‘Cipulumuso Canu Ciri Cifupi’!

‘Khalani dzololo mbamulamusa misolo yanu, thangwi cipulumuso canu ciri cifupi.’​—LUKA 21:28.

NYIMBO: 133, 43

MUNATAWIRA TANI?

Ndi pinthu pipi pyakulandana na pya mu caka 66 N.W, pinafuna kuona ife mwakukhonda dembuka?

Ndi ndzidzi upi wa mayesero unafuna kuoneka pakumala kufudzwa kwa ‘Bhabhilonya Wankulu’?

Ndi basa ipi yakugumanya inalongwa pa Mateo 24:31?

1. Ndi pinthu pipi pidacitika mu caka 66 N.W.? (Onani cithundzithundzi cakutoma.)

NYEREZERANI kuti ndimwe Nkristu mukukhala mu Yerusalemu mu caka 66 N.W. Pinthu pizinji pikucitika. Pakutoma, ntongi Waciroma Floro akwata matalento 17 m’mbuto inakoyerwa kobiri mu templo. Mwakucimbiza Ayuda aipirwa mbapha anyankhondo Aciroma mbakhonda kubvera utongi Waciroma. Mbwenye Aroma aabwerezera mwakucimbiza. Mu nthanda zitatu, anyankhondo akukwana 30.000 afika ku Yerusalemu mu kutsogolerwa na ntongi Waciroma Céstio Galo wa ku Sirya. Mwakukhonda dembuka, anyankhondo anewa afudza pisa pinango pya nkhundu mwa Yerusalemu. Ayuda akupanduka abwerera nduli mbasaka citsidzikizo nkati mwa mpanda wa templo. Buluka penepo, anyankhondo Aciroma atoma kufudza mpanda wakunja kwa templo! Anthu onsene mu nzinda akugopa. Mbamudapibva tani khala mukuona pinthu pyenepi mbapicitika?

2. Kodi Akristu a caka 66 N.W. akhafunika kucitanji, mphapo akwanisa tani kucita pyenepi?

² Mwakukhonda penula imwe musakumbuka mafala a Yezu anagumanika mu Evanjelyu ya Luka: ‘Mungaona nzinda wa Yerusalemu mbuzungulirwa na nsoka wa anyankhondo, penepo dziwani kuti uli dhuzi na kufudzwa. Penepale anthu a mu Yudeya athawire ku mapiri, ale ali mu nzinda abuluke, ale ali kunja aleke kupitamo.’ (Luka 21:20, 21) Kodi Akristu mbadakwanisa tani kubvera pitsogolero pya Yezu mbabuluka mu nzinda wa Yerusalemu wakuti ukhadazungulirwa na anyankhondo? Buluka penepo, cinthu cakudzumatirisa cacitika. Anyankhondo Aciroma atoma kubwerera! Ninga mukhadalonga Yezu, kupomokera kwawo ‘kwadzacepeswa.’ (Mat. 24:22) Natenepa, unoyu ukhali mwai kwa iwo toera kubvera citsogolero ca Yezu ca kuthawira ku mapiri ku ntunda unango wa Nkulo wa Yordane.a Buluka penepo mu caka 70 N.W., anyankhondo apswa Aciroma abwerera pontho ku Yerusalemu mbafudza nzinda. Mbwenye ale onsene adabvera pitsogolero pya Yezu apulumuswa.

3. Ndi pinthu pipi pinafuna kuthimbana na Akristu mwakukhonda dembuka? Ninji pinafuna ife kudinga mu nsolo uno?

³ Mwakukhonda dembuka, m’bodzi na m’bodzi wa ife anadzathimbana na makhaliro mabodzi ene. Yezu nee acenjeza basi ene Akristu thangwi yakufudzwa kwa Yerusalemu, mbwenye aphatirisirambo pidacitika mu pyaka dzana yakutoma toera kulandanisa na pinthu pinafuna kucitika ‘nyatwa ikulu’ ingatoma. (Mat. 24:3, 21, 29) Mbwenye mphangwa zadidi ndi zakuti, ‘mwinji ukulu’ wa anthu unadzapulumuka pakufudzwa kwa dziko ino yakuipa. (Lerini Apokalipse 7:9, 13, 14.) Kodi Bhibhlya isalonganji thangwi ya pinthu pyenepi pinafuna kucitika? Tisafunika kudziwa ntawiro, thangwi pyenepi pisaphataniza cipulumuso cathu. Cincino tendeni tidinge unyomonyomo unalonga kuti pinthu pyenepi pya ntsogolo pinadzatikhuya tani.

