MU PILONGERO pyakutoma, fala ya Cihebheri sheʹóhl na ya Cigerego haí·des asagumanika m’Bhibhlya m’maulendo akupiringana 70. Mafala anewa mawiri asabveka mbuto inaikhwa anyakufa. Mabhibhlya anango asaathumburuza ninga “nthumbi,” “infernu,” peno “djenje.” Mbwenye mu pilongero pizinji nkhabe mafala toera kuthumburuza mwakundendemera mabvekero andimomwene a mafala anewa a Cihebheri na Cigerego. Natenepa, Bhibhlya ya Tradução do Novo Mundo isaphatisira mafala akuti ‘Sheole’ na ‘Hade.’ Kodi mwandimomwene mafala anewa asabvekanji? Tendeni tione kuti asaphatisirwa tani mu mavesi akusiyana-siyana a Bhibhlya.

Koelete 9:10 isalonga: ‘Ku nyumba ya anyakufa [‘Sheole,’ NM] kunaenda iwe nkhabebve basa, nee pyakunyerezera, nee pyakudziwa, nee pya ndzeru.’ Kodi pyenepi pisabveka kuti Sheole ndi nthumbi ibodzi idaikha ife nyakufunika wathu? Nkhabe. Bhibhlya ingalonga pya mbuto ibodzi inaikhwa anyakufa, peno nthumbi, isaphatisira mafala anango a Cihebheri na a Cigerego, tayu sheʹóhl na haí·des. (Genesi 23:7-9; Mateo 28:1) Pontho, Bhibhlya nkhabe phatisira fala yakuti ‘Sheole’ toera kulonga pya djenje inaikhwa mitembo mizinji pabodzi, peno masiye a banja.​—Genesi 49:30, 31.

Mphapo ‘Sheole’ ndi mbuto ya ntundu wanji? Mafala a Mulungu asapangiza kuti ‘Sheole,’ peno ‘Hade,’ ndi mbuto yakupiringana nthumbi inaikhwa mitembo mizinji. Mwacitsandzo, Izaiya 5:14 isalonga kuti Sheole ndi mbuto ikulu na ‘isafungula mulomo wace onsene.’ Maseze Sheole yamala kukhudyula anthu akufa akukhonda lengeseka, ndzidzi onsene isaoneka ninga iri na njala yakufuna anango. (Misangani 30:15, 16) Mwakusiyana na mbuto yandimomwene inaikhwa anyakufa, yakuti inakwanisa kutambira anthu akufa akulengeseka, ‘Sheole nkhabe khuta.ʼ (Misangani 27:20, NM) Sheole cipo isadzala. Iyo nkhabe madire. Natenepa, Sheole, peno Hade, si mbuto yandimomwene tayu. M’mbuto mwace, ndi nthumbi ya anthu onsene akufa, mbuto yakuphiphirisa inagona anthu mu kufa.

Cipfundziso ca Bhibhlya ca kulamuka muli akufa cisatiphedza kukhala na cidziwiso cakuthimizirika ca mabvekero a ‘Sheole’ na ‘Hade.’ Mafala a Mulungu asapangiza kuti Sheole na Hade ndi mbuto inagona anthu akufa akuti ali na cidikhiro ca kulamuswa muli akufa.a (Yobe 14:13; Machitiro 2:31; Apokalipse 20:13) Mafala a Mulungu asapangizambo kuti ali mu Sheole, peno Hade, si ale adatumikira Yahova basi tayu, mbwenyembo azinji adakhonda kuntumikira. (Genesi 37:35; Masalmo 55:15) Natenepa, Bhibhlya isapfundzisa kuti kunadzaoneka “kulamuka muli akufa kwa anthu adidi na kwa akuipambo.”​—Machitiro 24:15.

KODI musanyerezeranji thangwi ya Ntsiku Yakutonga Miseru? Azinji asanyerezera kuti m’bodzi na m’bodzi wa pikwi pya pikwi pya anthu anadzaendeswa pamaso pa mpando waumambo wa Mulungu. Penepo, munthu m’bodzi na m’bodzi anadzatongwa. Anango anadzapaswa nkhombo ya kuenda ku paradizu kudzulu, na anango anadzatongwa toera kuthabuswa kwenda na kwenda. Mbwenye Bhibhlya isapangiza manyerezero akusiyana a ndzidzi unoyu. Mafala a Mulungu asaufokotoza ninga ndzidzi wa cidikhiro na wakucitwa papswa, tayu wakugopswa.

Pa Apokalipse 20:11, 12 tisaleri mafokotozero a mpostolo Jwau a Ntsiku Yakutonga Miseru: ‘Ndaona mpando ukulu wakuyetima, ndaonambo Uyu anakhalapo. Pantsi na thambo pyathawa nkhope yace, penepo mbuto yawo hidagumanikabve tayu. Ndaonambo anyakufa onsene, akulu na ang’ono akulimira patsogolo pa mpando mbafunguliwa mabukhu. Yafungulwambo bukhu inango, ndi bukhu ya umaso. Penepo anyakufa atongiwa ninga mudalembwa m’bukhu ineyi, mwakubverana na macitiro awo.’ Kodi Ntongi anafokotozwa pano mbani?

