BHIBHLIYOTEKA MU INTERNETI ya Torre de Vigia
Ncenjezi
ya Torre de Vigia
Cisena
  • BHIBHLYA
  • MABUKHU
  • MISONKHANO
  • mwbr24 Setembro ya matsa. 1-14
  • Mareferensya a “Umaso Wathu Wacikristu na Utumiki”

Nkhabe kugumanika vidhyu pa khundu ino.

Munatilekerera, paoneka madodo pakupangiza vidhyu.

  • Mareferensya a “Umaso Wathu Wacikristu na Utumiki”
  • Mudabuluswa Matawiro a Umaso Wathu Wacikristu na Utumiki—2024
  • Misolo Ming'ono
  • SUMANA 2-8 YA SETEMBRO
  • SUMANA 9-15 YA SETEMBRO
  • SUMANA 16-22 YA SETEMBRO
  • Citani phembero kuna Yahova ninga idacita Dhavidhi kuti: ‘Ndipaseni ntima wakukhonda gawika.’ Citani pyonsene pinakwanisa imwe toera umaso wanu ukhale wakubverana na phembero ineyi. Mu pisankhulo pinacita imwe ntsiku zonsene mwakukhonda tsalakana khala ndi ping’ono peno ndi pikulu, musafunika kupangiza kuti musalemedza kakamwe dzina ya Yahova. Mungacita pyenepi, munapangiza kuti ndimwe m’bodzi wa Mboni za Yahova. (Mis. 27:11) Pontho, ife tonsene tinakwanisa kulonga mafala ninga adalonga mprofeta Mikeya kuti: ‘Ife tinalambira Yahova Mulungu wathu kwenda na kwenda.’—Mik. 4:5.
  • SUMANA 30 YA SETEMBRO–6 YA OUTUBRO
  • SUMANA 7-13 YA OUTUBRO
  • SUMANA 14-20 YA OUTUBRO
  • SUMANA 21-27 YA OUTUBRO
  • SUMANA 28 YA OUTUBRO–3 YA NOVEMBRO
Mudabuluswa Matawiro a Umaso Wathu Wacikristu na Utumiki—2024
mwbr24 Setembro ya matsa. 1-14

Mareferensya a Umaso Wathu Wacikristu na Utumiki

© 2024 Watch Tower Bible and Tract Society of Pennsylvania

SUMANA 2-8 YA SETEMBRO

MPFUMA ZA MAFALA A MULUNGU | MASALMO 79-81

Pangizani Kuti Musafuna Dzina ya Yahova

Ncenjezi 02.17 tsa. 9 ndima 5

Ciomboli Ndi Muoni Ukulu wa Mulungu

5 Tinapangiza tani kuti tisafuna dzina ya Yahova? Kubulukira m’makhaliro athu. Yahova asafuna kuti tikhale akucena. (Lerini 1 Pedhru 1:15, 16.) Pyenepi pisabveka kuti tisafunika kulambira basi ene iye na kumbvera na ntima wathu onsene. Maseze titcingwe, tisawangisira toera kukhala mwakubverana na pinatipfundzisa Yahova. Tingakhala mwakubverana na midida ya Yahova, tisapasa mbiri dzina yace. (Mateu 5:14-16) Pontho tisapangiza kuti mitemo yace ndi yadidi na Sathani ndi wauthambi. Nakuti nee ndife aungwiro, midzidzi inango tinadawa. Mbwenye tingadawa, tisafunika kutcunyuka mbatiwangisira kucita pinthu pinapangiza kuti tisalemedza dzina ya Yahova.—Masalmo 79:9.

Textos Bíblicos Explicados nsolo 3 ndima 4-5

Aroma 10:13—“Kucemera Dzina ya Mbuya”

M’Bhibhlya, mafala akuti ‘kucemera dzina ya Yahova’ asabveka pizinji kupiringana kuidziwa na kuiphatisira pakulambira. (Masalmo 116:12-14) Asabvekambo kunyindira Mulungu na kusaka ciphedzo cace.—Masalmo 20:7; 99:6.

Dzina ya Mulungu ikhali yakufunika kakamwe kuna Yezu Kristu. Pidapfundzisa iye anyakupfundzace kucita phembero, Yezu atoma na mafala akuti: “Babathu muli kudzulu, dzina yanu mbiceneswe.” (Mateu 6:9) Yezu apangizambo kuti toera tikhale na umaso wakukhonda mala, tisafunika kudziwa, kubvera na kufuna Mwanaciro dzina ineyi, Yahova.—Juwau 17:3, 6, 26.

Mpfuma Zauzimu

Perspicaz vol. 2 tsa. 145

Zuze

Dzina ya Zuze Yapaswa Mbiri. Nakuti Zuze akhali na cidzo pakati pa ana onsene a Yakobe, pikhali pyakuthema kuti dzina yace iphatisirwe midzidzi inango toera kuimirira madzindza onsene a Izraeli, (Mas. 80:1) peno ale akuti adzaphatanizwa mu umambo wa madzindza khumi. (Mas. 78:67; Amosi 5:6, 15; 6:6) Dzina yace isagumanikambo m’maprofesiya a Bhibhlya. M’masomphenya adaona Ezekiyeli, unthaka wa Zuze ukhali na makhundu mawiri (Ezek. 47:13), pontho ubodzi mwa misuwo mikulu ya nzinda ukhacemerwa “Yahova Ali Penepo” wapaswa dzina ya Zuze. (Ezek. 48:32, 35) Kusiyapo pyenepi, thangwi yakugumanyikana pontho kwa mbumba ya Yahova, Zuze asalongwa ninga ntsogoleri wa khundu ibodzi, pontho Yuda ntsogoleri wa khundu inango. (Ezek. 37:15-26) Profesiya ya Obhadhiya ikhapangiza kuti “dzindza ya Zuze” mbidaphedzera kufudzwa kwa “dzindza ya Izau” (Obha. 18), pontho profesiya ya Zakariya ikhapangiza kuti Yahova mbadapulumusa “dzindza ya Zuze.” (Zak. 10:6) Dzindza ya Zuze isalongwa ninga ibodzi mwa madzindza a Izraeli wauzimu m’mbuto mwa dzindza ya Efraimu.—Apok. 7:8.

Nakuti Zuze asagumanika pa ndandanda ya madzindza analongwa pa Apokalipse 7:8, pisapangiza kuti profesiya idalonga Yakobe pikhali iye dhuzi na kufa, mbidaphatisirwambo kuna Izraeli wauzimu. Natenepa tinakwanisa kulonga kuti Wamphambvu wa Yakobe, Yahova Mulungu apereka Kristu Yezu ninga Nkumbizi Wadidi wakuti apereka umaso wace thangwi ya “mabira.” (Juw. 10:11-16) Kusiyapo pyenepi, Kristu Yezu ndi mwala wakufunika kakamwe wapankhomo unatsidzikiza templo ya Mulungu yakuti ndi Izraeli wauzimu. (Aef. 2:20-22; 1 Ped. 2:4-6) Pontho Nkumbizi unoyu na Mwala ali pabodzi na Mulungu Wamphambvu Zonsene.—Juw. 1:1-3; Mabasa 7:56; Aheb. 10:12; onani Gen. 49:24, 25.

