Mareferensya a Umaso Wathu Wacikristu na Utumiki
© 2024 Watch Tower Bible and Tract Society of Pennsylvania
SUMANA 1-7 YA JULHO
MPFUMA ZA MAFALA A MULUNGU MASALMO 57-59
Yahova Asapingiza Masasanyiro a Ale Anatcinga Atumiki Ace
Kupereka Umboni tsa. 220-221 ndima 14-15
“Mpaka Kunkhomo Kwa Dziko Yapantsi”
Estevau apereka umboni mwacipapo mbadzati kuphiwa na anyamalwa ace. (Mabasa 6:5; 7:54-60) “Kutcingwa kakamwe” kudaoneka mu ndzidzi unoyu, anyakupfundza onsene kusiyapo apostolo abalalika mu Yudeya onsene na ku Samariya. Mbwenye pyenepi nee pyalimirisa basa yakupereka umboni wakukwana. Filipi aenda ku Samariya ‘kamwaza mphangwa thangwi ya Kristu,’ pontho anango atawira kukhala anyakupfundza. (Mabasa 8:1-8, 14, 15, 25) Kusiyapo pyenepi Bhibhlya isalonga: “Ale adabalalika thangwi yakutcingwa kudatoma mu ndzidzi udaphiwa Estevau, aenda mpaka ku Fenisya, ku Xipre na ku Antiyokiya, mbwenye iwo akhamwaza mphangwa kuna Ayuda basi. Mbwenye amuna anango pakati pawo a ku Xipre na a ku Sirene, aenda ku Antiyokiya mbatoma kucedza na anthu akhalonga Cigerego, mbaamwazira mphangwa zadidi za Mbuya Yezu.” (Mabasa 11:19, 20) Nakuti mu ndzidzi unoyu Akristu akhatcingwa mbakakamizwa kubuluka mupisa pyawo, iwo amwazambo mphangwa zadidi za Umambo mupisa pinango pizinji.
Mu ntsiku zathu, pinthu pibodzi pyene pyacitikambo ku União Sovietika wakale. Makamaka mu pyaka 1950, Mboni za Yahova zizinji zaendeswa nkaidi ku Sibherya. Nakuti iwo akhadabalaliswa, mphangwa zadidi kweneko zamwazwa mbuto zizinji kakamwe. Mbapidakhala pyakunentsa toera Mboni za Yahova zizinji zikwanise kobiri toera kucita ulendo wa nsindzo wa makilometru 10.000 toera kumwaza mphangwa zadidi! Mbwenye ndi utongi udaphedza toera iwo afike mpaka kweneko. M’bale unango alonga: “Mukupita kwa ndzidzi mautongi aphedza toera anthu azinji a ntima wadidi a ku Sibherya apfundze undimomwene.”
Mpfuma Zauzimu
Ncenjezi 07.23 tsa. 18-19 ndima 16-17
“Khalani Dzololo na Akuwanga”
Khalani wakukhulupirika muntima mwanu. Mambo Dhavidhi apangiza kuti cipo mbadasiya kufuna Yahova mu ndzidzi udalonga iye kuti: “Ntima wanga ndi wakukhulupirika kuna imwe Mulungu.” (Mas. 57:7) Ife tinakwanisambo kukhala na ntima wakukhulupirika tinganyindira Yahova na ntima onsene. (Lerini Masalmo 112:7.) Onani pidaphedza Robert adalongwa mu ndima zakutoma. Pidapangwa iye kuti ciropa mbacidakhala dhuzi toera kumuikha pingafunika, iye alonga kuti mbadabuluka mu xipitari angafuna kumuikha ciropa. Mukupita kwa ndzidzi Robert alonga: “Ine nee ndapenula cisankhulo canga, pontho nee ndadzudzumika na pinthu pikhafuna kucitika.”
Robert akhali wakuwanga thangwi akhadacita kale pinthu mbadzati kuenda ku xipitari toera akhonde kupenula cisankhulo cace. Cakutoma, iye akhafuna kutsandzayisa Yahova. Caciwiri, iye akhapfundza Bhibhlya na mabukhu athu analonga thangwi ya kulemedza umaso na ciropa. Cacitatu, iye akhali na cinyindiro cakuti Yahova mbadampasa nkhombo angabvera mitemo yace. Ife tinakwanisambo kukhala akuwanga mwakukhonda tsalakana mayesero anafuna kuthimbana na ife.
SUMANA 8-14 YA JULHO
MPFUMA ZA MAFALA A MULUNGU
Yahova Asatitsidzikiza, Pontho Asaticitisa Kukhala Akulinganira
Perspicaz vol. 2 tsa. 1143 ndima 7
Nyumba yandzulu
Kuphatisirwa Mwakuphipirisa. Ale anakhulupira Yahova na kumbvera ali na citsidzikizo cikulu ninga pidalonga Dhavidhi: “Imwe [Yahova] ndimwe pakuthawira panga, nyumba yakuwanga yandzulu yakuti isanditsidzikiza kuna anyamalwa.” (Mas. 61:3) Ale anadzindikira mabvekero a dzina yace, anan’nyindira mbadziwisa dzina yace, nee anagopa cinthu, thangwi “dzina ya Yahova ndi mbuto yadidi yakubisalira. Nyakulungama asathawira mwenemu, mbatambira citsidzikizo.”—Mis. 18:10; 1 Sam. 17:45-47.
Perspicaz vol. 2 tsa. 1106 ndima 1
Nyumba
Kazinji kene, fala yakuti “nyumba” ikhaphatisirwambo toera kulonga pinthu pinango mwakuphipirisa. Nyumba ya munthu ikhali mbuto yakupuma na mbuto ya citsidzikizo. (Gen. 18:1) Mwakubverana na misambo yakutambira alendo, alendo akhali na cinyindiro cakuti mbadatambirwa mwadidi na kulemedzwa pa nyumba inafikira iwo. Mwacitsandzo, pidalonga Apokalipse 7:15 thangwi ya mwinji ukulu kuti Mulungu “anadzafuthula nsasa wace mbaatsidzikiza” pisabveka kuti iye anatsidzikiza atumiki ace. (Mas. 61:3, 4) Izaiya alonga masasanyiro anacita nkazi wakuphipirisa wa Mulungu, Sioni kuna ana anafuna kukhala na iye. Iye apangwa toera ‘athimizire nsasa wace.’ (Iza. 54:2) Natenepa iye asathimizira mbuto toera kutsidzikiza anace.