KUTOMA KWA NYATWA IKULU

4. Ninji cinafuna kutomesa nyatwa ikulu, mphapo inadzatoma tani?

⁴ Kodi nyatwa ikulu inadzatoma tani? Bukhu ya Apokalipse isafokotoza kufudzwa kwa ‘Bhabhilonya Wankulu.’ (Apok. 17:5-7) Bhibhlya isalandanisa mauphemberi onsene aunthawatawa na nkazi waupombo. Thangwi yanji? Thangwi atsogoleri awo nee asapangiza kukhulupirika kwa Mulungu. Mbuto mwakuphedzera Yezu na Umambo wace, iwo asaphedzera mautongi a anthu mbapwaza midida Yacikristu toera kubverwa na anyandale. Ulambiri wawo ndi wakusiyana kakamwe na ulambiri wakucena wa Akristu akudzodzwa. (2 Akor. 11:2; Tgo. 1:27; Apok. 14:4) Mphapo mbani anafuna kufudza Bhabhilonya Wankulu? Yahova Mulungu anadzaikha ‘ndzeru zace’ m’mitima ya “nyanga khumi” za ‘cinyama cakufuwira.’ Nyanga zenezi zisaimirira misoka yonsene ya ndale inaphedzera nsoka wa Nações Unidas, wakuti usaphiphiriswa na ‘cinyama cakufuwira.’​—Lerini Apokalipse 17:3, 16-18.

5, 6. Thangwi yanji tisalonga kuti kufudzwa kwa Bhabhilonya Wankulu nee kusabveka kuphiwa kwa anthu onsene a mauphemberi?

⁵ Kodi anthu onsene a mauphemberi aunthawatawa anadzaphiwa pakufudzwa kwa Bhabhilonya Wankulu? Panango nkhabe. Mprofeta Zakariya apumirwa toera kulemba pya ndzidzi unoyu. Mukulonga pya munthu wakuti akhacita khundu ya ulambiri waunthawatawa, Bhibhlya isalonga: “Iye anadzalonga ‘Ine sine mprofeta tayu, ndine nyakulima basi kutomera uphale wanga.’ Munthu angambvundza, ‘Ndi pironda pyanji pyenepi piri m’mapewa mwako?’ Iye anadzatawira, ‘Ndaphekeka kunyumba kwa xamwali wanga.’” (Zak. 13:4-6) Natenepa, pisaoneka kuti atsogoleri anango a mauphemberi anadzasiya uphemberi wawo mbakhonda kuti cipo acita khundu ya mauphemberi anewa aunthawatawa.

⁶ Ninji pinafuna kucitikira atumiki a Mulungu pa ndzidzi unoyu? Yezu alonga: ‘Ntsiku zire mbazidakhonda kucepeswa, nee munthu m’bodzi mbadakwanisa kupulumuka, mbwenye thangwi ya anthu adasankhuliwa zinadzacepeswa.’ (Mat. 24:22) Ninga pidadinga ife, mu caka 66 N.W nyatwa ‘zikhadacepeswa.’ Pyenepi pyacitisa “anthu adasankhuliwa,” Akristu akudzodzwa toera kuthawa mu nzinda na mu pisa pya cifupi. Munjira ibodzi ene, khundu yakutoma ya nyatwa ikulu ‘inadzacepeswa’ thangwi ya “anthu adasankhuliwa.” Misoka ya ndale inaimirirwa na “nyanga khumi” nkhabe kudzatawiriswa toera kufudza atumiki a Mulungu. Mbuto mwace, unadzaoneka ndzidzi wakucepa wa upfuliki.