SUMANA 9-15 YA SETEMBRO

MPFUMA ZA MAFALA A MULUNGU | MASALMO 82-84

Perekani Takhuta Thangwi ya Miyai Iri na Imwe

Sentinela N°6.16 tsa. 8 ndima 2-3

Tinapfundzanji na Mbalame?

Anthu akakhala mu Yerusalemu akhadziwa mwadidi mbalame zinacemerwa nyantandamibvi. Mbalame zenezi zikhamanga ntsandza zawo ku ntsoi kwa nyumba zawo. Pyaka pyonsene, anyantandamibvi anango akhamanga ntsandza zawo mu templo ya Salomoni. Pisaoneka kuti mbalame zenezi zikhamanga ntsandza mu templo thangwi zikhaona kuti ikhali mbuto yakutsidzikizika toera kukuza anawo.

Bukhu ya Masalmo 84 yakuti yalembwa na m’bodzi wa ana a Kora, isalonga pya ntsandza ya anyantandamibvi zikhagumanika mu templo. Ana a Kora akhali na mwai wakutumikira mu templo sumana ibodzi nkati mwa miyezi mitanthatu. Mbwenye nyakulemba bukhu ineyi ya Masalmo akhafuna kukhala ninga nyantandamibvi wakuti mbadakhala n’nyumba mwa Yahova. Iye alonga: “Imwe Yahova wa anyankhondo, ine ndisafuna kakamwe tabhernakulo yanu ikulu! Ine ndatsuwa kakamwe, inde, manungo anga afewa thangwi yakufuna kakamwe kuenda panyumba ya Yahova . . . Ngakhale mbalame zisagumana mbuto mwenemo toera kukhala, pontho nyantandamibvi asamanga ntsandza yace, toera kuikhamo anace dhuzi na guwa yanu ikulu ya ntsembe, imwe Yahova wa anyankhondo, Mambo wanga na Mulungu wanga!” (Masalmo 84:1-3) Kodi ife tisafunambo kakamwe kusonkhana na mbumba ya Mulungu pabodzi na anathu?—Masalmo 26:8, 12.

Sentinela 15/7/08 tsa. 30 ndima 3-4

Khalani na Maonero Akulinganira, Pontho Khalani Akutsandzaya

Kukalamba na nyatwa za ungumi panango pinatipingiza toera kucita pizinji m’basa ya Yahova. Khala ndimwe nyakubala, panango munaona kuti nee musaphindula mwakukwana na pfundziro ya munthu paekha peno misonkhano Yacikristu, thangwi musaphatisira ndzidzi uzinji na mphambvu zanu toera kutsalakana ananu. Mbwenye kunyerezera basi ene pinthu pyakuti nee munakwanisa kupicita, midzidzi inango kunakupingizani kuona pinthu pyakuti munakwanisa kupicita.

Pyaka pizinji nduli, Mulevi unango akhafuna kakamwe pinthu pyakuti nee mbadakwanisa kupicita. Iye akhali na mwai wakutumikira mu templo masumana mawiri pa caka. Ngakhale tenepo, iye akhafuna kakamwe kukhala ndzidzi onsene dhuzi na guwa. (Mas. 84:1-3) Ninji pidaphedza mamuna unoyu wakukhulupirika toera kutsandzaya na pikhacita iye? Iye adzindikira kuti maseze akhale ntsiku ibodzi pa templo, unoyu ukhali mwai ukulu kakamwe. (Mas. 84:4, 5, 10) Munjira ibodzi ene, m’mbuto mwakunyerezera basi ene pinthu pinacimwana ife kucita, tisafunika kuwangisira toera kukomerwa na miyai iri na ife.

Ncenjezi 01.20 tsa. 17 ndima 12

Imwe Ndimwe Wakufunika Kakamwe Kuna Yahova!

12 Khala musathimbana na utenda khalani na cinyindiro cakuti Yahova asadziwa nyatwa yanu. Phembani ciphedzo cace toera mukwanise kukhala na maonero akulinganira thangwi ya utenda wanu. Buluka penepo, lerini m’Bhibhlya mafala akubalangaza a Yahova. Ikhani manyerezero m’mavesi anapangiza kuti atumiki a Yahova ndi akufunika kakamwe kuna iye. Mungacita pyenepi, munaona kuti Yahova ndi wadidi kuna onsene anantumikira mwakukhulupirika.—Mas. 84:11.

Mpfuma Zauzimu

Perspicaz vol. 2 tsa. 350

Mwana Waumphawi

Nakuti pikhali pyakukhonda nentsa kukhonda kutsalakana mwana waumphawi, Yahova aphatisira mafala akuti “mwana waumphawi” toera kupangiza ulungami wa Aizraeli peno kusowa kwawo ulungami. Mu ndzidzi ukhali Aizraeli akuwanga mwauzimu, ana aumphawi akhatsalakanwa mwadidi. Pikhasiya Aizraeli kupangiza ulungami, ana aumphawi nee akhatsalakanwa, pontho pyenepi pikhacitika mu dziko yonsene ya Izraeli. (Mas. 82:3; 94:6; Iza. 1:17, 23; Yer. 7:5-7; 22:3; Ezek. 22:7; Zak. 7:9-11; Mal. 3:5) Yahova akhapasa dzedze ale akhatsalakana mwakuipa ana aumphawi. (Dheu. 27:19; Iza. 10:1, 2) Yahova asalongeka ekhene ninga Mbvunuliri (Mis. 23:10, 11), Mphedzi (Mas. 10:14), na Baba (Mas. 68:5) wa ana aumphawi. Iye asacita pinthu pyakulungama kuna iwo (Dheu. 10:17, 18), kuabvera ntsisi (Oze. 14:3), kuabalanga (Mas. 146:9), na kuapulumusa.—Yer. 49:11.

Cibodzi mwa pidzindikiro pinadziwika na Akristu andimomwene ndi citsalakano cinapangiza iwo kuna ana aumphawi na akazi adaferwa na amunawo. Nyakupfundza Tiyago alemba: “Ntundu wa ulambiri wakuti ndi wakucena na wakusowa midonthi m’maonero a Mulungu Babathu ndi uyu: Kuphedza ana aumphawi na akazi adaferwa na amunawo mu nyatwa zawo, mbatipitiriza kukhala akusowa midonthi ya dziko.”—Tiya. 1:27.

SUMANA 16-22 YA SETEMBRO

MPFUMA ZA MAFALA A MULUNGU | MASALMO 85-87

Phembero Isatiphedza Toera Kupirira

Sentinela 15/5/12 tsa. 25 ndima 10

Kodi Imwe Muli Kupangiza Mbiri ya Yahova?

