Yezu na anyakupfundzace agona ntsiku zitatu ku Bhetanya kutomera ntsiku idabuluka iwo ku Yeriko. N’Ciposi na macibese, pa Nisane 10, iwo abuluka mbaenda ku Yerusalemu. Pikhaenda iwo, Yezu abva njala. Natenepa pidaona iye muti wa nsambvu, iye aufendedzera. Kodi muti unoyu ukhali na misapo?

Pyenepi pyacitika kunkhomo kwa mwezi wa Março, mbwenye muti unoyu usatoma kubala misapo mwezi wa Junho. Mbwenye muti unoyu ukhali na masamba, ndi thangwi yace Yezu akhanyerezera kuti ukhali na misapo. Pidafika iye nee aigumana. Masamba a muti unoyu akhapangiza ninga ukhali na misapo. Buluka penepo Yezu alonga: “Nee munthu m’bodzi anadzadya pontho nsapo wako.” (Marko 11:14) Pidamala iye kulonga mafala anewa muti watoma kuuma, anyakupfundza abvesesa pyenepi mangwana mwace namacibese.

Mwakukhonda dembuka, Yezu na anyakupfundzace afika ku Yerusalemu. Iye aenda ku templo idadinga iye dzulo namasikati. Ulendo uno iye acita pizinji kupiringana kuidinga, acita ninga pidacita iye pyaka pitatu nduli pa Paskwa mu caka 30 N.W. (Juwau 2:14-16) Yezu athamangisa “ale akhagula na akhagulisa pinthu mu templo.” Pontho abhoma “meza za anyakucinjisa kobiri na mipando ya ale akhagulisa nkhangaiwa.” (Marko 11:15) Iye nee akhatawirisa kuti anthu apite na pa kintalo ya templo ninga njira yacigwagwa toera kuenda kukhundu inango ya nzinda, ngakhale ale akhali na mitolo.

Thangwi yanji Yezu athamangisa ale akhacinja kobiri na kugulisa pinyama mu templo? Iye alonga: “Kodi nee pyalembwa kuti, ‘Nyumba yanga inadzacemerwa nyumba inacitira maphembero anthu a madzindza onsene’? Mbwenye imwe mwaisanduza mbikhala dzimba ya mambava.” (Marko 11:17) Yezu acemera amuna anewa mambava thangwi iwo akhagulisa pinthu na ntengo ukulu kakamwe kwa ale akhagula pinyama toera kupereka ntsembe. Yezu akhaona macitiro anewa ninga kuba.

Akulu a anyantsembe, apfundzisi a mwambo na atsogoleri anango pidabva iwo pidacita Yezu, cifuno cawo cakumupha cathimizirika. Mbwenye akhali na nkandzo. Iwo acimwana kugumana njira toera kupha Yezu thangwi anthu azinji akhaenda kuna iye toera kambvesera.

Ayuda na ale adapita mu Ciyuda akhalimbo pa Paskwa. Anango adaenda ku Paskwa ineyi akhali Agerego. Iwo aenda kuna Filipi panango thangwi yakukwatika na dzina yace Yacigerego, mbamphemba kuona Yezu. Filipi panango nee akhali na cinyindiro na kubwera kwawo, natenepa Filipi acedza na Andreya. Uwiri wawo aenda kapanga Yezu pidabva iwo mu ndzidzi ukhali iye mu templo.

Yezu akhadziwa kuti pasala ntsiku zakucepa toera aphiwe, natenepa, iye nee mbadaphatisira ndzidzi unoyu toera kucita pinthu pinafuna anthu peno kucita pinthu toera akhale na mbiri. Iye atawira apostolo anewa awiri mukulonga nsangani: “Wafika ndzidzi toera Mwana wa munthu apaswe mbiri. Ine ndinakupangani na cinyindiro consene kuti, mbeu ya tirigu ingakhonda kugwa pantsi mbifa, isapitiriza kukhala mbeu ibodzi. Mbwenye ingagwa pantsi mbifa, isabala misapo mizinji.”—Juwau 12:23, 24.

