‘Ineyi Ndi Njira Idakomerwa Na Imwe’

‘Imwe mwabisa pinthu pyenepi pamaso pa anyandzeru na anyakucenjera a pantsi pano, mbwenye mwapifokotozera anang’ono.’​—LUKA 10:21.

MUNATAWIRA TANI?

Ndi pitsandzo pipi pyacincino pinapangiza kuti Yahova asakomerwa na cipfundziso cakubveka mwadidi na cakukhonda nentsa?

Kodi njira inafokotozera ife pyakucitika pya Bhibhlya isacinja tani mwapang’ono pang’ono?

Kodi kubvesesa kwathu misangani ya Yezu kusathimizirika tani?

1. Ninji pidacitisa Yezu ‘kusekera pikulu pyene mwa nzimu wakucena’? (Onani cithundzithundzi cakutoma.)

NYEREZERANI kuti mukuona Yezu ‘mbakasekera pikulu pyene mwa nzimu wakucena’! Panango imwe munakwanisa kumuona mbakamwetulira, maso ace mbakayetimira na kukomerwa. Ninji pidancitisa kukhala wakutsandzaya? Iye akhadatuma anyakupfundzace 70 toera kumwaza mphangwa zadidi za Umambo wa Mulungu. Iye akhadzudzumika kakamwe kuti iwo mbadacita tani basa yawo. Iwo akhali na anyamalwa azinji a mphangwa zadidi. Anyamalwa anewa akhali amphambvu, ninga alembi na Afarisi akuti akhali akucenjera, pontho akhadapfundza kakamwe. Iwo akulumiza anthu azinji toera kuona Yezu ninga nyakusema matabwa basi na anyakupfundzace ninga ‘anthu akukhonda kupfundziswa pya mabukhu na pya xikola.’ (Mach. 4:13; Marko 6:3) Mbwenye anyakupfundza abwerera mwakutsandzaya kakamwe. Iwo amwaza mphangwa mwakukhonda kutsalakana mipingizo, ngakhale ya mademonyo! Thangwi yanji akhali akutsandzaya na acipapo?​—Lerini Luka 10:1, 17-21.

2. (a) Ndi munjira ipi anyakupfundza a Yezu akhali ninga anang’ono? (b) Ninji pidaphedza atowereri a Yezu toera kubvesesa undimomwene wakuzika wa Bhibhlya?

² Onani pidalonga Yezu kuna Yahova: ‘Baba wakudzulu na wa pantsi pano, ndinakusimbani thangwi mwabisira ipi anyakudziwisa na anyakucenjera, mbwenye mwapifokotozera anang’ono. Ande Baba, thangwi ineyi ndi njira idakomerwa na imwe.’ (Mat. 11:25, 26) Mwandimomwene Yezu nee akhafuna kulonga kuti anyakupfundzace akhali anang’ono. Mbuto mwace, iye akhadziwa kuti iwo akhali ninga anang’ono mu kulandaniswa na anyakudziwisa na anyakupfundza kakamwe a dziko, akuti akhapangizika okhene ninga audziwisi. Cakufunika kakamwe, Yezu apfundzisa atowereri ace toera kukhala ninga anang’ono, mbapitiriza kukhala akucepeseka na kutawira kupfundziswa. (Mat. 18:1-4) Kodi iwo aphindula tani thangwi yakukhala akucepeseka? Mu kuphatisira nzimu wakucena, Yahova aaphedza toera kubvesesa undimomwene wakuzika wa Bhibhlya, mbwenye ale akhaapwaza apitiriza kuphophwa maso na Sathani na kudzikuza kwawo.

