvero anewa si akuipa tayu. Mpostolo Paulu alonga kuna abale a ku Tesalonika: ‘Ife tisadzikuza mwa imwe m’mipingo ya Mulungu thangwi ya phinga yanu na kukhulupirika kwanu m’mayesero onsene na nyatwa zinapirira imwe.’ (2 Ates. 1:4) Natenepa, kukomerwa thangwi ya mabasa a anango, peno kudzikuza mwakulinganira thangwi ya ife ene si pyakuipa tayu. Ife nee tisafunika kukhala na manyadzo thangwi ya banja yathu, makhaliro athu, peno cisa cidakula ife.​—Mach. 21:39.

⁶ Munjira inango, pana ntundu wakudzikuza wakuti unakwanisa kufudza uxamwali wathu na anango, makamaka na Yahova. Kudzikuza kweneku kunakwanisa kuticitisa kukoya pinthu muntima na kukhonda kutambira uphungu mbuto mwakuutawira mwakucepeseka. (Sal. 141:5) Ntundu unoyu wakudzikuza usafokotozwa ninga “kulemedzeka kakamwe tekhene,” peno “makhaliro akudzikuza anapangizwa na anthu akuti kazinji kene, ngakhale mwakusowa mathangwi, asanyerezera kuti ndi akufunika kakamwe kupiringana anango.” Yahova asaida munthu wakudzikuza. (Ezek. 33:28; Amosi 6:8) Mbwenye Sathani asakomerwa kakamwe kuona anthu mbakapangiza nzimu unoyu wakudzikuza, thangwi pyenepi pisapangiza makhaliro ace. Nyerezerani kutsandzaya kudakhala na Sathani, mu ndzidzi wakuti Nimrode, Farao na Absaloni agwa mu nsampha unoyu wa nzimu wakudzikuza! (Gen. 10:8, 9; Eks. 5:1, 2; 2 Sam. 15:4-6) Kudzikuza kwacitisambo Kayini kuluza uxamwali wace na Mulungu. Iye apaswa uphungu na Mulungu, mbwenye iye akhali wakudzikuza kakamwe mbakhonda kutawira ciphedzo. Mwakudzikuza, iye apwaza uphungu wa Yahova, mbagwa m’madawo.​—Gen. 4:6-8.

7, 8. (a) Kodi kusankhulana kwa madzindza ninji, na kunakwanisa tani kukhala ntundu wa kudzikuza? (b) Fokotozani kuti kudzikuza kunakwanisa tani kupingiza ntendere m’mpingo?

⁷ Lero, anthu asapangiza kudzikuza munjira zakuipa kakamwe. Kazinji kene, kudzikuza kusapangizwa mu kusankhulana kwa madzindza. Disionaryo inango isafokotoza tsankhulo ninga “kuida anthu a ntundu unango,” na “kukhulupira kuti anthu a ntundu unango ali na makhaliro na maluso akusiyana, pontho kuti ntundu unango wa anthu ndi wapadzulu kakamwe peno wakupwazika.” Kudzikuza thangwi ya dzindza kusabweresa kukhonda bverana, nkhondo, na kuphiwa kwa anthu azinji.

⁸ Mbwenye pyenepi nee pisafunika kuoneka m’mpingo Wacikristu. Ngakhale tenepa, kuphonyana maonero kwa abale na alongo, kwakuti kazinji kene kusatoma thangwi ya kudzikuza, kunakwanisa kukula. Panango, ndi pyenepi pidacitika kwa Akristu anango a pyaka dzana yakutoma adalembera Tyago mbvundzo wakufunika kakamwe: ‘Kodi nkhondo na nthonga ziri pakati panu zabulukira kupi?’ (Tgo. 4:1) Inde, kukoya pinthu muntima peno kudzikuza kunakwanisa kukhuya malongero athu na macitiro athu, mbapibweresa nyatwa zakukhonda lengeseka kuna anango. (Mis. 12:18) Mwandimomwene, kudzikuza kunakwanisa kupingiza ntendere m’mpingo.