Yahova Mulungu ndi Ntongi wankulu kakamwe wa anthu. Mbwenye, iye asapasa anango basa ineyi yakutonga miseru. Mwakubverana na Machitiro 17:31, mpostolo Paulu alonga kuti Mulungu ‘asankhula ntsiku ibodzi, inadzatonga iye anthu a pantsi ponsene kubulukira mwa munthu m’bodzi adasankhula iye.’ Ntongi unoyu wakusankhulwa ndi Yezu Kristu wakulamuswa muli akufa. (Jwau 5:22) Kodi Ntsiku Yakutonga Miseru inatoma lini? Pontho inadzakwata ndzidzi ungasi?

Bukhu ya Apokalipse isapangiza kuti Ntsiku Yakutonga Miseru inatoma pakumala kwa nkhondo ya Armagedhoni, munafuna kudzafudzwa makhaliro a pinthu a Sathani pa dziko yapantsi.a (Apokalipse 16:14, 16; 19:19–20:3) Pakumala nkhondo ya Armagedhoni, Sathani na mademonyo ace anadzaikhwa n’djenje mu pyaka 1.000. Nkati mwa ndzidzi unoyu, anthu akukwana 144.000 akuti anatambira unthaka pabodzi na Yezu kudzulu, anadzatonga miseru ninga ‘anyapidzo peno amambo pabodzi na Kristu mu pyaka cikwi cibodzi.’ (Apokalipse 14:1-3; 20:1-4; Aroma 8:17) Ntsiku Yakutonga Miseru si yakucimbiza ya midzidzi 24 basi tayu. Inamala pyaka cikwi cibodzi.

Nkati mwa ndzidzi unoyu wa pyaka cikwi, Yezu Kristu “anadzatonga anthu onsene ali maso na anyakufa.” (2 Timoti 4:1) ‘Anthu ali maso’ ndi ‘mwinji ukulu’ wa anthu anafuna kudzapulumuka pa Armagedhoni. (Apokalipse 7:9-17) Mpostolo Jwau aonambo “anyakufa . . . akulimira patsogolo pa mpando” wakutonga miseru. Ninga mudapikira Yezu, “anthu onsene anagona mu nthumbi anadzabva mafala [a Kristu]. Penepo iwo anadzalamukambo” muli akufa. (Jwau 5:28, 29; Machitiro 24:15) Kodi iwo anadzatongwa na macitiro api?

Mwakubverana na masomphenya a mpostolo Jwau, ‘yafungulwambo bukhu,’ na ‘anyakufa atongiwa ninga mudalemberwa m’bukhu ineyi, mwakubverana na macitiro awo.’ (Apokalipse 20:12) Kodi m’mabukhu anewa mwalembwa pidacita anthu mbadzati kufa? Nkhabe, kutongwa kweneku nee kunadzacitwa kubulukira m’macitiro a anthu mbadzati kufa. Tisadziwa tani pyenepi? Bhibhlya isalonga: “Munthu adafa apulumuswambo mwa madawo.” (Aroma 6:7) Anyakulamuswa muli akufa anabwerera mwakusowa madawo ku umaso. Natenepa mabukhu anewa asaimirira mitemo inango ya Mulungu. Toera kukhala maso kwenda na kwenda, anthu anadzapulumuka pa Armagedhoni na ale anadzalamuswa muli akufa anadzafunika kubvera matongero a Mulungu, pabodzi na mitemo yonsene ipswa inafuna kudzapangiza Yahova nkati mwa pyaka cikwi. Natenepa, m’bodzi na m’bodzi anadzatongwa mwakubverana na pinafuna kudzacita iye nkati mwa Ntsiku Yakutonga Miseru.

Ntsiku Yakutonga Miseru inadzapasa mwai wakutoma kwa anthu azinji wakupfundza pya cifuno ca Mulungu na kukhala maso mwakubverana na cifuno ceneci. Pyenepi pisabveka kuti panadzaoneka basa ikulu yakupfundzisa. Mwandimomwene, ‘anthu onsene anapfundza pya ulungami.’ (Izaiya 26:9) Mbwenye, si onsene anafuna kudzakhala maso mwakubverana na cifuno ca Mulungu tayu. Izaiya 26:10 isalonga: ‘Maseze mubvere ntsisi anyakudawa, iwo hanapfundza ulungami tayu, anathimizira kugongonyesa pyakulungama, mbakhonda kudzindikira ukulu wanu [Yahova].’ Anyakuipa anewa anadzafudzwa kwenda na kwenda nkati mwa Ntsiku Yakutonga Miseru.​—Izaiya 65:20.

Kunkhomo kwa Ntsiku Yakutonga Miseru, anthu akupulumuka ‘anadzakhala na umaso’ waungwiro. (Apokalipse 20:5) Natenepa, nkati mwa Ntsiku Yakutonga Miseru anthu anadzabwerera ku makhaliro awo akutoma aungwiro. (1 Akorinto 15:24-28) Buluka penepo, panadzaoneka kuyeserwa kwakumalisa. Sathani anadzabuluswa n’djenje mbadzatawiriswa kuyesera kunyengeta anthu paulendo wakumalisa. (Apokalipse 20:3, 7-10) Ale anapirira anadzaona kukwanirisika kwa pikiro ya Bhibhlya: ‘Anyakulungama anadzatambira dziko, mbakhala mwenemo kwenda na kwenda.’ (Masalmo 37:29) Natenepa, Ntsiku Yakutonga Miseru inadzakhala nkhombo kwa anthu onsene akukhulupirika!