10 Toera kupangiza mbiri ya Mulungu, tisafunikambo ‘kupitiriza kucita phembero.’ (Aroma 12:12) Tisafunika kucita phembero kuna Yahova toera atiphedze kuntumikira munjira yakutawirika. Toera pyenepi pikwanisike, tisafunika kuphemba nzimu wakucena, kuphemba toera athimizire cikhulupiro cathu, atipase mphambvu toera tikwanise kuthimbana na mayesero na kuphemba maluso toera ‘tiphatisire mwadidi mafala a undimomwene.’ (2 Tim. 2:15; Mat. 6:13; Luka 11:13; 17:5) Ninga mwana wakuti asanyindira pai wace, ife tisafunika kunyindira Babathu wakudzulu, Yahova. Tingaphemba ciphedzo cace toera tintumikire mwadidi, tinakwanisa kukhala na cinyindiro cakuti iye anacita pyenepi. Nee tisafunika kunyerezera kuti tiri kun’nentsa. Mbwenye tisafunika kucita phembero toera kunsimba, kupereka takhuta kuna iye na kusaka citsogolero cace tingathimbana na pinentso. Pontho tisafunika kuphemba ciphedzo cace toera tintumikire munjira inapasa mbiri dzina yace.—Mas. 86:12; Tiya. 1:5-7.

Ncenjezi 05.23 tsa. 13 ndima 17-18

Yahova Asatawira Tani Maphembero Athu?

17 Lerini Masalmo 86:6, 7. Dhavidhi akhali na cinyindiro cakuti Yahova akhabvesera na kutawira maphembero ace. Imwe munakwanisambo kukhala na cinyindiro cibodzi cene. Pitsandzo pidaona ife mu nsolo uno pisatipasa cinyindiro cakuti Yahova anakwanisa kutipasa udziwisi na mphambvu toera kupirira. Yahova panango anaphatisira abale na alongo athu peno anthu akuti nee asantumikira toera kutiphedza.

18 Maseze midzidzi inango Yahova nee anatawira maphembero athu munjira inadikhira ife, mbwenye tisadziwa kuti iye anaatawira. Iye anatipasa pinthu pinafuna ife, pontho anatipasa pinthu pyenepi mu ndzidzi unafuna ife. Natenepa pitirizani kucita maphembero na cikhulupiro cakuti Yahova anakutsalakanani cincino, pontho mu dziko ipswa iye ‘anadzakwanirisa cifuno ca pinthu pyonsene piri na umaso.’—Mas. 145:16.

Mpfuma Zauzimu

Ncenjezi 06.20 tsa. 13 ndima 17, 18

‘Ndipaseni Ntima Wakukhonda Gawika Toera Ndigope Dzina Yanu’

Ife nee tisafunika kukhala na ntima wakugawika. Nyerezerani nsoka wa anyakugwa bhola wakuti nee usabverana. Anango mu nsoka unoyu ndi akudzikuza, anango nee asabvera pitsogolero, pontho anango nee asalemedza trenadhori wawo. Natenepa, toera nsoka unoyu uwine usafunika kukhala wakubverana. Munjira ibodzi ene, toera tikhonde kukhala na ntima wakugawika tisafunika kunyerezera basi ene kutumikira Yahova. Kumbukani kuti Sathani asafuna kakamwe toera mukhale na ntima wakugawika. Iye asacita pyenepi mu kukuyeserani toera mukhonde kubvera mitemo ya Yahova. Mbwenye imwe musafunika kukhala na ntima wakukhonda gawika toera mukwanise kutumikira Yahova. (Mat. 22:36-38) Natenepa, lekani tawirisa Sathani toera akucitiseni kukhala na ntima wakugawika.

Citani phembero kuna Yahova ninga idacita Dhavidhi kuti: ‘Ndipaseni ntima wakukhonda gawika.’ Citani pyonsene pinakwanisa imwe toera umaso wanu ukhale wakubverana na phembero ineyi. Mu pisankhulo pinacita imwe ntsiku zonsene mwakukhonda tsalakana khala ndi ping’ono peno ndi pikulu, musafunika kupangiza kuti musalemedza kakamwe dzina ya Yahova. Mungacita pyenepi, munapangiza kuti ndimwe m’bodzi wa Mboni za Yahova. (Mis. 27:11) Pontho, ife tonsene tinakwanisa kulonga mafala ninga adalonga mprofeta Mikeya kuti: ‘Ife tinalambira Yahova Mulungu wathu kwenda na kwenda.’—Mik. 4:5.

SUMANA 23-29 YA SETEMBRO

MPFUMA ZA MAFALA A MULUNGU | MASALMO 88-89

Utongi wa Yahova Ndi Wadidi Kakamwe

Ncenjezi 06.17 tsa. 22 ndima 5

Phedzerani Utongi Ukulu wa Yahova!

5 Nyerezerani thangwi inango inacitisa Yahova kukhala wakuthema kutonga. Iye asaphatisira utongi wace munjira yakulungama. Iye asatipanga: ‘Ine ndine Yahova, Ule anapangiza ufuni wakukhonda mala na ulungami pa dziko yapantsi, thangwi ndi pyenepi pisakomerwa na ine.’ (Yeremiya 9:24) Yahova nee asafuna mitemo ya anthu toera kumphedza kucita pisankhulo pyadidi. M’mbuto mwace, iye akhazikisa n’dida wa pinthu pyadidi. Pontho kubulukira mu ulungami wace, Yahova apasa mitemo anthu. Nyamasalmo alonga: ‘Ulungami ndi phata ya mpando wanu wa umambo.’ Natenepa, ntemo onsene, n’dida na cisankhulo cinabuluka kwa Yahova ndi pyakulungama. (Masalmo 89:14; 119:128) Sathani alonga kuti Yahova nee ndi Ntongi wakukhulupirika. Mbwenye, Sathani nkhabe kwanisa kubweresa ulungami pa dziko.

Ncenjezi 06.17 tsa. 23-24 ndima 10-11

Phedzerani Utongi Ukulu wa Yahova!

10 Yahova nee asatonga mwaukali. Natenepa, munthu onsene anambvera asakhala wakusudzuka na wakutsandzaya. (2 Akorinto 3:17) Dhavidhi alonga thangwi ya Yahova: ‘Cilemedzo na mbiri piri pa maso pace; panakhala iye pali na mphambvu na ntendere.’ (1 Pya dziko ya Israele 16:7, 27, NM) Nyamasalmo Etani alemba: ‘Anyakutsandzaya ndi anthu ale anakhuwa mwakukomerwa. Iwo asafamba mu ceza canu, imwe Yahova. Iwo asatsandzaya na dzina yanu ntsiku zonsene, pontho asadzikuza thangwi ya ulungami wanu.’—Masalmo 89:15, 16.