9. Kodi Bhibhlya isatiphedza tani toera kucalira kusankhulana na kudzikuza kwakukhonda linganira? (Onani cithundzithundzi cakutoma.)

⁹ Khala tiri na cipendamiro cakunyerezera kuti ndife akufunika kupiringana anango, tisafunika kukumbuka kuti ‘Yahova asaipirwa na munthu onsene wakudzikuza.’ (Mis. 16:5) Tisafunikambo kudinga mwadidi maonero athu thangwi ya anthu a dzindza inango, dziko inango, peno a makhaliro anango. Khala tiri na manyerezero akupwaza anthu a dzindza inango, peno kudzikuza thangwi ya dziko yathu, tikupwaza undimomwene wakuti Mulungu ‘acita anthu a madzindza onsene kubulukira mwa munthu m’bodzi.’ (Mach. 17:26) Munjira ineyi, pana dzindza ibodzi basi, thangwi anthu onsene abulukira kwa Adhamu. Natenepa, mphyakusowa ndzeru kakamwe kunyerezera kuti ntundu unango wa anthu ndi wapadzulu kakamwe, peno ndi wakupwazika. Manyerezero anewa mbadaphedzera kakamwe nsampha wa Sathani toera kupingiza ufuni na kuphatana kwa Akristu. (Jwau 13:35) Toera kuwina pakuthimbana na Sathani, tisafunika kucalira ntundu onsene wa kudzikuza kwakukhonda linganira.​—Mis. 16:18.

KUCALIRA PYA MPFUMA NA KUFUNA DZIKO

10, 11. (a) Thangwi yanji mphyakukhonda nentsa kukulisa ufuni ku pinthu pya dziko? (b) Kodi Dema apangiza tani kuti akhafuna dziko?

¹⁰ Sathani ndi ‘ntongi wa dziko ino,’ iyo iri m’manja mwace. (Jwau 12:31; 1 Jwau 5:19) Natenepa, pinthu pizinji pinakulumiza dziko ino nee pisabverana na midida ya Bhibhlya. Ndimomwene kuti si pyonsene tayu pinapereka dziko mphyakuipa. Mbwenye Sathani anakwanisa kuphatisira dziko yace toera kutitundusa mbatiyesera toera kucita madawo peno kukulisa ufuni ku pinthu pya dziko mbatipwaza ulambiri wathu kwa Yahova.​—Lerini 1 Jwau 2:15, 16.

¹¹ Mwandimomwene, kufuna dziko kwakhuya Akristu anango a pyaka dzana yakutoma. Mwacitsandzo, Paulu alemba: “Dema andisiya thangwi iye afuna pinthu pya pantsi pano.” (2 Tim. 4:10) Bhibhlya nee isapangiza kuti ndi pinthu pipi pya dziko pidafuna Dema, mbapincitisa kusiya Paulu. Panango Dema akhadatoma kufuna pinthu pizinji pyakumanungo kupiringana pinthu pyauzimu. Khala ndi pyenepi, Dema aluza miyai yakutsandzayisa kakamwe yauzimu. Kodi pyenepi mbapidabweresa nkhombo kwa iye? Nkhabe. Kodi dziko mbidakwanisa kupasa Dema cinthu cakuti mbacidapiringana nkhombo zikhafuna kumpasa Yahova, ninga kukhala nyakuphedza wa Paulu?​—Mis. 10:22.

