Mudabuluswa Mitawiro ya Umaso Wathu Wacikristu na Utumiki
SUMANA 6-12 YA MAIO
MPFUMA ZA MAFALA A MULUNGU | 2 AKORINTO 4-6
“Ife Nkhabe Kubwerera Nduli”
(2 Akorinto 4:16) Na thangwi ineyi, ife nkhabe kubwerera nduli, maseze kunja manungo athu akumala, mbwenye nkati mwathu musasasanyirwa ntsiku zonsene.
Sentinela 15/08/04 tsa. 25 ndima 16-17
Maseze Tinete, Mbwenye Nee Tisafunika Kubwerera Nduli
16 Mwandimomwene kuwangisa uxamwali wathu na Yahova Mulungu ndi cinthu cakufunika kakamwe. Thangwi uxamwali unoyu unatiphedza toera tikhonde kusiya kuntumikira midzidzi inaneta ife. Yahova ndi ule “anawangisa ale adaneta” mbapasa mphambvu adaisowa. (Izaiya 40:28, 29) Mafala anewa akwanirisika kuna mpostolo Paulu, mbalonga: “Ife nkhabe kubwerera nduli, maseze kunja manungo athu akumala, mbwenye nkati mwathu musasasanyirwa ntsiku zonsene.”—2 Akorinto 4:16.
17 Mafala akuti “ntsiku zonsene,” asapangiza kuti tisafunika kupfundza ntsiku zonsene mabukhu anatipasa gulu ya Yahova. Mulongo unango adatumikira mwakukhulupirika ninga misionaryo mu pyaka 43, midzidzi inango akhali wakuneta na wakusowa mphambvu, mbwenye nee abwerera nduli. Iye alonga: “Ndiri na nsambo wakulamuka nakweru toera kucita phembero kuna Yahova na kuleri Bhibhlya mbandidzati kuphata basa. Kucita pyenepi kusandiphedza toera ndikwanise kupirira mpaka cincino.” Ife tinakwanisa kunyindira kuti Yahova anatiphedza tingacita phembero “ntsiku zonsene” na kunyerezera mwadidi pya makhaliro ace na mapikiro ace a ntsogolo.
(2 Akorinto 4:17) Thangwi maseze nyatwa zinaona ife ndi za ndzidzi wakucepa na zakululupa, izo zisabweresa mbiri ikulu kakamwe kuna ife, mbiri yakuti nkhabe kumala;
Perspicaz vol. 3 tsa. 256 ndima 1
Kupirira
Pontho ndi pyakufunika kwa ife ninga Akristu ndzidzi onsene kunyerezera pya cidikhiro ca umaso wakukhonda mala mu dziko yakusowa madawo. Ife tisafunika kupitiriza na cidikhiro ceneci, maseze anyamalwa athu atitcinge peno atiphe. (Aroma 5:4, 5; 1 Ates. 1:3; Apok. 2:10) Nyatwa zinatamba ife cincino ndi zakucepa kakamwe tingazilandanisa na cidikhiro ciri na ife. (Aroma 8:18-25) Thangwi ya cidikhiro ceneci, ngakhale nyatwa zinatamba ife zikhale zakunentsa, mbwenye tisadziwa kuti ndi za “ndzidzi wakucepa na zakululupa.” (2 Akor. 4:16-18) Kudziwa pyenepi na kukhonda kuduwala cidikhiro cathu Cacikristu, kunatiphedza toera tikhonde kubwerera nduli na kukhala akukhulupirika kuna Yahova Mulungu.
(2 Akorinto 4:18) mu ndzidzi wakuti nee tisaikha maso athu ku pinthu pyakuoneka na maso, mbwenye ku pinthu pyakukhonda kuoneka na maso. Thangwi pinthu pinaona ife na maso athu ndi pya ndzidzi wakucepa, mbwenye pinthu pinakhonda ife kuona ndi pya kwenda na kwenda.
Kusaka Mpfuma Zauzimu
(2 Akorinto 4:7) Mbwenye ife tiri na mpfuma iyi mu pyombo pya dongo, toera kupangiza kuti mphambvu yakupiringana yacibaliro isabuluka kuna Mulungu, tayu kuna ife.