NDZIDZI WA MAYESERO NA WAKUTONGWA

7, 8. Ndi mwai upi unafuna kuoneka pakumala kufudzwa kwa mauphemberi aunthawatawa? Kodi atumiki akukhulupirika a Mulungu anadzakhala tani akusiyana na anango mu ndzidzi unoyu?

⁷ Ninji pinafuna kucitika pakumala kufudzwa kwa misoka ya mauphemberi authambi? Unoyu unakhala ndzidzi toera kupangiza kuti mwandimomwene ninji piri muntima mwathu. Azinji anadzathawira m’misoka ya anthu inalandaniswa na ‘miyala mikulu ya mapiri.’ (Apok. 6:15-17) Mbwenye atumiki a Mulungu anadzathawira ku mbuto yakuphiphirisa inafuna kupereka Yahova. Mu pyaka dzana yakutoma, pidabuluka anyankhondo Aciroma, nee ukhali ndzidzi toera Ayuda azinji atawire Cikristu. Mbwenye ukhali ndzidzi toera Akristu abvere pitsogolero pya Yezu mbabuluka mu Yerusalemu. Munjira ibodzi ene, nee tisadikhira kuti pa kugwandirwa kwa nyatwa ikulu anthu azinji anadzatawira undimomwene. Mbuto mwace, unoyu unadzakhala ndzidzi toera Akristu onsene andimomwene apangize ufuni wawo kuna Yahova na kuphedzera abale a Kristu.​—Mat. 25:34-40.

⁸ Maseze nee tisadziwa pyonsene pinafuna kucitika pa ndzidzi unoyu wa mayesero, ife tisadikhira kuti tinadzaluza pinthu pyathu pinango. Mu pyaka dzana yakutoma, Akristu asiya nyumba na pinthu pyawo mbapirira nyatwa toera kupulumuka. (Marko 13:15-18) Bvundzikani: ‘Ndinadzakhala dzololo toera kuluza pinthu pyanga? Ndinadzacita pyonsene pinafunika toera kupangiza kukhulupirika kwanga kuna Yahova?’ Nyerezerani basi! Mu ndzidzi unoyu, ndife basi anafuna kudzatowezera citsandzo ca mprofeta Dhanyeli mu kupitiriza kulambira Mulungu wathu mwakukhonda tsalakana pinafuna kucitika.​—Dan. 6:10, 11.

9, 10. (a) Ndi mphangwa zipi zinafuna kumwaza atumiki a Mulungu mu ndzidzi wa nyatwa ikulu? (b) Anyamalwa a atumiki a Mulungu anadzacitanji?

⁹ Unoyu nee unadzakhala ndzidzi toera ‘kumwaza mphangwa zadidi za Umambo.’ Thangwi ndzidzi wakucita basa ineyi unadzamala. Unoyu unadzakhala ndzidzi ‘wakumalisa’! (Mat. 24:14) Mwakukhonda penula atumiki a Mulungu anadzamwaza mwaphinga mphangwa za kutongwa kwakuti kunadzakhuya anthu onsene. Mphangwa zenezi panango zinadzaphataniza kulonga kuti dziko yakuipa ya Sathani iri dhuzi na kufudzwa. Bhibhlya isalandanisa mphangwa zenezi na matalala munalonga iyo kuti: ‘Agwambo matalala makulu kakamwe, akulemera ninga makilu makumanai, mbagwera anthu. Penepale anthu axola Mulungu, thangwi ya miliri ya matalala makulu kakamwe.’​—Apok. 16:21.