11 Tinganyerezera mwacidikhodikho kazinji kene udidi wa Yahova, tisakhala na cinyindiro cakuti utongi wace ndi wadidi kakamwe. Ife tisapibva ninga nyamasalmo adalonga kuna Mulungu: ‘Kumala ntsiku ibodzi n’nyumba mwanu ndi kwadidi kupita kumala ntsiku cikwi kumbuto inango!’ (Masalmo 84:10) Ife tacitwa na Yahova, natenepa iye asadziwa mwadidi pinthu pinakomerwa na ife. Iye asatipasa pinthu mwakudzala manja kupiringana pinafunika ife. Pyonsene pinatiphemba Yahova toera kucita pisatiphindulisa. Maseze tiperekeke m’basa yace, ndzidzi onsene tinatsandzaya tingabvera Yahova.—Lerini Izaiya 48:17.

Ncenjezi 1/10/14 tsa. 13 ndima 14

Khalani Na Cikhulupiro Cakuwanga Ku Umambo

14 Onani pidapikira Yahova kuna Mambo Dhavidhi wa Israele wakale kubulukira mu cibverano ca Dhavidhi. (Lerini 2 Samwele 7:12, 16.) Yahova acita cibverano ceneci na Dhavidhi mu ndzidzi ukhatonga iye mu Yerusalemu, mbapikira kuti Mesiya mbadabalwa mu dzindza ya Dhavidhi. (Luka 1:30-33) Munjira ineyi, Yahova apereka mphangwa zakuthimizirika za dzindza ikhafuna kudzabala Mesiya. Yahova alonga kuti mwana wa Dhavidhi mbadakhala na ‘mwai wakutawirika’ toera kukhala pa mpando wa Umambo Waumesiya. (Ezek. 21:25-27) Kubulukira mwa Yezu, umambo wa Dhavidhi ‘unadzakhala wakuwanga kwenda na kwenda.’ Inde, dzindza ya Dhavidhi ‘inathimiza pa kukhaliratu; umambo wace unakhalikira ninga dzuwa.’ (Mas. 89:34-37) Tiri na cinyindiro cakuti utongi Waumesiya cipo unadzakhala wakuipa peno kufudzwa, mbwenye unadzabweresa maphindu akukhonda mala!

Mpfuma Zauzimu

Umaso Wathu Wacikristu na Utumiki 05.22 tsa. 8

Yahova Acita Cibverano na Dhavidhi

Dzuwa na mwezi pisatikumbusa kuti Mesiya anadzatonga kwenda na kwenda. (Masal. 89:35-37) Mungaona pinthu pyenepi, nyerezerani nkhombo zidapikira Yahova kuna imwe na kuna banja yanu mu Umambo Wace.

SUMANA 30 YA SETEMBRO–6 YA OUTUBRO

MPFUMA ZA MAFALA A MULUNGU | MASALMO 90-91

Nyindirani Yahova Toera Mukhale m’Maso Ndzidzi Uzinji

Sentinela N.° 3.19 tsa. 5 ndima 3-5

Kusaka Umaso wa Pyaka Pizinji

Asiyentista azinji nee asatawira kuti mitombwe inacitisa munthu kukhonda kalamba inakwanisa kucitisa anthu kukhala m’maso pyaka pizinji. Ndimomwene kuti ndzidzi unakhala anthu m’maso wathimizirika kutomera mu pyaka 1800. Mbwenye pyenepi pyakwanisika basi ene thangwi ya kuthimizirika kwa unyai, kucalira mautenda akuthaphulisana, kuphatisira makininu na mavasina. Asiyentista anango asaona kuti anthu nee anakwanisabve kukhala m’maso pyaka pizinji kupiringana pinakhala iwo cincino.

Cifupi na pyaka 3.500 nduli, Mose alemba: “Pyaka pya umaso wathu ndi 70, peno 80 kuna ale ali na mphambvu kakamwe. Mbwenye ipyo pyadzala na nyatwa na kutsukwala; ipyo pisamala mwakucimbiza, ife mbatizambazika.” (Masalmo 90:10) Mwakukhonda tsalakana pinacita anthu toera akhale na umaso mu pyaka pizinji, umaso usapitiriza kukhala wa ndzidzi wakucepa ninga pidalemba Mose.

Mbwenye pana pinyama pinango pinakhala m’maso pyaka pyakupiringana 200, kuphatanizambo miti inango yakuti isakhala m’maso pyaka pikwi pizinji. Tingalandanisa pyaka pyenepi na pyaka pinakhala ife m’maso, panango tinabvundzika: ‘Kodi ife tacitwa basi ene toera kukhala m’maso na pyaka 70 peno 80?’

Sentinela N.° 1.19 tsa. 5, bokosi

Ndi Ipi Dzina ya Mulungu?

Anthu azinji asacitika mbvundzo unoyu. Panango imwe mwabvundzikambo. Mwandimomwene, pinafuna ife kudziwa ndi pyakuti: Khala ndi Mulungu adacita pinthu pyonsene, iyembo acitwa na ani?

Kazinji kene asiyentista asatawira kuti pinthu pinaona ife alipo adapicita. Bhibhlya isaphedzerambo maonero anewa. Vesi yakutoma ya Bhibhlya isalonga: “Pakutoma, Mulungu acita kudzulu na dziko yapantsi.”—Genesi 1:1.

Pinthu pinaona ife nee pyacitika pyokhene. Alipo adapicita. Mbidakhala kuti nkhabepo munthu akhalipo kale, mwezi na pinthu pinango pyonsene nee mbipidakhalapo. Munthu adacita pyenepi pyonsene ndi Yahova. Iye ndi nzimu, ndi wamphambvu zonsene, pontho ndi waudziwisi.—Juwau 4:24.

Thangwi ya Mulungu, Bhibhlya isalonga: “Mapiri mbadzati kucitwa peno mbamudzati kucita dziko yapantsi na mataka, imwe ndimwe Mulungu wakwenda na kwenda.” (Masalmo 90:2) Natenepa, nkhabepo adacita Mulungu, thangwi iye alipo kutomera kale kakamwe. Pyenepi pisapangiza kuti “pakutoma,” Mulungu acita pinthu pyonsene piri kudzulu na pa dziko yapantsi.—Apokalipse 4:11.

Ncenjezi 06.22 tsa. 18 ndima 16-17

Ufuni wa Yahova Unatiphedza Toera Kukunda Kugopa

16 Sathani asadziwa kuti ife tisafuna kakamwe umaso wathu. Pontho iye asalonga kuti ife tinasiya kubvera Yahova basi ene toera kupulumusa umaso wathu. (Yobe 2:4, 5) Mbwenye unoyu nee ndi undimomwene. Nakuti Sathani “ali na mphambvu za kupha,” iye asaphatisira kugopa kufa toera kuyesera kuticitisa kusiya kutumikira Yahova. (Aheb. 2:14, 15) Midzidzi inango, anthu anatsogolerwa na Sathani asalonga kuti anatipha tingakhonda kusiya kutumikira Yahova. Pontho midzidzi inango, Sathani asabandza mwai mu ndzidzi unaduwala ife toera kutiyesera kuti tiphatisire ukondzi wakuti nee usabverana na pinalonga Bhibhlya. Madotoro peno acibale athu akuti nee asatumikira Yahova, panango anatikakamiza toera kubuluswa ciropa peno kuikhwa ciropa mbatipwaza ntemo wa Mulungu. Kusiyapo pyenepi, panango munthu unango anayesera kutipanga toera tisake ukondzi wakuti nee usabverana na pinalonga Bhibhlya.