Sentinela 15/4/02 tsa. 16 ndima 14
Mitemo ya Mulungu Isatiphedza
Mitemo ya Mulungu nkhabe kucinja. Midzidzi ino yakunentsa inakhala ife, Yahova ndi mwala wakukhonda tekenyeka kwenda na kwenda. (Masalmo 90:2) Iye alonga: “Ine ndine Yahova; ine nkhabe cinja.” (Malakiya 3:6) Mitemo ya Mulungu inagumanika m’Bhibhlya ndi yakunyindirika kakamwe, iyo yasiyana kakamwe na mitemo ya anthu yakuti asaicinja mwakubwereza-bwereza. (Tiyago 1:17) Mwacitsandzo, mu pyaka pizinji, anyakupfundza pya manyerezero aphedzera kuti ana nee asafunika kutowezera mitemo, mbwenye mukupita kwa ndzidzi, anango a anyakupfundza anewa acinja manyerezero mbalonga kuti akhadaphonyeka. Mitemo na pitsogolero pya dziko thangwi ya pyenepi, pisacinja mwakubwereza-bwereza. Mbwenye Mafala a Yahova nkhabe kucinja. Mu pyaka pizinji, Bhibhlya isapereka uphungu thangwi yakukuza ana mwaufuni. Mpostolo Paulu alemba: “Ababa, lekani kutsukwalisa ananu, mbwenye pitirizani kuakuza kubulukira mu kualanga na kuapfundzisa mwakubverana na pinalonga Yahova.” (Aefesi 6:4) Ndi pyakutsandzayisa kudziwa kuti tinakwanisa kunyindira mitemo ya Yahova thangwi iyo nee isacinja.
Mpfuma Zauzimu
Sentinela 1/6/06 tsa. 11 ndima 7
Ntsonga Zikulu za Bukhu ya Masalmo
Mas. 62:11. Mulungu nee asanyindira pinthu pinango toera akhale na mphambvu. Mphambvu zisabulukira mwa iye, pontho ‘mphambvu ndi zace.’
SUMANA 15-21 YA JULHO
MPFUMA ZA MAFALA A MULUNGU MASALMO 63-65
“Ufuni Wanu Wakukhonda Mala Ndi Wakufunika Kakamwe Kupiringana Umaso”
Sentinela 15/10/01 tsa. 15-16 ndima 17-18
Ninji cinafuna kupingiza Mulungu toera kutifuna?
Kodi ufuni wa Mulungu ndi wakufunika kakamwe kuna imwe? Panango musapibva ninga Dhavidhi adalemba kuti: “Nakuti ufuni wanu wakukhonda mala ndi wakufunika kakamwe kupiringana umaso, mulomo wanga unadzakusimbani. Natenepa ndinadzakusimbani mu umaso wanga onsene; ndinadzalamusa manja anga mbandicemera dzina yanu mu phembero.” (Masalmo 63:3, 4) Kodi n’dziko ino muli na cinthu cadidi kakamwe kupiringana ufuni wakukhonda mala wa Mulungu na kukhala axamwali ace? Mwacitsandzo, kuwangisira toera kukhala na basa yakuti inapasa kobiri izinji ndi pyadidi kupiringana kutsandzaya na kukhurudzika kunakhala na munthu thangwi yakukhala na uxamwali wakuwanga na Mulungu? (Luka 12:15) Akristu anango akhala na cisankhulo cakusiya kutumikira Yahova peno kufa. Pyenepi pyacitika na Mboni za Yahova zizinji m’mazunde a Nazi mu ndzidzi wa Nkhondo Yaciwiri ya Dziko Yonsene. Abale athu azinji asankhula kupitiriza mu ufuni wa Mulungu mbakhala dzololo toera kufa pingafunika. Ale adasankhula kupitiriza kukhala akukhulupirika kuna Mulungu anakwanisa kukhala na cinyindiro cakuti anadzatambira umaso wakukhonda mala, pinthu pyakuti dziko ino nee inakwanisa kutipasa. (Marko 8:34-36) Mbwenye pana pinthu pizinji pinafuna iwo kutambira, kusiyapo umaso wakukhonda mala.
Maseze nee tinakwanisa kukhala na umaso wakukhonda mala mukusowa ciphedzo ca Yahova, yeserani kunyerezera kuti umaso unoyu mbudakhala tani mukusowa Nciti wathu. Mbudakhala umaso wakukhonda tsandzayisa na wakusowa cifuniro. Yahova apasa basa yakutsandzayisa atumiki ace toera kuicita ntsiku zino zakumalisa. Natenepa tinakwanisa kukhala na cinyindiro cakuti Yahova angakwanirisa cifuniro cace, tinadzakhala na umaso wakutsandzayisa kakamwe, pontho tinadzapfundza pinthu pizinji toera kucita. (Ekleziaste 3:11) Mwakukhonda tsalakana pyaka pizinji kakamwe pinafuna kupfundza ife, cipo tinabvesesa pyonsene thangwi ya ‘nkhombo zizinji za Mulungu, udziwisi wace na ndzeru zace.’—Aroma 11:33.
Ncenjezi 12.19 tsa. 28 ndima 4
“Perekani Takhuta Thangwi ya Pinthu Pyonsene”
Cakufunika kakamwe kwa ife ndi kupereka takhuta kuna Mulungu. Mwandimomwene, midzidzi inango imwe musanyerezera pinthu pizinji pyauzimu na pyakumanungo pinakupasani Mulungu. (Deut. 8:17, 18; Mabasa 14:17) M’mbuto mwakunyerezera kukoma ntima kwa Mulungu mwakucimbiza, ndiye tani kukhala na ndzidzi wakunyerezera mwadidi pinapereka Mulungu kuna imwe na kuna anyakufunika anu? Kunyerezera mwadidi kukoma ntima kwa Nciti wanu kunathimizira kupereka kwanu takhuta kuna iye, pontho munakhala na cinyindiro cakuwanga cakuti iye asakufunani na asakutsalakanani.—1 Juw. 4:9.
Ncenjezi 15/10/15 tsa. 24 ndima 7
Nyerezerani Mwacidikhodikho Pinthu Pyauzimu
Maseze kuleri nee kusaphemba kuwangisira, kunyerezera mwacidikhodikho kusaphemba kukhazikika. Natenepa, si pyadidi tayu kunyerezera mwacidikhodikho pa ndzidzi wakuti mwaneta. Mphyadidi kusaka mbuto yakusowa dzumbi, yakuti nkhabe pinthu pizinji pyakudzudzumisa. Nyamasalmo Dhavidhi aona kuti ndzidzi wadidi toera kunyerezera mwacidikhodikho ndi unakhala iye pa talimba camasiku mbadzati kugona. (Sal. 63:6) Yezu wakuti akhali waungwiro, asankhula mbuto zakusowa dzumbi toera kunyerezera mwacidikhodikho na kucita phembero.—Luka 6:12.