¹⁰ Anyamalwa athu anadzabva mphangwa zenezi za mphambvu. Yahova apumira mprofeta Ezekyele toera kufokotoza pinafuna kucita Goge wa Magoge, wakuti asaimirira kuphatana kwa madzindza a anthu: ‘Ipi ndipyo pidalonga Yahova: ‘Pa ntsiku ineyi unadzanyerezera pyakuipa pizinji. Unadzalonga kuti: ‘Ndinadzapomokera dziko yakusowa malinga a citsidzikizo. Ndinadzaenda kapomokera anthu anakhala mwenemu mwakupfulika na mwantendere nee kutsidzikizwa na mipanda nee mipiringanyo ya utale.’ Ndinatapata anthu awa, ndinapita m’madembe adamangwa papswa na anthu adagumanywa papswa kubulukira ku madzindza onsene mbakhala pontho na pifuyo na upfumi pakati pa dziko.’’ (Ezek. 38:10-12) Mwauzimu, atumiki a Mulungu anadzakhala akusiyana na onsene ninga kuti ‘ali pakati pa dziko.’ Madzindza a anthu anadzaipirwa na pyenepi. Inde, iwo anadzafuna kakamwe kupomokera anyakudzodzwa a Yahova kuphatanizambo ale anaaphedzera.

11. (a) Ninji pisafunika ife kukumbuka thangwi ya ndzidzi unafuna kucitika pinthu pa nyatwa ikulu? (b) Kodi anthu anadzacitanji angaona pidzindikiro pya kudzulu?

¹¹ Munadinga ife pinafuna kucitika patsogolo, tisafunika kukumbuka kuti Bhibhlya nkhabe kupangiza ndzidzi unafuna kucitika cibodzi na cibodzi. Mbwenye pinthu pinango pinadzacitika mu ndzidzi ubodzi ene. Yezu alonga mu profesiya yace thangwi ya kumala kwa makhaliro ano a pinthu: ‘Pinadzaoneka pidzindikiro pa dzuwa, pa mwezi na pa nyenyezi. Pontho pa dziko yapantsi anthu anadzagopa mbatetemera thangwi ya kutitima kwa bara na mabimbi ace. Anthu anadzauma na kugopa, pa kudikhira pinthu pinafuna kudza pa dziko yapantsi, thangwi mphambvu za kudzulu zinadzatekenyeka. Buluka penepo, anthu anadzaona Mwana munthu ali kudza na mphambvu na mbiri ikulu m’makole.’ (Luka 21:25-27; lerini Marko 13:24-26.) Kodi kukwanirisika kwa profesiya ineyi kunaphataniza pidzindikiro pyakugopswa kudzulu? Tisafunika tidikhire toera kuona. Mbwenye munjira zonsene, pidzindikiro pinadzacitisa anyamalwa a Mulungu kugopa mbatetemera.

12, 13. (a) Ninji pinafuna kucitika Yezu angabwera ‘na mphambvu na mbiri ikulu’? (b) Kodi atumiki a Mulungu anadzacitanji pa ndzidzi unoyu?

¹² Ninji pinafuna kucitika Yezu angabwera ‘na mphambvu na mbiri ikulu’? Anadzapasa nkhombo anthu akukhulupirika na kutcinyusa ale akuti nee ndi akukhulupirika. (Mat. 24:46, 47, 50, 51; 25:19, 28-30) Yezu aphatisira nsangani wa mabira na mbuzi toera kufokotoza pyenepi. Iye alonga: ‘Mwana wa munthu angabwera na mbiri yace pabodzi na aanju ace onsene, anadzakhala pa mpando wace wa mbiri. Penepo anthu a mitundu yonsene anadzagumanywa pamaso pace. Iyembo anadzaapambula ninga munapambulira nkumbizi mabira na mbuzi. Anadzaikha mabira kunkono wace wa madyo, mbuzi kunkono wace wabzwere.’ (Mat. 25:31-33) Ninji pinafuna kucitikira mabira na mbuzi? Nsangani usamalisira na mafala akuti: ‘Mbuzi peno anthu akukhonda khulupirika anadzafudzwa. Mbwenye mabira peno anthu akukhulupirika anadzatambira umaso wakukhonda mala.’​—Mat.  25:46.

