Zuze akhali m’bodzi mwa ana ang’ono a Yakobe. Iye akhafuniwa kakamwe na pai wace. Na thangwi ineyi, akulu ace akhamuida kakamwe. Ntsiku inango Zuze alota, natenepa iye apanga abale ace pya ndoto zace. Mbwenye iwo nee akomerwa na ndoto zenezi. Thangwi yanji? Thangwi iwo akhanyerezera kuti Zuze mbadakhala mambo wawo. Pyenepi pyaacitisa kuida kakamwe Zuze!

Ntsiku inango, abale ace Zuze akhadyesa mabira dhuzi na nzinda wa Sikemu. Yakobe atuma Zuze toera aende kaaona kuti ali tani. Iwo aona Zuze nakutali mbakabwera. Natenepa iwo alonga: ‘Onani, nyakulota ali kubwera. Tendeni timuphe!’ Iwo am’phata mbamponya mu ncera wakuzika. Mbwenye m’bodzi mwa abale ace akhacemerwa Yuda alonga: ‘Lekani kumupha! Mphyadidi tin’gulise ninga bitcu.’ Natenepa iwo agulisa Zuze na kobiri 20 za parata kuna anyamalonda a ku Midhiyani akuti akhaenda ku Ejitu.

Buluka penepo, abale ace abvika nguwo ya Zuze mu ciropa ca bokho. Iwo atumiza nguwo ineyi kuna pai wawo mbalonga: ‘Nee ndi nguwo ya mwananu iyi?’ Natenepa Yakobe anyerezera kuti mwanace adyiwa na cinyama ca ntsanga. Iye atsukwala kakamwe. Nee munthu m’bodzi akhakwanisa kum’balangaza.

Pidafika iwo ku Ejitu, Zuze aguliswa ninga bitcu kuna Putifare nkulu wa anyakuonera. Mbwenye Yahova ndzidzi onsene akhaphedza Zuze. Putifare aona kuti Zuze akhaphata basa mwadidi, pontho akhali wakunyindirika. Mwakukhonda dembuka, Zuze apaswa basa yakutsalakana pinthu pyonsene panyumba ya Putifare.

Nkazi wa Putifare aona kuti Zuze akhali wakubalika kakamwe na wamphambvu. Ntsiku zonsene iye akhaphemba Zuze toera kugona naye. Natenepa Zuze akhakhonda mbalonga: ‘Nkhabe, pyenepi mphyakuipa. Mbuyanga apereka pinthu pyace pyonsene m’manja mwanga, kusiyapo imwe basi, thangwi ndimwe nkazace. Ndingagona na imwe, ndinadawira Mulungu!’

Ntsiku inango nkazi wa Putifare akakamiza Zuze toera kugona naye. Iye aphata nguwo za Zuze, mbwenye Zuze athawa. Pidafika Putifare panyumba, nkazace alonga uthambi mbalonga kuti Zuze akhafuna kugona naye. Putifare aipirwa kakamwe, mbaikhisa Zuze nkaidi. Mbwenye Yahova nee aduwala Zuze.

Pikhali Zuze nkaidi, mambo wa ku Ejitu, Farau, alota ndoto zakuti nkhabe munthu akhakwanisa kuzifokotoza. M’bodzi mwa atumiki a Farau alonga kuti Zuze mbadakwanisa kufokotoza mabvekero a ndoto zenezi. Mwakucimbiza, Farau acemeresa Zuze.

Pidafika iye, Farau am’bvundza: ‘Unakwanisa kufokotoza ndoto zanga?’ Zuze atawira mbalonga: ‘Mu Ejitu munadzakhala na pyakudya pizinji mu pyaka pinomwe. Mbwenye pingamala pyaka pyenepi, kunadzaoneka pyaka pinomwe pya njala. Cincino, sankhulani munthu waudziwisi toera agumanye cakudya toera anthu akhonde kufa na njala.’ Farau antawira: ‘Ine ndasankhula iwe! Iwe unadzakhala ntongi waciwiri wamphambvu kakamwe wa dziko ya Ejitu.’ Zuze akwanisa tani kufokotoza ndoto za Farau? Iye aphedzwa na Yahova.

Mu pyaka pinomwe, Zuze agumanya pyakudya pizinji kakamwe. Buluka penepo, dziko yonsene yadzakhala na njala ninga pikhadalonga iye. Anthu akhabuluka m’mbuto zakusiyana-siyana mbaenda kuna Zuze toera kagula pyakudya. Yakobe pidabva iye kuti ku Ejitu kuna pyakudya, atuma anace khumi toera kuenda kweneko kagula pyakudya.

Pidafika ana a Yakobe ku Ejitu, Zuze aadzindikira kuti iwo akhali abale ace. Mbwenye abale ace nee andzindikira. Iwo agodamira Zuze ninga pikhadalota iye pikhali iye mwana. Zuze akhafuna dziwa khala abale ace acinja peno nkhabe. Natenepa iye aapanga: ‘Imwe mwabwera kudzaona dziko. Mwabwera dzaona kufewa kwa dziko yathu.’ Iwo alonga: ‘Nkhabe! Ife tabuluka ku dziko ya Kanani, mu ubale wathu tikhali 12. Pai wathu ndi m’bodzi ene, m’bale wathu m’bodzi afa, mbwenye ng’ono wathu asala na pai wathu.’ Zuze aapanga: ‘Ndokoni kakwate m’bale wanu wang’ono mubwere naye kuno toera ndione khala pinalonga imwe ndi undimomwene.’ Natenepa, iwo abwerera kuna pai wawo.

Pidamala cakudya m’banja ya Yakobe, iye atuma pontho anace toera kuenda ku Ejitu. Paulendo unoyu iwo akwata m’bale wawo wang’ono Bhenjamini. Toera kuyesera abale ace, Zuze abisa kopo yace ya parata nsakha ya Bhenjamini, mbapambizira abale ace kuti aiba. Atumiki a Zuze asaka kopo m’masakha mwawo mbaigumana nsakha ya Bhenjamini. Natenepa abale ace atsukwala kakamwe mbaphemba Zuze kuti atcunyuse iwo m’mbuto mwakutcunyusa Bhenjamini.

Cincino Zuze adzindikira kuti abale ace acinja. Natenepa Zuze nee akwanisabve kupirira, iye atoma kulira kakamwe mbalonga: ‘Ine ndine m’bale wanu Zuze. Pai wanga aciri m’maso?’ Abale ace adzumatirwa kakamwe. Iye aapanga: ‘Lekani kutsukwala thangwi ya pidandicitira imwe. Mulungu anditumiza kuno toera kupulumusa umaso wanu. Natenepa bwererani mwakucimbiza toera mukakwate pai wanga kuti mubwere naye kuno.’

Iwo aenda kunyumba kapanga pai wawo mphangwa zenezi, buluka penepo mbaenda nawo ku Ejitu. Pidapita pyaka pizinji, Zuze na pai wace adzakhala pontho pabodzi.