Sentinela 01/02/12 tsa. 28-29
“Citani Pinthu Pinakomeresa Yahova”
M’bale David Splane, m’bodzi wa Mathubo Akutonga acita nkhani yakubuluswa m’Malemba. (2 Akorinto 4:7) Ndi ipi mpfuma ineyi? Kodi mpfuma ineyi ndi udziwisi? M’bale Splane atawira kuti “nkhabe. Mpfuma ikhalonga Paulu pa vesi ineyi ndi ‘utumiki wakudziwisa undimomwene.’ ” (2 Akorinto 4:1, 2, 5) Iye akumbusa anyakupfundza kuti iwo apfundza pizinji mu miyezi mixanu pyakuti pinaaphedza toera kucita basa yakupambulika yakumwaza mphangwa. Iwo asafunika kuona kuti basa ineyi ndi yakufunika kakamwe.
M’bale Splane alonga kuti “pyombo pya dongo” pisaimirira manungo athu. Iye alonga kusiyana kwa combo ca dongo na ca ouro. Kazinji kene pyombo pinaphatisirwa ndi pya dongo, tayu pya ouro. Tingaikha mpfuma mu combo ca ouro, panango tinadzudzumika na combo na mpfuma idaikha ife mwenemo. Pakumalisa m’bale Splane alonga: “Ninga amisionaryo nee musafunika kudzikuza, mbwenye musafunika kuphedza anthu toera adziwe Yahova. Natenepa musafunika kukhala akucepeseka ninga combo ca dongo.”
(2 Akorinto 6:13) Ine ndisalonga na imwe ninga ananga, titsalakaneni ninga munakutsalakanani ife, fungulanimbo mwakukwana mitima yanu.
Sentinela 15/11/09 tsa. 21 ndima 7
Pitirizani Kufuna Abale Anu
7 Ndiye tani ife? Tinapangiza tani kuti ‘tafungula mwakukwana mitima yathu’ toera kufuna abale athu? Midzidzi inango nkhabe nentsa kuna anthu a thunga ibodzi ene peno a dziko ibodzi ene kufunana unango na ndzace. Pontho ale anakomerwa na masendzekero mabodzi ene kazinji kene asamala ndzidzi uzinji pabodzi pene. Mbwenye khala Akristu anango asaticimwanisa kucedza na abale na alongo anango tisafunika ‘kufungula mwakukwana mitima yathu.’ Natenepa mphyadidi kubvundzika: ‘Kodi ndi pyakunentsa kwa ine kumwaza mphangwa, peno kucita mabasa anango pabodzi na abale na alongo akuti nee ndi axamwali anga? Ndisacalira kucedza na anthu apswa Panyumba ya Umambo, mbindinyerezera kuti iwo nee ndi axamwali anga? Kodi ndisamwanyika abale na alongo akugwesera kuphatanizambo aphale na atsikana mu mpingo?’
SUMANA 13-19 YA MAIO
MPFUMA ZA MAFALA A MULUNGU | 2 AKORINTO 7-10
“Kuphedza Ale Adagwerwa na Cidengwa Ndi Khundu ya Basa Yathu Yakumwaza Mphangwa”
(2 Akorinto 8:1-3) Abale, cincino tisafuna kukudziwisani pidacita mpingo wa ku Masedhonya thangwi ya kukoma ntima kukulu kwa Mulungu kudapangizwa iwo. 2 Iwo aona nyatwa mu ndzidzi ukhathimbana iwo na pinentso pikulu, mbwenye iwo apangiza kukomerwa kwawo, mbapasa mwakudzala manja. Iwo acita pyenepi maseze akhali akutcerenga kakamwe. 3 Iwo acita pyonsene toera kupereka mwakubverana na makhaliro awo. Mwandimomwene ine ndiri na umboni wakuti iwo acita pizinji kupiringana makhaliro awo.
Sentinela 01/11/98 tsa. 25 ndima 1
“Mulungu Asafuna Munthu Anapasa Mwakukomerwa”
Pakutoma, Paulu apanga Akristu a ku Korinto pya Amasedhonya akuti akhali citsandzo cadidi cakuphedza anango. Paulu alonga: “Mu ndzidzi ukhathimbana iwo na pinentso pikulu, . . . iwo apangiza kukomerwa kwawo, mbapasa mwakudzala manja. Iwo acita pyenepi maseze akhali akutcerenga kakamwe.” Amasedhonya nee akakamizwa toera kuphedza anango. M’mbuto mwace Paulu alonga kuti “iwo akhatidembetera mwakubwereza-bwereza toera akwanisembo kukhala na nkhombo yakupasa na ntima onsene.” Kupasa na ntima onsene kudacita Amasedhonya kukhali kwakudzumatirisa, thangwi iwo “akhali akutcerenga kakamwe.”—2 Akorinto 8:2-4.
