Cakudya Cancidodo Ca Mbuya Ndi Cikumbuso Cinalemedza Mulungu

AKRISTU asatongwa kucita Cikumbuso ca kufa kwa Kristu. Cikumbuso ceneci cisacemerwambo ‘Phwando Yancidodo ya Mbuya.’ (1 Akorinto 11:20) Thangwi yanji ndi cakufunika kakamwe? Kodi cisacitwa lini na munjira ipi?

Yezu Kristu atomesa cikumbuso ceneci namasiku a Paskwa ya Ciyuda mu caka 33 N.W. Paskwa ikhali cikumbuso cikhacitwa kabodzi pa caka pa ntsiku 14 ya nthanda ya Ciyuda ya Nisane. Toera kudziwa ntsiku ineyi, Ayuda akhadikhira ntsiku yakuti ikhali na midzidzi 12 ya ceza na midzidzi 12 ya cidima pakumala kwa malimwe na kutoma kwa khoni. Kuoneka kwakutoma kwa mwezi upswa cifupi na ntsiku ineyi kukhapangiza kutoma kwa nthanda ya Nisane. Paskwa ikhacitwa pakupita ntsiku 13.

Yezu acita Paskwa na apostolo ace, abulusa Yuda Iskaryote pa nsoka, buluka penepo atomesa Cakudya Cancidodo ca Mbuya. Cakudya ceneci capitira mbuto Paskwa ya Ciyuda, natenepa cikhafunika kucitwa kabodzi pa caka.

Mphangwa Zadidi za Mateo zisalonga: ‘Yezu akwata nkate, mbacita phembero, aumenya aupasa anyakupfundzace, mbati: Tambirani mudye, ici ndi manungo anga. Akwatambo kalise, mbacita phembero, aipasa kuli iwo, mbati: Mwerani monsene, thangwi ici ndi ciropa canga cakubverana kwa cincino, cinadzatsanulirwa thangwi ya anthu azinji toera kualekerera madawo.’​—Mateo 26:26-28.

Anango asakhulupira kuti Yezu aphinduza nkate kudzadi manungo ace na vinyu kudza ciropa cace. Mbwenye, manungo a uunthu a Yezu apitiriza kukhala amumphu mudapereka iye nkate unoyu. Kodi apostolo a Yezu adyadi manungo ace andimomwene na kumwa ciropa cace? Nkhabe, iwo mbadadya manungo a munthu mbadaphonyana na mwambo wa Mulungu. (Genesi 9:3, 4; Levitiko 17:10) Mwakubverana na Luka 22:20, Yezu alonga: ‘Kalise iyi ndi kubverana kupswa mu ciropa canga cinadzatsanulirwa thangwi ya imwe.’ Kodi kalise yadzakhaladi ‘cibverano cipswa’? Pyenepi nee mbipidakwanisika, thangwi cibverano ndi kubverana, tayu cinthu cakuoneka.

Natenepa, nkate na vinyu ndi pidzindikiro basi. Nkate usaphipirisa manungo aungwiro a Kristu. Yezu aphatisira nkate udasala pa phwando ya Paskwa. Nkate unoyu wakucitwa mbukhonda ikhwa pyakutupisa. (Eksodo 12:8) Kazinji kene Bhibhlya isaphatisira pyakutupisa ninga ciphiphiriso ca madawo peno kubvunda kwa cinthu. Natenepa, nkate usaimirira manungo aungwiro adapereka Yezu ninga ntsembe. Akhali akusowa madawo.​—Mateo 16:11, 12; 1 Akorinto 5:6, 7; 1 Pedro 2:22; 1 Jwau 2:1, 2.

Vinyu yakufwira isaimirira ciropa ca Yezu. Ciropa ceneci cisacitisa cibverano cipswa kuphata basa. Yezu alonga kuti ciropa cace catsanulirwa toera ‘kulekerera madawo.’ Natenepa anthu anakwanisa kukhala akucena pamaso pa Mulungu, pontho anakwanisa kupita mu cibverano cipswa na Yahova. (Ahebere 9:14; 10:16, 17) Cibverano ceneci cisacitisa kuti Akristu 144.000 akukhulupirika akwanise kuenda kudzulu. Kweneku iwo anadzaphata basa ninga amambo na anyantsembe toera kupasa nkhombo anthu onsene.​—Genesi 22:18; Yeremiya 31:31-33; 1 Pedro 2:9; Apokalipse 5:9, 10; 14:1-3.

Kodi mbani adathema kudya pidzindikiro pyenepi pya Cikumbuso? Mwapakweca, adathema kudya nkate na kumwa vinyu ndi ale basi ali mu cibverano cipswa, akuti ali na cidikhiro ca kuenda kudzulu. Nzimu wakucena wa Mulungu usaapasa cinyindiro kuti iwo asankhulwa toera kukhala amambo akudzulu. (Aroma 8:16) Iwombo ali mu cibverano ca Umambo na Yezu.​—Luka 22:29.

Kodi ndiye tani kwa ale ali na cidikhiro cakukhala maso kwenda na kwenda mu Paradizu pa dziko yapantsi? Iwo asabvera matongero a Yezu na asagumanika pa Cakudya Cancidodo ca Mbuya. Asakhala mwacilemedzo mbaona pinacitika mbwenye nkhabe kudya. Mboni za Yahova zisakumbukira Cakudya Cancidodo ca Mbuya kabodzi pa caka, pakumala kubira kwa dzuwa pa 14 ya nthanda ya Nisane. Maseze pikwi pyakucepa basi mu dziko yonsene yapantsi pisalonga kuti piri na cidikhiro cakuenda kudzulu, cikumbuso ceneci ndi cakufunika kwa Akristu onsene. Ndi ndzidzi wakuti onsene anakwanisa kunyerezera ufuni ukulu udapangiza Yahova Mulungu na Yezu Kristu.​—Jwau 3:16.