PFUNDZIRO 6

Pangizani Kuti Thangwi Yanji Mwaleri Lemba

Juwau 10:33-36

MUSAFUNIKA KUCITANJI: Lekani kuleri lemba buluka penepo mbamulonga mphangwa zakusiyana na zidaleri imwe. Phedzani anyakubvesera anu toera aone kuti pinalonga imwe pisabverana na lemba idaleri imwe, pontho pisabverana na ntsonga inagomezera imwe.

MUNACITA TANI PYENEPI:

Gomezerani mafala akufunika. Mungamala kuleri lemba, gomezerani mafala akuti asabverana na ntsonga yakufunika. Imwe munakwanisa kucita pyenepi mungabwerezera mafala anewa peno mungacita mbvundzo wakuti unaphedza anyakubvesera anu kudzindikira mafala akufunika.

Mungaphatisira mafala akusiyana toera kufokotoza lemba, citani pyonsene pinakwanisa imwe toera anthu anacedza na imwe aone kuti mafala a m’Bhibhlya asabverana tani na ntsonga yakufunika inagomezera imwe.
Gomezerani ntsonga yakufunika. Mungaleri lemba mbamulonga pakweca kuti thangwi yanji mwaileri, fokotozani kuti mafala akufunika a lemba asabverana tani na ntsonga inagomezera imwe.

Lekani kufunga Bhibhlya yanu mu ndzidzi unafokotoza imwe lemba toera anyakubvesera anu adzindikire kuti mafala analonga imwe asabverana tani na vesi idaleri imwe.
Pangizani kuti lemba ineyi inaphatisirwa tani. Calirani kulonga mafala akuti nkhabe phedzera ntsonga yakufunika. Mwakubverana na pinthu pyakuti anyakubvesera anu asapidziwa kale, longani basi ene ntsonga zakufunika toera iwo akwanise kubvesesa kuti anaziphatisira tani.