12. Ndi munjira zipi tinakwanisa kugwa mu nsampha wa ‘mphambvu yakunyengeza ya mpfuma’?

¹² Pyenepi pinakwanisa kucitikambo kwa ife. Ninga Akristu tiri na cifuno cadidi ca kutsalakana pinthu pyakumanungo, pya ife na pya banja yathu. (1 Tim. 5:8) Yahova asafuna kuti tikhale na umaso wadidi​—ndi na thangwi ineyi iye apasa Adhamu na Eva paradizu yakubalika toera kukhala mwenemu. (Gen. 2:9) Mbwenye Sathani anakwanisa kuyesera pifuno pyathu mu kuphatisira ‘mphambvu yakunyengeza ya mpfuma.’ (Mat. 13:22) Azinji asanyerezera kuti kobiri inaacitisa kukhala akutsandzaya peno kuti pinthu pyakumanungo ndi pfuli yakupembera. Manyerezero anewa ndi akunyengeza kakamwe, na anakwanisa kutiluzisa cinthu cakufunika kakamwe ciri na ife​—uxamwali wathu na Yahova. Yezu acenjeza atowereri ace: ‘Nkhabepo munthu anakwanisa kuphatira basa ambuya awiri, thangwi anadzatcinga m’bodzi mbadzafuna unango, peno anadzabvera m’bodzi mbanyoza unango. Munacimwana kukhala adzakazi a Mulungu na a Mpfuma.’ (Mat. 6:24) Tingakhala adzakazi a Mpfuma basi, tinasiya kutumikira Yahova, ndi pyenepi pinafuna Sathani kwa ife! Cipo tisafunika kutawirisa kuti kobiri peno pinthu pinagulwa na kobiri piikhe pangozwi uxamwali wathu na Yahova. Toera kuthimbana na Sathani, tisafunika kupitiriza kukhala na maonero akulinganira thangwi ya pinthu pyakumanungo.​—Lerini 1 Timoti 6:6-10.

KUCALIRA ULUKWALI

13. Kodi dziko isaphedzera tani maonero akuphonyeka thangwi ya banja na pyakupita m’mabonde?

¹³ Nsampha unango wa Sathani ndi ulukwali. Lero, azinji asanyerezera kuti kukhala wakukhulupirika m’banja peno kumanga banja, mphyakale kakamwe, pontho pisapingiza ufulu wawo. Mwacitsandzo, nkazi unango wakubvekera wakuti asacita pya matsendzo alonga: “Nkhabe kwanisika nkazi kukhala na mamuna m’bodzi peno mamuna kukhala na nkazi m’bodzi. Nkhabe munthu anadziwa ine wakuti ndi wakukhulupirika peno asafuna kukhala wakukhulupirika.” Mamuna unango anacitambo basa ibodzi ene alonga: “Ine nkhabe cinyindiro khala mphyacibaliro kukhala m’banja na munthu m’bodzi ene mu umaso onsene.” Sathani asakomerwa kakamwe angaona anthu akubvekera mbakapwaza muoni wa Mulungu wakumanga banja. Dyabo nee asapasa ntengo masasanyiro a banja, pontho nkhabe funa kuaona mbakafamba mwadidi. Toera kuwina pakuthimbana na Sathani, tisafunika kuona banja ninga munaionera Mulungu.

14, 15. Tinakwanisa tani kuthimbana na makhaliro aulukwali?

¹⁴ Mwakukhonda tsalakana khala ndife akumanga banja peno azice, tisafunika kuwangisira toera kucalira makhaliro onsene aulukwali. Kodi pyenepi mphyakukhonda nentsa? Nkhabe! Mwacitsandzo, khala ndimwe mphale peno ntsikana, panango munabva andzanu akuxikola mbalonga mwakugaya kuti asapita m’mabonde na munthu onsene anafuna iwo. Peno kutumizirana mphangwa na mafoto anapangiza pyaulukwali mu kuphatisira mitokodzi ya m’manja. M’madziko anango macitiro anewa asaoniwa ninga kutumizira munthu vidyu ya ucipezipezi ya mwanang’ono. Bhibhlya isalonga: ‘Anacita pya ulukwali asadawira manungo ace.’ (1 Akor. 6:18) Nyatwa na kufa pisaoneka thangwi yakumwazika kwa mautenda akuthaphulisana m’mabonde. Aphale na atsikana azinji adaluza umwali wawo mbadzati kumanga banja alonga kuti asatsumbikika na pidacita iwo. Ubalangazi wa dziko usatikulumiza toera kukhulupira kuti kuswa mitemo ya Mulungu nkhabe kubweresa nyatwa. Tingakhulupira uthambi unoyu tinapeuswa na ‘mphambvu yakunyengeza ya madawo.’​—Aheb. 3:13.

