Kodi Mbani Mikele, Arkanju?

CAKUCITWA cauzimu cinacemerwa Mikele nee asalongwa kazinji m’Bhibhlya. Mbwenye, iye angalongwa, asalongwa mbali m’basa. M’bukhu ya Danyele, Mikele akucita nkhondo na aanju akuipa; mu tsamba ya Yuda, iye ali kukanana na Sathani; na mu Apokalipse, iye akucita nkhondo na Dyabo na mademonyo ace. Mukutsidzikiza utongi wa Yahova na kumenyana na anyamalwa a Mulungu, Mikele asakhala mwakubverana na mabvekero a dzina yace. Dzina ineyi isabveka “Mbani Wakulandana na Mulungu?” Kodi mbani mphapo Mikele?

M’midzidzi inango, anthu asadziwika na madzina mazinji. Mwacitsandzo, kholo Yakobe asadziwikambo ninga Israele, pontho mpostolo Pedhro, asadziwikambo ninga Simau. (Genesi 49:1, 2; Mateo 10:2) Munjira ibodzi ene, Bhibhlya isapangiza kuti Mikele ndi dzina inango ya Yezu Kristu, mbadzati bwera pa dziko yapantsi na mudabwerera iye kudzulu. Tendeni tione mathangwi a Malemba anatifikisa pa manyerezero anewa.

Arkanju. Mafala a Mulungu asacemera Mikele “Arkanju.” (Yuda 9) Fala ineyi isabveka “anju wankulu.” Fala yakuti “arkanju” isagumanika m’Bhibhlya mbilonga munthu m’bodzi basi tayu anthu azinji. Pyenepi pisapangiza kuti pana anju m’bodzi basi wakuti ndi arkanju. Natenepa, Yezu athema dzina ya arkanju thangwi iye ali pa mbuto yapadzulu kupiringana aanju onsene. Thangwi ya Mbuya Yezu Kristu wakulamuswa muli akufa, 1 Atesalonika 4:16 isalonga: ‘Mbuya anadzatcitha kubuluka kudzulu cingaoneka cidzindikiro cinabvekesa anju wankulu na mafala ace.’ Natenepa fala ya Yezu isalongwa ninga kukhala ya arkanju. Lemba iyi isapangiza kuti Yezu ene ndi arkanju Mikele.

Ntsogoleri wa anyankhondo. Bhibhlya isalonga kuti ‘Mikele na aanju ace acita nkhondo na nyangumi na aanju ace.’ (Apokalipse 12:7) Natenepa, Mikele ndi Ntsogoleri wa anyankhondo aanju akukhulupirika. Bukhu ya Apokalipse isalongambo Yezu ninga Ntsogoleri wa anyankhondo aanju akukhulupirika. (Apokalipse 19:14-16) Pontho mpostolo Paulu amulonga pakweca “Mbuya Yezu” na ‘aanju ace amphambvu.’ (2 Atesalonika 1:7) Natenepa Bhibhlya isalonga pya Mikele na ‘aanju ace’ na Yezu na ‘aanju ace.’ (Mateo 13:41; 16:27; 24:31; 1 Pedro 3:22) Nakuti nkhabe khundu m’Mafala a Mulungu inalonga kuti pana misoka miwiri ya anyankhondo aanju akukhulupirika kudzulu, ubodzi wakutsogolerwa na Mikele na unango wakutsogolerwa na Yezu, pisaoneka pakweca kuti Mikele si unango tayu kusiyapo Yezu Kristu m’basa yace yakudzulu.a