3. Ninji pinafuna kudzadinga ife mu nsolo uno?

³ Mwandimomwene Yezu akomerwa kakamwe! Iye akomerwa kakamwe kuona kuti Yahova akhapangiza undimomwene wakuzika wa Bhibhlya kwa anthu akucepeseka a mitundu yonsene, mwakukhonda tsalakana kupfundza kwawo peno maluso awo. Iye akhali wakutsandzaya thangwi Babace akhakomerwa na njira ineyi yakupfundzisa. Kodi Yahova acinja? Ninji pinapangiza kuti iye asapitiriza kukomerwa na njira ineyi yakupfundzisa? Munadinga ife ntawiro wa mbvundzo unoyu, tinadzakhala akutsandzaya kakamwe ninga pidacita Yezu.

KUFOKOTOZA UNDIMOMWENE WAKUZIKA KWA ANTHU ONSENE

4. Ndi munjira zipi revista ya Ncenjezi yakukhonda nentsa kubvesesa isapangiza kukhala muoni waufuni?

⁴ Mu pyaka pyacincino, cipfundziso cauzimu cinaperekwa na gulu ya Yahova cisabveka mwadidi munjira yakukhonda nentsa. Dingani pitsandzo pitatu. Cakutoma ndi revista ya Ncenjezi n’Cizungu yakulembwa munjira yakukhonda nentsa kubvesesa.a Revista ineyi ndi muoni kwa ale ananentseka na cilongero peno kunentseka na kuleri. Misolo ya banja asaona kuti cincino anawo asakwanisa kubvesesa na kutawira pa pfundziro ya Ncenjezi, yakuti ndi njira ikulu toera kutambira cakudya cathu cauzimu. Anthu azinji alemba matsamba akupereka takhuta na ntima onsene. Mulongo unango alemba kuti iye akhagopa kutawira pa pfundziro ya Ncenjezi. Iye alonga “Ine ndikhali na manyadzo kakamwe.” Mbwenye cincino nkhabebve! Pidatoma iye kuphatisira Ncenjezi wakukhonda nentsa kubvesesa, iye alemba: “Cincino ndisatawira kazinji kene, pontho kugopa kwamala! Ndisapereka takhuta kuna Yahova na kuna imwe.”

5. Ndi api maphindu mangasi a Bhibhlya yakusasanyirwa papswa ya Tradução do Novo Mundo das Escrituras Sagradas?

⁵ Caciwiri ndi Bhibhlya yakusasanyirwa papswa ya Tradução do Novo Mundo das Escrituras Sagradas idabuluswa n’Cingerezi pa nsonkhano wa caka pa ntsiku ya 5 ya Malandalupya ya caka 2013.b Malemba mazinji cincino asaphatisira mafala akucepa, mbwenye mabvekero ndi mabodzi ene, pontho asabveka kakamwe. Mwacitsandzo, lemba ya Yobe 10:1 ikhali na mafala 27, cincino iri na mafala 19; lemba ya Misangani 8:6 ikhali na mafala 20 cincino iri na mafala 13. Mavesi anewa asabveka mwadidi m’Bhibhlya yakusasanyirwa papswa. M’bale m’bodzi wakudzodzwa wakuti asatumikira Yahova mwakukhulupirika mu pyaka pizinji alonga: “Ndaleri bukhu ya Yobe m’Bhibhlya yakusasanyirwa papswa, mbwenye ndisabva ninga ndikutoma kwene kuibvesesa!” Azinji alongambo pibodzi pyene.

6. Ndi api mabvero anu thangwi ya kubvesesa kwathu kupswa kwa Mateo 24:45-47?

⁶ Cacitatu, dingani kubvesesa kwathu kupswa kungasi. Mwacitsandzo, kubvesesa kwathu kupswa thangwi ya ‘m’bandazi wakukhulupirika na wandzeru’ kudafokotozwa mu A Sentinela ya 15 de Julho de 2013 kwatitsandzayisa kakamwe. (Mat. 24:45-47, Mphangwa Zadidi) Kwafokotozwa kuti m’bandazi wakukhulupirika ndi Mathubo Akutonga, ‘anyabasa ace apanyumba’ ndi ale onsene anadyeswa mwauzimu, mwakukhonda kutsalakana khala ndi akudzodzwa peno a “mabira anango.” (Jwau 10:16) Tisakomerwa kakamwe kupfundza undimomwene unoyu na kuupfundzisambo anango! Ninji pontho pinapangiza kuti Yahova asakomerwa na cipfundziso cakubveka mwadidi munjira yakukhonda nentsa?