17 Maseze ife nee tisafuna kufa, ife tisadziwa kuti Yahova nee anasiya kutifuna ngakhale tife. (Lerini Aroma 8:37-39.) Axamwali a Yahova angafa, iye asapitiriza kuakumbukira, thangwi kuna iye iwo aciri m’maso. (Luka 20:37, 38) Yahova asafuna kakamwe kualamusa muli akufa. (Yobe 14:15) Iye alipa kale ntengo ukulu kakamwe toera tikwanise kukhala na “umaso wakukhonda mala.” (Juwau 3:16) Ife tisadziwa kuti Yahova asatifuna kakamwe, pontho asatitsalakana. Natenepa, m’mbuto mwakusiya kutumikira Yahova tingabva kupha peno tingapangwa kuti tinaphiwa, tisafunika kunyindira kuti iye anatibalangaza, anatipasa udziwisi na mphambvu. Pyenepi ndi pidacita mulongo Valérie na mamunace.—Masal. 41:3.

Mpfuma Zauzimu

Sentinela N.° 5.17 tsa. 5

Kodi Imwe Muli na Anju Toera Kukutsidzikizani?

Bhibhlya nee isalonga kuti m’bodzi na m’bodzi ali na anju wace toera kuntsidzikiza. Ulendo unango Yezu alonga tenepa: “Citani mphole-mphole toera mukhonde kupwaza nee m’bodzi wa anang’ono awa, thangwi ine ndinakupangani kuti aanju awo kudzulu ndzidzi onsene asaona nkhope ya Babanga wakuti ali kudzulu.” (Mateu 18:10) Mphapo Yezu akhafuna kulonganji na mafala anewa? Iye akhafuna kulonga kuti aanju asafuna kakamwe anthu, tayu kuti munthu m’bodzi na m’bodzi ali na anju toera kuntsidzikiza. Na thangwi ineyi, Akristu andimomwene nee asaikha umaso wawo pangozwi mbanyerezera kuti anatsidzikizwa na aanju.

Kodi pyenepi pisabveka kuti aanju nee asaphedza anthu? Nkhabe. (Masalmo 91:11) Anthu anango asakhulupira kuti Mulungu asaphatisira aanju toera kuatsidzikiza na kuatsogolera. Kenneth, adalongwa mu nsolo udamala, akhulupira kuti iye aphedzwambo na aanju. Panango iye alonga undimomwene. Mboni za Yahova kazinji kene zisaona ciphedzo ca aanju m’basa yawo yakumwaza mphangwa. Nakuti aanju nee asaoneka, ife nee tinakwanisa kulonga kuti iwo asaphatisirwa tani na Mulungu toera kuphedza anthu. Natenepa, nee ndi pyakuipa kupereka takhuta kuna Mulungu na kutiphedza kunacita iye.—Akolose 3:15; Tiyago 1:17, 18.

SUMANA 7-13 YA OUTUBRO

MPFUMA ZA MAFALA A MULUNGU | MASALMO 92-95

Kutumikira Yahova Ndi Cinthu Cadidi Kakamwe mu Umaso!

Ncenjezi 04.18 tsa. 28 ndima 5

Aphale na Atsikana, Muli na Pifuno Pyauzimu?

5 Thangwi yakufunika kakamwe yakukhazikisa pifuno pyauzimu ndi toera kupereka takhuta kuna Yahova thangwi ya ufuni wace na pinthu pidacita iye kuna ife. Mulembi m’bodzi wa Masalmo alonga: ‘Mphyadidi kupereka takhuta kuna imwe Yahova. Mwandicitisa kutsandzaya, imwe Yahova, thangwi ya mabasa anu; ndisatsandzaya thangwi ya mabasa a manjanu.’ (Masalmo 92:1, 4) Nyerezerani pinthu pyonsene pidakupasani Yahova: umaso, cikhulupiro, Bhibhlya, mpingo na cidikhiro cakukhala kwenda na kwenda m’Paraizu. Mungakhazikisa pifuno pyauzimu, musapangiza kuna Yahova kuti musapereka takhuta thangwi ya pinthu pyenepi pyonsene mbamukhala na uxamwali wakuwanga na iye.

Ncenjezi 11.18 tsa. 23 ndima 8

Mbani Anatsogolera Manyerezero Anu?

8 Ninga nyakubala wadidi, Yahova asafuna kuti anace akhale na umaso wadidi. (Izaiya 48:17, 18) Ndi thangwi yace, iye asatipasa midida inalonga kuti tinakhala tani na makhaliro adidi, pontho tinatsalakana tani anango. Pyenepi nee pisamalisa ufulu wathu. M’mbuto mwace, pisaticitisa kukhala anthu a ndzeru na pisatiphedza toera kucita pisankhulo pyadidi. (Masalmo 92:5; Misangani 2:1-5; Izaiya 55:9) Tinganyerezera ninga Yahova tinapitiriza kucita pinafuna ife, mbwenye tinadzacita pisankhulo pyadidi pyakuti pinadzatitsandzayisa. (Masalmo 1:2, 3) Mwandimomwene, kunyerezera ninga Yahova kunatiphedza kakamwe!

Ncenjezi 01.20 tsa. 19 ndima 18

Imwe Ndimwe Wakufunika Kakamwe Kuna Yahova!

18 Tingakalamba, tinakwanisa kukhala na cinyindiro consene cakuti Yahova anapitiriza kutiphatisira. (Masal. 92:12-15) Panango munanyerezera kuti nee musacita pizinji kuna Yahova. Mbwenye Yezu atipfundzisa kuti pyonsene pinacita ife kuna Yahova ndi pyakufunika. (Luka 21:2-4) Natenepa ikhani manyerezero anu ku pinthu pinakwanisa imwe kucita. Mwacitsandzo, imwe munakwanisa kupanga anango pya Yahova, kuphataniza anango m’maphembero anu na kuwangisa anango toera akhale akukhulupirika. Yahova asakuonani ninga nyabasa ndzace, tayu thangwi ya pinthu pinacita imwe, mbwenye thangwi ya kumbvera kwanu na ntima onsene.—1 Akor. 3:5-9.

Mpfuma Zauzimu

Achegue-se a Jeová tsa. 176 ndima 18

Udziwisi wa Mulungu Ndi Ukulu Kakamwe!

