Mudabuluswa Matawiro a Umaso Wathu Wacikristu na Utumiki
Sumana 4-10 YA NOVEMBRO
MPFUMA ZA MAFALA A MULUNGU | 1 JUWAU 1-5
‘Lekani Kufuna Dziko Nee Pinthu Pya Dziko’
(1 Juwau 2:15, 16) Lekani kufuna dziko nee pinthu piri mu dziko. Khala munthu asafuna dziko, ufuni wa Baba nee uli muna iye; 16 thangwi pinthu pyonsene piri mu dziko, ninga pinthu pinasirirwa na manungo, pinthu pinasirirwa na maso, na kugaya thangwi ya pinthu piri na munthu mu umaso wace, nee pisabuluka kuna Baba, mbwenye pisabuluka ku dziko.
Sentinela 1/1/05 tsa. 10 ndima 13
Towezerani Citsandzo ca Yezu
13 Panango, anango analonga kuti nee ndi pyonsene piri n’dziko pyakuti ndi pyakuipa. Maseze unoyu ndi undimomwene, dziko na pinthu pyayo inakwanisa kutidzudzumisa toera ticimwane kutumikira Yahova. Nkhabepo cinthu ca dziko cidacitwa na cifuniro cakutiphedza toera kufendedzera Mulungu. Natenepa, tingatoma kufuna pinthu pya dziko, maseze pikhonde kukhala pyakuipa, ife tinakhala pangozwi. (1 Timoti 6:9, 10) Kusiyapo pyenepi, pinthu pizinji pya dziko ndi pyakuipa, pontho pinakwanisa kuphekesa manyerezero athu. Tingaona mafilimu peno maprogramu a televizau anapangiza pya uphanga, mpfuma na pyaulukwali, panango pinaoneka ninga pyakutawirika mbatitoma kupisirira. Khala tisacedza na anthu akuti asafuna kakamwe kukhala na umaso wadidi, kufuna mpfuma, ife tinatomambo kufuna kakamwe pinthu pyenepi.—Mateu 6:24; 1 Akorinto 15:33.
(1 Juwau 2:17) Kusiyapo pyenepi, dziko iri kupita pabodzi na pifuno pyayo, mbwenye munthu anacita pinafuna Mulungu anapitiriza kukhala kwenda na kwenda.
Sentinela 15/08/13 tsa. 27 ndima 18
Nyerezerani Kuti Musafuna Kukhala Munthu wa Ntundu Wanji
18 Cinthu cinango cinafuna kutiphedza toera kucalira “pinthu piri mu dziko” ndi kunyerezera mafala akupumirwa a Juwau akuti: “Dziko iri kupita pabodzi na pifuno pyayo, mbwenye munthu anacita pinafuna Mulungu anapitiriza kukhala kwenda na kwenda.” (1 Juwau 2:17) Dziko ya Sathani isaoneka ninga ndi yadidi kakamwe pontho nee inamala. Mbwenye ingafika ntsiku yace inafudzwa. Nkhabepo cinthu ca dziko ya Sathani cakuti cinakhala kwenda na kwenda. Kukumbuka pyenepi kunatiphedza toera tikhonde kupeuswa na mayesero a Dyabo.
Kusaka Mpfuma Zauzimu
(1 Juwau 2:7, 8) Abale akufunika, ine nee ndisakulemberani matongero mapswa, mbwenye ndi akale, akuti imwe muli nawo bulukira pakutoma. Matongero akale anewa ndi mafala adabva imwe. 8 Mbwenye ine ndiri kukulemberani matongero mapswa, akuti iye aatoweza, pontho imwe mwaatowezambo, thangwi cidima ciri kupita, pontho ceza candimomwene ciri kuyetimira.
Ncenjezi 1/9/13 tsa. 10 ndima 14
Pikumbuso Pya Yahova Ndi Pyakunyindirika
14 Malemba Acigerego Acikristu adzala na pikumbuso toera tipangize ufuni kwa unango na ndzace. Yezu alonga kuti mwambo ukulu waciwiri ndi “funa ndzako ninga iwe ene.” (Mat. 22:39) Munjira ibodzi ene, Tiyago, m’bale wa Yezu, alonga kuti ufuni ndi “mwambo wa mambo.” (Tiya. 2:8) Mpostolo Juwau alemba: “Abale akufunika, ine nee ndisakulemberani matongero mapswa, mbwenye ndi akale, akuti imwe muli nawo bulukira pakutoma.” (1 Juwau 2:7, 8) Kodi Juwau akhalonganji na mafala “matongero akale”? Iye akhalonga pya matongero a ufuni. Matongero anewa akhali “akale” munjira yakuti Yezu aapereka mu pyaka pya nduli, ‘kutomera pakutoma.’ Mbwenye akhalimbo “mapswa” munjira yakuti usacemerwa ufuni wakudzimana, wakuti anyakupfundza akhafunika kukhala nawo pakuthimbana na nyatwa zipswa. Ninga anyakupfundza a Kristu, kodi tisapereka takhuta ku macenjezo akuti asatiphedza toera kukhonda kukulisa nzimu wakucenama wa dziko ino, wakuti unakwanisa kunyenyena ufuni wathu kwa anyakuendekana athu?