Sentinela 15/7/09 tsa. 16 ndima 6
Pfundzisani Mwaufuni Ninga Pidacita Yezu
Ife tisatsandzaya kulonga pinthu pinakomerwa na ife. Tisalonga pinthu pyenepi mwakugalamuka, pontho anango asakwanisa kuona kutsandzaya kwathu. Ndi pyenepi pisacitikambo tingalonga thangwi ya munthu anafuna ife. Kazinji kene tisafuna kakamwe kupangambo anango pinadziwa ife thangwi ya munthu unoyu. Ife tisansimba, kumulemedza na kuntsidzikiza. Tisacita pyenepi thangwi tisafuna kuti anthu anango akomerwembo na makhaliro a munthu unoyu.
Mpfuma Zauzimu
Sentinela 15/11/07 tsa. 15 ndima 6
Kodi Imwe Musawangisa Anango?
Ndi pyakukhonda nentsa kufudza nyumba kupiringana kuimanga. Pyenepi ndi sawasawa na mafala analonga ife. Ninga anthu akusowa ungwiro, tonsene tisadodoma. Mambo Salomoni alonga: “Pa dziko yapantsi nkhabepo munthu wakulungama wakuti ndzidzi onsene asacita pinthu pyadidi mbakhonda kudawa.” (Ekleziaste 7:20) Ndi pyakukhonda nentsa kuona madodo a munthu mbatintsukwalisa na mafala athu. (Masalmo 64:2-4) Mbwenye tisafunika kukhala na maluso toera tikwanise kulonga mafala akuwangisa.
SUMANA 22-28 YA JULHO
MPFUMA ZA MAFALA A MULUNGU MASALMO 66-68
Ntsiku Zonsene Yahova Asathukula Mitolo Yathu
Ncenjezi 05.23 tsa. 12 ndima 15
Yahova Asatawira Tani Maphembero Athu?
Kazinji kene maphembero athu nee asatawirwa munjira yakudzumatirisa. Mbwenye iwo asatawirwa munjira yakufunika kuna ife toera tipitirize kukhala akukhulupirika kuna Babathu wakudzulu. Natenepa onani mwadidi njira inatawira Yahova maphembero anu. Mulongo unango anacemerwa Yoko akhanyerezera kuti Yahova nee akhatawira maphembero ace, mbwenye buluka penepo, iye atoma kulemba n’kadhernu pinthu pikhaphemba iye kuna Yahova. Mukupita kwa ndzidzi, iye aona n’kadhernu mwace, pontho adzindikira kuti Yahova atawira mazinji mwa maphembero adacita iye, ngakhale maphembero akuti iye aduwala kuti akhadaacita. Midzidzi inango ife tisafunika kunyerezera kuti Yahova akutawira tani maphembero athu.—Mas. 66:19, 20.
Sentinela 1/12/10 tsa. 23 ndima 6
Pangizani Citsalakano Kuna Ale Anakuza Ana Okhene
Yahova apumira anthu anango toera kulemba masalmo, peno nyimbo zakusimba zikhaimba Aizraeli pakulambira. Mwakukhonda penula, akazi azice na amphawi mu Izraeli akhawangiswa kakamwe angaimba nyimbo zenezi, pontho zikhaakumbusa kuti Yahova ndi “pai” na “ntongi” wawo. Kusiyapo pyenepi, nyimbo zenezi zikhaapasa cinyindiro cakuti Yahova ali dzololo toera kuaphedza. (Masalmo 68:5; 146:9) Ife tinakwanisambo kuwangisa anyakubala anakuza ana okhene. Iwo anakwanisa kukumbuka mafala athu mu pyaka pizinji. Ngakhale papita pyaka 20, Ruth asakumbuka mafala adampanga nyakubala unango kuti: “Iwe uli kutsalakana mwadidi anako awiri. Pitiriza tenepo.” Ruth alonga: “Mafala anewa andiwangisa kakamwe.” Mwandimomwene, “mafala adidi asapasa umaso,” pontho anakwanisa kuwangisa munthu munjira yakuti nee tikhaidikhira. (Misangani 15:4, Sociedade Bíblica Portuguesa) Kodi munakwanisa kunyerezera mafala toera kusimba nyakubala anakuza ana ekhene?
Sentinela 1/4/09 tsa. 31 ndima 1
Pai wa Ana Aumphawi
“BABA wa ana aumphawi . . . ndi Mulungu, ule anakhala pa mbuto yace yakucena.” (Masalmo 68:5) Mafala anewa asatipfundzisa kuti Yahova Mulungu asafuna kakamwe kuphedza ale adasowa ciphedzo. Ntemo udapereka Mulungu kuna Aizraeli usapangiza pakweca kuti iye asadzudzumika kakamwe na ana adaferwa na apai awo peno amai awo. Tendeni tione lemba yakutoma inalonga pya “mwana waumphawi.” Lemba ineyi ndi Eksodho 22:22-24.
Ncenjezi 01.23 tsa. 19 ndima 17
Yahova Asakuphedzani Toera Pinthu Pikufambireni Mwadidi
Lerini Masalmo 40:5. Anthu anakwira phiri cifuniro cawo ndi kufika pa ntsonga ya phiri. Ngakhale tenepo, mu ndzidzi unakwira iwo, asalimira kazinji kene toera kuona pinthu pyakubalika pinagumanika pa phiri. Munjira ibodzi ene, khalani na ndzidzi toera kulimira mbamunyerezera kuti Yahova ali kukuphedzani tani toera pinthu pikufambireni mwadidi, ngakhale mu ndzidzi unathimbana imwe na nyatwa. Pakumala kwa ntsiku, bvundzikani: ‘Ndi pinthu pipi pidandicitira Yahova lero? Maseze ndiciri kuthimbana na nyatwa, Yahova asandiphedza tani toera ndikwanise kupirira?’ Yeserani kuona cinthu cibodzi cidakucitirani Yahova toera pinthu pikufambireni mwadidi.
Mpfuma Zauzimu
Sentinela 1/6/06 tsa. 10 ndima 4
Ntsonga Zikulu za Bukhu Yaciwiri ya Masalmo
Mas. 68:18—Mbani akhali “amuna ninga miyoni”? Akhali amuna adakwatwa ninga mabitcu mu ndzidzi udapita Aizraeli mu Dziko Yakupikirwa. Mukupita kwa ndzidzi, amuna anewa adzapaswa basa yakuphedza Alevi.—Esd. 8:20.
