Pfunziro 1

Mulungu Asakucemerani Kuti Mukhale Xamwali Ace

Mulungu asafuna kuti mukhale xamwali ace. Mwatoma kupinyerezera kale kuti munakwanisa kukhala xamwali wa Munthu wankulu kakamwe wa Kudzulu na Pantsi ponsene? Abaramu, adakhala maso kalene kakamwe, acemerwa xamwali wa Mulungu. (Tyago 2:23) Anthu anango anathulwa m’Bibilya akhalimbo na uxamwali na Mulungu pina iwo apaswa nkhombo zakuinjipa kakamwe. Lero, anthu akuinjipa m’dziko yonsene yapantsi akhala axamwali a Mulungu. Imwe munakwanisa kukhalambo xamwali wa Mulungu.

Kukhala xamwali wa Mulungu mphyadidi kupiringana kukhala xamwali wa munthu. Mulungu cipo na cipo asaaphatisa mwala tayu axamwali ace akukhulupirika. (Masalmo 18:25) Kukhala xamwali wa Mulungu mphyadidi kupiringana kukhala na mpfuma. Pakufa munthu wa mpfuma, kobiri yace isasala na anthu anango. Mbwenye ale ali na uxamwali na Mulungu ali na mpfuma yakuti nkhabe munthu unango anadzaapokesera.—Mateo 6:19.

Anthu anango angafune kupingiza kuti muleke kupfunza pya Mulungu. Panango axamwali anu ene na abale anu angacite pyenepi. (Mateo 10:36, 37) Anthu anango pakukusingirirani peno kukuthusani, pibvunzeni kuti: ‘Kodi mbani anafunene kukomeresa—anthu peno Mulungu?’ Nyerezerani ipi: Khala munthu unango akupangani kuti muleke kudya, kodi mbamudambvera? Ndimomwene kuti nkhabe! Pisafunika cakudya towera kukhala maso. Mbwenye Mulungu anakwanisa kucitisa kuti mukhale maso kwenda na kwenda! Natenepa, cipo na cipo lekani kutawirisa kuti munthu unango akupingizeni kupfunza njira yakucitisa kuti mukhale xamwali wa Mulungu.—Jwau 17:3.