Munatomesa Tani Mapfunziro Na Bukhu Yakuti Biblya Isapfunzisanji

Azinji a ife mbadakhala akukomerwa kucitisa pfunziro ya Biblya yakuti yatomiwa kale. Bukhu ipswa yakuti Kodi Mwandimomwene Biblya Isapfunzisanji? ingakwanise kutiphedza. Matomero pa tsamba 3-7 acitwa towera kucitisa mwanaciro nyumba kuceza pya Biblya m’kuphatisira bukhu ineyi. Ngakhale ale akuti nkhabe kwanisa maka m’utumiki anaona kukhala kwakukhonda nensa kuiphatisira towera kutomesa mapfunziro.

◼ Mungakwanise kuyesera njira iyi m’kuphatisira tsamba 3:

Pakumala kulonga pyakucitika peno nyatwa zinanensa anthu m’cisa canu, tsogolerani manyerezero a mwanaciro nyumba ku mabvunzo a malembero akutswipa pa tsamba 3, na mphembeni kuti atawire. Buluka penepo fungulani tsamba 4-5.

◼ Panango mungafune kutoma m’kugomezera tsamba 4-5:

Mungakwanise kulonga: “Kodi pinadzakhala pyakudzumatirisa tayu macinjo anapangizwa apa angacitikadi?” Panango mungakwanise kubvunza: “Kodi ndi ipi mwa mapikiro awa inafuna imwe kuona mbikwanirisika?” Bveserani mwacidikhodikho ntawiro.

Khala mwanaciro nyumba apangiza cifuno cakupambulika mwa ibodzi ya malemba, mpangizeni pinapfunzisa Biblya thangwi ya pyenepi m’kudinga m’bukhu ndima zingasi zinafokotoza lemba ineyi. (Onani bokosi pa tsamba ino.) Dingani mphangwa m’njira ibodzi ene yakuti mbumudaiphatisira pa pfunziro ya Biblya. Mungakwanise kucita pyenepi pa nsuwo paulendo wakutoma m’mphindi zixanu peno khumi.

◼ Njira inango ndi ya kucitisa munthu kulonga m’kuphatisira tsamba 6:

Citisani kuti mwanaciro nyumba anyerezere mabvunzo ali pantsi pa tsamba, na bvunzani: “Kodi imwe mwatoma bvunzika kale ubodzi wa mabvunzo anewa?” Khala iye apangiza cifuno kwa ubodzi wa mabvunzo, fungulani ndima zinatawira mbvunzo unoyu m’bukhu. (Onani bokosi pa tsamba ino.) Munadinga imwe pabodzi mphangwa zenezi, imwe mukucita pfunziro ya Biblya.

◼ Tsamba 7 ingakwanise kuphatisirwa towera kupangiza macitiro a pfunziro ya Biblya:

Lerini mafraze matatu akutoma pa tsamba, na buluka penepo fungulani nsolo 3, na pangizani macitiro a pfunziro m’kuphatisira ndima 1-3. Citani masasanyiro kuti mubwerere kudzaceza pya matawiro a mabvunzo pa ndima 3.

◼ Munacita tani masasanyiro kuti mubwerere: Munamalisa imwe pfunziro yakutoma, bveranani kuti mupitirize na kuceza. Imwe mungakwanise kulonga: “M’mphindi zakucepa basi, tapfunza pinapfunzisa Biblya pya nsolo wakufunika. Pa ulendo unango tinadzaceza pya [siyani mbvunzo wakuti munadzautawira]. Kodi musafuna kuti ndipite na pano sumana inafuna kudza m’nzidzi ubodzi ene?”

Munafendzera ife duzi kakamwe na nzidzi wakuikhwa wa Yahova, iye asapitiriza kutikhunganya towera kucita basa iri na ife. (Mat. 28:19, 20, MZ; 2 Tim. 3:17) Tendeni tiphatisire mwadidi bukhu iyi ipswa yakudzumatirisa towera kutomesa mapfunziro a Biblya.

Njira Yakugawira Bukhu Yakuti Biblya Isapfunzisanji

Nthimiziro uyu usaphataniza njira zakusiyana-siyana za kugawira bukhu yakuti Biblya Isapfunzisanji. Towera kuziphatisira mwadidi, longani m’mafala anu ene, cinjani malongero anu mwakubverana na anthu a m’cisa canu, na dziwani ntsonga zakuthonyeka zinagumanika m’bukhu. Mungakwanisembo kuphatisira njira zinango zakuphata basa m’cisa canu.—Onani Nosso Ministério do Reino wa Janeiro de 2005, tsa. 8.

