MIBVUNDZO INACITWA NA ANYAKULERI

Kodi ninji ‘muoni’ na “cidzindikiro” pinatambira m’bodzi na m’bodzi wa Akristu akudzodzwa kubulukira kwa Mulungu?—2 Akor. 1:21, 22.

Muoni: Mwakubverana na bukhu inango, fala Yacigerego yakuthumburuzwa kuti ‘muoni’ pa 2 Akorinto 1:22 ikhaphatisirwa “m’malonda peno pinthu pyakutawirika na ntemo” mbipangiza kuti “cinthu calipwa, catoma kulipwa, caphatirwa, peno ntengo unaperekwa mwanyapantsi, khundu ibodzi ya ntengo wa kugula cinthu, mbupasa cinyindiro kakamwe ku cinthu cinafuna kugulwa, peno kucitisa cibverano kukhala cakutawirika.” Kwa anyakudzodzwa, kulipwa konsene, peno kutambira muoni wawo, kusafokotozwa pa 2 Akorinto 5:1-5 ninga kubvala manungo akukhonda kufudzika kudzulu. Muoni unoyu usaphatanizambo kutambira umaso wakukhonda kufa.​—1 Akor. 15:48-54.

Mu Cigerego ca cincino, fala ibodzi ene isaphatisirwa pa kubvazika mphete yakumanga banja. Pyenepi pisaimirira mwakuthema ale anafuna kudzacita khundu ya mankhadzi wakuphiphirisa wa Kristu.​—2 Akor. 11:2; Apok. 21:2, 9.

Cidzindikiro: Kale, cidzindikiro cikhaphatisirwa toera kupangiza mwanaciro cinthu, kunyindirika kwa cinthu peno cibverano. Anyakudzodzwa asaikhwa “cidzindikiro,” peno kulembwa mwakuphiphirisa na nzimu wakucena ninga cipangizo cakuti iwo ndi anthu a Mulungu. (Aef. 1:13, 14) Cidzindikiro ceneci nee ndi cakwenda na kwenda, mbwenye cisakhala cakwenda na kwenda ndzidzi pang’ono munthu mbadzati kufa mwakukhulupirika peno nyatwa ikulu mbidzati kutoma.​—Aef. 4:30; Apok. 7:2-4.