SUMANA 29 YA JULHO–4 YA AGOSTO
MPFUMA ZA MAFALA A MULUNGU MASALMO 69
Pinthu Pidacitika mu Umaso wa Yezu Pikhadalongwa Kale m’Masalmo 69
Sentinela 15/8/11 tsa. 11 ndima 17
Iwo akhadikhira Mesiya
Mesiya mbadaidiwa mwakusowa mathangwi. (Mas. 69:4) Yezu alonga: “Mbadakhonda kuona mabasa adacita ine pakati [pa anthu] akuti cipo acitwa kale na munthu unango, iwo nee mbadakhala na madawo; mbwenye cincino iwo andiona mbaida ine na Babanga ene. Pyenepi pyacitika toera kukwanirisa mafala adalembwa mu Mwambo wawo kuti: ‘Iwo andiida mwakusowa mathangwi.’” (Juw. 15:24, 25) Kazinji kene fala yakuti “Mwambo” isabveka Malemba onsene. (Juw. 10:34; 12:34) Maevanjelyu asapangiza kuti Yezu akhaidiwa, makamaka na atsogoleri auphemberi Waciyuda. Kusiyapo pyenepi, Kristu alonga: “Dziko nkhabe thangwi toera kukuidani, mbwenye isaida ine thangwi ndisapereka umboni wakuti mabasa ayo ndi akuipa.”—Juw. 7:7.
Sentinela 15/12/10 tsa. 8 ndima 7-8
Khalani Aphinga na Ulambiri Wandimomwene
Pinthu pidacitika ntsiku inango pyapangiza pakweca phinga ikhali na Yezu. Pyenepi pyacitika mu ndzidzi udatoma iye utumiki wace, pa Paskwa ya 30 P.K.K. Yezu na anyakupfundzace aenda ku templo, pontho “agumana anthu akugulisa ng’ombe, mabira na nkhangaiwa. Agumanambo anyakucinjisa kobiri akhali m’mipando yawo.” Kodi Yezu acitanji, pontho pyenepi pyakhuya tani anyakupfundzace?—Lerini Juwau 2:13-17.
Pidacita Yezu na pidalonga iye ntsiku ineyi pyacitisa anyakupfundzace kukumbuka mafala adalonga Dhavidhi kuti: “Phinga iri na ine thangwi ya nyumba yanu ndi ninga moto wakugaka muntima mwanga.” (Mas. 69:9) Thangwi yanji? Thangwi pidacita Yezu pikhali pyakugopswa kakamwe. Thangwi akulu a mu templo, anyantsembe, alembi na anthu anango akhaphedzera pinthu pyenepi pyakuipa pikhacitwa mu templo. Toera kupangiza kuti pikhacita iwo ndi pyakuipa, Yezu akhafunika kucita pinthu ninga nyamalwa wa anthu anewa. Natenepa anyakupfundza akwanisa kuona kuti Yezu akhali na ‘phinga thangwi ya nyumba ya Mulungu.’ Mphapo phinga ninji?
Perspicaz vol. 2 tsa. 660
Muti wa Venenu
Malemba akhadalonga kuti Mesiya mbadapaswa “muti wa venenu” ninga cakudya. (Mas. 69:21) Pyenepi pyacitika Yezu Kristu mbadzati kukhomerwa pa muti, mu ndzidzi udapaswa iye vinyu yakubvungazwa na miti yakuwawa mbakhonda pidailawira iye. Iye apaswa vinyu ineyi panango toera kupungula kubva kupha kwace. Pakulonga kukwanirisika kwa profesiya ineyi, lemba ya Mateu 27:34 yaphatisira fala Yacigerego yakuti kho·leʹ (miti yakuwawa), fala ibodzi ene isagumanikambo mu Septuaginta Yacigerego pa Masalmo 69:21. Mbwenye bukhu ya Marko isalonga mira (Marko 15:23), pontho pyenepi pisacitisa anango kunyerezera kuti “muti wa venenu” unalongwa pa Masalmo 69:21 ndi “mira.” Panango vinyu idapaswa Yezu ikhali na miti yakuwawa na mira.
Mpfuma Zauzimu
Sentinela 15/1/99 tsa. 18 ndima 1
Lamusani Manja Mwakukhulupirika m’Phembero
Anthu azinji asacita phembero basi ene toera kuphemba pinthu, mbwenye ufuni wathu kuna Yahova Mulungu usafunika kutikulumiza toera kunsimba tingacita phembero pathu tekha peno pamwinji. Paulu alemba: “Lekani kudzudzumika, nee na cinthu cibodzi, mbwenye mu pinthu pyonsene, dziwisani Mulungu maphembo anu pakucita phembero, kudembetera na kupereka takhuta; natenepa, ntendere wa Mulungu wakuti usapiringana kubvesesa konsene, unadzatsidzikiza mitima yanu na manyerezero anu kubulukira mwa Kristu Yezu.” (Afilipi 4:6, 7) Kusiyapo kudembetera na kuphemba, tisafunika kupereka takhuta kuna Yahova thangwi ya nkhombo zauzimu na zakumanungo zinatipasa iye. (Misangani 10:22) Nyamasalmo alonga: “Perekani miyoni yanu yakupereka takhuta ninga ntsembe kuna Mulungu, pontho citani pidadumbira imwe kuna Mulungu Wakudzulu Kakamwe.” (Masalmo 50:14) Pontho mu phembero idacita Dhavidhi, iye alongambo mafala awa: “Ndinaimba nyimbo toera kusimba dzina ya Mulungu, ndinakusimbani, pontho ndinapereka takhuta kuna imwe.” (Masalmo 69:30) Kodi nee tisafunika kucita pyenepi tingacita phembero pathu tekha peno pamwinji?
