NSOLO WA REVISTA | KODI YEZU ASAPULUMUSA​—MU NJIRA IPI?

Thangwi Yanji Tisafunika Kupulumuswa?

‘Munthu wakubalwa na nkazi, ntsiku zace ndi zakucepa na zakudzala na nyatwa. Ndi ninga luwa inagaka namacibese namaulo mbibunyala; ninga nthundzi unazambazika nee limira.’​—Yobe 14:1, 2.

Kutomera kale, anthu asanyerezera kuti mbipidakhala pyakutsandzayisa kakamwe kupitiriza kukhala mphale peno ntsikana na ungumi wadidi wa kwenda na kwenda. Mbwenye pyakutsukwalisa mphyakuti tisafa. Mafala a Yobe adalongwa padzulu apa, akuti alembwa mu pyaka pyakupiringana pikwi pitatu nduli, ndi andimomwene ntsiku zino.

Cifuno cakukhala na umaso wa kwenda na kwenda ndi ca anthu onsene, pontho ndi cakufunika kakamwe. Bhibhlya isatipanga kuti Mulungu aikha m’mitima yathu cifuno cakukhala kwenda na kwenda. (Koelete 3:11, Tradução do Novo Mundo) Khala ndi tenepo, kodi Mulungu waufuni mbadaikha cifuno mwa ife cakuti nkhabe kwanisika? Khala ntawiro wanu ndi wakuti nkhabe, mwatawira mwadidi. Mafala a Mulungu asacemera kufa ninga nyamalwa mbapikira kuti ‘nyamalwa unoyu anadzafudzwa kwenda na kwenda.’​—1 Akorinto 15:26.

Mphyakukhonda penula kuti kufa ndi nyamalwa. Nee m’bodzi asakomerwa nako. Tingafuna kugwerwa na ngozwi, tisandzwenga, kubisala peno kuthawa. Tingaduwala, tisasaka ukondzi toera kukhala mwadidi. Tisacita pyonsene pinakwanisa ife toera kucalira pinthu pyakuphekesa umaso wathu.

Kodi pana thangwi yakukhulupira kuti nyamalwa unoyu wakale kakamwe anadzafudzwa? Inde. Nciti wathu, Yahova Mulungu nee acita anthu toera akhale na umaso mu pyaka pyakucepa buluka penepo mbafa. Kufa kwa anthu nee cikhali cifuniro cace cakutoma. Iye akhafuna kuti anthu akhale kwenda na kwenda pa dziko yapantsi, pontho pinafuna iye asapikwanirisa.​—Izaiya 55:11.

Kodi kufa kunadzamaliswa tani? Mu mbiri yonsene, anthu asayesera kumalisa kufa, mbwenye asacimwana. Mpaka lero, iwo asapitiriza kufufudza njira zakumalisa kufa. Masiyetista asasanya mavasina na mitombwe yakuti yapungula mautenda anango. Iwo acita pyenepi mukupfundza selula ya pinthu pyaumaso. M’madziko mazinji, m’medya, anthu asakhala maso ntsiku zizinji kupiringana anthu a mu pyaka dzana pya nduli. Ngakhale tenepa, iwo asafa. Ninga pinalonga Bhibhlya, “pyonsene pisabwerera kupfumbi.”​—Koelete 3:20.

Undimomwene ndi wakuti ife nee tisafunika kunyindira anthu toera kumalisa nkandzo unoyu wakale kakamwe. Yahova Mulungu ali dzololo toera kutipulumusa peno kutitsidzikiza kwa nyamalwa wathu, kufa, kubulukira mwa Yezu Kristu