Banja

◼ “Ife tonsene tisafuna kukhala na umaso wa m’banja wakutsanzaya. Kodi si tenepa tayu? [Dikhirani ntawiro.] Biblya isalonga pinthu pyakuti munthu mbodzi na mbodzi m’banja angakwanise kucita towera umaso wa m’banja ukhale wakutsanzaya—kusangizira Mulungu m’kupangiza kufuna.” Lerini Aefesi 5:1, 2 na ndima 4 pa tsamba 135.

Biblya

◼ “Kazinji kene anthu asalonga kuti Biblya ndi Mafala a Mulungu. Kodi mwatoma kubvunzika kuti pyacitika tani kuti bukhu yakulembwa na anthu itheme kucemerwa Mafala a Mulungu? [Dikhirani ntawiro. Buluka penepo lerini 2 Pedro 1:21 na ndima 5 pa tsamba 19-20.] Bukhu iyi isapasa matawiro a Biblya ku mabvunzo anewa.” Pangizani mabvunzo ali pa tsamba 6.

◼ “M’ntsiku zathu zino, anthu ali na mphangwa zizinji kupiringana kale. Kodi ndi kupi kunanyerezera imwe kuti tingakwanise kugumana uphungu wadidi wakuti ungakwanise kutitsogolera ku umaso wakutsanzaya na wakupembera? [Dikhirani ntawiro. Buluka penepo lerini 2 Timoti 3:16, 17 na ndima 12 pa tsamba 22-3.] Bukhu iyi isafokotoza kuti tinakwanisa tani kukhala maso m’njira yakukomeresa Mulungu na yakutiphindulisa.” Pangizani ndandanda na cithunzithunzi ciri pa tsamba 122-3.

Cidengwa/Kunenseka

◼ “Pangaoneka cidengwa, azinji asabvunza khala Mulungu asatsalakanadi anthu na khala asaona kunenseka kwawo. Kodi mwabvunzika kale pyenepi? [Dikhirani ntawiro. Buluka penepo lerini 1 Pedro 5:7 na ndima 11 pa tsamba 11.] Bukhu iyi isafokotoza kuti Mulungu anadzamalisiratu kunenseka kwa anthu.” Pangizani mabvunzo akutoma ali pa tsamba 106.

Harmagedoni

◼ “Anthu azinji angabva fala yakuti ‘Harmagedoni,’ asanyerezera kufudzwa kukulu. Kodi munadzumatirwa kudziwa kuti Harmagedoni ndi cinthu cakudikhirwa mwakukomerwa? [Dikhirani ntawiro. Buluka penepo lerini Apokalipse 16:14, 16.] Onani mafala awa anapangiza kuti umaso unadzakhala tani Harmagedoni angamala kucitika.” Fungulani tsamba 82-4, na lerini ndima 21.

Kufa/Kulamuka Muli Akufa

◼ “Anthu azinji asabvunzika kuti ndi ninji pinacitikadi pa kufa. Kodi musanyerezera kuti ife tinakwanisa kupidziwa? [Dikhirani ntawiro. Buluka penepo lerini Koelete [Mlaliki] 9:5 na ndima 5-6 pa tsamba 58-9.] Bukhu iyi isafokotozambo kuti pikiro ya Biblya ya kulamuka muli akufa inadzabvekanji kwa ale adafa.” Pangizani cithunzithunzi ciri pa tsamba 75.

◼ “Angafa nyakufunika wathu, mwacibaliro ife tisafuna kumuona pontho. Kodi si tenepa tayu? [Dikhirani ntawiro.] Anthu azinji asathontholeswa na pikiro ya Biblya ya kulamuka muli akufa. [Lerini Jwau 5:28, 29 na ndima 16-17 pa tsamba 71-2.] Nsolo uyu usatawirambo mabvunzo awa.” Pangizani mabvunzo akutoma ali pa tsamba 66.

Kuphembera

◼ “Kodi mwatoma kubvunzika kuti Mulungu asatawira tani maphembero? [Dikhirani ntawiro. Buluka penepo lerini 1 Jwau 5:14, 15 na ndima 16-18 pa tsamba 170-2.] Nsolo uyu usafokotozambo thangwi yanji tisafunika kuphembera kwa Mulungu na pinafunika ife kucita kuti tibveserwe na iye.”