MAFOKOTOZERO AKUKHONDA NENTSA KAKAMWE A MBIRI ZA BHIBHLYA

7, 8. Ndi pitsandzo pipi pingasi pya mbiri za Bhibhlya pyakuti pisaphiphirisa pinthu pya ntsogolo?

⁷ Khala musatumikira Yahova mu pyaka pizinji, panango mwaona kucinja kwa njira inafokotozera mabukhu athu mbiri zizinji za Bhibhlya. Munjira yanji? Kale, kazinji kene mabukhu athu akhaphatisira kakamwe mafala akuti ciphiphiriso na cinaphiphiriswa toera kufokotoza mbiri za Bhibhlya. Mbiri ya Bhibhlya ikhaoniwa ninga ciphiphiriso, kukwanirisika konsene kwa profesiya ya mbiri ineyi kukhaoniwa ninga cinaphiphiriswa. Kodi pana mathangwi adidi toera kufokotoza mbiri za Bhibhlya munjira ineyi? Inde. Mwacitsandzo, Yezu alonga pya ‘cidzindikiro ca mprofeta Yona.’ (Lerini Mateo 12:39, 40.) Yezu afokotoza kuti ndzidzi udamala Yona m’mimba mwa ntsomba ukhaphiphirisa ndzidzi ukhafuna kumala iye mu nthumbi.

⁸ Bhibhlya iri na mbiri zinango zinaphiphirisa kukwanirisika kwa maprofesiya a ntsogolo. Mpostolo Paulu alonga mazinji a iwo. Mwacitsandzo, kumanga banja kudacita Abrahamu na Agare na Sara kwaphiphirisa cibverano ca Yahova na dzindza ya Israele na khundu yakudzulu ya gulu ya Mulungu. (Agal. 4:22-26) Munjira ibodzi ene, tabernakulu na templo, Ntsiku Yakuphimbira Madawo, nyantsembe wankulu, na makhundu anango a Mwambo wa Mose pikhali ‘cithundzithundzi ca pinthu pikhafuna kuoneka ntsogolo.’ (Aheb. 9:23-25, 10:1) Kupfundza mbiri zenezi za maprofesiya na kukwanirisika kwazo kusawangisa cikhulupiro cathu. Kodi pyenepi pisabveka kuti anthu onsene, mbiri zonsene na pinthu pyonsene pidalembwa m’Bhibhlya pisaphiphirisa munthu peno cinthu?

9. Kodi mbiri inalonga pya Nabote ikhafokotozwa tani kale?

⁹ Kale mabukhu athu akhaphatisira kakamwe njira ineyi toera kufokotoza mbiri za Bhibhlya. Mwacitsandzo dingani mbiri ya Nabote, wakuti kutcingwa na kuphiwa kwace kwatsogolerwa na Nyankhoda Yezabele toera mamunace Akabu akwanise kukwata munda wa mauva wa Nabote. (1 Am. 21:1-16) Mu caka 1932, mbiri ineyi yafokotozwa ninga profesiya. Akabu na Yezabele alongwa kuti akhaphiphirisa Sathani na onsene anamphedzera; Nabote akhaphiphirisa Yezu; pontho kufa kwace kukhaphiphirisa kuphiwa kwa Yezu. Mbwenye mu caka 1961, bukhu yakuti “Santificado Seja o Teu Nome,” yalonga kuti Nabote akhaphiphirisa Akristu akudzodzwa, mbwenye Yezabele akhaphiphirisa Cikristu Caunthawatawa. Natenepa kutcingwa kwa Nabote na Yezabele kukhaphiphirisa kutcingwa kwa Akristu akudzodzwa mu ntsiku zakumalisa. Mu pyaka pizinji atumiki a Mulungu akhaona kuti mbiri ineyi ikhawangisa cikhulupiro cawo. Mphapo thangwi yanji mafokotozero anewa acinja?

