manyerezero athu na ‘pinthu pyonsene pyamaso, . . . pyaulungami, pyakucena na pyakufuniwa.’ Tingacita pyenepi, “Mulungu wa ntendere” anadzatipasa ntendere wa m’manyerezero na wa muntima.​—Afilipi 4:8, 9.

KUFUNIKA KWA PHEMBERO

Cikhulupiro candimomwene cisatiphedza kuthimbana na kupswipa ntima. Bhibhlya isaticenjeza toera ‘kukhala maso mbatikhonda kupwaza maphembero.’ (1 Pedro 4:7) Ife tinakwanisa kuphemba ciphedzo ca Mulungu, udziwisi na cipapo cace toera kucita pyadidi m’makhaliro athu, na cinyindiro cakuti “iye anabvera maphembero athu onsene.”​—1 Jwau 5:15.

Bhibhlya isafokotoza kuti ‘ntongi wa dziko ino’ ndi Sathani, tayu Mulungu, pontho kuti ‘dziko yonsene iri m’manja mwa nyakuipa.’ (Jwau 12:31; 1 Jwau 5:19) Ndi thangwi yace, Yezu nee akhalonga mafala akuphipirisa mudatipfundzisa iye kuphembera: ‘Tipulumuseni kwa nyakuipa.’ (Mateo 6:13) Alona alonga: “Mukhatoma kulira cingalingali ndaphembera kuna Yahova kuti andiphedze toera nditsalakane mabvero anga. Pontho mamunanga wakufunika andicemera mbacita phembero pabodzi na ine. Mwandimomwene phembero isaphedza.” Ndi ninga pinalonga Bhibhlya: ‘Yahova ali dhuzi na onsene anancemera mwandimomwene.’​—Masalmo 145:18.

CIDIKHIRO CATHU CA NTSOGOLO

Mu Nkhani yace ya Paphiri, Yezu apfundzisa atowereri ace toera kuphembera: ‘Umambo wanu mbudze.’ (Mateo 6:10) Umambo wa Mulungu unadzamalisa kwenda na kwenda kupswipa ntima konsene kwakuphekesa. Kubulukira mwa Yezu, ‘Ntongi wa Ntendere,’ Mulungu ‘anadzamalisa nkhondo pantsi ponsene.’ (Izaiya 9:6; Masalmo 46:9) ‘Iye [Mulungu] anadzatonga miseru pakati pa anthu azinji . . . Iwo nkhabe kudzalamusirana supada, dziko na dziko inango na iwo nkhabe kudzapfundzabve nkhondo. . . . Nee m’bodzi anadzaagopesa.’ (Mikeya 4:3, 4, NM) Mabanja akutsandzaya ‘anadzamanga nyumba zawo mbakhalamo, anadzatceka miti ya mauva mbadya misapo yace.’ (Izaiya 65:21) ‘Pontho nee m’bodzi wakukhala n’dziko anadzalonga kuti: ‘Ndikuduwala.’’​—Izaiya 33:24.

Lero, mwakukhonda tsalakana kuwangisira konsene, anthu nkhabe kwanisa kucalira “pinthu pyakukhonda kudikhirwa” peno kucalira kukhala pa mbuto yakudawika na ndzidzi wakudawika. (Koelete 9:11, NM) Ninga pidacitika m’madzana a pyaka, nkhondo, uphanga na utenda pisapitiriza kupha anthu adidi. Kodi anthu anewa anaphiwa mwakukhonda kudawa ali na cidikhiro canji?

Pikwi na pikwi pya anthu akukhonda lengeseka, akuti numero yace anaidziwa ndi Mulungu basi, anadzakhala pontho maso. Cincino, iwo ali kugona, mwakukoyeka m’manyerezero aungwiro a Mulungu mpaka ntsiku yakuti ‘onsene anagona mu nthumbi . . . anadzalamuka.’ (Jwau 5:28, 29) Kulonga pya kulamuka muli akufa, Bhibhlya isatipasa cinyindiro: ‘Ife tiri na cidikhiro ceneci ninga nangula ya moyo wathu, ico ndi cakunyindirika na cakukhonda tekenyeka.’ (Ahebere 6:19, NM) Pontho Mulungu ‘apereka cinyindiro kwa anthu onsene mukulamusa [Yezu] muli akufa.’​—Machitiro 17:31, NM.

