Arka ya Nowa

Mukupita kwa ndzidzi, anthu adzanjipa pa dziko yapantsi. Mbwenye azinji a iwo akhacita pinthu pyakuipa. Ngakhale aanju anango kudzulu adzakhalambo akuipa. Iwo abuluka kudzulu mbabwera pa dziko ino yapantsi. Usadziwa thangwi yanji iwo acita pyenepi? Thangwi akhafuna kukhala na manungo ninga a anthu toera kumanga banja na akazi.

Aanju anewa akuipa abala ana na akazi adakwata iwo. Ana anewa adzakula mbakhala amphambvu kakamwe, pontho akhathabusa anango na kuaphekesa. Yahova nee atawirisa kuti makhaliro anewa akuipa apitirize. Natenepa iye atonga kufudza anthu anewa akuipa na madzi makulu.

Mbwenye pakhali na mamuna unango wadidi wakuti akhafuna Yahova. Dzina yace ikhali Nowa. Iye akhali na nkazi na ana atatu akuti akhacemerwa Semu, Kamu na Yafeti, pontho ana anewa akhali akumanga banja. Yahova apanga Nowa kuti amange arka ikulu toera iye na banja yace apulumukiremo. Arka ikhali ninga bokosi peno kaxa ikulu kakamwe yakuti mbidakwanisa kuberuka m’madzi. Yahova apangambo Nowa toera apitise pinyama pizinji mu arka toera pipulumukembo.

Mwakukhonda dembuka, Nowa atoma kumanga arka. Nowa na banja yace amala cifupi na pyaka 50 mbakamanga arka. Iwo amanga arka ninga mudapangwa iwo na Yahova. Mu ndzidzi unoyu, Nowa akhacenjezambo anthu thangwi ya Madzi Makulu. Mbwenye nee munthu m’bodzi adam’bvera.

Buluka penepo, wafika ndzidzi toera iwo apite mu arka. Nsolo unatowera unapangiza pidacitika.