KODI musanyerezeranji thangwi ya Ntsiku Yakutonga Miseru? Azinji asanyerezera kuti m’bodzi na m’bodzi wa pikwi pya pikwi pya anthu anadzaendeswa pamaso pa mpando waumambo wa Mulungu. Penepo, munthu m’bodzi na m’bodzi anadzatongwa. Anango anadzapaswa nkhombo ya kuenda ku paradizu kudzulu, na anango anadzatongwa toera kuthabuswa kwenda na kwenda. Mbwenye Bhibhlya isapangiza manyerezero akusiyana a ndzidzi unoyu. Mafala a Mulungu asaufokotoza ninga ndzidzi wa cidikhiro na wakucitwa papswa, tayu wakugopswa.

Pa Apokalipse 20:11, 12 tisaleri mafokotozero a mpostolo Jwau a Ntsiku Yakutonga Miseru: ‘Ndaona mpando ukulu wakuyetima, ndaonambo Uyu anakhalapo. Pantsi na thambo pyathawa nkhope yace, penepo mbuto yawo hidagumanikabve tayu. Ndaonambo anyakufa onsene, akulu na ang’ono akulimira patsogolo pa mpando mbafunguliwa mabukhu. Yafungulwambo bukhu inango, ndi bukhu ya umaso. Penepo anyakufa atongiwa ninga mudalembwa m’bukhu ineyi, mwakubverana na macitiro awo.’ Kodi Ntongi anafokotozwa pano mbani?

Yahova Mulungu ndi Ntongi wankulu kakamwe wa anthu. Mbwenye, iye asapasa anango basa ineyi yakutonga miseru. Mwakubverana na Machitiro 17:31, mpostolo Paulu alonga kuti Mulungu ‘asankhula ntsiku ibodzi, inadzatonga iye anthu a pantsi ponsene kubulukira mwa munthu m’bodzi adasankhula iye.’ Ntongi unoyu wakusankhulwa ndi Yezu Kristu wakulamuswa muli akufa. (Jwau 5:22) Kodi Ntsiku Yakutonga Miseru inatoma lini? Pontho inadzakwata ndzidzi ungasi?

Bukhu ya Apokalipse isapangiza kuti Ntsiku Yakutonga Miseru inatoma pakumala kwa nkhondo ya Armagedhoni, munafuna kudzafudzwa makhaliro a pinthu a Sathani pa dziko yapantsi.a (Apokalipse 16:14, 16; 19:19–20:3) Pakumala nkhondo ya Armagedhoni, Sathani na mademonyo ace anadzaikhwa n’djenje mu pyaka 1.000. Nkati mwa ndzidzi unoyu, anthu akukwana 144.000 akuti anatambira unthaka pabodzi na Yezu kudzulu, anadzatonga miseru ninga ‘anyapidzo peno amambo pabodzi na Kristu mu pyaka cikwi cibodzi.’ (Apokalipse 14:1-3; 20:1-4; Aroma 8:17) Ntsiku Yakutonga Miseru si yakucimbiza ya midzidzi 24 basi tayu. Inamala pyaka cikwi cibodzi.

Nkati mwa ndzidzi unoyu wa pyaka cikwi, Yezu Kristu “anadzatonga anthu onsene ali maso na anyakufa.” (2 Timoti 4:1) ‘Anthu ali maso’ ndi ‘mwinji ukulu’ wa anthu anafuna kudzapulumuka pa Armagedhoni. (Apokalipse 7:9-17) Mpostolo Jwau aonambo “anyakufa . . . akulimira patsogolo pa mpando” wakutonga miseru. Ninga mudapikira Yezu, “anthu onsene anagona mu nthumbi anadzabva mafala [a Kristu]. Penepo iwo anadzalamukambo” muli akufa. (Jwau 5:28, 29; Machitiro 24:15) Kodi iwo anadzatongwa na macitiro api?