Lero, ngakhale ale anayesera kukomeresa Mulungu asathimbana na kupswipa ntima. Mukucita pinthu pyakufunika, kufendedzera Mulungu m’phembero na kukulisa cikhulupiro mu cidikhiro ca ntsogolo cinalongwa m’Bhibhlya, Paul, Janet na Alona, akupembera pakuthimbana na kupswipa ntima. Ninga pidacita iye kuna iwo, ‘Mulungu wakukhulupirika adzalise mitima yanu na kusekera konsene na ntendere onsene, mu kukhulupira iye.’​—Aroma 15:13.

BHIBHLYA ISACINJA UMASO WA ANTHU

Umaso Wanga Ukhabuluka Pakuipa Kuenda Pakutekera

Yakulongwa na Stephen Mcdowell

CAKA CAKUBALWA: 1952

DZIKO YAKUBALWA: ESTADOS UNIDOS

MBIRI: MANYEREZERO AUPHANGA

MBIRI YANGA: Ndakula n’cisa ca Los Angeles, California, E.U.A., cakudzala na mapanga na kuphatisira mitombwe yakuledzeresa. Anyakubalanga akhali na ana atanthatu, ine ndikhali waciwiri.

Mama atikuza ninga piwalo pya gereja ya evanjelyu. Mbwenye ninga mphale, ndikhali na umaso uwiri. M’madimingu ndikhaimba na nsoka nyimbo za gereja. Ntsiku zinango za sumana, ndikhakhala m’maphwando, kuphatisira mitombwe yakuledzeresa na kucita ulukwali.

Ndikhali na manyerezero auphanga. Ndikhafuna kuphatisira cinthu consene ninga cida toera kuwina. Pikhapfundza ine ku gereja nee pikhandiphedza. Kazinji kene ndikhalonga, “Kubwezera pyakuipa ndi kwa Mbuya​—ine ndine cida cace!” Pikhakhala ine kuxikola kunkhomo kwa pyaka 1960, ndikhadathaphuliswa na Panteras Negras, nsoka wa ndale ukhadziwika thangwi yakutsidzikiza kwawo ufulu wa anthu. Ndapita mu nsoka unoyu wakupfundza ufulu wa anthu. Kazinji kene tikhacita uviyaviya mpaka kufunga xikola mu ndzidzi wakucepa.

Pisaoneka kuti uviyaviya nee ukhakwanirisa pifuno pyanga pyauphanga. Natenepa, ndatoma kuida anthu mwausumankha. Mwacitsandzo, ndzidzi unango ine na axamwali anga tikhaona mafilimu akhapangiza pya ubitcu ukhacitwa anthu a ku Afrika mu dziko ya Estados Unidos. Mukukulumizwa na kusowa ulungami kweneku, tatoma kumenya aphale azungu m’mbuto yakuonera mafilimu. Buluka penepo taenda kupisa pya azungu, kasaka anthu anango toera kuamenya.

Mbandidzati kukwanirisa pyaka 20, ine na abale anga tacita uphanga uzinji kakamwe. Tapita n’nyatwa na mautongi. M’bodzi wa abale anga ang’ono akhali ciwalo ca mapanga akudziwika pacisa, ine ndabvungazikana nawo. Umaso wanga ukhabuluka pakuipa kuenda pakutekera.

BHIBHLYA YACINJA TANI UMASO WANGA: Anyakubala a xamwali wanga akhali Mboni za Yahova. Iwo andiphemba toera kuenda kumisonkhano yawo ya mpingo, ine ndatawira. Bulukira ntsiku ineyo, ndakwanisa kuona kuti Mboni za Yahova ndi zakusiyana. Munthu onsene akhali na Bhibhlya, pontho akhaiphatisira nkati mwa misonkhano. Ngakhale anang’ono akhacitambo nkhani! Ndadzumatirwa kakamwe pidapfundza ine kuti Mulungu ali na dzina, Yahova, pontho kubva mbikaphatisirwa. (Masalmo 83:18, NM) Mpingo ukhali na anthu a madziko akusiyanasiyana, pikhaonekeratu kuti nee akhasankhulana mitundu.