10. (a) Ndi munjira ipi m’bandazi wakukhulupirika asapangiza luso pakufokotoza mbiri za Bhibhlya? (b) Kodi lero mabukhu athu kazinji kene asagomezeranji?

¹⁰ Ninga pikhadikhira ife, mu pyaka pizinji Yahova asaphedza ‘m’bandazi wakukhulupirika na wandzeru’ toera kupitiriza kukhala waluso kakamwe. Lero m’bandazi asalonga kuti mbiri ya Bhibhlya isaphiphirisa cinthu basi ene khala ali na mathangwi adidi akubverana na Bhibhlya anapangiza pyenepi. Kusiyapo pyenepi, pisaoneka kuti mafokotozero mazinji akale analonga pya ciphiphiriso na cinaphiphiriswa asanentsa kakamwe kuabvesesa. Unyomonyomo wa mphangwa ninga​—ngana asaphiphirisa ngana pontho thangwi yanji—​pikhanentsa kupibvesesa, kupikumbukira na kupiphatisira. Mbwenye cakudzudzumisa kakamwe ndi cakuti ntsonga zikulu za mbiri zenezi za Bhibhlya zikhaphimbirwa peno zikhaluzika thangwi yakusaka pinthu pikhaphiphirisa izo. Natenepa, lero mabukhu athu asagomezera kakamwe ntsonga zikulu za cikhulupiro, kupirira, kuperekeka na makhaliro anango akufunika kakamwe anapfundza ife m’mbiri za Bhibhlya.c

11. (a) Kodi cincino tisabvesesa tani mbiri ya Nabote? Thangwi yanji citsandzo cace ndi cakuwangisa kwa ife? (b) Thangwi yanji mabukhu athu lero nee asagomezera kakamwe pya ciphiphiriso na cinaphiphiriswa? (Onani “Mibvundzo Inacitwa Na Anyakuleri” mu revista ino.)

¹¹ Cincino mbiri ya Nabote tisaibvesesa mwadidi kakamwe pontho munjira yakukhonda nentsa. Mamuna unoyu wakulungama afa, tayu thangwi akhaphiphirisa Yezu peno Akristu akudzodzwa, mbwenye thangwi iye akhafuna kupitiriza kukhala wakukhulupirika kuna Mulungu. Iye apitiriza kubvera Mwambo wa Yahova mwakukhonda tsalakana kutcingwa na atongi akuipa. (Num. 36:7; 1 Am. 21:3) Citsandzo ca Nabote cisawangisa atumiki onsene a Mulungu akuti panango anatcingwambo thangwi yakubvera mitemo ya Mulungu. (Lerini 2 Timoti 3:12.) Akristu onsene anakwanisa kubvesesa, kukumbukira, na kuphatisira ntsonga ineyi yakuwangisa cikhulupiro.

12. (a) Kodi tisafunika kucalira kunyerezeranji thangwi ya mbiri za Bhibhlya? (b) Thangwi yanji tisakwanisa kubvesesa mafokotozero a pinthu pyakuzika pya m’Bhibhlya? (Onani cidzindikiro capantsi.)