Umambo wa Mulungu Ukutonga! tsa. 209 ndima 1
Utumiki Wakuphedzera Pangaoneka Pidengwa
MU CAKA 46 N.W., mu Yudeya mukhali na njala ikulu. Anyakupfundza a Kristu Aciyuda akuti akhali mwenemu nee akhakwanisa kugula cakudya thangwi cikhali cakucepa, pontho cikhadhula kakamwe. Iwo akhali na njala, pontho nee akhali na cakucita. Natenepa, iwo akhafunika kuona ciphedzo ca Yahova munjira yakuti cipo pyacitika kwa anyakupfundza a Kristu. Ninji pikhafuna citika?
(2 Akorinto 8:4) Nakufuna kwawo, iwo akhatidembetera mwakubwereza-bwereza toera akwanisembo kukhala na nkhombo yakupasa na ntima onsene, toera acitembo khundu m’basa yakuphedza anthu akucena.
Umambo wa Mulungu Ukutonga! tsa. 209-210 ndima 4-6
Utumiki Wakuphedzera Pangaoneka Pidengwa
4 Mu tsamba yace yaciwiri kwa Akorinto, Paulu alonga kuti basa yace ikhaphataniza makhundu mawiri. Maseze tsamba ya Paulu yatumizwa kwa Akristu akudzodzwa, mafalace asaphatambo basa kwa “mabira anango” a Kristu. (Juw. 10:16) Khundu ibodzi ya basa yathu ndi “yakuphedza anthu toera akhale pontho na uxamwali na” Mulungu peno kumwaza mphangwa na kupfundzisa. (2 Akor. 5:18-20; 1 Tim. 2:3-6) Khundu inango isaphataniza kuphedza Akristu andzathu, makamaka ‘angagwerwa na pidengwa.’ (2 Akor. 8:4) Mafala akuti “basa yakuphedza anthu toera akhale pontho na uxamwali” na Mulungu, na ‘basa yakuphedza’ pangaoneka pidengwa, athumburuzwa kubulukira mu fala Yacigerego di·a·ko·ní·a. Thangwi yanji pyenepi mphyakubveka?
5 Mukuphatisira fala ibodzi ene Yacigerego m’makhundu mawiri ene, Paulu aphataniza basa yakuphedzera pangaoneka pidengwa na mitundu inango ya basa yakuti ikhacitwa mu mpingo Wacikristu. Iye akhadalongeratu: “Pana njira zakusiyana-siyana zakutumikira, mbwenye Mbuya ndi m’bodzi ene; pana mabasa akusiyana-siyana, . . . Mbwenye mabasa anewa onsene asacitwa na ciphedzo ca nzimu wakucena ubodzi ene.” (1 Akor. 12:4-6, 11) Mwandimomwene, Paulu aphataniza mabasa akusiyana-siyana a mipingo na “utumiki wakucena.” (Aroma 12:1, 6-8) Mwakukhonda penula, iye akhaona kuti mphyakuthema kuphatisira ndzidzi wace toera “kutumikira abale.”—Aroma 15:25, 26.
6 Paulu aphedza Akristu a ku Korinto toera kuona kuti thangwi yanji basa yakuphedzera pidengwa ikhali khundu ya utumiki wawo na kulambira Yahova. Paulu alonga kuti Akristu anaphedzera pidengwa asacita pyenepi thangwi ‘asabvera mphangwa zadidi zinalonga pya Kristu.’ (2 Akor. 9:13) Natenepa, mukukulumizwa na cifuno cawo cakuphatisira cipfundziso ca Kristu, Akristu asaphedza anyakukhulupira andzawo. Udidi unapangiza iwo mukuphedzera abale awo, Paulu alonga kuti mwandimomwene ndi cipangizo ca “kukoma ntima kukulu kwa Mulungu.” (2 Akor. 9:14; 1 Ped. 4:10) Natenepa, mukulonga pya kuphedzera abale athu mu ndzidzi wa nyatwa, kwakuti kusaphataniza basa yakuphedzera pangaoneka pidengwa, A Sentinela 1° de Março de 1976, yalonga: “Ife cipo tisafunika kupenula kuti Yahova Mulungu na Mwanace Yezu Kristu asapasa ntengo ntundu unoyu wa basa.” Inde, basa yakuphedzera pangaoneka pidengwa ndi khundu yakufunika ya utumiki wakupambulika.—Aroma 12:1, 7; 2 Akor. 8:7; Aheb. 13:16.