¹⁵ Khala musathimbana na mayesero toera kucita ulukwali, musafunika kucitanji? Dzindikirani kufewa kwanu. (Arom. 7:22, 23) Phembani mphambvu kwa Yahova. (Afil. 4:6, 7, 13) Calirani makhaliro akuti anakutsogolerani ku ulukwali. (Mis. 22:3) Mungaona mayesero, akhondeni mwakucimbiza.​—Gen. 39:12.

16. Yezu atawira tani mayesero a Sathani, na tinapfundzanji kubulukira ku citsandzo ceneci?

¹⁶ Yezu akhazikisa citsandzo cadidi kakamwe ca kucalira mayesero. Iye nee anyengezwa na muoni wa Sathani, pontho nee abvunga ndzidzi toera kunyerezera khala mbadatawira peno nkhabe muoni unoyu. Mbuto mwace, Yezu antawira mwakucimbiza: “Pyalembwa.” (Lerini Mateo 4:4-10.) Yezu akhadziwa Mafala a Mulungu, pyenepi pyamphedza toera kucita pinthu mwakucimbiza na kuphatisira malemba pakuthimbana na mayesero. Toera kuwina pakuthimbana na Sathani, nee tisafunika kutawirisa kugwa m’makhaliro aulukwali.​—1 Akor. 6:9, 10.

KUWINA KUBULUKIRA MU KUPIRIRA

17, 18. (a) Ndi misampha ipi inango inaphatisira Sathani, mphapo thangwi yanji nee isatidzudzumisa? (b) Ninji pinafuna kudzacitikirwa na Sathani, pyenepi pisakuwangisani tani toera kupirira?

¹⁷ Kudzikuza, kufuna mpfuma, na ulukwali ndi mitatu mwa misampha inaphatisira Sathani. Mbwenye iripo inango mizinji. Mwacitsandzo, Akristu anango asatcingwa na acibale awo, kusingirirwa na andzawo akuxikola, ngakhale kukhondeswa na mautongi basa yawo yakumwaza mphangwa. Nyatwa zenezi nee zisatidzudzumisa, thangwi Yezu acenjeza atowerere ace: ‘Imwe munadzatcingwa na anthu onsene thangwi ya dzina yanga. Mbwenye anapirira mpaka kunkhomo, anadzapulumuswa.’​—Mat. 10:22.

¹⁸ Tinakwanisa tani kuthimbana na Sathani mbatiwina? Yezu apanga anyakupfundzace: ‘Kubulukira mu kupirira kwanu munadzapulumusa umaso wanu.’ (Luka 21:19) Nkhabepo cinafuna kucita anthu cakuti cinadzationesa nyatwa kwenda na kwenda. Tingakhonda kutawirisa, nkhabe anafuna kwanisa kumalisa uxamwali wathu wakufunika kakamwe na Mulungu. (Arom. 8:38, 39) Ngakhale kuti atumiki a Yahova asafa, pyenepi nee pisabveka kuti Sathani akuwina, thangwi Yahova anadzaalamusa. (Jwau 5:28, 29) Munjira inango, Sathani nkhabe cidikhiro cadidi. Pakumala kufudzwa kwa makhaliro ano akuipa, Sathani anadzafungirwa n’djenje mu pyaka 1.000. (Apok. 20:1-3) Pakumala kwa Utongi wa Pyaka Cikwi wa Yezu, Sathani ‘anadzasudzulwa’ mu ndzidzi wakucepa toera kuyesera kupeusa anthu aungwiro. Buluka penepo, Dyabo anadzafudzwa. (Apok. 20:7-10) Sathani akudikhira kufudzwa, mbwenye imwe nkhabe! Khalani akuwanga mu cikhulupiro toera kuthimbana na Sathani. Imwe munakwanisa kuthimbana na Sathani mbamuwina!