¹² Kodi nkhubveka kuti mbiri za Bhibhlya nkhabebve mabvekero anango kusiyapo ntsonga zikulu? Nkhabe. Lero, mabukhu athu asagomezera kakamwe kuti mbiri ya Bhibhlya ndi cenjezo kwa ife, peno isabverana tani na inango. Mwacitsandzo, tinakwanisa kulonga mwakulinganira kuti kukhulupirika kwa Nabote mwakukhonda tsalakana kutcingwa, kusatikumbusa kukhulupirika kwa Yezu na kwa Akristu akudzodzwa. Mbwenye mbiri ineyi isatikumbusambo kukhulupirika kwa “mabira anango” a Yezu. Pyenepi pisapangiza kuti Yahova asatipfundzisa munjira yakukhonda nentsa kubvesesa.d

MAFOKOTOZERO AKUKHONDA NENTSA KAKAMWE A MISANGANI YA YEZU

13. Ndi pitsandzo pipi pinapangiza kuti cincino tisafokotoza misangani ya Yezu munjira yakukhonda nentsa kubvesesa?

¹³ Yezu Kristu ndi Mpfundzisi wankulu kakamwe kupiringana onsene adakhala pa dziko yapantsi. Ibodzi mwa njira zikhakomerwa na iye kakamwe pakupfundzisa ndi misangani. (Mat. 13:34) Misangani isaphedza munthu toera kunyerezera na kukhuya ntima wace. Mu pyaka pizinji, mabukhu athu asafokotozambo misangani ya Yezu munjira yakukhonda nentsa kubvesesa. Kodi nee takomerwa thangwi yakubvesesa mwadidi misangani ya Yezu idafokotozwa mu A Sentinela ya 15 de Julho de 2008 inalonga pya mbeu ya mostarda, pyakutupisa, na pya kokota? Cincino tisabvesesa mwadidi kuti misangani ineyi isatipfundzisa pya Umambo wa Mulungu na kugumanyizwa kwa atowereri andimomwene a Kristu mu dziko ino yakuipa.

14. (a) Kodi kale tikhafokotoza tani nsangani wa Nsamariya? (b) Kodi lero tisabvesesa tani nsangani wa Yezu?

¹⁴ Tinakwanisa tani kubvesesa mwadidi misangani idalonga Yezu? Misangani inango ndi yakuphiphirisa, pontho isalonga pinthu pyantsogolo; inango isagomezera ntsonga zakuti tinakwanisa kuziphatisira. Mphapo, tinakwanisa tani kuidzindikira? Ntawiro usabveka mwadidi mukupita kwa pyaka. Mwacitsandzo, onani njira ikhafokotozera ife nsangani wa Yezu unalonga pya Nsamariya. (Luka 10:30-37) Mu caka 1924 Ncenjezi walonga kuti Nsamariya asaphiphirisa Yezu; nseu unabuluka ku Yerusalemu kuenda ku Yeriko wakuti ndi njira ya materero, usaphiphirisa kunyanya kwa makhaliro a anthu kubulukira pa upanduki wa mu Edeni; mapanga a mu nseu asaphiphirisa makomponi makulu na anyamalonda aumbirimi; mbwenye nyantsembe na Mulevi asaphiphirisa Cikristu Caunthawatawa. Lero, mabukhu athu asaphatisira nsangani unoyu toera kukumbusa Akristu onsene kuti nee tisafunika kukhala a tsankhu pakuphedza ale anafuna ciphedzo, makamaka cauzimu. Tisakomerwa kakamwe kuona kuti Yahova asatipfundzisa munjira yakukhonda nentsa kubvesesa.

15. Ninji pinafuna kudzadinga ife mu nsolo unatowerera?

¹⁵ Mu nsolo unatowerera tinadzadinga nsangani unango wa Yezu unalonga pya amiyali khumi. (Mat. 25:1-13) Kodi Yezu akhafuna kuti atowereri ace abvesese tani nsangani unoyu mu ntsiku zino zakumalisa? Kodi anthu onsene, cinthu consene na pyakucitika pyonsene pya nsangani unoyu pisaphiphirisa pinthu pikulu pya ntsogolo? Peno Yezu akhafuna kuti atowereri ace aphatisire ntsonga za nsangani unoyu toera kuatsogolera mu ntsiku zakumalisa? Tendeni tione.

[Pidzindikiro pyapantsi]