(2 Akorinto 9:7) M’bodzi na m’bodzi mbacite ninga mudanyerezera iye muntima mwace, tayu mwakukhonda funa peno mwakukakamizwa, thangwi Mulungu asafuna munthu anapasa mwakukomerwa.
Umambo wa Mulungu Ukutonga! tsa. 196 ndima 10
Mabasa a Umambo wa Mulungu Asaphedzerwa Tani
10 Yakutoma, ife tisacita pyakupereka pyaufulu thangwi tisafuna Yahova na tisafuna kucita pinthu “pinakomerwa na iye.” (1 Juw. 3:22) Mwandimomwene, Yahova asakomerwa na ntumiki wace anapereka na ntima onsene. Tendeni tione mafala a mpostolo Paulu analonga pyakupasa Kwacikristu. (Lerini 2 Akorinto 9:7.) Nkristu wandimomwene nee asafunika kukhala nyakupasa wakunyinyirika, peno wakukakamizwa. Mbuto mwace, iye asapasa ninga “mudanyerezera iye muntima mwace.” Nyakupasa unoyu asakomeresa Yahova, thangwi “Mulungu asafuna munthu anapasa mwakukomerwa.” Bhibhlya inango isalonga: “Mulungu asafuna anthu ale anakomerwa na kupasa.”
Kusaka Mpfuma Zauzimu
(2 Akorinto 9:15) Tendeni tipereke takhuta kuna Mulungu thangwi ya muoni wace ukulu kakamwe.
Ncenjezi 01/16 tsa. 12 ndima 2
Kodi Musakhuyiwa Tani na ‘Muoni Ukulu Kakamwe’ wa Mulungu?
2 Paulu akhadziwa kuti kubulukira mu ntsembe yaungwiro ya Kristu mapikiro onsene akudzumisa a Mulungu mbadakwanirisika. (Lerini 2 Akorinto 1:20.) Natenepa, ‘muoni unoyu ukulu kakamwe’ mbudaphataniza udidi onsene na ufuni wandimomwene wakuti Yahova mbadaupangiza kwa ife kubulukira mwa Yezu. Mwandimomwene, muoni unoyu wakufunika kakamwe ndi wakunentsa kufokotozwa na anthu. Mphapo muoni unoyu usatikhuya tani? Pontho iwo unatikulumiza tani mu ndzidzi unakhunganyika ife toera kugumanika pa cikumbuso ca kufa kwa Kristu, Ncitatu, ntsiku 23 ya Murope ya caka 2016?
(2 Akorinto 10:17) “Mbwenye munthu anagaya, mbagaye thangwi ya Yahova.”
Despertai 08/07/99 tsa. 20-21 ndima 5
Kodi Kugaya Ndi Kwadidi?
M’malemba Acigerego Acikristu, fala yakuti kau·khá·o·mai, yathumburuzwa “kudzikuza, kutsandzaya na kugaya,” pontho iyo isaphatisirwa munjira yadidi na yakuipa. Mwacitsandzo Paulu alonga kuti “tendeni titsandzaye na cidikhiro cakuti tinadzatambira mbiri ya Mulungu.” Pontho iye alonga: “Munthu anagaya, mbagaye thangwi ya Yahova.” (Aroma 5:2; 2 Akorinto 10:17) Pyenepi pisabveka kuti tisafunika kugaya thangwi Mulungu wathu ndi Yahova, mabvero akuti anaticitisa kukhala akutsandzaya thangwi ya dzina yace na makhaliro ace adidi.