SUMANA 5-11 YA AGOSTO
MPFUMA ZA MAFALA A MULUNGU MASALMO 70-72
‘Pangani Ubalwi Unafuna Kudza’ Pya Mphambvu za Mulungu
Sentinela 1/9/99 tsa. 18 ndima 17
Aphale na Atsikana—Kulisani Maluso Anu Akudzindikira
Toera kucalira misampha ya Sathani tisafunika kukhala akuyang’anira, pontho midzidzi inango tisafunika kukhala acipapo kakamwe. Midzidzi inango panango munapibva ninga musaidiwa na anthu a thunga yanu peno anthu onsene. Nyamasalmo Dhavidhi aphembera: “Yahova Mbuya Wankulu Kakamwe, imwe ndimwe cidikhiro canga; ine ndisakunyindirani kutomera mu uwana wanga. Mulungu, imwe mwandipfundzisa kutomera mu uwana wanga, pontho mpaka lero, ine ndisapitiriza kulonga pya mabasa anu akudzumisa.” (Masalmo 71:5, 17) Dhavidhi akhadziwika thangwi ya cipapo cace. Ndi mu ndzidzi upi udakulisa iye cipapo ceneci? Ndi mu ndzidzi ukhali iye m’phale! Ngakhale mbadzati kupha Goliyati, Dhavidhi akhadapangiza kale cipapo mu ndzidzi udatsidzikiza iye mabira a pai wace, mbapha nkhalamu na ursu. (1 Samweli 17:34-37) Mbwenye Dhavidhi apasa mbiri yonsene Yahova thangwi ya cipapo cidapangiza iye mbalonga kuti ‘ndisanyindira iye kutomera mu uwana wanga.’ Kunyindira Yahova kwaphedza Dhavidhi toera kupirira mayesero onsene akhathimbana na iye. Imwe munganyindira Yahova, iye anakupasani cipapo na mphambvu toera “kukunda dziko.”—1 Juwau 5:4.
Despertai! 8/10/04 tsa. 23 ndima 3
Tisafunika Kutsalakana Tani Ankhalamba?
Nyamasalmo aphembera: “Lekani kundikhonda ndingakalamba; lekani kundisiya mphambvu zanga zingamala.” (Masalmo 71:9) Mulungu nee ‘asakhonda’ atumiki ace akukhulupirika, maseze iwo anyerezere kuti ndi akusowa basa thangwi ya thunga yawo. Nyamasalmo nee akhapibva kuti asiyiwa na Yahova, mbwenye adzindikira kuti akhafunika kunyindira kakamwe Nciti wace mu ndzidzi ukhakalamba iye. Yahova asaphedza anthu akukhulupirika ninga Dhavidhi mu umaso wawo onsene. (Masalmo 18:25) Kazinji kene iye asaphatisira Akristu andzathu toera kutiphedza.
Ncenjezi 1/1/14 tsa. 23 ndima 4-5
Tumikirani Yahova Mbazidzati Kufika Ntsiku Za Nyatwa
Khala imwe muli na pyaka pizinji pya maluso ninga munthu wankulu, pana mbvundzo wakufunika kwa imwe toera kubvundzika, ‘Kodi ndinadzacitanji na umaso wanga cincino mu ndzidzi wakuti ndiciri na mphambvu?’ Ninga Nkristu wa maluso, muli na miyai yakuti idzati kufungulwa kuna anango. Munakwanisa kupanga aphale na atsikana pinthu pidapfundza imwe kubulukira kuna Yahova. Munakwanisa kuwangisa anango mu kulonga pyakugumana napyo pidakhala na imwe mu kutumikira Mulungu. Mambo Dhavidhi aphembera kuti akhale na miyai toera kucita pyenepi. Iye alemba: “Mulungu, mwandipfundzisa kutomera uwana wanga . . . Chinchino ndine nkhalamba na munthu wa imbvi; ntsiku zinombo lekani kundisiya, Mulungu; towera ndibvekese pya mphambvu zanu zikulu kuli anthu onsene a chinchino na a kutsogolo.”—Sal. 71:17, 18.
Kodi munakwanisa tani kupereka udziwisi udakhala na imwe mu pyaka pizinji? Munakwanisa kucemera kunyumba kwanu aphale na atsikana anatumikira Mulungu toera kucita masendzekero akuwangisa? Munakwanisa kuaphemba toera kubuluka pabodzi mu utumiki mbamuapangiza kutsandzaya kunakhala na imwe mu kutumikira Yahova? Eliyu wa ndzidzi wakale alonga: “Mphyadidi alonge mba akulu, ankhalamba mbapangisa udziwisi wawo.” (Yobe 32:7) Mpostolo Paulu akulumiza akazi a maluso Acikristu toera kuwangisa anango kubulukira m’mafala na citsandzo. Iye alemba: ‘Akazi akulu akhale anthu akupfundzisa pinthu pyadidi.’—Tito 2:3, Chibverano Chachinchino.
Mpfuma Zauzimu
Perspicaz vol. 1 tsa. 892
Eufrate
Madire a dziko idapaswa Aizraeli. Mulungu apikikira kupasa dzindza ya Abhrahamu dziko ikhatomera “ku nkulo wa Ejitu mpaka ku nkulo ukulu, wakuti ndi nkulo wa Eufrate.” (Gen. 15:18) Mulungu alonga pontho pikiro ineyi kuna Aizraeli. (Eks. 23:31; Dheu. 1:7, 8; 11:24; Yos. 1:4) Lemba ya 1 Kronika 5:9 isalonga kuti Dhavidhi mbadzati kutonga, anthu a dzindza ya Rubheni athimizira cisa cawo “mpaka kudatoma thando inagumanika cifupi na Nkulo wa Eufrate.” Mbwenye nakuti nkulo wa Eufrate uli na nsindzo wa makilometro 800, munthu angacita ulendo kuenda “kumabulukiro a dzuwa a Jiliyadhi.” (1 Kro. 5:10) Pyenepi panango pisabveka kuti anthu a dzindza ya Rubheni athimizira cisa cawo kumabulukiro a dzuwa a Jiliyadhi mpaka dhuzi na thando ya Sirya inapitiriza mpaka ku Eufrate. Natenepa pisaoneka kuti pikiro ya Yahova yakwanirisika yonsene mu ndzidzi ukhatonga Dhavidhi na mu ndzidzi ukhatonga Salomoni. Mu ndzidzi unoyu madire a Izraeli akhaphataniza utongi wa Arani ku Zobha, natenepa akhafika mpaka ku nkulo wa Eufrate wakuti panango ukhafika ku Sirya. (2 Sam. 8:3; 1 Ama. 4:21; 1 Kro. 18:3-8; 2 Kro. 9:26) Thangwi yakukula kakamwe, nkulo wa Eufrate midzidzi inango ukhacemerwa basi ene “Nkulo.”—Yos. 24:2, 15; Mas. 72:8.
SUMANA 12-18 YA AGOSTO
MPFUMA ZA MAFALA A MULUNGU MASALMO 73-74
Tinacitanji Khala Tisacitira Bibvu Ale Akuti Nee Asatumikira Mulungu?