(1 Juwau 5:16, 17) Khala munthu aona m’bale wace mbakacita madawo akuti nee athema kuphiwa thangwi ya madawo anewa, iye anaphemba, pontho Mulungu anadzampasa umaso; inde, kwa ale anacita madawo anapangiza kuti nee athema kuphiwa. Alipo madawo anapangiza kuti munthu athema kuphiwa. Nee ndiri kulonga kuti iye asafunika kucita phembero thangwi ya madawo anewa. 17 Macitiro onsene akuti nkhabe kubverana na ulungami ndi madawo. Mbwenye alipo madawo akuti nkhabe kucitisa kuti munthu aphiwe.
Perspicaz vol. 3 tsa. 243 ndima 3
Kulekerera
Ndi pyakufunika kucita phembero kuna Mulungu toera alekerere anango, ngakhale kuphemba toera alekerere mpingo onsene. Mose acita pyenepi kuna mbumba ya Izraeli, iye abweka madawo awo mbaphemba kulekererwa, pontho Yahova abvesera phembero yace. (Num. 14:19, 20) Pontho, mu ndzidzi ukhazimulwa templo, Salomoni acita phembero kuna Yahova toera alekerere mbumba ingacita madawo mbitcunyuka madawo awo. (1 Ama. 8:30, 33-40, 46-52) Esdhra akhala ninga muimiriri wa Ayuda adabwerera ku ubitcu mbabweka pakweca madawo awo. Phembero yace yakubulukira muntima na cenjezo yace, pyacitisa mbumba kutcunyuka mbilekererwa na Yahova. (Esd. 9:13–10:4, 10-19, 44) Tiyago alonga kuti khala munthu akuduwala mwauzimu acemere akulu a mpingo toera acite phembero thangwi ya iye, pontho “khala iye acita madawo, anadzalekererwa.” (Tiya. 5:14-16) Mbwenye, pana “madawo anapangiza kuti munthu athema kuphiwa,” kudawira nzimu wakucena, madawo akucitwa mwacakhomo akuti munthu nee analekererwa. Nkristu nee asafunika kucita phembero thangwi ya munthu anacita madawo munjira ineyi.—1 Juw. 5:16; Mat. 12:31; Aheb. 10:26, 27; onani MADAWO; NZIMU.
SUMANA 11-17 YA NOVEMBRO
MPFUMA ZA MAFALA A MULUNGU | 2 JUWAU 1–YUDA
“Tisafunika Kumenya Nkhondo Toera Kupitiriza mu Undimomwene”
(Yuda 3) Abale anga akufunika, maseze ndikhafuna kakamwe kukulemberani thangwi ya cipulumuso ciri na ife tonsene, cincino ndaona kuti ndisafunika kukulemberani kuti mumenye nkhondo mwakuwanga toera kutsidzikiza cikhulupiro cidapaswa anthu akucena a Mulungu kabodzi basi toera cipitirize kwenda na kwenda.
Sentinela 15/09/04 tsa. 11-12 ndima 8-9
“Pitirizani Kuwangiswa Mwa Mbuya”
8 Ife nee tisafunika kupwaza njira zinaphatisira Sathani, thangwi Malemba asapangiza misampha inaphatisira iye. (2 Akorinto 2:11) Dyabo athabusa mamuna wakulungama Yobe, mukuphatisira nyatwa ikulu yakusowa kobiri, kuferwa na anyakufunika ace, kutcingwa na acibale, utenda, ngakhale kulongwa mwakuipa na axamwali ace. Yobe atsukwala kakamwe mbanyerezera kuti Mulungu ansiya. (Yobe 10:1, 2) Maseze Sathani panango nee anaphatisira nyatwa zenezi lero, Akristu azinji asathimbana na nyatwa zakulandana na zenezi, pontho Dyabo anakwanisa kuziphatisira toera kukwanirisa cifuno cace.