18 Onani njira idafokotoza mpostolo Paulu udziwisi wakukhonda landanisika wa Yahova. Iye alonga: “Nkhombo za Mulungu ndi zizinji kakamwe, pontho udziwisi wace na ndzeru zace ndi zikulu kakamwe. Mbani anakwanisa kubvesesa kutonga kwace, pontho mbani anakwanisa kudziwa njira zace!” (Aroma 11:33) Mu Cigerego, Paulu atoma vesi ineyi na fala yakuti “O” toera kupangiza mabvero akhali na iye peno kudzumatirwa. Mafala adaphatisira iye akuti “zizinji kakamwe” peno zakuzika kakamwe, alandana na mafala akuti “djenje yakuzika kakamwe.” Natenepa tinakwanisa kuona m’manyerezero mwathu pinthu pikhafuna iye kulonga. Tinganyerezera udziwisi wa Yahova, pisakhala ninga tiri kuyang’ana ndjenje yakuzika na ikulu kakamwe! (Masalmo 92:5) Kunyerezera pyenepi nee kusaticitisa kukhala akucepeseka?

SUMANA 14-20 YA OUTUBRO

MPFUMA ZA MAFALA A MULUNGU | MASALMO 96-99

“Dziwisani Mphangwa Zadidi”!

Sentinela 1/3/11 tsa. 6 ndima 1-2

Mphangwa Zadidi Ninji?

AKRISTU asafunika kumwaza “mphangwa zadidi za Umambo.” Iwo asafunikambo kufokotozera anthu kuti Umambo unoyu ndi utongi wa ntsogolo unafuna kudzatonga dziko yonsene mwaulungami. Mbwenye mafala akuti “mphangwa zadidi” asaphatisirwambo munjira zakusiyana-siyana m’Bhibhlya. Mwacitsandzo, iyo isalonga “mphangwa zadidi za cipulumuso” (Masalmo 96:2); “mphangwa zadidi za Mulungu” (Aroma 15:16); na “mphangwa zadidi zinalonga pya Yezu Kristu”—Marko 1:1.

Mwacigwagwa, mphangwa zadidi zisaphataniza undimomwene onsene udalonga Yezu na udalemba anyakupfundzace. Yezu mbadzati kuenda kudzulu apanga anyakupfundzace kuti: “Natenepa, ndokoni mukacite anyakupfundza kuna anthu a madzindza onsene, mbamuabatiza mu dzina ya Baba, na ya Mwana na ya nzimu wakucena, apfundziseni toera abvere pinthu pyonsene pidakupangani ine.” (Mateu 28:19, 20) Natenepa, Akristu andimomwene nee asafunika basi ene kulonga kuna anango thangwi ya Umambo, mbwenye asafunikambo kuwangisira toera kucita anyakupfundza.

Sentinela 1/9/12 tsa. 16 ndima 1

Ninji Pinafuna Kudzacitika pa Ntsiku Yakutongwa?

Ninga pinapangizwa pa foto iri kunkono wamadyo, anthu azinji asanyerezera kuti pa Ntsiku Yakutongwa, anthu onsene anadzaenda ku mpando wa Mulungu toera katongwa mwakubverana na pinthu pidacita iwo, anango toera kupaswa umaso kudzulu, anango toera kutongwa mu djenje ya moto. Mbwenye Bhibhlya isapangiza kuti cifuniro ca Ntsiku Yakutongwa ndi toera kupulumusa anthu ku pinthu pyakusowa ulungami pinacitika mu dziko ino. (Masalmo 96:13) Mulungu asankhula Yezu ninga Ntongi wakuti anadzabweresa ulungami pa dziko yapantsi.—Lerini Izaiya 11:1-5; Mabasa 17:31.

Sentinela 15/9/12 tsa. 12 ndima 18-19

Ntendere Unadzatoma mu Utongi wa Pyaka Cikwi!

18 Ntendere unoyu wafudzika mu ndzidzi udanyengerera Sathani anthu mbasandukira utongi wa Yahova. Mbwenye kutomera mu caka ca 1914, Umambo Waumesiya usabweresa pontho ntendere na kuphatana. (Aef. 1:9, 10) Mu Utongi wa Pyaka Cikwi, pinthu pyakutsandzayisa pinadikhira ife pinadzacitika. Buluka penepo “kumala” kunadzafika, pyenepi pisabveka kumala kwa Utongi wa Kristu wa Pyaka Cikwi. Mphapo ninji pinafuna kudzacitika pyenepi pingamala? Maseze akhadapaswa “mphambvu zonsene kudzulu na pa dziko yapantsi,” Yezu nee asafuna kupitira mbuto Yahova. Mwakucepeseka iye ‘anadzapereka umambo kuna Mulungu wace na Babace.’ Yezu anadzaphatisira cidzo cace “toera kupasa mbiri Mulungu.”—Mat. 28:18; Afil. 2:9-11.

19 Pa ndzidzi unoyu, anthu anatongwa na Umambo pa dziko yapantsi anadzakhala aungwiro. Iwo anadzatowezera citsandzo ca Yezu, pontho mwakucepeseka anadzabvera utongi wa Yahova. Angapulumuka pa mayesero akumalisa, anadzapangiza kuti asafuna kakamwe kubvera Yahova. (Apok. 20:7-10) Buluka penepo, anthu onsene akukhonda bvera kuphatanizambo Sathani na madimonyo ace anadzafudzwa kwenda na kwenda. Unoyu unadzakhala ndzidzi wakutsandzayisa kakamwe! Aanju kudzulu na anthu akubvera pa dziko yapantsi, anadzasimba Yahova mwakutsandzaya wakuti anadzakhala “Ntongi m’bodzi basi wa pinthu pyonsene.”—Lerini Masalmo 99:1-3.

Mpfuma Zauzimu

Perspicaz vol. 1 tsa. 427

Nyimbo

Mafala akuti “nyimbo ipswa” nee asagumanika basi ene m’bukhu ya Masalmo, mbwenye asagumanikambo m’bukhu ya Izaiya na m’bukhu idalemba mpostolo Juwau. (Mas. 33:3; 40:3; 96:1; 98:1; 144:9; 149:1; Iza. 42:10; Apok. 5:9; 14:3) Kudingwa kwa mphangwa zinango zinagumanika n’khundu mwa mafala akuti “nyimbo ipswa” kusapangiza kuti nyimbo ineyi isaimbwa thangwi ya kuthambaruka paswa kwa anyankhondo a Yahova mu utongi wace. Bukhu ya Masalmo 96:10 isalonga kuti “Yahova adzakhala Mambo.” Kuthambaruka kwa umambo wa Yahova na mabvekero a kudzulu na pa dziko yapantsi, pisakhala ninga ndi pinalongwa mu “nyimbo ipswa.”—Mas. 96:11-13; 98:9; Iza. 42:10, 13.

SUMANA 21-27 YA OUTUBRO

MPFUMA ZA MAFALA A MULUNGU | MASALMO 100-102

Pangizani Kuti Musapereka Takhuta Thangwi ya Ufuni Wakukhonda Mala wa Yahova

Ncenjezi 03.23 tsa. 12 ndima 18-19

Musafunika Kucitanji Toera Mukhale Wakuthema Kubatizwa?