Mwakubverana na masomphenya a mpostolo Jwau, ‘yafungulwambo bukhu,’ na ‘anyakufa atongiwa ninga mudalemberwa m’bukhu ineyi, mwakubverana na macitiro awo.’ (Apokalipse 20:12) Kodi m’mabukhu anewa mwalembwa pidacita anthu mbadzati kufa? Nkhabe, kutongwa kweneku nee kunadzacitwa kubulukira m’macitiro a anthu mbadzati kufa. Tisadziwa tani pyenepi? Bhibhlya isalonga: “Munthu adafa apulumuswambo mwa madawo.” (Aroma 6:7) Anyakulamuswa muli akufa anabwerera mwakusowa madawo ku umaso. Natenepa mabukhu anewa asaimirira mitemo inango ya Mulungu. Toera kukhala maso kwenda na kwenda, anthu anadzapulumuka pa Armagedhoni na ale anadzalamuswa muli akufa anadzafunika kubvera matongero a Mulungu, pabodzi na mitemo yonsene ipswa inafuna kudzapangiza Yahova nkati mwa pyaka cikwi. Natenepa, m’bodzi na m’bodzi anadzatongwa mwakubverana na pinafuna kudzacita iye nkati mwa Ntsiku Yakutonga Miseru.

Ntsiku Yakutonga Miseru inadzapasa mwai wakutoma kwa anthu azinji wakupfundza pya cifuno ca Mulungu na kukhala maso mwakubverana na cifuno ceneci. Pyenepi pisabveka kuti panadzaoneka basa ikulu yakupfundzisa. Mwandimomwene, ‘anthu onsene anapfundza pya ulungami.’ (Izaiya 26:9) Mbwenye, si onsene anafuna kudzakhala maso mwakubverana na cifuno ca Mulungu tayu. Izaiya 26:10 isalonga: ‘Maseze mubvere ntsisi anyakudawa, iwo hanapfundza ulungami tayu, anathimizira kugongonyesa pyakulungama, mbakhonda kudzindikira ukulu wanu [Yahova].’ Anyakuipa anewa anadzafudzwa kwenda na kwenda nkati mwa Ntsiku Yakutonga Miseru.​—Izaiya 65:20.

Kunkhomo kwa Ntsiku Yakutonga Miseru, anthu akupulumuka ‘anadzakhala na umaso’ waungwiro. (Apokalipse 20:5) Natenepa, nkati mwa Ntsiku Yakutonga Miseru anthu anadzabwerera ku makhaliro awo akutoma aungwiro. (1 Akorinto 15:24-28) Buluka penepo, panadzaoneka kuyeserwa kwakumalisa. Sathani anadzabuluswa n’djenje mbadzatawiriswa kuyesera kunyengeta anthu paulendo wakumalisa. (Apokalipse 20:3, 7-10) Ale anapirira anadzaona kukwanirisika kwa pikiro ya Bhibhlya: ‘Anyakulungama anadzatambira dziko, mbakhala mwenemo kwenda na kwenda.’ (Masalmo 37:29) Natenepa, Ntsiku Yakutonga Miseru inadzakhala nkhombo kwa anthu onsene akukhulupirika!

CIFUPI na pyaka makumanai, anyakupfundza a Bhibhlya abvekesa mwanyapantsi kuti mu caka 1914 mbakudacitika pinthu pyakufunika kakamwe. Kodi pyakucitika pyenepi ndi pipi, na ndi pipangizo pipi pinathonya 1914 ninga caka cakufunika?

Ninga pyalembwa pa Luka 21:24, Yezu alonga: “Yerusalemu [anadzapondiwa] na miyendo ya ajentiu mpaka kumalisira ndzidzi wawo.” Yerusalemu ukhali nzinda ukulu wa dziko ya Ayuda, pontho ikhali mbuto ya utongi ya amambo a nzera wa nyumba ya Mambo Dhavidhi. (Masalmo 48:1, 2) Natenepa, amambo anewa akhali akupambulika pakati pa atsogoleri a madziko. Iwo akhakhala pa “mbuto,” peno mpando waumambo wa Yahova ninga aimiriri a Mulungu. (1 Pya dziko ya Israele 29:23) Natenepa, Yerusalemu akhali cidzindikiro ca utongi wa Yahova.