SUMANA 20-26 YA MAIO
MPFUMA ZA MAFALA A MULUNGU | 2 AKORINTO 11-13
“Paulu Apirira ‘Munga Ukhali m’Manungo Mwace’ ”
(2 Akorinto 12:7) basi ene thangwi ndisapaswa mphangwa zenezi zakudzumisa. Toera ndikhonde kugaya mwakupiringana midida, ine ndaikhwa munga m’manungo mwanga, anju wa Sathani, toera apitirize kundimenya mbama, toera ine ndikhonde kugaya kakamwe.
Sentinela 15/06/08 tsa. 3-4 ndima 3
Maseze Titambe Nyatwa Tinakwanisa Kukhala Amphambvu
Ntumiki wakukhulupirika Paulu, aphemba Yahova toera abuluse ‘munga ukhali m’manungo’ mwace wakuti ukhali nyatwa ikulu. Iye adembetera Mulungu katatu toera abuluse nyatwa ineyi. Ife nkhabe dziwa kuti ikhali nyatwa ya ntundu wanji, mbwenye ikhali ninga munga wakuti ukhacitisa Paulu kukhonda tsandzaya m’basa ya Yahova. Paulu alandanisa nyatwa ineyi na kumenywa mbama kazinji kene. Mbwenye Yahova antawira: “Kukoma ntima kwanga kukulu kwakwana kuna iwe, thangwi mphambvu yanga isapangizika mwakukwana mu kufewa kwako.” Yahova nee abulusa munga ukhali m’manungo mwa Paulu. Iye akhafunika kuupirira, natenepa iye alonga: “Mu ndzidzi unakhala ine wakufewa, ndi mu ndzidzi unoyu unakhala ine wamphambvu.” (2 Akor. 12:7-10) Kodi iye akhafuna kulonganji na mafala anewa?
(2 Akorinto 12:8, 9) Ine ndadembetera Mbuya katatu, toera abuluse munga unoyu m’manungo mwanga. 9 Mbwenye iye andipanga: “Kukoma ntima kwanga kukulu kwakwana kuna iwe, thangwi mphambvu yanga isapangizika mwakukwana mu kufewa kwako.” Natenepa, mwakukomerwa kakamwe, ine ndinagaya thangwi yakufewa kwanga, toera mphambvu za Kristu zipitirize muna ine ninga khumbi.
Sentinela 15/12/06 tsa. 24 ndima 17-18
Yahova Asapasa “Nzimu Wakucena Ale Anam’phemba”
17 Mukutawira maphembero a Paulu, Mulungu alonga kuna iye: “Kukoma ntima kwanga kukulu kwakwana kuna iwe, thangwi mphambvu yanga isapangizika mwakukwana mu kufewa kwako.” Buluka penepo Paulu alonga: “Natenepa, mwakukomerwa kakamwe, ine ndinagaya thangwi yakufewa kwanga, toera mphambvu za Kristu zipitirize muna ine ninga khumbi.” (2 Akorinto 12:9; Masalmo 147:5) Paulu adzindikira kuti kubulukira mwa Kristu, Mulungu aphatisira mphambvu zace toera kuntsidzikiza ninga khumbi. Lero, Yahova asatawira maphembero athu munjira ibodzi ene. Iye ndi ninga mbuto yakuthawira kuna atumiki ace.
18 Ndimomwene kuti khumbi nkhabe kupingiza madzi kubvumba peno mphepo, mbwenye isatsidzikiza anthu. Munjira ibodzi ene, “mphambvu za Kristu” nkhabe citisa kuti tikhonde kugwerwa na nyatwa peno mayesero, mbwenye zisatitsidzikiza toera pinthu pyakuipa pinabweresa Sathani na dziko yace pikhonde kufudza uxamwali wathu na Yahova. (Apokalipse 7:9, 15, 16) Maseze mayesero akhonde ‘kubuluka’ muna imwe, khalani na cinyindiro cakuti Yahova asaona nyatwa zanu, pontho iye “anadzakutawirani” mungancemera. (Izaiya 30:19; 2 Akorinto 1:3, 4) Paulu alonga: “Mulungu ndi wakukhulupirika, iye nkhabe kudzatawirisa kuti muthimbane na mayesero akuti nee munakwanisa kuapirira, mbwenye mayesero angabwera, iye anadzakusakirani njira yakubuluka nayo, toera mukwanise kupirira.”—1 Akorinto 10:13; Afilipi 4:6, 7.