9 Mu ntsiku zino zakumalisa pana pinthu pizinji pyakuti pinaphekesa umaso wathu wauzimu. Ife tikukhala n’dziko yakuti anthu azinji asafuna kakamwe mpfuma kupiringana pinthu pyauzimu. Kazinji kene maprogramu a televizau, radyo na matsamba a mphangwa asapangiza kuti ulukwali usabweresa kutsandzaya, tayu kutsukwala. Pontho cincino anthu azinji asafuna “pinakomerwa na iwo basi, mbakhonda kufuna Mulungu.” (2 Timoti 3:1-5) Manyerezero anewa anakwanisa kudzudzumisa umaso wathu wauzimu, kusiyapo khala tisamenya “nkhondo mwakuwanga toera kutsidzikiza cikhulupiro.”—Yuda 3.
Kusaka Mpfuma Zauzimu
(Yuda 4) Cinandidzudzumisa ndi cakuti pakati panu pana anthu adalongwa kale m’Malemba kuti anadzatongwa; iwo ndi anthu akukhonda kulemedza Mulungu, asaphatisira ntsisi zikulu za Mulungu wathu toera kucita pinthu pyakuipa, na macitiro awo asapangiza kuti asakhonda Mbuyathu m’bodzi basi adatigula, Yezu Kristu.
(Yuda 12) Mungakhala nawo pabodzi pene m’maphwando anacita imwe ninga abale, iwo asakhala ninga miyala mikulu yakubisalika m’madzi. Iwombo ndi ninga akumbizi anadyeseka okhene nee kugopa; makole akusowa madzi anagwinywa uku na uku na mphepo; miti yakusowa misapo mu ndzidzi wakubala misapo, yakufa kawiri, yakudulwa na mitcitci ene;
Perspicaz vol. 1 tsa. 62 ndima 1
Maphwando Aufuni
Bhibhlya nee isalonga pya maphwando anewa aufuni, pontho nee isapangiza midzidzi ikhacitwa iwo. (Yuda 12) Maphwando anewa nee akhazikiswa na Mbuya Yezu Kristu, peno apostolo ace, natenepa nee asafunika kukhala akukakamizwa peno kucitwa ndzidzi onsene. Anango asalonga kuti maphwando anewa akhacitwa na Akristu akuti akhali akupfuma mbacemera Akristu andzawo akuti akhali akutcerenga. Natenepa amphawi, azice, akupfuma na akutcerenga akhadya pabodzi ninga abale.
Perspicaz vol. 1 tsa. 456 ndima 6
Mwala Ukulu
Fala inango Yacigerego yakuti spi·lasʹ, panango isalonga pya mwala ukulu unabisalika m’madzi. Yuda aphatisira citsandzo ca mwala unoyu toera kulonga pya amuna a pifuno pyakuipa akuti akhali mu mpingo Wacikristu. Ninga miyala mikulu yakubisalika m’madzi yakuti ikhaphekesa mabote, amuna anewa akhaikha pangozwi umaso wa Akristu anango mu mpingo. Iye alonga thangwi ya amuna anewa kuti: “Mungakhala nawo pabodzi pene m’maphwando anacita imwe ninga abale, iwo asakhala ninga miyala mikulu yakubisalika m’madzi.”—Yuda 12.
(Yuda 14, 15) Enoki, munthu wacinomwe kubulukira pa Adhamu, alonga profesiya thangwi ya iwo mudalonga iye kuti: “Onani! Yahova abwera na aanju ace azinji akucena, 15 toera kutonga anthu onsene, pontho toera kutcunyusa anthu akuipa onsene thangwi ya pinthu pyakuipa pyonsene pidacita iwo mwakukhonda kulemedza Mulungu, pontho thangwi ya pinthu pyakuipa kakamwe pidamulongera anyakudawa anakhonda kulemedza Mulungu.”
