Kuwina Kwa Umambo​—Kukhazikisa Mphangwa Zadidi Mwakubverana na Mitemo ya Dziko

MU NDZIDZI unamwaza imwe mphangwa nyumba na nyumba, musabva cingalingali na kutali. Cingalingali cisapitiriza na kulira mwakugaluza. Munatoma imwe kulonga na mwanaciro nyumba, andzanu asadzudzumika mu ndzidzi unafika motokala wa apolixa. Nkadamu wa apolixa asatcita mbabwera cifupi, mbabvundza: “Uwiri wanu ndimwe a mbumba inafamba nyumba na nyumba mbilonga pya Bhibhlya? Tisatambira mphangwa zakuipa zinalonga pya imwe!” Imwe musatawira mwacilemedzo, mbamulonga kuti ndimwe Mboni ya Yahova. Ninji pinafuna kudzacitika?

Khundu ikulu ya nkhani ineyi isanyindira mbiri. Mu pyaka pizinji, kodi mautongi a dziko inakhala imwe asatsalakana tani Mboni za Yahova? Kodi musagumanika ufulu wa uphemberi? Khala ndi tenepo, pasaoneka kuti pana pinthu pizinji toera kucita ninga abale na alongo anu auzimu a makhumi a pyaka adaphata basa mwakuwanga toera ‘kubvunulira na kukhazikisa mphangwa zadidi.’ (Afil. 1:7) Mwakukhonda tsalakana kunakhala imwe, kunyerezera mwacidikhodikho pya kuwina kwa Mboni za Yahova m’mathando akutonga kunakuwangisani cikhulupiro. Mu khundu ino, tinadzadinga pyakucitika pingasi pyakupambulika. Kuwina kwathu kusapangiza kuti Umambo ndi wandimomwene, tekhene nee mbitidakwanisa kuwina!