(2 Akorinto 12:10) Munjira ineyi, ine ndiri wakutsandzaya thangwi ya Kristu mu kufewa kwanga, pakutikanwa, pakusowa pinthu, pakutcingwa, m’midzidzi yakunentsa. Thangwi mu ndzidzi unakhala ine wakufewa, ndi mu ndzidzi unoyu unakhala ine wamphambvu.
Ncenjezi 01/18 tsa. 5 ndima 8-9
‘Iye Asapasa Mphambvu Anthu Akuneta’
8 Lerini Izaiya 40:30. Panango tiri na maluso mazinji, mbwenye pinakhala pyakunentsa kucita pinango tekhene. Ineyi ndi ntsonga yakufunika kakamwe kwa ife tonsene. Mpostolo Paulu akhakwanisa kucita pinthu pizinji, mbwenye nee akhakwanisa kucita pyonsene pikhafuna iye. Pidacita iye phembero kuna Yahova mbalonga mabvero ace, Yahova ampanga: “Mphambvu yanga isapangizika mwakukwana mu kufewa kwako.” Paulu abvesesa pidampanga Yahova. Ndi thangwi yace iye alonga: “Mu ndzidzi unakhala ine wakufewa, ndi mu ndzidzi unoyu unakhala ine wamphambvu.” (2 Akorinto 12:7-10) Kodi iye akhafuna kulonganji?
9 Paulu adzindikira kuti nee mbadakwanisa kucita pinthu pyonsene, iye akhafunambo ciphedzo. Natenepa nzimu wakucena ukhampasa mphambvu mu ndzidzi ukhafewa iye. Mbwenye nzimu wakucena ukhampasambo mphambvu toera kucita pinthu pizinji. Nzimu wa Mulungu ukhapasa Paulu mphambvu toera kucita pinthu pyakuti nee mbadakwanisa kupicita na mphambvu zace. Pyenepi pinacitikambo kuna ife lero. Yahova angatipasa nzimu wace wakucena, tinakhala na mphambvu kakamwe!
Kusaka Mpfuma Zauzimu
(2 Akorinto 12:2-4) Ine ndisadziwa munthu m’bodzi wakuti ndi nyakupfundza wa Kristu, mu pyaka 14 nduli, iye akwatwa mpaka kuthambo yacitatu; khala akwatwa na manungo ace ene peno nee akwatwa na manungo ace ene, ine nkhabe kupidziwa, anapidziwa ndi Mulungu. 3 Inde, ine ndisandziwa munthu unoyu, khala akwatwa na manungo ace ene peno nee akwatiwa na manungo ace ene, ine nkhabe kupidziwa; anapidziwa ndi Mulungu, 4 iye akwatwa mbaendeswa m’paraizu, mbabva mafala akuti nkhabe funika kulongwa, pontho akuti munthu nee asatawiriswa kualonga.
Sentinela 12/18 tsa. 8 ndima 10-12
Mibvundzo Inacitwa na Anyakuleri
Mafala akuti “kuthambo yacitatu” adalongwa pa 2 Akorinto 12:2 panango asafuna kulonga pya Umambo Waumesiya unafuna kudzatonga Yezu Kristu pabodzi na 144.000, Umambo unoyu usacemerwambo “kudzulu kupswa.”—2 Ped. 3:13.
Kweneku ndi “kuthambo yacitatu” thangwi Umambo unoyu ndi utongi wamphambvu kakamwe na wakupambulika.
Paulu “akwatwa” m’masomphenya mbaendeswa “m’paraizu” yakuti isafuna kulonga (1) pya Paraizu inafuna kukhala pa dziko yapantsi, (2) paraizu yauzimu inafuna kukhala na ife ntsogolo, yakuti inadzakhala ikulu kakamwe kupiringana ya lero, pontho (3) ‘paraizu ya Mulungu’ kudzulu, maparaizu anewa onsene anadzakhala mu ndzidzi ubodzi ene mu dziko ipswa.
(2 Akorinto 13:12) Mwanyikanani unango na ndzace na mpswompswono ninga abale.