Sentinela numero 1 de 2017 tsa. 12 ndima 1
“Iye Akomeresa Mulungu”
Kodi Enoki akhalonganji mu profesiya yace? Bhibhlya isalonga: “Onani! Yahova abwera na aanju ace azinji akucena, toera kutonga anthu onsene, pontho toera kutcunyusa anthu akuipa onsene thangwi ya pinthu pyakuipa pyonsene pidacita iwo mwakukhonda kulemedza Mulungu, pontho thangwi ya pinthu pyakuipa kakamwe pidamulongera anyakudawa anakhonda kulemedza Mulungu.” (Yuda 14, 15) Onani kuti mu profesiya ineyi Enoki alonga pinthu ninga Mulungu akhadamala kale kucita pinthu pidalonga iye. Aprofeta azinji adaoneka patsogolo pa Enoki alongambo maprofesiya ninga amala kucitika kale. Ntsonga ndi yakuti profesiya ikhali yakunyindirika kakamwe, natenepa mprofeta akhailonga ninga yacitika kale!—Izaiya 46:10.
Sentinela numero 1 de 2017 tsa. 12 ndima 3
“Iye Akomeresa Mulungu”
Cikhulupiro ca Enoki cisaticitisa kunyerezera: Kodi tisaona dziko lero ninga munaionera Mulungu? Mphangwa zakutonga zikhamwaza Enoki ziri na mphambvu ibodzi ene lero. Yahova akwanirisa profesiya ya Enoki mu ndzidzi udabweresa iye Cigumula mbafudza anthu akuipa. Natenepa, Cigumula ceneci ndi cipangizo ca kufudzwa kukulu kunafuna kudzacitika ntsogolo. (Mateu 24:38, 39; 2 Pedhru 2:4-6) Yahova pabodzi na aanju ace ali dzololo toera kufudza dziko ino yakuipa. Natenepa, m’bodzi na m’bodzi wa ife asafunika kukumbuka cenjezo ya Enoki na kupangambo anango thangwi ya cenjezo ineyi. Acibale athu na axamwali athu panango anationa mwakuipa. Midzidzi inango tinapibva ninga tiri tekha. Mbwenye Yahova nee asiya Enoki, munjira ibodzi ene iye cipo anasiya atumiki ace akukhulupirika lero!
SUMANA 18-24 YA NOVEMBRO
MPFUMA ZA MAFALA A MULUNGU | APOKALIPSE 1-3
“Ine Ndisadziwa Pinacita Iwe”
(Apokalipse 1:20) Ici ndi cibisobiso cakucena ca nyenyezi zinomwe zidaona iwe mu djanja yanga yamadyo na pinthu pyakuikhira nyale pinomwe pya ouro: Nyenyezi zinomwe zisaimirira aanju a mipingo minomwe, pontho pinthu pinomwe pyakuikhira nyale pisaimirira mipingo minomwe.
Sentinela 15/10/12 tsa. 14 ndima 8
Ndi Nzimu Upi Unapangiza Imwe?
8 Toera kucalira ntundu unoyu wa nzimu, tisafunika kukumbuka kuti Yezu asalongwa m’Bhibhlya kuti ‘ali na nyenyezi zinomwe mu djanja yace yamadyo.’ “Nyenyezi” zenezi zisaimirira Akristu akudzodzwa, kuphatanizambo akulu a mpingo onsene. Yezu anakwanisa kutsogolera “nyenyezi” zenezi ziri mu djanja yace munjira yonsene inafuna iye. (Apok. 1:16, 20) Nakuti Yezu ndi Nsolo wa mpingo Wacikristu, iye asaona pyonsene pinacita misoka ya akulu a mpingo. Khala m’bodzi wa akulu a mpingo asafunika kusandikwa, Yezu wakuti ‘maso ace ali ninga lirimi ya moto’ anaona pyenepi, pontho anapicita pa ndzidzi wakuthema. (Apok. 1:14) Mu ndzidzi unadikhira ife pyenepi, tisafunika kupitiriza kulemedza ale adakhazikiswa na nzimu wakucena, thangwi Paulu alemba: “Bverani ale anatsogolera pakati panu, mbamutawira na ntima onsene citsogolero cawo, thangwi iwo asakuonerani ninga kuti anadzatawirira mulando. Mungacita pyenepi, iwo anaphata basa yawo mwakukomerwa, tayu mwakudungunya, thangwi pyenepi mbapidabweresa nyatwa kuna imwe.”—Aheb. 13:17.
(Apokalipse 2:1, 2) “Kuna anju wa ku mpingo wa ku Efeso, lemba: Ipi ndi pinalonga ule wakuti ali na nyenyezi zinomwe mu djanja yace yamadyo, anafamba pakati pa pinthu pyakuikhira nyale pinomwe pya ouro: 2 ‘Ine ndisadziwa pinacita iwe, basa yako yakuwanga na kupirira kwako. Ndisadziwa kuti iwe nee usatawirisa anthu akuipa akhale pakati pako; pontho wayesera ale analonga kuti ndi apostolo, mbwenye iwo nee ndi apostolo, mbudzindikira kuti iwo ndi anyauthambi.