¹³ Kodi anthu anewa anadzacitanji angadziwa kuti anadzafudzwa? Iwo “anadzadhima pacifuwa thangwi yakutsukwala.” (Mat. 24:30, Tradução do Novo Mundo) Mphapo abale a Kristu pabodzi na andzawo anaaphedzera anadzacitanji pa ndzidzi unoyu? Mu kukhulupira Yahova na Mwanace, Yezu Kristu, iwo anadzacita pidalonga Yezu: ‘Ipi pingatoma kucitika, khalani dzololo mbamulamusa misolo yanu, thangwi cipulumuso canu ciri cifupi.’ (Luka 21:28) Inde, ife tinadzakhala na maonero akulinganira na cinyindiro cakupulumuswa.

KUYETIMIRA KAKAMWE MU UMAMBO

14, 15. Ndi basa ipi yakugumanya inafuna kucitika kupomokera kwa Goge wa Magoge kungatoma, pontho basa ineyi isaphatanizanji?

¹⁴ Ninji pinafuna kucitika Goge wa Magoge angatoma kupomokera atumiki a Mulungu? Bhibhlya isalonga: ‘Mwana wa munthu anadzatuma aanju ace toera kugumanya anthu ale adasankhula iye m’makhundu manai a mphepo, kubulukira kunkhomo ya dziko yapantsi mpaka kudzulu.’ (Marko 13:27; Mat. 24:31) Basa ineyi ya kugumanya nee isabveka kugumanywa kwakutoma kwa Akristu akudzodzwa, nee kuikhwa cidzindikiro cakumalisa kwa Akristu akudzodzwa akusalikira. (Mat. 13:37, 38) Thangwi kuikhwa kwa cidzindikiro ceneci kunacitika nyatwa ikulu mbidzati kutoma. (Apok. 7:1-4) Mphapo ndi basa ipi yakugumanya idalonga Yezu? Basa ineyi ndi ndzidzi wakuti anyakudzodzwa akusalikira mwa 144.000 anadzatambira muoni wawo kudzulu. (1 Ates. 4:15-17; Apok. 14:1) Pyenepi pinadzacitika mu ndzidzi ungasi Goge wa Magoge angatoma kupomokera. (Ezek.  38:11) Buluka penepo, mafala awa a Yezu anadzakwanirisika: ‘Pa ndzidzi unoyu anyakulungama anadzayetima ninga dzuwa mu Umambo wa Babawo.’​—Mat. 13:43.b

¹⁵ Kodi pyenepi pisabveka kuti panadzaoneka “kukwatiwa” kwa Akristu akudzodzwa? Anthu azinji auphemberi waunthawatawa asakhulupira kuti Akristu anadzakwatwa toera kuenda kudzulu na manungo aunyama. Natenepa, iwo asadikhira kuona Yezu na maso awo mbabwera toera kutonga dziko yapantsi. Mbwenye Bhibhlya isapangiza pakweca kuti ‘cidzindikiro ca Mwana wa munthu cinadzaoneka kudzulu,’ pontho Yezu anadzabwera ‘m’makole’ (Mat. 24:30). Mafala mawiri ene asapangiza kukhonda kuoneka na maso. Kusiyapo pyenepi, ‘manungo na ciropa pinacimwana kupita mu Umambo wa Mulungu.’ Natenepa, ale akuti anadzakwatiwa toera kuenda kudzulu, pakutoma asafunika ‘kucinjwa manungo awo mwakucimbiza kakamwe sawasawa ninga kuphoira kwa diso, pakulira kwa tuluka yakumalisira.’c (Lerini 1 Akorinto 15:50-53.) Natenepa, ife nee tisaphatisira fala yakuti “kukwatiwa,” thangwi iri na mabvekero akuphonyeka. Akristu akudzodzwa adasalikira pa dziko yapantsi anadzagumanywa pabodzi mwakucimbidza kakamwe.

16, 17. Ninji cinafuna kucitika kudzulu Mwanabira mbadzati kumanga banja?