Nkhondo/Ntendere

◼ “Anthu konsene kwene asafuna ntendere. Kodi musanyerezera kuti cidikhiro ca ntendere pa dziko yapantsi ndi ndota basi? [Dikhirani ntawiro. Buluka penepo lerini Masalmo 46:8, 9.] Bukhu iyi isalonga kuti Mulungu anadzakwanirisa tani cifuniro cace na kubweresa ntendere wa dziko yonsene yapantsi.” Pangizani cithunzithunzi ciri pa tsamba 35, na dingani ndima 17-21 pa tsamba 33-4.

Nyumba

◼ “M’mbuto zizinji, kugumana nyumba yadidi na yabarato kusakhala kwakunensa kakamwe. Kodi musadziwa kuti inadzafika ntsiku yakuti anthu onsene anadzakhala na nyumba zadidi? [Dikhirani ntawiro. Buluka penepo lerini Izaiya 65:21, 22 na ndima 20 pa tsamba 34.] Bukhu iyi isafokotoza makwanirisikiro a pikiro ineyi yakubuluka kwa Mulungu.”

Umaso Okhonda Mala

◼ “Anthu azinji asafuna ungumi wadidi na kukhala maso piaka pizinji. Mbidakhala kuti pyenepi mphyakukwanisika, kodi mbumudafuna kukhala maso kwenda na kwenda? [Dikhirani ntawiro. Buluka penepo lerini Apokalipse 21:3, 4 na ndima 17 pa tsamba 54.] Bukhu iyi isafokotoza njira yakuti tingakwanise kugumana umaso okhonda mala na kuti umaso unadzakhala tani pikiro ineyi ingadzakwanirisika.”

Uphemberi

◼ “Anthu azinji asatoma kuona uphemberi wa dziko ninga utomesi wa nyatwa za anthu mbuto mwa umalisi wa nyatwa. Kodi musanyerezera kuti uphemberi usatsogolera anthu ku njira yadidi? [Dikhirani ntawiro. Buluka penepo lerini Mateo 7:13, 14 na ndima 5 pa tsamba 145-6.] Nsolo uyu usadinga ntsonga zitanthatu zinapangiza ulambiri unatawirika kwa Mulungu.” Pangizani ndandanda uli pa tsamba 147.

Yahova Mulungu

◼ “Anthu azinji anakhulupira Mulungu asafuna kubva kuti ali duzi kakamwe na iye. Kodi musadziwa kuti Biblya isaticemerera kuti tifendedzere kwa iye? [Dikhirani ntawiro. Buluka penepo lerini Tyago 4:8a na ndima 20 pa tsamba 16.] Bukhu iyi yacitwa towera kuphedza anthu kupfunza pizinji pya Mulungu m’kuphatisira Biblya yawo ene.” Pangizani mabvunzo akutoma ali pa tsamba 8.

◼ “Anthu azinji asaphembera kuti dzina ya Mulungu iceneswe. Kodi mwatoma kubvunzika kuti dzina ineyi ndi ipi? [Dikhirani ntawiro. Buluka penepo lerini Masalmo 83:18, Tradução do Novo Mundo na ndima 2-3 pa tsamba 195.] Bukhu iyi isafokotoza pinapfunzisadi Biblya pya Yahova Mulungu na cifuniro cace kwa anthu.”

Yezu Kristu

◼ “Kuzungulira dziko yonsene yapantsi anthu abva pya Yezu Kristu. Anango asalonga kuti iye akhali munthu wakufunika kakamwe. Anangombo asamulambira ninga Mulungu Wamphambvu zonsene. Kodi musadziwa kuti pinakhulupira ife thangwi ya Yezu Kristu ndi pinthu pyakufunika?” [Dikhirani ntawiro. Buluka penepo lerini Jwau 17:3 na ndima 3 pa tsamba 37-8.] Tsogolerani manyerezero ku mabvunzo akutoma ali pantsi pa nsolo.

[Caption on page 5]

Njira Za Kulonga Masasanyiro A Pyakupereka

“Mungafuna kucita cakupereka cing’ono lero towera kuphedza basa yathu ya dziko yonsene yapantsi, ndinakhala wakukomerwa kucitambira.”

“Ngakhale kuti mabukhu anthu asagawirwa mwakusowa ntengo, tisatambira cakupereka cing’ono towera kuphedza basa yathu ya dziko yonsene yapantsi.”