Sentinela 15/4/12 tsa. 29 ndima 11
Yahova Asatitsidzikiza Toera Tidzapulumuke
11 Masomphenya anagumanika pa Apokalipse kapitulu 2 na 3, asapangiza Yezu Kristu ninga Mambo anang’anira mipingo minomwe ya ku Azya Menori. Masomphenya anewa asapangiza kuti Kristu akhaona pyonsene pikhacitika m’mipingo ineyi. Midzidzi inango, iye asalonga anthu na madzina awo, kuasimba peno kuapasa uphungu wakufunika. Pyenepi pisapangizanji? Pa kukwanirisika kwa masomphenya anewa, mipingo minomwe isaimirira Akristu akudzodzwa kutomera mu caka 1914, pontho uphungu udaperekwa kuna mipingo minomwe usaphatambo basa lero kuna mipingo yonsene ya atumiki a Mulungu. Natenepa, tinakwanisa kulonga kuti kubulukira kwa Mwanace, Yahova asatsogolera atumiki ace. Tinaphedzeka tani na uphungu unoyu?
Sentinela 15/1/01 tsa. 20-21 ndima 20
Fambani Pabodzi na Gulu ya Yahova
20 Toera kufamba pabodzi na gulu ya Yahova, tisafunika kudzindikira kuti Yezu Kristu apaswa basa na Mulungu ninga “nsolo wa mpingo.” (Aefesi 5:22, 23) Ntsonga inango yakufunika ndi inagumanika pa lemba ya Izaiya 55:4, iyo isalonga: ‘Onani! [ine Yahova] ndampereka toera akhale mboni ya madzindza a anthu, ntsogoleri na ntongi wa madzindza a anthu.’ Mwandimomwene Yezu asadziwa kutsogolera. Iye asadziwambo mabira ace na pinacita iwo. Ndi thangwi yace, mu ndzidzi ukhayang’anira iye mipingo minomwe ya ku Azya Menori, iye alonga maulendo maxanu kuti: “Ine ndisadziwa pinacita iwe.” (Apokalipse 2:2, 19; 3:1, 8, 15) Yezu asadziwambo pinafuna ife ninga Babace, Yahova. Mbadzati kucita Phembero Yacitsandzo, Yezu alonga: “Babanu wakudzulu asadziwa kale pinafuna imwe mbamudzati kum’phemba.”—Mateu 6:8-13.
Kusaka Mpfuma Zauzimu
(Apokalipse 1:7) Onani! Iye akubwera m’makole, anthu onsene anadzamuona, kuphatanizambo ale adamulasa; madzindza onsene pa dziko yapantsi anadzadhima pa nthimandzi pawo mwakutsukwala thangwi ya iye. Inde, pyenepi pinadzacitikadi. Ameni.
Umambo Ukutonga tsa. 226-227 ndima 10
Umambo Wa Mulungu Unadzafudza Anyamalwa Ace
10 Kutongwa kwa anthu. Anyamalwa onsene a Umambo wa Mulungu anadzakakamizwa toera kuona cakucitika cinango cakuti cinadzathimizira kuthabuka kwawo. Yezu alonga: “Anthu anadzaona Mwana wa munthu mbakabwera m’makole na mphambvu zikulu na mbiri.” (Marko 13:26) Mphambvu ya pidzindikiro pyenepi inadzapangiza kuti Yezu afika toera kutonga. Mu khundu inango ya profesiya ineyi yakulonga pya ntsiku zakumalisa, Yezu alonga unyomonyomo wa kutonga kwakuti kunadzacitika pa ndzidzi unoyu. Ife tisagumana mphangwa zenezi mu nsangani wa mabira na mbuzi. (Lerini Mateu 25:31-33, 46.) Anthu onsene anaphedzera mwakukhulupirika Umambo wa Mulungu, anadzatongwa ninga “mabira” na ‘anadzalamusa misolo’ yawo, mukudziwa kuti ‘cipulumuso cawo ciri cifupi.’ (Luka 21:28) Natenepa, anyamalwa a Umambo anadzatongwa ninga “mbuzi” na ‘anadzalira’ mukudziwa kuti asadikhira ‘kufudzwa kwa kwenda na kwenda.’—Mat. 24:30; Apok. 1:7.