18 Ufuni wanu kuna Yahova ndi n’khaliro wadidi kakamwe. (Lerini Misangani 3:3-6.) Ufuni wakuwanga kuna Mulungu unakuphedzani toera kupirira nyatwa zinathimbana na imwe. Pontho n’khaliro unoyu unakuphedzani toera mukhonde kusiya kutumikira Yahova mungathimbana na nyatwa. Bhibhlya kazinji kene isalonga kuti Yahova asapangiza ufuni wakukhonda mala kuna atumiki ace. Ufuni unoyu usapangiza kuti iye cipo anasiya kufuna atumiki ace. (Mas. 100:5) Imwe mwacitwa mwakulandana na Mulungu. (Gen. 1:26) Mphapo munapangizambo tani ufuni unoyu wakukhonda mala?

19 Tomani kupereka takhuta kuna Yahova. (1 Ates. 5:18) Ntsiku zonsene bvundzikani: ‘Kodi Yahova asapangiza tani ufuni wace kuna ine?’ Buluka penepo, m’maphembero anu perekani takhuta kuna Yahova mbamulonga pinthu pidakucitirani iye. Onani kuti pinthu pyadidi pinakucitirani Yahova ndi thangwi yakuti iye asakufunani. Mpostolo Paulu adzindikirambo pyenepi thangwi ya Yahova. (Lerini Agalata 2:20.) Bvundzikani: ‘Kodi ine ndisafunambo kupangiza ufuni wanga kuna Yahova?’ Ufuni wanu kuna Yahova unakuphedzani toera kupitiriza kukunda mayesero na kupirira nyatwa. Ufuni unoyu unakukulumizani toera kupitiriza kulambira Yahova, mbamupangiza kuna Babanu wakudzulu kuti musanfuna kakamwe ntsiku zonsene.

Ncenjezi 02.23 tsa. 17 ndima 10

“Khalani Andzeru, Pontho Khalani Akuyang’anira!”

10 Pinthu pinango pyakuti tisafunika kupicalira pisaphataniza kupfinyirana diso, bibvu, kumwa kakamwe, kudya kakamwe, kulonga mafala akutsukwalisa anango na kuona mafilimu anapangiza pinthu pyauphanga, ucipezipezi na pinthu pinango. (Mas. 101:3) Nyamalwa wathu wankulu Sathani, ndzidzi onsene asasaka miyai toera kufudza uxamwali wathu na Yahova. (1 Ped. 5:8) Tingakhonda kucita mphole-mphole, Sathani anakwanisa kuticitisa kukhala abibvu, akusowa ulungami, akufuna pyonsene, akuidana, akudzikuza na akukoya pinthu pyakuipa muntima. (Agal. 5:19-21) Pakutoma, pinthu pyenepi panango nee pinaoneka ninga ndi pyakuipa. Mbwenye tingakhonda kuwangisira kumalisa makhaliro anewa mwakucimbiza, iwo anapitiriza kukula ninga utenda wakuti ungakhonda kukondzwa mwakucimbiza unakwanisa kuikha umaso wa munthu pangozwi.—Tiya. 1:14, 15.

Sentinela 15/7/11 tsa. 16 ndima 7-8

Kodi Munabvera Macenjezo a Yahova?

7 Tisafunika kucitanji toera kucalira apfundzisi authambi? Nee tisafunika kuatambira m’manyumba mwathu nee kuamwanyika. Kusiyapo pyenepi, nee tisafunika kuleri mabukhu awo, kubvesera pinalonga iwo mu televizau, kuleri na kutawira mphangwa zawo mu interneti. Thangwi yanji tisaacalira munjira zenezi zonsene? Thangwi ya ufuni. Ife tisafuna “Mulungu analonga undimomwene,” pontho tisaida pipfundziso pinaphonyana na undimomwene wa Mafala a Mulungu. (Mas. 31:5; Juw. 17:17) Kusiyapo pyenepi, ife tisafuna gulu ya Yahova yakuti isatipfundzisa pinthu pyakutsandzayisa. Mwacitsandzo, iyo yatipfundzisa dzina ya Mulungu na mabvekero ayo, cifuniro Cace na dziko yapantsi, makhaliro a anthu akufa na cidikhiro ca kulamuswa kwa anthu adafa. Kodi musakumbuka kuti mwapibva tani mu ndzidzi udapfundza imwe undimomwene unoyu na unango? Natenepa lekani tawirisa kuti apfundzisi authambi akucitiseni kupandukira gulu ya Mulungu idakupfundzisani undimomwene unoyu.—Juwau 6:66-69.

8 Mwakukhonda tsalakana pinalonga apfundzisi authambi, ife nee tinaabvera. Tingaabvera tinatsukwala kakamwe thangwi iwo akhala ninga micera yakusowa madzi. Mbwenye tisafunika kupitiriza kukhala akukhulupirika kuna Yahova na gulu yace yakuti nee isatitsukwalisa, thangwi kutomera kale kakamwe gulu ineyi isatipasa madzi akucena na akupha nyota a undimomwene wa Mafala a Mulungu.—Iza. 55:1-3; Mat. 24:45-47.

Mpfuma Zauzimu

Perspicaz vol. 2 tsa. 624

Cidokowe

Cidokowe cingakhuta, kazinji kene cisamburuka mbacienda ku mbuto yace yokha, kweneko ico cisatsolimisa nsolo wace, pontho cisapfulika kakamwe kwakuti nakutali cinakwanisa kuoneka ninga mwala wakucena. Midzidzi inango ico cisakhala munjira ineyi maora mazinji, pyakuti pisalandaniswa na njira inakhala munthu wakutsukwala ninga pidalemba nyamasalmo thangwi ya kutsukwala kukhali na iye: ‘Ine ndakhala ninga cidokowe ca n’thando.’ (Mas. 102:6) Thando inalongwa pa vesi ineyi nee isabveka nsitu, mbwenye isabveka mbuto yakuti iri kutali na kunakhala anthu. Pa caka, midzidzi inango kunkwiriro wa Yordani kusakhala na pidokowe pizinji kakamwe. Mitundu mitatu ya pidokowe isagumanika ku Izraeli. Pidokowe pizinji pinagumanika kweneko ndi pyakucena, mbwenye pidokowe pya madamba-madamba na pya kore ya dotha nee pisagumanika pizinji.

Pidokowe pisakomerwa na kukhala mbuto zakutali zakuti nee pinadzudzumiswa na anthu. Mbalame zenezi zisamanga ntsandza zawo na kukuza anawo kweneko, pontho zingaenda kadya zisabwerera ku mbuto ineyi. Nakuti mbalame zenezi zisakomerwa kakamwe na mbuto zakutali na zakusowa dzumbi, izo zisaphatisirwa m’Bhibhlya toera kulonga mbuto zakuti nee zisakhala anthu. Mwacitsandzo, toera kulonga pya kufudzwa kwa Edhomi, Izaiya alonga kuti pidokowe mbapidakhala mu dziko ineyi. (Iza. 34:11) Mprofeta Sofoniya alonga mwanyapantsi kuti pidokowe mbapidakhala m’mizinda mikulu ya Ninive, toera kupangiza kuti mizinda ineyi mbidafudzwa, pontho nee mbidakhalabve anthu.—Sof. 2:13, 14.