¹⁶ Akristu onsene akudzodzwa akukwana 144.000 angamala kuenda kudzulu, anatoma masasanyiro akumanga banja kwa Mwanabira. (Apok. 19:9) Mbwenye mbudzati kutoma ndzidzi unoyu wakutsandzayisa pana cinthu cinango cinafuna kucitika. Kumbukani kuti ndzidzi pang’ono anyakudzodzwa akusalikira mbadzati kuenda kudzulu, Goge anapomokera atumiki a Mulungu. (Ezek. 38:16) Kodi atumiki a Mulungu anadzacitanji? Iwo anadzaoneka ninga akusowa citsidzikizo. Iwo anadzabvera pitsogolero pidaperekwa mu ntsiku za Mambo Yosafate: ‘Imwe nee munadzacita nkhondo. Khalani m’mbuto zanu mbamukhala dzololo, munadzaona cipulumuso ca Yahova. Imwe Ayuda na anthu a ku Yerusalemu lekani kugopa.’ (2 Pya dziko. 20:17) Pakumala kupomokera kwa Goge, mu ndzidzi wakucepa Akristu onsene akudzodzwa akusalikira pa dziko yapantsi anaenda kudzulu. Natenepa, lemba ya Apokalipse 17:14 isalonga pinafuna kucitika na anyamalwa a atumiki a Mulungu: ‘Iwo anadzacita nkhondo na Mwanabira, mbwenye nakuti Mwanabira ndi Mbuya wa ambuya, na Mambo wa amambo, Mwanabira anadzaakunda. Pontho, ale adacemerwa na adasankhulwa toera kukhala pabodzi na iye, anadzaakundambo pabodzi na iye.’ Natenepa, Yezu na andzace anafuna kutonga na iye kudzulu akukwana 144.000, anadzabwera toera kupulumusa atumiki a Mulungu pa dziko yapantsi.

¹⁷ Pyenepi pinadzatomesa nkhondo ya Armagedoni yakuti inadzapasa mbiri dzina yakucena ya Yahova. (Apok. 16:16) Pa ndzidzi unoyu, onsene anafuna kudzatongwa ninga mbuzi peno ninga anyakukhonda kukhulupira ‘anadzafudzwa.’ Mwinji ukulu unadzapulumuka pa Armagedoni, natenepa pa dziko yapantsi nkhabe kudzaonekabve uipi. Masasanyiro onsene angamala kucitwa, ntsonga ikulu ya bukhu ya Apokalipse yakuti ndi kumanga banja kwa Mwanabira kunadzacitika. (Apok. 21:1-4)d Onsene anafuna kupulumuka pa dziko yapantsi anadzatsandzaya thangwi yakutawirwa na Mulungu mbatambira nkhombo za ufuni wace. Ineyi inadzakhala phwando ikulu kakamwe yakumanga banja. Ife tisadikhira phwando ineyi na cifuno cikulu kakamwe!​—Lerini 2 Pedro 3:13.

18. Tinganyerezera pinthu pyonsene pyakutsandzayisa pinadikhira ife ntsogolo, tisafunika kukhala akutonga toera kucitanji?

¹⁸ Tinganyerezera pinthu pyenepi pyakutsandzayisa pinafuna kucitika ntsogolo, kodi m’bodzi na m’bodzi wa ife asafunika kucitanji? Mpostolo Pedhro apumirwa toera kulemba: ‘Nakuti pinthu pyonsene pinadzanyunguluswa, musafunika kukhala anthu a makhaliro akucena na akucita pinthu pinapangiza kuti ndimwe akuperekeka kuna Mulungu mu ndzidzi unadikhira imwe kudza kwa ntsiku ya Yahova. Mphapo anga apantima, pa kudikhira pyenepi, citani pyonsene toera iye akugumaneni akusowa midonthi, akusowa cilema na antendere.’ (2 Ped. 3:11, 12, 14) Natenepa, tendeni tikhale akutonga kupitiriza kukhala akucena mwauzimu, mbatiphedzera Mambo Wantendere.

[Pidzindikiro pyapantsi]