(Apokalipse 2:7) Ule ali na makutu mbabve pinalonga nzimu wakucena ku mipingo: Ule anakunda, ndinantawirisa toera adye misapo ya muti wakupasa umaso, wakuti uli m’paraizu ya Mulungu.’
Sentinela 15/01/09 tsa. 31 ndima 1
Ntsonga Zikulu za Bukhu ya Apokalipse—I
Apok. 2:7—Kodi “paraizu ya Mulungu” ninji? Nakuti mafala anewa asaphatisirwa kuna Akristu akudzodzwa, paraizu inalongwa pa lemba ineyi isaimirira umaso wadidi kudzulu. Akristu akudzodzwa akukhulupirika anadzapaswa mwai wakudya “misapo ya muti wakupasa umaso.” Iwo anadzatambira umaso wakukhonda kufa.—1 Akor. 15:53.
SUMANA 25 YA NOVEMBRO–1 YA DEZEMBRO
MPFUMA ZA MAFALA A MULUNGU | APOKALIPSE 4-6
“Anthu Anai Akwira Makavalo”
(Apokalipse 6:2) Buluka penepo, ine ndaona kavalo yakucena. Ule akhali pa kavalo ineyi akhali na uta; pontho apaswa nthimba, iye abuluka mbakakunda anyamalwa ace, toera kumalisa kuwina kwace.
Sentinela numero 3 de 2017 tsa. 4 ndima 3
Mbani Adakwira Makavalo Manai?
Mbani adakwira kavalo yakucena? Bukhu ya Apokalipse isapereka ntawiro. Pa kapitulu 19, munthu adakwira kavalo ineyi asacemerwa “Fala ya Mulungu.” (Apokalipse 19:11-13) Yezu Kristu apaswa cidzo cakuti Fala, thangwi iye ndi nkwati mphangwa wa Mulungu. (Juwau 1:1, 14) Kusiyapo pyenepi, iye asacemerwa “Mambo wa amambo, na Mbuya wa ambuya,” pontho asalongwa “Wakukhulupirika na Wandimomwene.” (Apokalipse 19:16) Mwandimomwene, iye ali na mphambvu toera kukhala Mambo wa Anyankhondo. Pontho thangwi yakukhala wakukhulupirika, iye nee asaphatisira mwakuipa mphambvu zace. Mbwenye pana mibvundzo mingasi.
Sentinela numero 3 de 2017 tsa. 4 ndima 5
Mbani Adakwira Makavalo Manai?
Anthu adakwira makavalo, atoma lini kufamba na makavalo awo? Onani kuti nyakukwira kavalo wakutoma, atoma mu ndzidzi udatambira iye nthimba. (Apokalipse 6:2) Yezu akhazikiswa lini ninga Mambo kudzulu? Iye nee akhazikiswa pidamala iye kulamuswa muli akufa mbabwerera kudzulu. Bhibhlya isapangiza kuti mu ndzidzi unoyu iye atoma kudikhira. (Ahebheri 10:12, 13) Yezu apasa cidzindikiro atowereri ace toera akwanise kudziwa ndzidzi ukhafuna iye kutoma kutonga kudzulu. Iye alonga kuti makhaliro a dziko mbadatekera kakamwe. Mbapadaoneka nkhondo, mautenda na kusoweka kwa pyakudya. (Mateu 24:3, 7; Luka 21:10, 11) Pisaoneka kuti pinthu pidalonga Yezu pyatoma mu caka 1914, pidamala kwene Nkhondo Yakutoma Ya Dziko Yonsene Yapantsi. Bhibhlya isalonga kuti ndzidzi unoyu ndi “ntsiku zakumalisa.”—2 Timoti 3:1-5.
(Apokalipse 6:4-6) Yabuluka kavalo inango yakufuira ninga moto. Ule akhali pa kavalo ineyi atawiriswa toera kubulusa ntendere pa dziko yapantsi, toera anthu aphane unango na ndzace, pontho iye apaswa supada ikulu. 5 Pidafungula iye cidzindikiro cacitatu, ine ndabva anju wacitatu mbakalonga: “Bwera!” Penepo ndaona kavalo yakupswipa. Ule akhali pa kavalo ineyi akhali na bhalansa m’manja mwace. 6 Ine ndabva fala ikhabuluka pakati pa aanju anai ikhalonga kuti: “Kilu ibodzi ya tirigu ntengo wace ndi dhenaryo ibodzi; makilu matatu a sevadha ntengo wace ndi dhenaryo ibodzi. Leka kubvunga mafuta na vinyu.”