Ncenjezi 12.20 tsa. 19 ndima 14
‘Yahova Asapulumusa Anthu Akutsukwala’
Munthu adalemba Masalmo 73 akhali Mulevi. Iye akhali na mwai ukulu kakamwe wakuphata basa panyumba ya Yahova. Mbwenye mukupita kwa ndzidzi, iye adzakhala wakutsukwala kakamwe. Thangwi yanji? Iye nee akhatsukwala thangwi yakufuna kucita pinthu pyakuipa, mbwenye thangwi akhasirira pinthu pyadidi pikhali na anthu akuipa. (Masal. 73:2-9, 11-14) Thangwi anthu anewa akhaoneka ninga ali na pinthu pizinji pyadidi, pontho nee akhadzudzumika na cinthu. Pidaona Mulevi pinthu pyenepi iye atsukwala kakamwe mbalonga: ‘Mwandimomwene, kuwangisira kwanga toera kukhala na ntima wakucena kukhali kwapezi, pontho kusamba manja kudacita ine toera ndikhale wakusowa mulando kukhali kwakusowa basa.’ Mwandimomwene, pyenepi mbapidan’citisa toera kusiya kutumikira Yahova.
Ncenjezi 12.20 tsa. 19 ndima 15-16
‘Yahova Asapulumusa Anthu Akutsukwala’
Lerini Masalmo 73:16-19, 22-25. Mulevi ‘apita n’nyumba ya Mulungu.’ Mu nyumba ineyi, iye akhali pabodzi na anthu anango akhalambira Yahova. Natenepa pyenepi pyamphedza toera kukhala wakukhurudzika na kucita phembero thangwi ya nyatwa zace. Buluka penepo iye adzindikira kuti manyerezero ace akhali akuphonyeka, pontho uxamwali wace na Yahova ukhali pangozwi. Kusiyapo pyenepi, iye adzindikira kuti ‘anthu akuipa ali pa mataka autherezi,’ pontho iwo anadzafudzwa. Toera kumalisa mabvero akhali na iye, Mulevi akhafunika kuona pinthu ninga mukhapionera Yahova. Pidacita iye pyenepi, iye atoma pontho kukhala wakutsandzaya. Iye alonga: ‘Kusiyapo Yahova, nkhabepo cinthu cinango cinafuna ine pa dziko yapantsi.’
Tisapfundzanji? Ife cipo tisafunika kusirira umaso wadidi uli na anthu akuipa. Kutsandzaya kwawo ndi kwa ndzidzi wakucepa, pontho iwo nee anadzatambira umaso wakwenda na kwenda. (Koel. 8:12, 13) Tingasirira pinthu piri na iwo, pinaticitisa kukhala akutsukwala mbatiluza uxamwali wathu na Yahova. Natenepa, mungaona kuti mukutoma kusirira pinthu piri na anthu akuipa, citani pinthu ninga pidacita Mulevi. Bverani uphungu wa Mulungu, pontho khalani cifupi na abale na alongo mu mpingo. Mungafuna kakamwe Yahova kupiringana pinthu pyonsene, imwe munadzakhala wakutsandzaya kakamwe. Pontho munakwanisa kukhala na cidikhiro ca kudzatambira “umaso wandimomwene.”—1 Tim. 6:19.
Ncenjezi 1/4/14 tsa. 8 ndima 5
Towezerani Cikhulupiro Ca Mose
Munakwanisa tani kucalira ‘maphindu akutsandzayisa a ndzidzi wakucepa a madawo’? Cipo, lekani kuduwala kuti tsendzo ya madawo ndi ninga madzi akupita. Na maso a cikhulupiro, onani kuti ‘dziko na pifuno pyayo pikupita.’ (1 Jwau 2:15-17) Nyerezerani pinafuna kudzacitika kwa anyakudawa akuti nkhabe funa tcinyuka. Iwo ali “pa kutherezeka, . . . mbamalisira kufudziwa mwakugopswa!” (Sal. 73:18, 19) Mungayeserwa toera kucita madawo, bvundzikani: ‘Ninji pinafuna kundicitikira ntsogolo?’
Sentinela 15/2/13 tsa. 25-26 ndima 3-5
Lekani Tawirisa Kuti Cinthu Cikupingizeni Kukhala Wakutawirika Kuna Mulungu
Nyamasalmo apangiza cinyindiro cace cakuti Yahova mbadam’phata na nkono wace wamadyo mbantsogolera toera akhale wakutawirika kuna iye. (Lerini Masalmo 73:23, 24.) Yahova asacita tani pyenepi? Iye asalemedza atumiki ace akucepeseka munjira zakusiyana-siyana. Iye asaapasa nkhombo mukuaphedza toera kubvesesa cifuno cace. (1 Akor. 2:7) Iye asatawirambo kukhala na uxamwali wakuwanga na ale anambvera.—Tiya. 4:8.
Yahova asanyindira atumiki ace mukuapasa mpfuma ya utumiki. (2 Akor. 4:1, 7) Pontho utumiki unoyu usaacitisa kukhala akutawirika. Ale anaphatisira miyai yawo yakutumikira toera kusimba Yahova na kuphedza anango, iye asaapikira: “Ine ndinalemedza ale anandilemedza.” (1 Sam. 2:30) Anthu anewa asakhala na uxamwali wadidi na Yahova, pontho ndzidzi onsene asalongwa mwadidi na atumiki andzawo.—Mis. 11:16; 22:1.
Ninji pinafuna kucitika na ale ‘anadikhira Yahova mbatoweza njira zace’? Bhibhlya isalonga: “Iye [Yahova] anadzakupasa mbiri, mbakucitisa kutambira dziko yapantsi ninga unthaka. Ale anacita pinthu pyakuipa angafudzwa, iwe unadzaona pyenepi.” (Mas. 37:34) Iwo asadikhira kupaswa umaso wakukhonda mala.—Mas. 37:29.
