Yahova apanga Mose: ‘Kwira paphiri ubwere kuna ine. Ndinadzalemba mitemo yanga pa matabwa a miyala inafuna kukupasa ine.’ Natenepa Mose akwira paphiri mbakhala kweneko mu ntsiku 40 masiku na masikati. Mu ndzidzi ukhali iye paphiri, Yahova alemba Mitemo Khumi pa matabwa mawiri a miyala mbaipasa Mose.

Pikhadembuka Mose kutcita, Aizraeli anyerezera kuti iye nee mbadabwererabve. Natenepa, iwo apanga Aroni: ‘Tisafuna ntsogoleri unango. Ticitire mulungu!’ Aroni aapanga: ‘Ndipaseni ouro iri na imwe.’ Buluka penepo Aroni anyungulusa ouro mbacita dzimunthu ya mwanang’ombe. Aizraeli alonga: ‘Mwanang’ombe uyu ndi Mulungu wathu adatibulusa mu dziko ya Ejitu.’ Iwo atoma kulambira mwanang’ombe unoyu, pontho acita phwando. Kodi pyenepi pikhali pyakuipa? Inde, thangwi mbumba ikhadapikira kulambira Yahova basi. Mbwenye iwo nee akwanirisa pikiro yawo.

Yahova akhaona pyonsene pikhacitika, natenepa Iye apanga Mose: ‘Tcita, ndoko kuna mbumba. Iyo yasiya kundibvera mbilambira mulungu wauthambi.’ Buluka penepo, Mose atcita paphiri na matabwa mawiri a miyala m’manja mwace.

Pidafika Mose dhuzi na nsasa, iye abva Aizraeli mbakaimba. Buluka penepo, aaona mbakabvina, pontho mbakagodamira mwanang’ombe. Mose aipirwa kakamwe. Natenepa iye aponya miyala miwiri ene pantsi mbisweka. Pontho afudza dzimunthu ineyi. Buluka penepo abvundza Aroni: ‘Ninji pidakucitira mbumba iyi toera ucite pinthu ipi pyakuipa?’ Aroni atawira: ‘Lekani kuipirwa. Imwe musadziwa mwadidi mbumba iyi. Iwo akhafuna mulungu, natenepa, ndanyungulusa ouro yawo pa moto mbandicita mwanang’ombe uyu!’ Mwandimomwene Aroni nee akhafunika kucita pyenepi. Buluka penepo, Mose abwerera pontho paphiri, mbadembetera Yahova toera alekerere mbumba.

Yahova alekerera basi ene ale akhali na cifuno cakumbvera. Na thangwi ineyi, Aizraeli akhafunika kubvera pinthu pyonsene pikhapangwa iwo na Mose.

Pikhali Mose Paphiri ya Sinai, Yahova ampanga toera amange tabhernakulo yakuti mbidaphatisirwa na Aizraeli toera kumulambira. Tabhernakulo ineyi ikhafunika kumangwa munjira yakukhonda nentsa kuithukula toera kuenda nayo ku mbuto inango.

Yahova alonga: ‘Panga Aizraeli toera apereke pinakwanisa iwo kuti aphedzere kumangwa kwa tabhernakulo.’ Natenepa Aizraeli apereka ouro, parata, nkuwa, miyala yakufunika kakamwe, nthembe za pinyama, usalu wa linyu na pinthu pinango. Iwo apereka pinthu pizinji kakamwe mpaka Mose kulonga: ‘Pyakwana. Lekani kubweresabve pinthu pinango.’

Yahova apasa maluso amuna na akazi azinji toera aphedzere kumanga tabhernakulo. Anango akhali na basa yakusona nguwo, anangombo akhatsalakana miyala yakufunika kakamwe, ouro peno matabwa.

Aizraeli amanga tabhernakulo ninga mudapangirwa iwo na Yahova. Iwo acita nguwo yakubalika toera kugawa tabhernakulo m’makhundu mawiri: Mbuto Yakucena na Mbuto Yakucena Kakamwe. Mbuto Yakucena mukhali na cakuikhira nyale ca ouro, meza, na guwa yakupisira ntsembe. Mbuto Yakucena Kakamwe mukhali na bokosi ya cibverano yakucitwa na matabwa na ouro. Kunja kwa tabhernakulo kukhali na basiya ya parata na guwa ikulu. Bokosi ya cibverano ikhagumanika mu Mbuto Yakucena Kakamwe ikhakumbusa Aizraeli pya pikiro idacita iwo toera kubvera Yahova. Cibverano ninji? Ndi pikiro yakupambulika.

Yahova asankhula Aroni na anace toera kutumikira pa tabhernakulo ninga anyantsembe. Iwo akhafunika kutsalakana tabhernakulo na kupereka ntsembe kuna Yahova. Basi ene Aroni wakuti akhali nyantsembe wankulu, ndiye akhatawiriswa toera kupita m’Mbuto Yakucena Kakamwe. Iye akhapita mu mbuto ineyi kabodzi pa caka toera kupereka ntsembe thangwi ya madawo ace, a banja yace na a mbumba yonsene.

Aizraeli amala kumanga tabhernakulo caka cibodzi pidamala iwo kubuluka ku Ejitu. Natenepa, iwo adzakhala na mbuto toera kulambira Yahova.

Yahova acitisa kuti padzulu pa tabhernakulo paoneke khole. Mu ndzidzi ukhali khole padzulu pa tabhernakulo, Aizraeli akhafunika kupitiriza pa mbuto ibodzi ene. Mbwenye khole ingakwira, iwo akhafunika kufunya tabhernakulo mbatowera kunaenda khole.