Sentinela numero 3 de 2017 tsa. 5 ndima 2
Mbani Adakwira Makavalo Manai?
Nyakukwira kavalo unoyu asaimirira nkhondo. Onani kuti iye nee asamalisa ntendere m’madziko anango, mbwenye pa dziko yonsene yapantsi. Mu caka 1914 ukhali ulendo wakutoma udacitika nkhondo yakutoma ya dziko yonsene ya pantsi. Mukupita kwa ndzidzi kwacitika nkhondo inango yaciwiri ya dziko yonsene ya pantsi yakuti yapha anthu azinji kakamwe. Anango asalonga kuti kutomera mu caka 1914, anthu adafa pa nkhondo zenezi na nkhondo zinango ndi akupiringana mamiliyau 100! Kusiyapo pyenepi, anthu azinji aphekeka kakamwe.
Sentinela numero 3 de 2017 tsa. 5 ndima 4-5
Mbani Adakwira Makavalo Manai?
“Ndaona kavalo yakupswipa. Ule akhali pa kavalo ineyi akhali na bhalansa m’manja mwace. Ine ndabva fala ikhabuluka pakati pa aanju anai ikhalonga kuti: “Kilu ibodzi ya tirigu ntengo wace ndi dhenaryo ibodzi; makilu matatu a sevadha ntengo wace ndi dhenaryo ibodzi. Leka kubvunga mafuta na vinyu.” ”—Apokalipse 6:5, 6.
Nyakukwira kavalo unoyu asaimirira njala. Bhibhlya isalonga kuti makhaliro mbadatekera kakamwe kwakuti litru ibodzi ya trigu mbidaguliswa denaryo ibodzi, yakuti ikhali ntengo wa kobiri ikhatambira munthu pa ntsiku mu ndzidzi wa Yezu. (Mateu 20:2) Na kobiri ineyi, munthu akhakwanisambo kugula malitru matatu a sevadha, cakudya cakuti cikhali cakupwazika kakamwe. Cakudya ceneci nee cikhakwana toera kudyesa banja ikulu. Fala yalongambo kuti anthu akhafunika kukoya mafuta na vinyu, thangwi pyenepi pikhali pyakudya pyakufunika kakamwe kuna anthu, pontho pyakutoma mu ndzidzi unoyu.
(Apokalipse 6:8) Penepo ine ndaona kavalo yakuumbuka. Ule akhali pa kavalo ineyi dzina yace ndi Kufa. Masiye akhali nduli mwace. Iwo apaswa mphambvu pa khundu yacinai ya dziko yapantsi toera aphe anthu na supada yakulapha, na njala, na utenda wakugopswa, na pikala pya pa dziko yapantsi.
Sentinela numero 3 de 2017 tsa. 5 ndima 8-10
Mbani Adakwira Makavalo Manai?
Nyakukwira kavalo wacinai asaimirira kufa kwa anthu thangwi ya miliri na pinthu pinango. Pidamala kwene caka 1914, utenda unacemerwa gripe espanhola wapha anthu azinji kakamwe. Pisaoneka kuti anthu akukwana mamiliyau 500 akhadaphatwa na utenda unoyu. Pa anthu atatu, m’bodzi akhali na utenda unoyu!
Gripe espanhola ikhali kutoma kwa miliri. Anyakudziwisa asalonga kuti mu pyaka 1900, anthu anango akukwana mamiliyau 300 afa na utenda unacemerwa varíola peno nthomba-tomba. Mpaka lero, anthu azinji asafa thangwi ya Sida, cokolo na malarya maseze asiyentista asayesera kusaka njira toera kumalisa matenda anewa.
Ninga taona, nkhondo, njala na miliri pisapha anthu azinji. Natenepa tinakwanisa kulonga kuti Masiye asatambira anthu anewa anafa, pontho pisaoneka ninga iwo nee ali na cidikhiro.
Kusaka Mpfuma Zauzimu
(Apokalipse 4:4) Mpando waumambo ukhadazungulirwa na mipando yaumambo yakukwana 24, m’mipando ineyi, ndaona akulu a mpingo akukwana 24 adabvala nguwo zakucena, m’misolo mwawo iwo akhali na nthimba za ouro.
(Apokalipse 4:6) Patsogolo pa mpando waumambo pakhali na cinthu cakulandana na bara ya vidhru, cakucena kakamwe ninga mwala unacemerwa dhiyamante. Pakati-nakati pa mbuto inagumanika mpando waumambo, n’khundu mwace akhalipo aanju anai akuti akhali na maso mazinji kakamwe kutsogolo na nduli mwene.
