Pidabuluka Aizraeli Paphiri ya Sinai iwo apita na n’thando ya Parani, ku Kadhesi. Pidafika iwo kweneko Yahova apanga Mose: ‘Sankhula amuna 12 mu dzindza ibodzi na ibodzi toera aende kaone dziko ya Kanani, inafuna ine kupasa Aizraeli.’ Natenepa, Mose asankhula amuna 12 mbaapanga: ‘Ndokoni ku Kanani mukaone khala dziko ndi yadidi toera kulima peno nkhabe. Pontho onani khala anthu anakhala mwenemu ndi amphambvu peno nkhabe.’ Natenepa anyakusuzumira dziko 12, aenda ku Kanani.

Pidapita ntsiku 40, anyakusuzumira dziko abwerera, pontho iwo abweresa misapo ya mauva, romaa na masambvu. Iwo alonga: ‘Ndi dziko yadidi, mbwenye anthu onsene adaona ife mwenemu ndi amphambvu, pontho mizinda yawo idazungulirwa na mipanda ndi mikulu kakamwe.’ Buluka penepo, Kalebe wakuti akhali m’bodzi mwa anyakusuzumira dziko alonga: ‘Tendeni mwakucimbiza, ife tinakwanisa kuakunda!’ Thangwi yanji Kalebe alonga tenepo? Thangwi iye na Yoswa akhanyindira Yahova. Mbwenye anyakusuzumira dziko anango khumi alonga: ‘Nkhabe! Anthu a kweneko ndi akulapha na a manungo makulu kakamwe! Pontho tingalandanisika na iwo, ife tisakhala ninga nthete.’

Pidabva Aizraeli pyenepi, iwo agopa mbatoma kudungunya. Buluka penepo iwo alonga: ‘Tendeni tisankhule ntsogoleri unango toera tibwerere pyathu ku Ejitu. Thangwi yanji tisafunika kuenda kweneko toera tiphiwe?’ Yoswa na Kalebe alonga: ‘Lekani kusandukira Yahova, pontho lekani kugopa. Yahova ali na ife.’ Mbwenye Aizraeli nee abvera. Na thangwi ineyi, iwo akhafuna kupha Yoswa na Kalebe!

Kodi Yahova acitanji? Iye apanga Mose: ‘Ndacita pinthu pizinji pamaso pa Aizraeli, mbwenye iwo akupitiriza basi kukhonda kundibvera. Natenepa, iwo anakhala n’thando ino mu pyaka 40, pontho anafera muno. Basi ene anapiana awo, Yoswa na Kalebe ndiwo anafuna kupita mu dziko idaapikira ine.’

Mu ndzidzi ukhali Aizraeli n’thando, Kora, Dhatani, Abhironi pabodzi na amuna akukwana 250 asandukira Mose. Iwo ampanga: ‘Ife taneta na imwe! Thangwi yanji iwe usafuna kukhala ntsogoleri wathu, pontho m’baleako Aroni mbakhala nyantsembe wankulu? Yahova nee ali na imwe basi, ali na ifembo.’ Yahova nee akomerwa na pyenepi. Iye akhaona kuti amuna anewa akusandukira iye ene!

Mose apanga Kora na ale akham’phedzera: ‘Mangwana bwerani ku tabhernakulo, pontho bweresani moto na insenso toera kupisa ntsembe. Yahova anapangiza munthu adasankhula iye.’

Mangwana mwace, Kora na amuna 250 aenda kaonana na Mose ku tabhernakulo. Iwo apisa ntsembe maseze nee akhali anyantsembe. Buluka penepo, Yahova apanga Mose na Aroni: ‘Bulukani pana Kora na nsoka wace.’

Kora pidaenda iye kaonana na Mose ku tabhernakulo, Dhatani, Abhironi na mabanja awo akhonda kuenda. Natenepa Yahova apanga Aizraeli toera abuluke pakati pa misasa ya Kora, Dhatani na Abhironi. Mwakucimbiza, Aizraeli abuluka. Mbwenye Dhatani na Abhironi pabodzi na mabanja awo abuluka mbalimira pa misuwo ya misasa yawo. Mwakututumusa, mataka afunguka mbameza onsene! Ku tabhernakulo, moto wabuluka kuna Yahova mbupisa Kora na amuna akukwana 250.

Buluka penepo, Yahova apanga Mose: ‘Kwata ndodo ya ntsogoleri wa dzindza ibodzi na ibodzi, mbuilemba dzinace. Mbwenye pa ndodo ya dzindza ya Alevi, lemba dzina ya Aroni. Pontho ikha ndodo zonsene mu tabhernakulo, ndodo ya mamuna anafuna sankhula ine inadzaphukira maluwa.’

Mangwana mwace, Mose abulusa ndodo zonsene mbapangiza atsogoleri. Ndodo ya Aroni yaphukira maluwa mbibala misapo. Pyenepi pyapangiza kuti Yahova akhadasankhula Aroni toera kukhala nyantsembe wankulu.