Mose akhala ku Midhiyani mu pyaka 40. Kweneko iye amanga banja mbakhala na ana. Ntsiku inango pikhadyesa iye mabira cifupi na Phiri ya Sinai, Mose aona cinthu cakudzumatirisa. Thendere ikhagaka moto, mbwenye nee ikhapya! Pikhafendedzera iye dhuzi toera aone mwadidi pinthu pikhacitika, abva fala pakati pa thendere mbilonga: “Mose! Leka kufendedzera pontho. Dula masandalya ako, thangwi mbuto idalimira iwe ndi yakucena.” Ndi Yahova akhalonga mbakaphatisira anju.

Mose agopa, mbaphimbira nkhope yace. Yahova alonga pontho: ‘Ine ndaona nyatwa inatamba Aizraeli. Ndisafuna kuaombola m’manja mwa Aejitu mbandiabulusa mu dziko ineyi, mbandiaendesa ku dziko yadidi. Iwe unadzabulusa mbumba yanga ya Izraeli mu Ejitu.’ Mwandimomwene Mose adzudzumika kakamwe na pyenepi.

Iye abvundza: ‘Anthu angandibvundza kuti watumwa na ani, ndinaatawira tani?’ Mulungu antawira: ‘Apange kuti Yahova, Mulungu wa Abhrahamu, Mulungu wa Izaki na Mulungu wa Yakobe andituma kuna imwe.’ Mose abvundza pontho: ‘Mphapo ndiye tani mbumba ingakhonda kundibvera?’ Nakuti Mose akhadzudzumika, Yahova ampasa cidzindikiro cakuti mbicidam’phedza. Iye apanga Mose toera aponye ndodo yace pantsi. Pidaiponya iye pantsi, iyo yasanduka kudza nyoka! Buluka penepo, Mose aphata ncira wa nyoka, mbisanduka pontho kudza ndodo. Yahova alonga: ‘Ungapangiza cidzindikiro ceneci, iwo anakhulupira kuti ndine adakutuma.’

Mose alonga: “Ine nkhabe kwanisa kulonga mwadidi.” Yahova apikira kuna iye: ‘Ndinadzakupanga pinafunika iwe kulonga, pontho ndinatuma m’bale wako Aroni toera akuphedze.’ Pidadziwa Mose kuti Yahova akhali na iye, akwata nkazace na anace mbabwerera ku Ejitu.

Aejitu akhakakamiza Aizraeli toera kuphata basa ninga mabitcu. Yahova atuma Mose na Aroni toera kuenda kuna Farau na mphangwa izi: ‘Siya mbumba yanga iende toera indilambire n’thando.’ Mwakudzikuza, Farau atawira: ‘Ine nkhabe bvera pinalonga Yahova, pontho nee ndinasiya Aizraeli toera aende.’ Natenepa Farau akakamiza Aizraeli toera aphate basa mwakuwanga kakamwe. Yahova apfundzisa Farau cinthu cakufunika. Yahova acita tani pyenepi? Iye abweresa Miliri Khumi mu Ejitu. Yahova apanga Mose: ‘Farau nee akundibvera. Mangwana namacibese iye anakhala ku Nkulo wa Nilo. Ndoko kuna iye ukampange kuti thangwi yakukhonda kwace kutawirisa mbumba yanga iende, madzi onsene a mu Nkulo wa Nilo anadzacinja mbadza ciropa.’ Mose abvera mbaenda kuna Farau. Farau aona Aroni mbakamenya madzi a mu Nkulo wa Nilo na ndodo, pontho madzi acinja mbadza ciropa. Madzi atoma kununkha, ntsomba zafa, pontho anthu nee akhali na madzi adidi toera kumwa. Farau apitiriza basi kukhondesa Aizraeli toera aende.

Pakupita ntsiku zinomwe, Yahova atuma pontho Mose toera aende kuna Farau na mphangwa izi: ‘Ungapitiriza kukhonda kuasiya toera aende, mu dziko ya Ejitu munadzala na matesi.’ Farau akhonda kubvera Yahova. Natenepa Aroni athukula ndodo yace, matesi mbatoma kudzala n’dziko ya Ejitu. Anthu akhaona matesi n’nyumba zawo, pa matalimba awo na mu pyombo pyawo pyonsene. Matesi akhali m’mbuto zonsene! Farau apanga Mose toera aphembe Yahova kuti amalise muliri unoyu. Farau akhadapikira kuti mbadasiya Aizraeli toera aende. Natenepa, Yahova alimirisa muliri unoyu, pontho Aejitu agumanya matesi akufa m’mikuku mizinji, dziko mbitoma kununkha. Pidaona Farau kuti muliri wa matesi wamala, iye akhondesa pontho Aizraeli toera aende.

Buluka penepo, Yahova apanga Mose: ‘Panga Aroni kuti amenye pantsi na ndodo yace toera pfumbi isanduke kudza imbu.’ Aroni pidamenya iye pantsi, imbu zadzala konsene kwene. Anthu anango a mu Ejitu pidaona iwo muliri unoyu apanga Farau: ‘Muliri uyu wabwereswa na Mulungu.’ Mbwenye Farau apitiriza basi kukhondesa Aizraeli toera aende.