SUMANA 28 YA OUTUBRO–3 YA NOVEMBRO

MPFUMA ZA MAFALA A MULUNGU | MASALMO 103-104

“Iye Asakumbuka Kuti Ndife Pfumbi”

Ncenjezi 07.23 tsa. 21 ndima 5

Khalani na Maonero Akulinganira Ninga Yahova

5 Kucepeseka kwa Yahova na kubvera kwace ntsisi kusancitisa kukhala wakulinganira. Mwacitsandzo, Yahova apangiza kucepeseka kwace mu ndzidzi ukhafuna iye kufudza anthu akuipa mu Sodhoma. Mukuphatisira aanju, Yahova apanga Loti wakuti akhali wakulungama toera athawire ku mapiri. Loti agopa kuthawira kweneko. Natenepa, iye aphemba Yahova toera iye na banja yace athawire ku Zoari, nzinda ung’ono wakuti ukhafuna kufudzwa na Yahova. Yahova mbadakakamiza Loti toera abvere pidampanga iye. Mbwenye iye atawirisa Loti toera athawire ku Zoari, pontho iye nee afudzabve nzinda unoyu. (Gen. 19:18-22) Mukupita kwa pyaka, Yahova abvera ntsisi anthu a ku Ninive. Iye atuma mprofeta Yona toera akadziwise kuti nzinda unoyu mbudafudzwa pabodzi na anthu akuipa. Mbwenye pidatcunyuka iwo, Yahova aabvera ntsisi, pontho nee afudzabve nzinda unoyu.—Yona 3:1, 10; 4:10, 11.

Ncenjezi 09.23 tsa. 6-7 ndima 16-18

Nyindirani Yahova Ninga Pidacita Samisoni

16 Maseze Samisoni athabuka kakamwe thangwi ya madodo ace, iye nee asiya kucita cifuno ca Yahova. Ngakhale ticite madodo mbatisandikwa peno mbatiluza mwai wakutumikira, ife nee tisafunika kubwerera nduli. Kumbukani kuti Yahova ali dzololo toera kutilekerera. (Mas. 103:8-10) Mwakukhonda tsalakana madodo adacita ife, tinakwanisa kuphatisirwa pontho na Yahova ninga pidacita iye na Samisoni.

17 Onani citsandzo ca m’phale anacemerwa Michael. Iye akhatumikira Yahova mwaphinga ninga ntumiki wakutumikira na mpainiya wa ndzidzi onsene. Mwakutsukwalisa, iye acita madodo adancitisa kuluza miyai yakutumikira mu mpingo. Iye alonga: “Mpaka ndzidzi unoyu ine ndikhatumikira Yahova mwadidi.” Buluka penepo, ine ndapibva kuti ndikhali wakusowa basa kuna Yahova. Ine cipo ndanyerezera kuti Yahova mbadandisiya, mbwenye ndabvundzika khala uxamwali wanga na iye mbudakhala pontho wakuwanga peno khala mbandidakhala pontho na mwai wakuntumikira mu mpingo ninga kale.”

18 Michael nee abwerera nduli. Iye athimiza: “Ine ndawangisira toera kukhala pontho na uxamwali wakuwanga na Yahova mukucita phembero ndzidzi onsene, kupfundza Bhibhlya na kunyerezera mwadidi pikhapfundza ine.” Mukupita kwa ndzidzi, Michael akhala pontho na miyai yakutumikira mu mpingo. Cincino iye asatumikira ninga nkulu wa mpingo, pontho ninga mpainiya wa ndzidzi onsene. Iye alonga: “Ciphedzo na ciwangiso cidatambira ine makamaka kubulukira kwa akulu a mpingo pyandiphedza toera kudzindikira kuti Yahova akhapitiriza kundifuna. Ine ndisakwanisa kutumikira pontho mu mpingo na cikumbuntima cakucena. Pyenepi pyandipfundzisa kuti Yahova analekerera ale anatcunyuka na ntima onsene.” Ife tinakwanisa kukhala na cinyindiro cakuti Yahova anatiphatisirambo, pontho anatipasa nkhombo; ngakhale kuti tacita madodo; mbwenye tisafunika kucita pyonsene pinakwanisa ife toera tikhale pontho na uxamwali wakuwanga na iye mbatipitiriza kun’nyindira.—Mas. 86:5; Mis. 28:13.

Ncenjezi 05.23 tsa. 26 ndima 2

Imwe Munakwanisa Kukwanirisa Pifuno Pyanu Pyauzimu

2 Khala imwe muli na cifuno cakuti mudzati kucikwanirisa, lekani tsukwala. Toera kukwanirisa cifuno, maseze cikhale cing’ono pisaphemba ndzidzi na kuwangisira. Nakuti musafuna kukwanirisa cifuno canu, pyenepi pisapangiza kuti uxamwali wanu na Yahova ndi wakufunika kuna imwe, pontho musafuna kumpasa pinthu pyadidi kakamwe. Yahova asaona kuwangisira kunacita imwe, pontho iye nee asadikhira kuti mucite pinthu pyakuti nee munapikwanisa. (Mas. 103:14; Mik. 6:8) Natenepa, cifuno canu cisafunika kukhala cakulinganira, mwakubverana na pinakwanisa imwe. Mphapo mungakhazikisa cifuno, munacitanji toera kucikwanirisa? Tendeni tione maonero mangasi.

Mpfuma Zauzimu

Achegue-se a Jeová tsa. 55 ndima 18

Mphambvu Zakucita Pinthu—“Ule Adacita Kudzulu na Dziko Yapantsi”

18 Tisapfundzanji na njira inaphatisira Yahova mphambvu zace zakucita pinthu? Ife tisadzumatirwa na pinthu pyakusiyana-siyana pidacita iye. Nyamasalmo unango alemba kuti: “Yahova, mabasa anu ndi mazinji kakamwe! . . . Dziko yapantsi yadzala na pinthu pidacita imwe.” (Masalmo 104:24) Unoyu ndi undimomwene! Asiyentista peno anyakufufudza pinthu pya umaso adzindikira mitundu yakusiyana-siyana mizinji kakamwe ya pinthu pya umaso pa dziko yapantsi. Mbwenye iwo nee asadziwa ntundu ubodzi na ubodzi usagumanika mamiliyau mangasi a pinthu pya umaso. Munthu waluso yakulemba pithundzithundzi midzidzi inango asasowa cakulemba. Mbwenye luso ya Yahova na mphambvu zace zakucita pinthu pipswa nee zisamala.

    Mabukhu Acisena (1982-2025)
    Bulukani
    Fungulani
    • Cisena
    • Tumizirani Anango
    • Sankhulani Pinafuna Imwe
    • Copyright © 2025 Watch Tower Bible and Tract Society of Pennsylvania
    • Pinafunika Imwe Kutowezera
    • Cibisobiso
    • Configurações de Privacidade
    • JW.ORG
    • Fungulani
    Tumizirani Anango