Mpfuma Zauzimu
Perspicaz vol. 2 tsa. 222
Bukhu ya Masalmo 74 isalonga njira idapulumusa Mulungu atumiki ace, pontho mavesi 13 na 14 asalonga mwakuphipirisa kubuluswa kwa Aizraeli ku Ejitu. Mafala adathumburuzwa mu Cihebheri penepa akuti “pinyama pikulu pya m’bara” [hebr.: than·ni·ním, plural de tan·nín]” m’mavesi anango asalongwa “Leviatani,” pontho kunyedzwa kwa misolo ya Leviatani panango kusabveka kufudzwa kwa Farau na anyankhondo ace mu ndzidzi ukhacita Aizraeli ulendo buluka ku Ejitu. Targum Aramaico yaphatisira mafala akuti “anyamphambvu a Farau” m’mbuto mwa “misolo ya Leviatani.” (Onani lemba ya Ezek. 29:3-5, yakuti isalandanisa Farau na “cikala cikulu ca m’bara” cidagona pakati pa madzi a mu Nkulo wa Nilo; onanimbo Ezek. 32:2.) Pisaoneka kuti lemba ya Izaiya 27:1 isalonga Leviatani (LXX, “nyoka”) ninga cidzindikiro ca utongi, nsoka wa madziko akusiyana-siyana unatongwa na munthu m’bodzi anacemerwa “nyoka.” (Apok. 12:9) Profesiya ineyi isalonga pya Izraeli, pontho isapangiza kuti ‘Yahova angapha’ Leviatani, anadzafudzambo Bhabhilonya. Mbwenye mavesi 12, na 13 asalongambo pya Asirya na Ejitu. Natenepa, fala yakuti Leviatani panango isabveka nsoka peno utongi wa madziko akusiyana--siyana unaida Yahova na atumiki ace.
SUMANA 19-25 YA AGOSTO
MPFUMA ZA MAFALA A MULUNGU MASALMO 75-77
Thangwi Yanji Nee Tisafunika Kudzikuza?
Ncenjezi 01.18 tsa. 28 ndima 4-5
Onani Kusiyana Kwa Anthu Anatumikira Yahova na Ale Anakhonda Kuntumikira
Pidamala Paulu kulonga kuti azinji anadzafuna pyawo pyokha basi na anadzafuna kobiri, iye alongambo kuti anthu anadzagaya, anadzikuza mbadzacita umbirimi. Anthu akuti ali na makhaliro ninga anewa kazinji kene asanyerezera kuti iwo ndi akufunika kakamwe kupiringana anango thangwi ya maonekero awo, pinacita iwo, pinthu piri na iwo, peno cidzo ciri na iwo. Anthu ninga anewa asafuna kakamwe kulemedzwa. Nyakudziwisa pya Bhibhlya m’bodzi alemba tenepa thangwi ya munthu ninga unoyu: “Muntima mwace muli na guwa inagodamira iye ekha.” Anango asalonga kuti kudzikuza ndi kwakunyanyasa kakamwe kwakuti anthu akudzikuza nee asakomerwa angaona anango mbakadzikuza.
Yahova asaida n’khaliro wakudzikuza wakuti m’Bhibhlya usacemerwa “maso akugaya.” (Misangani 6:16, 17) Mwandimomwene kudzikuza kusacitisa munthu kukhala kutali na Mulungu. (Masalmo 10:4) Kudzikuza ndi n’khaliro wa Dyabo. (1 Timoti 3:6) Mwakutsukwalisa, atumiki anango a Yahova akhuiwambo na kudzikuza. Mwacitsandzo, Mambo Uziya wa ku Yuda, akhala wakukhulupirika mu pyaka pizinji. Mbwenye Bhibhlya isalonga: ‘Pidadzakhala iye munthu wamphambvu, ntima wace wadzala na umbirimi mbaleka kukhulupira Yahova, Mulungu wace.’ Uziya apita mu templo mbapisa ntsembe zakununkhira, mbwenye iye nee akhadathema kucita pyenepi. Mukupita kwa ndzidzi, Mambo Ezekiya, wakuti akhali wakukhulupirika akhalambo wakudzikuza, maseze acita pyenepi mu ndzidzi wakucepa.—2 Pya dziko ya Israele 26:16; 32:25, 26.
Ncenjezi 04.23 tsa. 5 ndima 11, 12
Tisapfundzanji na Pirengo Pidacita Yezu?
Tisapfundzanji na cirengo cidacita Yezu ca kucinja madzi kudza vinyu? Tisapfundza kufunika kwa kukhala akucepeseka. Yezu nee adzikuza na cirengo ceneci cidacita iye, pontho cipo adzikuza na pinthu pinango pikhacita iye. Mbwenye mwakucepeseka, pontho mwakubwereza-bwereza, iye akhapasa mbiri Babace. (Juwau 5:19, 30; 8:28) Tingakhala akucepeseka ninga Yezu, ife nee tinadzikuza thangwi ya pinthu pinacita ife. Mwakukhonda tsalakana pinacita ife m’basa ya Yahova, nee tisafunika kudzikuza thangwi ya pinthu pinacita ife, mbwenye thangwi ya mwai uli na ife wakutumikira Yahova. (Yer. 9:23, 24) Tisafunika kumpasa mbiri thangwi iye ndi wakuthema kupaswa mbiri. Mwandimomwene mbatidasowa ciphedzo ca Yahova, ife nee mbatidakwanisa kucita nee cinthu cibodzi cadidi.—1 Akor. 1:26-31.
Onani njira inango yakuti tinakwanisa kutowezera kucepeseka kwa Yezu. Nyerezerani kuti nkulu wa mpingo amala ndzidzi uzinji mbakaphedza ntumiki wakutumikira toera kukhunganyika nkhani yace yapakweca. Na ciphedzo ceneci, ntumiki wakutumikira acita nkhani yakuwangisa kakamwe, pontho abale na alongo mu mpingo akomerwa. Pakumala kwa misonkhano, abale anango asaenda kuna nkulu wa mpingo unoyu mbalonga: ‘M’bale Ngana acita nkhani yadidi kakamwe.’ Kodi nkulu wa mpingo asafunika kulonga: ‘Inde, acita nkhani yadidi, mbwenye ine ndamala ndzidzi uzinji mbandikamphedza.’ Peno asafunika kulonga mwakucepeseka kuti: ‘Inde, acita nkhani yadidi. Pontho ndiri wakutsandzaya kakamwe na pyenepi?’ Tingakhala akucepeseka, nee tinafuna kupaswa mbiri na pinthu pyadidi pinacitira ife anango. Thangwi ife tisakomerwa na kudziwa kuti Yahova asaona, pontho asakomerwa na pinacita ife. (Onani Mateu 6:2-4; Aheb. 13:16) Mwandimomwene, ife tisakomeresa Yahova tingatowezera Yezu mbatikhala akucepeseka.—1 Ped. 5:6.
