Pidaenda anyakuona dziko a Izraeli ku nzinda wa Yeriko, iwo afikira pa nyumba ya Raabhe. Mambo wa Yeriko Pidadzindikira iye pyenepi, atuma anyankhondo toera kuenda kunyumba kwa Raabhe. Raabhe abisa anyakuona dziko awiri padzulu panyumba, pontho apanga anyankhondo toera aende na njira inango. Iye apanga anyakuona dziko: ‘Ndinakuphedzani, thangwi ndisadziwa kuti Yahova ali kukhundu yanu, pontho munakunda dziko ino. Ndaphata miyendo, ndipikireni kuti munadzapulumusa anthu a panyumba ya babanga.’

Anyakuona dziko apanga Raabhe: ‘Tinapikira kuna iwe kuti nee munthu m’bodzi anafuna kugumanika n’nyumba mwako anadzaphiwa.’ Iwo athimiza: ‘Basi ene usafunika kumangirira nkhambala iyi yakufuira pa janela pako, ungacita pyenepi banja yako inadzapulumuswa.’

Buluka penepo, Raabhe aphatisira nkhambala toera kuatcitisa na pa janela. Iwo aenda ku mapiri mbabisala kweneko mu ntsiku zitatu mbadzati kuenda kaonana na Yoswa. Buluka penepo, Aizraeli awambuka Nkulo wa Yordani mbakhunganyika toera kukunda dziko. Iwo atoma kukunda nzinda wa Yeriko. Yahova aapanga toera kuzungulira nzinda kabodzi pa ntsiku, mu ntsiku zitanthatu. Pa ntsiku yacinomwe, iwo azungulira nzinda kanomwe. Buluka penepo, anyantsembe aliza matuluka, pontho anyankhondo akhuwa na mphambvu kakamwe. Natenepa, mipanda ya nzinda yagomoka! Mbwenye nyumba ya Raabhe yakuti ikhali padzulu pa mipanda, nee yagomoka. Raabhe na banja yace apulumuka thangwi iye anyindira Yahova.

Mphangwa za kufudzwa kwa Yeriko zafika kuna anthu onsene a ku Kanani. Amambo awo atonga kugumanyikana toera kumenyana na Aizraeli. Mbwenye Ajibheyoni akhali na maonero akusiyana. Iwo abvala nguwo zakusakala, aenda kuna Yoswa, mbalonga: ‘Tabuluka ku dziko yakutali. Tabva mbiri ya Yahova na pyonsene pidacita iye ku Ejitu na ku Moabhe. Pikirani kuti nee munatifudza, pontho ife tinakhala atumiki anu.’

Yoswa akhulupira pidalonga iwo mbapikira kuti nee anaafudza. Pidapita ntsiku zitatu, iye adzindikira kuti iwo nee abuluka ku dziko yakutali. Iwo akhadabuluka ku dziko ya Kanani. Yoswa abvundza Ajibheyoni anewa: “Thangwi yanji mwatinyengeza?” Iwo atawira: ‘Tikhagopa. Tisadziwa kuti Yahova Mulungu wanu asakuphedzani ku nkhondo. Taphata miyendo lekani kutipha.’ Natenepa, Yoswa acita pidapikira iye mbakhonda kuapha.

Pidapita ntsiku zingasi, amambo axanu a ku Kanani na anyankhondo awo amenyana na Ajibheyoni. Yoswa na anyankhondo ace afamba masiku onsene toera kuenda kapulumusa Ajibheyoni. Pidaca kunja, iwo atoma kumenya nkhondo. Akanani atoma kuthawa. Pikhathawa iwo, Yahova aagwisira miyala mikulu. Buluka penepo, Yoswa aphemba Yahova toera alimirise dzuwa. Nakuti dzuwa nee isalimira, thangwi yanji iye aphemba Yahova toera acite pyenepi? Thangwi Yoswa akhanyindira Yahova. Natenepa, dzuwa yalimira mbipitiriza kugaka mpaka Aizraeli kumala kukunda amambo a ku Kanani na anyankhondo awo.