Mbeu ibodzi ya tirigu panango inaoneka ninga yakupwazika kakamwe. Mbwenye ingabzwalwa ‘mbifa’ isamera mbikula mpaka kubala misapo mizinji. Pyenepi ndipyo pikhafuna kucitikira Yezu wakuti akhali waungwiro. Iye akhali wakukhulupirika kuna Mulungu mpaka kufa, na thangwi ineyi anthu azinji akuti ali na ntima wakuperekeka anadzakhala na umaso wakukhonda mala. Natenepa Yezu alonga: “Munthu anafuna kakamwe umaso wace akuufudza, mbwenye ule anaida umaso wace mu dziko ino, akuutsidzikiza toera kukhala na umaso wakukhonda mala.”—Juwau 12:25.

Yezu nee akhanyerezera pya iye basi, natenepa iye alonga: ‘Khala munthu asafuna kunditumikira, mbanditowere, thangwi kunafuna ine khala, ule anafuna kunditumikira anadzakhalambo kweneko. Khala munthu asafuna kunditumikira, Baba wanga anadzamulemedza.’ (Juwau 12:26) Pinadzakhala pyakutsandzayisa kakamwe! Ale analemedzwa na Baba anadzakhala axamwali a Kristu mu Umambo.

Nakuti Yezu akhadziwa kuti mbadatamba nyatwa, pontho mbadaphiwa, iye alonga: “Cincino ndiri wakunentseka kakamwe, mphapo ndinalonganji? Baba, ndipulumuseni pa ndzidzi uno wakunentsa.” Mbwenye Yezu nee akhafuna kuti cifuno ca Mulungu cikhonde kwanirisika. Iye athimiza: “Ndzidzi unoyu usafunika kupita na pana ine, thangwi ine ndadzera pyenepi.” (Juwau 12:27) Yezu akhafuna kucita pyonsene pikhafuna Mulungu, kuphatanizambo kupereka umaso wace ninga ntsembe.

Mu ndzidzi ukhali Yezu mu templo, n’Ciposi pa Nisane 10, alonga pya kufa kwace kwakuti kukhali cifupi. Thangwi yakudzudzumika kuti kufa kwace kunakhuya tani dzina ya Mulungu, Yezu alonga: “Baba, pasani mbiri dzina yanu.” Penepo yabveka fala yamphambvu kubuluka kudzulu mbilonga: “Ine ndaipasa kale mbiri, pontho ndinadzaipasa mbiri.”—Juwau 12:27, 28.

Anthu akhali cifupi adzudzumika kakamwe. Anango akhanyerezera kuti abva kudhima kwa madzi. Anango alonga: “Ndi anju adalonga na iye.” (Juwau 12:29) Mbwenye ndi Yahova akhalonga! Unoyu nee ukhali ulendo wakutoma udabva anthu Mulungu mbakalonga pinthu thangwi ya Yezu.

Pyaka pitatu na hafu nduli, pa ndzidzi ukhabatizwa Yezu, Juwau M’batizi abva Mulungu mbakalonga thangwi ya iye: “Uyu ndi Mwananga wakufunika, anakomerwa na ine.” Pontho pidamala Paskwa mu caka 32 N.W., Tiyago, Juwau na Pedhru aona Yezu mbakasanduka. Amuna anewa atatu abva Mulungu mbalonga: “Uyu ndi Mwananga wakufunika, anakomerwa na ine, m’bvereni.” (Mateu 3:17; 17:5) Mbwenye paulendo unoyu wacitatu, anthu azinji abva Yahova mbakalonga!

Yezu alonga: ‘Fala ineyi nee yabveka thangwi ya ine, mbwenye thangwi ya imwe.’ (Juwau 12:30) Pyenepi pikhapangiza kuti Yezu ndi mwana wa Mulungu, Mesiya akhadikhirwa na anthu.