Perspicaz vol. 1 tsa. 325 ndima 9
Mpswompswono
“Mpswompswono Ninga Abale.” Akristu a mu ndzidzi wakale akhamwanyikana na “mpswompswono ninga abale” (Aroma 16:16; 1 Akor. 16:20; 2 Akor. 13:12; 1 Ates. 5:26) peno “mpswompswono waufuni” (1Ped. 5:14), panango amuna akhampswompswona amuna andzawo, akazi na akazi andzawo. Pisaoneka kuti nsambo unoyu wa Akristu akutoma ukhabverana na nsambo wa Ahebheri wakumwanyikana na mpswompswono. Maseze Malemba nkhabe longa pizinji thangwi ya “mpswompswono ninga abale” peno “mpswompswono waufuni,” mbwenye kumwanyikana munjira ineyi kukhapangiza ufuni na kuphatana kukhali pakati pa mpingo Wacikristu.—Juw. 13:34, 35.
SUMANA 27 YA MAIO–2 YA JUNHO
MPFUMA ZA MAFALA A MULUNGU | AGALATA 1-3
“Ine Ndalonga Naye Nkhope na Nkhope”
(Agalata 2:11-13) Mbwenye pidafika Kefa ku Antiyokiya, ine ndalonga naye nkhope na nkhope mbandinsandika; thangwi iye akhadacita pinthu mwakuphonyeka. 12 Thangwi mbadzati kufika anthu adatumwa na Tiyago, iye akhadya pabodzi na anthu a madzindza anango; mbwenye pidafika iwo, iye asiya kucita pyenepi, mbapambulika, thangwi akhagopa anthu akusidzwa. 13 Ayuda anango atomambo kucita pinthu mwaciphamaso ninga iye, na Bharnabhe ene akwatikambo na macitiro awo aciphamaso.
Ncenjezi 04/17 tsa. 25 ndima 16
Kodi Musadziwisa Anango Ulungami wa Yahova?
16 Lerini Agalata 2:11-14. Pedhru adzakhala nyakugopa anthu. (Misangani 29:25) Pedhru akhadziwa mabvero a Yahova thangwi ya Akristu akuti nee ndi Ayuda. Ngakhale tenepo, iye agopa kuti Akristu Aciyuda akukhonda kusidzwa akhabwera kubuluka ku Yerusalemu mbadanyerezera kuti iye akucedza na Akristu akuti nee ndi Ayuda. Mpostolo Paulu apanga Pedhru kuti akhali mpfakafaka. Thangwi yanji? Thangwi Paulu akhadabva Pedhru mbatsidzikiza Akristu akuti nee ndi Ayuda pa nsonkhano udacita iwo mu Yerusalemu mu caka 49. (Mabasa 15:12; Agalata 2:13) Kodi Akristu anewa apibva tani mudakhonda Pedhru kudya nawo pabodzi? Kodi iwo agwegweduka na macitiro anewa? Kodi Pedhru aluza mabasa ace thangwi ya madodo ace?
(Agalata 2:14) Mbwenye pidaona ine kuti iwo nee akhafamba mwakubverana na undimomwene wa mphangwa zadidi, ine ndapanga Kefa pamaso pawo onsene: “Khala iwe, maseze ndiwe Muyuda, usakhala maso ninga munakhala anthu a madzindza anango, tayu ninga Ayuda, unakakamiza tani anthu a madzindza anango toera kukhala maso mwakubverana na miyambo ya Ayuda?”
Sentinela 15/03/13 tsa. 5 ndima 12
Kwa Ale Anafuna Yahova, ‘Nkhabe Citca Cinaagwegwedusa’
12 Maseze Pedhru acita pinthu pyakuipa thangwi yakugopa anthu, mbwenye iye apitiriza kukhala wakukhulupirika kuna Yahova na Yezu. Mwacitsandzo, iye akhonda Mbuya wace katatu. (Luka 22:54-62) Mukupita kwa ndzidzi Pedhru nee acita pinthu ninga Nkristu, atsalakana Akristu a madziko anango munjira yakuipa, mbaona Akristu Aciyuda akuti akhali akusidzwa kukhala akufunika kakamwe. Mbwenye mpostolo Paulu akhali na maonero akusiyana, iye nee akhafuna kuti anthu mu mpingo asankhulane. Pedhru akhali na maonero akuphonyeka. Natenepa maonero a Pedhru mbadzati kutekera, Paulu ansandika pamaso pa onsene. (Agal. 2:11-14) Kodi Pedhru akutsukwala thangwi ya kudzikuza kwace mbasiya kutumikira Mulungu? Nkhabe. Iye aphatisira uphungu udapaswa iye na Paulu mbapitiriza kutumikira Mulungu.
