PFUNDZIRO 11

Longani Mwakugalamuka

Aroma 12:11

MUSAFUNIKA KUCITANJI: Longani mwakugalamuka toera anthu akhale na cifuno cakubvesera mphangwa zinalonga imwe.

Pakutoma mphangwa zisafunika kukhuya ntima wanu. Mu ndzidzi unakhunganyika imwe nkhani yanu, nyerezerani kufunika kwa mphangwa zinafuna imwe kulonga. Khunganyikani mwadidi toera mukwanise kulonga na mafala anu ene kubulukira muntima.
Nyerezerani anyakubvesera anu. Nyerezerani kuti mphangwa zinafuna imwe kuleri peno kupfundzisa zinaphedza tani anango. Nyerezerani njira zingasi zakuti zinadzakuphedzani toera kulonga mphangwa zanu munjira yakuti inacitisa anyakubvesera anu kukhala na cifuno cakubvesera.
Khalani wakugalamuka. Longani munjira yakuphata ntima. Phatisirani majesto mwacibaliro, pontho longani mafala munjira yakuti inakuphedzani kupangiza mabvero anu.

Citani mphole-mphole toera mukhonde kudzudzumisa anyakubvesera anu thangwi yakuphatisira majesto mabodzi ene mwakubwereza-bwereza. Citani majesto mwacibaliro. Khalani wakugalamuka mu ndzidzi unalonga imwe ntsonga zakufunika, pontho wangisani anyakubvesera anu toera aphatisire mphangwa zidalonga imwe. Calirani kukhala wakugalamuka kakamwe mu nkhani yanu yonsene, thangwi pyenepi pinanetesa anyakubvesera anu.