Yezu akhali wakukhulupirika ndzidzi onsene ukhali iye pa dziko yapantsi. Na thangwi ya pyenepi iye asiya citsandzo cadidi kwa anthu, pontho apangiza kuti Sathani Dyabo, ntongi wa dziko ino asafunika kuphiwa. Yezu alonga: “Cincino dziko ino ikutongwa; cincino ntongi wa dziko ino anathamangiswa.” Kufa kwa Yezu nee kusapangiza kuti iye akundwa na Sathani, mbwenye kusapangiza kuti iye awina. Munjira ipi? Yezu alonga: “Mbwenye ndingamanikwa pamuti, ndinadzabweresa kuna ine anthu a mitundu yonsene.” (Juwau 12:31, 32) Kufa kwa Yezu pamuti kwacitisa kuti anthu azinji aende kuna iye, pontho kwafungula njira toera anthu agumane umaso wakukhonda mala.

Mudalonga Yezu kuti ‘ndingamanikwa pamuti,’ mwinji wa anthu walonga: “Mwambo usalonga kuti Kristu anakhala kwenda na kwenda. Mphapo thangwi yanji iwe usalonga kuti Mwana wa munthu asafunika kumanikwa pamuti? Mbani Mwana wa munthu unoyu?” (Juwau 12:34) Anthu azinji nee atawira kuti Yezu ndi Mwana wandimomwene wa munthu peno Mesiya akhadikhirwa. Iwo nee atawira pyenepi ngakhale kuti pakhali pipangizo pizinji, kuphatanizambo fala ya Mulungu.

Yezu alonga pontho kuti iye ndi “ceza.” (Juwau 8:12; 9:5) Iye apanga mwinji wa anthu kuti: “Ceza cinapitiriza pakati panu mu ndzidzi ungasi. Fambani mu ceza mu ndzidzi wakuti muciri naco, toera cidima cikhonde kukukundani . . . Mu ndzidzi wakuti muciri na ceza, khulupirani ceza toera mukhale ana a ceza.” (Juwau 12:35, 36) Pidamala Yezu kulonga pyenepi, iye abuluka pakati pawo, thangwi Nisane 10 nee ikhali ntsiku yakuphiwa kwace. Mbwenye pa Paskwa ya Nisane 14 iye akhafunika “kumanikwa pamuti” peno kukhomerwa.—Agalata 3:13.

Mu ndzidzi ukhacita Yezu utumiki wace, Ayuda azinji nee ankhulupira, pontho pyenepi pikhakwanirisa profesiya ineyi. Izaiya alongeratu kuti maso a anthu anewa nee mbadaona cinthu, pontho mitima yawo mbidakhala yakuuma kwakuti nee mbadatawira kucinja. (Izaiya 6:10; Juwau 12:40) Ayuda azinji akhonderatu cipangizo cakuti Yezu ndi Mpulumusi adalongwa mwanyapantsi, pontho kuti iye ndi njira toera kuwina umaso.

Nikodhemu, Zuze wa ku Arimateya na atongi anango azinji ‘akhulupira’ Yezu. Kodi iwo akhacita pinthu pinapangiza kuti akhakhulupira Yezu? Kodi mbadasiya kun’khulupira thangwi yakugopa kuthamangiswa mu sinagoga, peno thangwi yakufuna kakamwe kupaswa ‘mbiri na anthu?’—Juwau 12:42, 43.

Yezu afokotoza pinthu pinacitika munthu angatoma kun’khulupira. Iye alonga: “Munthu anandikhulupira nee asakhulupira ine basi, mbwenye asakhulupirambo Ule adandituma.” Undimomwene udalonga Mulungu kuti Yezu asafunika kuupfundzisa anthu na mphangwa zidapitiriza iye kumwaza zikhali zakufunika kakamwe kwa Yezu, ndi thangwi yace iye alonga: “Munthu anandipwaza mbakhonda kutawira mafala anga, alipo anafuna kuntonga. Mafala adalonga ine ndiwo anafuna kuntonga pa ntsiku yakumalisa.”—Juwau 12:44, 45, 48.

Buluka penepo, Yezu amalisa na kulonga: “Ine nee ndalonga pinafuna ine, mbwenye Baba adandituma ndiye adandipanga pinalonga ine na pinapfundzisa ine. Pontho ine ndisadziwa kuti pidandipanga iye pisatsogolera ku umaso wakukhonda mala.” (Juwau 12:49, 50) Yezu akhadziwa kuti mwakukhonda dembuka mbadapereka umaso wace ninga ntsembe kwa anthu anankhulupira.—Aroma 5:8, 9.