Umaso Wakutsandzayisa wa Umisionaryo. (Mis. 10:22)—Mphangwa izi zabuluswa mu Anuário das Testemunhas de Jeová de 2014
Tsamba 124 ndima 1 mpaka tsamba 127 ndima 4
Amisionaryo Aphinga Athimizira Kuthambaruka Kwa Basa
Kutomera pakati pa pyaka 1970 amisionaryo adapfundziswa ku Gileade akhatumizwa mwakukhonda kulimira toera kuphedzera basa ku Serra Leoa na ku Guine. Anango akhadatumikira kale m’mbuto zinango mu Afrika, iwo adzolowera mwakucimbiza makhaliro apacisa. Kwa anango ukhali ulendo wakutoma kufika mu Afrika. Mbadakwanisa tani kuthimbana na makhaliro acilendo? Onani mafala mangasi adalonga iwo.
“Anthu akhali akucepeseka, pontho akhali na njala yauzimu. Ndikhakomerwa kakamwe kuona undimomwene mbukhacinja umaso wawo.”—Hannelore Altmeyer.
“Kuthimbana na makhaliro akupisa na mautenda ukhali nkandzo. Mbwenye ndikhakomerwa kakamwe kuona anthu azinji a mitima yadidi mbatumikira Yahova.”—Cheryl Ferguson.
“Ndapfundza kukhala munthu wakupirira. Mudabvundza ine mulongo unango kuti alendo ace mbadafika lini, iye atawira: ‘Panango lero. Panango mangwana. Peno nkucauno.’ Ndadzudzumika kakamwe thangwi iye apitiriza kulonga kuti: ‘Mbwenye iwo anabwera.’”—Christine Jones.
“Amisionaryo akukwana 14 a madzindza na makhaliro akusiyana-siyana akhala panyumba ya amisionaryo mu cisa ca Freetown. Tikhaphatisira pimbuzi piwiri, mbuto ibodzi yakusambira, ntcini ubodzi wakufula nguwo, na cozinha ibodzi. Tikhali na pyakudya pyakucepa pontho nee pikhali pyadidi kakamwe. Mwakukhonda dikhira, magesi akhathima. Midzidzi inango tikhamala ntsiku zingasi nee magesi. Azinji a ife athabuka na malariya na mautenda anango a madziko akupisa. Maseze pyenepi pikhaoneka ninga nyatwa ikulu, ife tapfundza kukhala pabodzi pene, kulekererana, na kupangiza kukomerwa m’midzidzi yakunentsa. Kumwaza mphangwa kukhatsandzayisa kakamwe, amisionaryo akhazikisa uxamwali wakuwanga kakamwe.—Robert na Pauline Landis.
“Ndzidzi udakhala ife ku Serra Leoa ndi ubodzi mwa midzidzi yakutsandzayisa kakamwe ya umaso wathu. Ife nkhabe kutsumbikika nee kudungunya. Tiri na citsuwo ca kubwererako pontho.”—Benjamin na Monica Martin.
“Ntsiku inango taenda kunyumba kwa nkazi unango wakuti akhapfundza Bhibhlya, iye atipasa cakudya cacilendo. Iye alonga: ‘Ndi nyoka, ndamala kale kubulusa mano ace. Musafuna pang’ono? Ife tayesera kukhonda mwacilemedzo, mbwenye iye atikakamiza. Pyakugumana napyo ninga pyenepi pikhacitika kazinji kene, ngakhale tenepo ife tikhapasa ntengo khodzo yawo, pontho tikhaafuna kakamwe.”—Frederick na Barbara Morrisey.
Mu pyaka 43 pya basa yanga ya umisionaryo, ndakhala pabodzi na amisionaryo anango akukwana 100. Ndi mwai ukulu kakamwe kudziwa anthu azinji a makhaliro akusiyana-siyana, mbwenye onsene mbaphata basa na cifuniro cibodzi cene! Mphyakutsandzayisa kakamwe kukhala nyakuphedza wa Mulungu, na kuona anthu azinji mbakatawira undimomwene wa Bhibhlya!—Lynette Peters.
Kutomera mu caka 1947, amisionaryo akukwana 154 atumikira ku Serra Leoa, anango akukwana 88 atumikira ku Guine. Atumiki anango a Yahova atumikirambo m’madziko anewa akuti kusafunika kakamwe amwazi mphangwa. Lero, amisionaryo akukwana 44 asatumikira ku Serra Leoa, 31 asatumikira ku Guine. Mabasa onsene adacita iwo na kuwangisira kwawo mwakukhonda neta, pyakhuya umaso wa anthu azinji. Alfred Gunn, wakuti asatumikira mu Komiti ya Filiali mu pyaka pizinji alonga: “Tisaakumbukira na ntima onsene.”