“Panango mungabvunzike kuti pisakwanisika tani kuti basa ineyi iende kutsogolo. Pyenepi pisakwanisika thangwi basa yathu ya dziko yonsene yapantsi isaphedzwa na pyakupereka pyakufuna. Khala musafuna kucita cakupereka cing’ono lero, ndinakhala wakukomerwa kucitambira.”

(1) Mbvunzo, (2) Lemba, na (3) Nsolo

Njira yakukhonda nensa ya kugawira bukhu yakuti Kodi Mwandimomwene Biblya Isapfunzisanji? ndi iyi: (1) kucita mbvunzo unacitisa munthu kulonga manyerezero ace, (2) kuleri lemba yakuthema, na (3) kutsogolera manyerezero ku nsolo wa bukhu unalonga ntsonga ineyi m’kuleri mabvunzo akutoma ali pantsi pa nsolo. Mwanaciro nyumba angapangiza kufuna, mungakwanise kupangiza macitiro a pfunziro ya Biblya m’kuphatisira ndima zakutoma za nsolo unoyu. Njira ineyi ingakwanise kuphatisirwa towera kutomesa pfunziro pa ulendo wakutoma peno pa ulendo wakubwerezera.

◼ “M’maonero anu, kodi mphyakukwanisika kwa anthu kudziwa Nciti wathu wamphambvu zonsene, ninga pidalembwa pa Biblya apa?” Lerini Machitiro 17:26, 27, na dikhirani ntawiro. Buluka penepo fungulani nsolo 1.

◼ “Na pinenso pinathimbana na ife lero, kodi musanyerezera kuti mphyakukwanisika kugumana cithonthoso na cidikhiro cinafokotozwa pano?” Lerini Aroma 15:4, na dikhirani ntawiro. Buluka penepo fungulani nsolo 2.

◼ “Mbumudakhala na mphambvu za kucita pyenepi, kodi imwe mbumudabweresa macinjo awa?” Lerini Apokalipse 21:4, na dikhirani ntawiro. Buluka penepo fungulani nsolo 3.

◼ “M’maonero anu, kodi ana athu anadzatsanzaya na makhaliro anafokotozwa m’nyimbo iyi yakale?” Lerini Masalmo 37:10, 11, na dikhirani ntawiro. Buluka penepo fungulani nsolo 3.

◼ “Kodi imwe musanyerezera kuti inadzafika ntsiku yakuti mafala anewa anadzakwanirisika?” Lerini Izaiya 33:24, na dikhirani ntawiro. Buluka penepo fungulani nsolo 3.

◼ “Kodi imwe mwatoma kubvunzika khala anyakufa asadziwa pinacita anthu amaso?” Dikhirani ntawiro. Buluka penepo lerini Koelete 9:5, na fungulani nsolo 6.

◼ “M’maonero anu, kodi mphyakukwanisika kuti ntsiku inango tione pontho anyakufunika athu adafa, ninga pidalonga Yezu pa mavesi awa?” Lerini Jwau 5:28, 29, na dikhirani ntawiro. Buluka penepo fungulani nsolo 7.

◼ “M’maonero anu, kodi pinakwanisika tani kuti cifuno ca Mulungu cicitike pa dziko yapantsi ninga kudzulu, ninga pidalongwa m’phembero iyi yakudziwika kakamwe?” Lerini Mateo 6:9, 10, na dikhirani ntawiro. Buluka penepo fungulani nsolo 8.

◼ “M’maonero anu, kodi tisakhala m’nzidzi unafokotozwa m’profesiya iyi?” Lerini 2 Timoti 3:1-4, na dikhirani ntawiro. Buluka penepo fungulani nsolo 9.

◼ “Anthu azinji asabvunzika thangwi yanji nyatwa za anthu zisathimizirika. Kodi imwe mwatoma kunyerezera pinafokotozwa pa vesi iyi ninga thangwi ya pyenepi?” Lerini Apokalipse 12:9, na dikhirani ntawiro. Buluka penepo fungulani nsolo 10.

◼ “Kodi mwatoma kale kusaka kudziwa ntawiro wa mbvunzo uyu?” Lerini Yobe 21:7, na dikhirani ntawiro. Buluka penepo fungulani nsolo 11.

◼ “M’maonero anu, kodi kuphatisira uphungu uyu wa Biblya kungaphedze anthu kutsanzaya na umaso wa m’banja?” Lerini Aefesi 5:33, na dikhirani ntawiro. Buluka penepo fungulani nsolo 14.