Kusaka Mpfuma Zauzimu
(Agalata 2:20) Cincino ine ndakhomerwa pamuti pabodzi na Kristu. Natenepa, ali maso sinebve tayu, mbwenye ndi Kristu wakuti ali maso muna ine. Mwandimomwene, umaso uli na ine cincino m’manungo mwanga, ine ndiri nawo thangwi yakukhulupira Mwana wa Mulungu, ule adandifuna mbaperekeka thangwi ya ine.
Ncenjezi 1/09/14 tsa. 16 ndima 20-21
Tumikirani Mulungu Mwakukhulupirika Mwakukhonda Tsalakana “Nyatwa Zizinji”
20 Ndiye tani pya mayesero akubisalika? Mwacitsandzo, tinakwanisa tani kukunda mabvero akufewa manungo? Njira yakufunika kakamwe ndi kunyerezera mwacidikhodikho pya ciomboli. Ndi pyenepi pidacita mpostolo Paulu. M’midzidzi inango iye akhapibva ninga wakusowa basa. Mbwenye iye akhadziwambo kuti Kristu afera anthu akudawa, tayu aungwiro. Paulu akhali m’bodzi wa anthu anewa akudawa. Iye alemba: “Ine ndiri [na umaso] thangwi yakukhulupira Mwana wa Mulungu, ule adandifuna mbaperekeka thangwi ya ine.” (Agal. 2:20) Inde, Paulu atawira ciomboli. Iye adzindikira kuti ciomboli caperekwa kwa iye.
21 Imwe munakwanisa kuphindula na maonero mabodzi ene akuona ciomboli ninga muoni udapereka Yahova kwa imwe. Pyenepi nee pisabveka kuti kufewa manungo kunamala mwakucimbiza. Anango a ife, anapitiriza kuthimbana na mayesero akubisalika mpaka mu dziko ipswa. Mbwenye kumbukani: Anafuna kutambira muoni ndi ale anakhonda kubwerera nduli. Ife tiri cifupi kakamwe na ntsiku yakuti Umambo wa Mulungu unadzakhazikisa ntendere na kucitisa anthu onsene akukhulupirika kukhala aungwiro. Natenepa, khalani wakutonga toera kupita mu Umambo unoyu—ngakhale kuti musafunika kupirira nyatwa zizinji.
(Agalata 3:1) Imwe Agalata akusowa ndzeru! Imwe mwatambira cipfundziso cakubveka mwadidi cinalonga pya kufa kwa Yezu Kristu adakhomerwa pamuti, mphapo mbani adakunyengezani toera kukhala na maonero anewa akuipa?
Perspicaz vol. 2 tsa. 171 ndima 3
Tsamba Idalemberwa Akristu a ku Galasya
Mafala a Paulu akuti “Agalata akusowa ndzeru,” nee asapangiza kuti iye akhalonga pya nsoka wa anthu a ku Galasya udabuluka kumabulukiro a dzuwa a Galasya. (Agal. 3:1) M’mbuto mwace, Paulu akhasandika anthu anango m’mipingo thangwi yakutowezera misambo ya Ayuda akhali pakati pawo, akuti akhaphatisira mwambo wa Mose toera kukhazikisa midida yawo yaulungami, m’mbuto mwakuphatisira ‘ulungami unabuluka mu cikhulupiro’ ca cibverano cipswa. (Agal. 2:15–3:14; 4:9, 10) Mukulonga thangwi ya madzindza, “mipingo ya ku Galasya” (Agal. 1:2) idalembera Paulu ikhali na Ayuda na ale akuti nee akhali Ayuda, kuphatanizambo ale adatawira kupita mu uphemberi Waciyuda, anthu akusidzwa na akukhonda kusidzwa na anthu a dzindza ya Seltiki. (Mabasa 13:14, 43; 16:1; Agal. 5:2) Akristu onsene a madzindza anewa akhacemerwa Agalata, thangwi cisa cikhali iwo cikhacemerwa Galasya. Mbwenye mphangwa zonsene zidalemba Paulu mu tsamba yace, azilembera anthu akhadziwa iye mwadidi akumadokero a dzuwa a provinsya ya Roma, tayu anthu akumabulukiro a dzuwa akuti cipo akhaadziwa.