Kodi utongi wa Mulungu watoma lini ‘kupondiwa na miyendo ya ajentiu,’ na munjira ipi? Pyenepi pyacitika mu caka 607 M.N.W. mudakundwa Yerusalemu na Ababilonya. Buluka penepo nee munthu m’bodzi adzakhala pontho pa mpando wa Yahova, na amambo a nzera wa Dhavidhi alimiriswa. (2 Amambo 25:1-26) Kodi ‘kupondiwa’ kweneku mbukudakhala kwenda na kwenda? Nkhabe, thangwi profesiya ya Ezekyele yalonga pya mambo wakumalisa wa Yerusalemu, Zedekiya: ‘Dula mphapo nthimba yako. Anadzabwera ule adapasa Ine mphambvu toera kutonga. Penepale ine ndinadzaupereka m’manja mwace.’ (Ezekyele 21:31, 32) “Ule adapasa [Yahova] mphambvu” toera kukhala na nthimba wa Dhavidhi ndi Kristu Yezu. (Luka 1:32, 33) Natenepa ‘kupondiwa’ kweneku mbukudamala mu ndzidzi ukhafuna kudzakhala Yezu Mambo.

Kodi cakucitika ceneci cikulu mbicidacitika lini? Yezu apangiza kuti Ajentiu mbadatonga mpaka kumala kwa ndzidzi udapaswa iwo. Mbiri ya Danyele kapitulu 4 isapasa njira yakudziwa kumala kwa ndzidzi unoyu. Iyo isapangiza ndoto yaciprofesiya idakhala na Mambo Nabukodonozore wa Babilonya. Iye aona muti ukulu wakugwandwa. Pfuli yace nee mbidakula thangwi ikhadamangwa na unyolo wa utale na wa safuli. Anju alonga kuti ‘mbudamala pyaka pinomwe [“midzidzi minomwe,” NM].’​—Danyele 4:7-13.

M’midzidzi inango, miti isaphatisirwa m’Bhibhlya toera kupangiza utongi. (Ezekyele 17:22-24; 31:2-5) Natenepa, kugwandwa kwa muti unoyu wakuphipirisa kusapangiza njira yakulimiriswa kwa utongi wa Mulungu, wakuimirirwa na amambo ku Yerusalemu. Masomphenya anewa apangiza kuti ‘kupondiwa kwa Yerusalemu’ mbukudakhala kwa ndzidzi ungasi basi—‘midzidzi minomwe.’ Kodi ndzidzi unoyu ukhali wakulapha tani?

Apokalipse 12:6, 14, [MZ] isapangiza kuti midzidzi mitatu na hafu ndi ‘ntsiku cikwi na madzana mawiri na makumatanthatu.’ Natenepa ‘midzidzi minomwe’ mbidakhala ntsiku 1.260 kubwerezera kawiri, peno ntsiku 2.520. Mbwenye Ajentiu hadalimira ‘kuponda’ utongi wa Mulungu mu ntsiku 2.520 mudamala kugwa Yerusalemu tayu. Mwapakweca, profesiya ineyi isalonga pya ndzidzi wakulapha kakamwe. Mwakubverana na Numero 14:34 na Ezekyele 4:6, analonga kuti ‘caka cibodzi ndi ntsiku ibodzi,’ ‘midzidzi minomwe’ mbidakhala pyaka 2.520.

Pyaka 2.520 pyenepi pyatoma mu nthanda ya Malandalupya ya 607 M.N.W. mudafudzwa Yerusalemu na Ababilonya, pontho mudabuluswa mambo wa nzera wa nyumba ya Dhavidhi pa mpando wace. Ndzidzi unoyu wamala mu nthanda ya Malandalupya ya 1914. Pa ndzidzi unoyu, wamala ‘ndzidzi wa ajentiu,’ na Yezu Kristu aikhwa ninga Mambo wakudzulu wa Mulungu.a—Masalmo 2:1-6; Danyele 7:13, 14.

Ninga mudalongeratu Yezu, ‘kukhalapo’ kwace ninga Mambo wakudzulu mbakudadzindikirwa na pyakucitika pikulu pya dziko: nkhondo, njala, piteketeke na miliri. (Mateo 24:3-8; Luka 21:11) Pyakucitika pyenepi pisapereka umboni ukulu wakuti mwandimomwene 1914 ndi caka cakubalwa kwa Umambo wa Mulungu kudzulu na kutoma kwa “ntsiku zakumalisa” za makhaliro ano akuipa a pinthu.—2 Timoti 3:1-5.