‘Babilonya Wankulu’ Ndi Ninji?

BUKHU ya Apokalipse iri na mafala akuti ali na mabvekero akuphipirisa. (Apokalipse 1:1) Mwacitsandzo, isalonga pya nkazi wakuti pa nkhope pace palembwa dzina yakuti ‘Babilonya Wankulu.’ Nkazi unoyu asalongwa kuti akhala pa ‘mwinji wa anthu na mitundu ya anthu.’ (Apokalipse 17:1, 5, 15) Nakuti nkhabe nkazi wandimomwene anakwanisa kucita pyenepi, Babilonya Wankulu ndi wakuphipirisa. Kodi nkazi waupombo unoyu wakuphipirisa asaimiriranji?

Pa Apokalipse 17:18, nkazi m’bodzi ene wakuphipirisa asafokotozwa ninga ‘nzinda ukulu, unatonga amambo onsene a pantsi pano.’ Fala yakuti “nzinda” isapangiza nsoka wakuphatana wa anthu. Nakuti ‘nzinda unoyu ukulu’ usatonga ‘amambo onsene a pantsi pano,’ nkazi wakucemerwa Babilonya Wankulu anakwanisa kukhala nsoka ukulu unaphataniza madziko onsene. Nsoka unoyu wathema kucemerwa utongi wa dziko yonsene. Kodi ndi utongi wa ntundu wanji? Utongi wauphemberi. Onani kuti makhundu anango a bukhu ya Apokalipse asatitsogolera tani ku manyerezero anewa.

Utongi unakwanisa kukhala wandale, wamalonda, peno wauphemberi. Nkazi unoyu anacemerwa Babilonya Wankulu si utongi wandale tayu, thangwi Mafala a Mulungu asalonga kuti ‘amambo onsene a pantsi pano,’ peno piwalo pyandale pya dziko ino, ‘pyacita upombo’ na iye. Iye asacita upombo wace mukucita cibverano na atongi a dziko ino yapantsi, na asacita pyonsene toera kuatonga. Na thangwi ineyi, iye asacemerwa ‘nkazi wa upombo.’​—Apokalipse 17:1, 2; Tyago 4:4.

Babilonya Wankulu si utongi wamalonda tayu thangwi “anyamalonda a pantsi ponsene,” anaimirira piwalo pyamalonda, anadzalira pa ndzidzi wakufudzwa kwace. Pontho, amambo na anyamalonda asafokotozwa ninga akuyang’ana Babilonya Wankulu na “kutali.” (Apokalipse 18:3, 9, 10, 15-17) Natenepa, pyathema kulongwa kuti Babilonya Wankulu si utongi wandale peno utongi wamalonda tayu, mbwenye utongi wauphemberi.

Cidzindikiro cakuti Babilonya Wankulu ndi utongi wauphemberi cisagomezerwa na mafala akuti iye asanyengeta madziko onsene kubulukira ku mabasa ace a “ufiti.” (Apokalipse 18:23) Nakuti mitundu yonsene yakukhulupira mizimu isaphedzerwa na mauphemberi pontho na mademonyo, nkhabe dzumisa kudziwa kuti Bhibhlya isacemera Babilonya Wankulu kuti ndi “mbuto munakhala mademonyo.” (Apokalipse 18:2; Deuteronomyo 18:10-12) Utongi unoyu usafokotozwambo kuti usapingiza kakamwe uphemberi wandimomwene, mbutcinga ‘alongeri peno aprofeta’ na ‘anthu akucena.’ (Apokalipse 18:24) Mwandimomwene, Babilonya Wankulu asaida kakamwe uphemberi wandimomwene kwakuti asautcinga mwamphambvu na kupha “amboni a Yezu.” (Apokalipse 17:6) Natenepa, nkazi unoyu wakucemerwa Babilonya Wankulu mwapakweca asaimirira umambo wa dziko yonsene wauphemberi waunthawatawa, unaphataniza mauphemberi onsene anakhonda Yahova Mulungu.