Clímax de Revelação tsa. 76-77 ndima 8
Mbiri ya Mpando Waumambo wa Yahova Kudzulu
8 Juwau akhadziwa kuti pakhazikiswa anyantsembe toera atumikire mu tabhernakulo wakale. Panango iye adzumatirwa na kuona pinthu pidalemba iye: “Mpando waumambo ukhadazungulirwa na mipando yaumambo yakukwana 24, m’mipando ineyi, ndaona akulu a mpingo akukwana 24 adabvala nguwo zakucena, m’misolo mwawo iwo akhali na nthimba za ouro.” (Apokalipse 4:4) Mwandimomwene, kusiyapo anyantsembe, iye aona akulu a mpingo 24 adakhala m’mipando yaumambo, pontho abvazikwa nthimba ninga amambo. Akulu a mpingo anewa mbani? Ndi Akristu akudzodzwa a mpingo Wacikristu, akuti alamuswa muli akufa mbaenda kudzulu ninga pikhadapikirwa iwo na Yahova. Tisadziwa tani pyenepi?
Clímax de Revelação tsa. 76-77 ndima 19
Mbiri ya Mpando Waumambo wa Yahova Kudzulu
19 Kodi aanju anewa asaimiriranji? Masomphenya adaona mprofeta Ezekyeli asatiphedza toera kugumana ntawiro. Ezekyeli aona Yahova akhali pa mpando waumambo, wakuti ukhali pa gareta yakudzulu, pontho cifupi na gareta ineyi pakhali na aanju akulandana na adaona Juwau. (Ezekyele 1:5-11, 22-28) Mukupita kwa ndzidzi, Ezekyeli aona pontho gareta yakuti ikhali na mpando waumambo pabodzi na aanju anewa. Mbwenye paulendo unoyu, iye alonga kuti aanju anewa akhali akerubhi. (Ezekyele 10:9-15) Natenepa, pisaoneka kuti aanju anewa anai adaona Juwau asaimirira akerubhi azinji a Mulungu, akuti ndi akupambulika kakamwe mwa aanju onsene adacita Mulungu. Nee pikhali pyakudzumatirisa kuna Juwau kuona akerubhi cifupi na Yahova, thangwi mu tabhernakulo yakale mukhali na akerubhi awiri a ouro padzulu pa mphampha ya bokosi ya cibverano, akuti akhaimirira umambo wa Yahova. Kubulukira pakati pa akerubhi anewa awiri, mitemo ya Yahova ikhabveka kuna mbumba.—Eksodo 25:22; Masalmo 80:1.
(Apokalipse 5:5) Mbwenye m’bodzi wa akulu a mpingo andipanga: “Leka kulira. Ona! Nkhalamu ya dzindza ya Yuda, ntcitci wa Dhavidhi akunda, natenepa iye athema toera kufungula tsamba yakupyangirirwa na kubulusa pidzindikiro pinomwe piri penepo.”
Bwera Dzanditowera tsa. 36 ndima 5-6
“Ona, Nkhalamu ya Dzindza ya Yuda”
5 Nkhalamu kazinji kene isalandaniswa na cipapo. Kodi mwagumanikana kale na nkhalamu imuna nkhope na nkhope? Khala ndi tenepo, panango mwapulumuka thangwi ya mpanda ukhali pakati pa imwe na cinyama ceneci cakuti cikhadafungirwa m’mbuto inakoyerwa pinyama pya ntsanga. Ngakhale tenepo, imwe munagopa. Mungayang’ana nkhope ya cinyama ceneci cikulu kakamwe na camphambvu mbamuyang’ana nduli mwanu, imwe munakwanisa kunyerezera kuti nkhalamu nkhabe kugopa cinthu. Bhibhlya isalonga pya “nkhalamu, cikala ca mphambvu kakamwe kupita pinyama pinango, mbacikhonda kugopa.” (Misangani 30:30) Ceneci ndi cipapo ca Kristu.
6 Tendeni tidinge njira zitatu zidapangiza Yezu cipapo ninga ca nkhalamu: Mukutsidzikiza undimomwene, kuphedzera ulungami na kupirira pakutcingwa. Natenepa, mwakukhonda tsalakana khala ndife acipapo peno nkhabe, tonsene tinakwanisa kutowezera Yezu mukupangiza cipapo.