Mpfuma Zauzimu
Sentinela 15/7/06 tsa. 11 ndima 3
Ntsonga Zikulu za Bukhu Yacitatu na Yacinai ya Masalmo
Mas. 76:10—Kodi “kuipirwa kwa anthu” kunakwanisa tani kupasa mbiri Yahova? Mulungu angatawirisa kuti anthu aticitire pinthu pyakuipa thangwi yakukhala atumiki ace, panango pyenepi pinabweresa maphindu. Nyatwa zonsene zinathimbana na ife zinakwanisa kutipfundzisa pinthu. Yahova asatawirisa kuti tithimbane na nyatwa toera izo zitipfundzise pinthu. (1 Pedhru 5:10) ‘Kuipirwa kwakumalisa kwa anthu, kunadzamaliswa na Mulungu.’ Mphapo ndiye tani tingathabuka mpaka kufa? Pyenepi pinakwanisambo kupasa mbiri Mulungu, thangwi ale anaona kupirira kwathu panango anatomambo kucita pibodzi pyene.
SUMANA 26 YA AGOSTO–1 YA SETEMBRO
MPFUMA ZA MAFALA A MULUNGU MASALMO 78
Kukhonda Khulupirika Kwa Aizraeli Ndi Cenjezo Kuna Ife
Sentinela 1/12/96 tsa. 29-30
Thangwi Yanji Tisafunika ‘Kukumbuka Ntsiku za Nduli’?
Mwakutsukwalisa, kazinji kene Aizraeli akhaduwala pinthu pikhaacitikira. Mphapo ninji pikhacitika thangwi ya kuduwala kweneku? “Mwakubwereza-bwereza iwo ayesera Mulungu, pontho iwo atsukwalisa Wakucena wa Izraeli. Iwo nee akumbuka mphambvu zace, nee akumbuka ntsiku idaapulumusa iye kuna anyamalwa awo.” (Masalmo 78:41, 42) Yahova aakhonda thangwi ya kuduwala kwawo matongero ace.—Mateu 21:42, 43.
Nyamasalmo m’bodzi apangiza citsandzo cadidi. Iye alemba: “Ndinakumbuka mabasa a Yahova; ndinakumbuka mabasa akudzumisa adacita imwe kale kakamwe. Ndinanyerezera mwadidi mabasa anu onsene na pyonsene pinacita imwe.” (Masalmo 77:11, 12) Tinganyerezera pinthu pidaticitira Yahova na ufuni udapangiza iye kuna ife, tisawangiswa, pontho tisakulumizika toera kupereka takhuta. Kusiyapo pyenepi, ‘tingakukumbuka ntsiku za nduli’ tisapungula kuneta mbatiwangisira kucita pyonsene pinakwanisa ife toera kupirira na kukhala akukhulupirika.
Sentinela 15/7/06 tsa. 17 ndima 16
‘Lekani Kudungunya’
Kudungunya kusacitisa kuti tinyerezere basi ene pya ife mbatiikha pa mbuto yaciwiri nkhombo ziri na ife thangwi yakukhala Mboni za Yahova. Toera kumalisa cipendamiro ca kudungunya, tisafunika kukumbuka nkhombo zenezi. Mwacitsandzo, m’bodzi na m’bodzi wa ife ali na mwai wakudziwika na dzina ya Yahova. (Izaiya 43:10) Ife tinakwanisa kukhala na uxamwali wakuwanga na iye, pontho tinakwanisa kulonga na “Nyakubva phembero” ndzidzi onsene. (Masalmo 65:2; Tiyago 4:8) Umaso wathu uli na cifuniro thangwi tisabvesesa ufulu wakutonga wa Yahova, pontho tisadziwa kuti tiri na mwai wakupitiriza kukhala wakukhulupirika kuna Mulungu. (Misangani 27:11) Ife tinakwanisa kumwaza mphangwa zadidi za Umambo. (Mateu 24:14) Kukhulupira kwathu ntsembe ya Yezu Kristu kusatiphedza toera kukhala na cikumbuntima cakucena. (Juwau 3:16) Ife tiri na nkhombo zenezi mwakukhonda tsalakana nyatwa zinafunika ife kupirira.
Sentinela 1/7/11 tsa. 10 ndima 3-4
Kodi Yahova Ali na Mabvero?
Nyamasalmo alonga: “Iwo ansandukira kazinji kene nʼthando.” (Vesi 40) Vesi inatowera isalonga: “Mwakubwereza-bwereza iwo ayesera Mulungu.” (Vesi 41) Onani kuti nyamasalmo alonga kuti Aizraeli akhasandukira Yahova mwakubwereza-bwereza. Iwo atoma kucita pyenepi n‘thando, pakumala kwene kubuluka ku Ejitu. Aizraeli atoma kudungunya mbapenula khala Yahova mbadakwanisa kuatsalakana. (Numero 14:1-4) Bukhu inango inalonga pya Bhibhlya yalonga kuti mafala akuti ‘ansandukira’ anakwanisa “kuthumburuzwa ninga ‘iwo aumisa mitima yawo peno akhonda kubvera Mulungu.’” Ngakhale tenepo, Yahova aalekerera pidatcunyuka iwo. Mbwenye mukupita kwa ndzidzi, iwo akhapitiriza kucita pinthu pibodzi pyene mbasandukira pontho Mulungu.—Masalmo 78:10-19, 38.
Yahova akhapibva tani ndzidzi onsene ukhakhonda iye kubverwa na Aizraeli? Vesi 40 isalonga kuti “iwo antsukwalisa.” Bukhu inango inalonga pya Bhibhlya yalonga: “Mafala anewa asabveka kuti Aizraeli akhacita pinthu mwacakhomo toera kutsukwalisa Yahova, ninga pinacita mwana wakukhonda bvera.” Ninga mwana wakukhonda bvera wakuti asatsukwalisa anyakubalace, Aizraeli akukhonda bvera “atsukwalisa Wakucena wa Izraeli.”—Vesi 41.
Mpfuma Zauzimu
Sentinela 15/7/06 tsa. 11 ndima 4
Ntsonga Zikulu za Bukhu Yacitatu na Yacinai ya Masalmo
Mas. 78:24, 25—Thangwi yanji mana akhacemerwa “cakudya cakubuluka kudzulu” na “cakudya ca anyamphambvu”? Mafala anewa nee asabveka kuti mana akhali cakudya ca aanju. Asacemerwa ‘cakudya cakudzulu’ thangwi iwo akhabuluka kudzulu. (Mas. 105:40) Nakuti aanju peno “anyamphambvu” asakhala kudzulu, mafala akuti “cakudya ca anyamphambvu” panango asabveka kuti mana anewa akhaperekwa na Mulungu anakhala kudzulu. (Mas. 11:4) Kusiyapo pyenepi, panango Yahova aphatisira anju toera kupereka mana kuna Aizraeli.