BHIBHLYA ISACINJA UMASO WA ANTHU
Umaso Wanga Ukhabuluka Pakuipa Kuenda Pakutekera
Yakulongwa na Stephen Mcdowell
CAKA CAKUBALWA: 1952
DZIKO YAKUBALWA: ESTADOS UNIDOS
MBIRI: MANYEREZERO AUPHANGA
MBIRI YANGA: Ndakula n’cisa ca Los Angeles, California, E.U.A., cakudzala na mapanga na kuphatisira mitombwe yakuledzeresa. Anyakubalanga akhali na ana atanthatu, ine ndikhali waciwiri.
Mama atikuza ninga piwalo pya gereja ya evanjelyu. Mbwenye ninga mphale, ndikhali na umaso uwiri. M’madimingu ndikhaimba na nsoka nyimbo za gereja. Ntsiku zinango za sumana, ndikhakhala m’maphwando, kuphatisira mitombwe yakuledzeresa na kucita ulukwali.
Ndikhali na manyerezero auphanga. Ndikhafuna kuphatisira cinthu consene ninga cida toera kuwina. Pikhapfundza ine ku gereja nee pikhandiphedza. Kazinji kene ndikhalonga, “Kubwezera pyakuipa ndi kwa Mbuya—ine ndine cida cace!” Pikhakhala ine kuxikola kunkhomo kwa pyaka 1960, ndikhadathaphuliswa na Panteras Negras, nsoka wa ndale ukhadziwika thangwi yakutsidzikiza kwawo ufulu wa anthu. Ndapita mu nsoka unoyu wakupfundza ufulu wa anthu. Kazinji kene tikhacita uviyaviya mpaka kufunga xikola mu ndzidzi wakucepa.
Pisaoneka kuti uviyaviya nee ukhakwanirisa pifuno pyanga pyauphanga. Natenepa, ndatoma kuida anthu mwausumankha. Mwacitsandzo, ndzidzi unango ine na axamwali anga tikhaona mafilimu akhapangiza pya ubitcu ukhacitwa anthu a ku Afrika mu dziko ya Estados Unidos. Mukukulumizwa na kusowa ulungami kweneku, tatoma kumenya aphale azungu m’mbuto yakuonera mafilimu. Buluka penepo taenda kupisa pya azungu, kasaka anthu anango toera kuamenya.
Mbandidzati kukwanirisa pyaka 20, ine na abale anga tacita uphanga uzinji kakamwe. Tapita n’nyatwa na mautongi. M’bodzi wa abale anga ang’ono akhali ciwalo ca mapanga akudziwika pacisa, ine ndabvungazikana nawo. Umaso wanga ukhabuluka pakuipa kuenda pakutekera.
BHIBHLYA YACINJA TANI UMASO WANGA: Anyakubala a xamwali wanga akhali Mboni za Yahova. Iwo andiphemba toera kuenda kumisonkhano yawo ya mpingo, ine ndatawira. Bulukira ntsiku ineyo, ndakwanisa kuona kuti Mboni za Yahova ndi zakusiyana. Munthu onsene akhali na Bhibhlya, pontho akhaiphatisira nkati mwa misonkhano. Ngakhale anang’ono akhacitambo nkhani! Ndadzumatirwa kakamwe pidapfundza ine kuti Mulungu ali na dzina, Yahova, pontho kubva mbikaphatisirwa. (Masalmo 83:18, NM) Mpingo ukhali na anthu a madziko akusiyanasiyana, pikhaonekeratu kuti nee akhasankhulana mitundu.
Pakutoma, nee ndikhafuna kupfundza Bhibhlya na Mboni za Yahova, mbwenye ndikhakomerwa kuenda ku misonkhano yawo. Ntsiku inango namasiku, mukhali ine kumisonkhano ya Mboni za Yahova, nsoka wa axamwali anga waenda ku mbuto ikhaimbwa na kubvinwa. Kweneku, iwo amenya mphale unango mpaka kumupha thangwi akhonda kuapasa kapoti wace wa nthembe. Mangwana mwace, iwo akhagaya thangwi ya pidacita iwo. Pontho akhapwaza nseru mukhabvundzwa iwo pa thando yakutonga miseru. Azinji a iwo atongwa kukhala nkaidi umaso wawo onsene. Ndikhali wakutsandzaya kakamwe kudziwa kuti nee ndikhali na iwo namasiku anewa. Ndatonga kucinja umaso wanga na kutoma kupfundza Bhibhlya.
Thangwi yakudzoloera kukhala na anthu a tsankhu, ndaona pinthu pakati pa Mboni za Yahova pyakuti pyandidzumisa. Mwacitsandzo, m’bale wacizungu angacita ulendo, akhasiya anace pa banja ya abale acikafiri. Pontho banja yacizungu ikhakwata aphale peno atsikana acikafiri akuti akhafuna ciphedzo mbakhala nawo panyumba pawo. Ndadzindikira kuti Mboni za Yahova zisacita pinthu mwakubverana na mafala a Yezu anagumanika pa Jwau 13:35: “Na kufunana kwanu anthu onsene anadzadzindikira kuti ndimwe anyakupfundza anga.” Ndadziwa kuti ndagumana ubale wandimomwene.
Kubulukira mukupfundza Bhibhlya, ndaona kufunika kwa kucinja manyerezero anga. Ndikhafunika kucinja manyerezero anga tayu basi toera kucita pinthu mwantendere mbwenye kuona kuti ineyi ndi njira yadidi ya umaso. (Aroma 12:2) Mwapang’ono na pang’ono ndacita macinjo. Mu nthanda ya Thongwe ya 1974, ndabatizwa ninga m’bodzi wa Mboni za Yahova.
Ngakhale pakumala kubatizwa, ndikhafunika kupitiriza kusasanyira manyerezero anga. Mwacitsandzo, ntsiku inango pikhali ine mu utumiki Wacikristu wa nyumba na nyumba, ndathamangisa mbava wakuti akhadaba radyo ya motokala wanga. Pikhali ine cifupi na kumphata, ataya radyo mbathawa. Pidalonga ine kwa anango kuti ndawina tani radyo yanga, nkulu wa mpingo akhali mu nsoka andibvundza: “Stephen, mbudacitanji naye mbudamphata?” Mbvundzo unoyu wandikulumiza toera kupitiriza kuwangisira kukhala wantendere.
Mu nthanda ya Malandalupya ya 1974, ndatoma kutumikira ninga ntumiki wa ndzidzi onsene, pontho ndikhapereka midzidzi 100 nthanda zonsene kupfundzisa anthu Bhibhlya. Patsogolo pace, ndakhala na mwai wakutumikira pa ofesi ikulu ya dziko yonsene yapantsi ya Mboni za Yahova ku Brooklyn, Nova York. Mu caka 1978, ndabwerera ku Los Angeles toera kutsalakana mai wanga wakuti akhaduwala. Pyaka piwiri patsogolo pace, ndamanga banja na Aarhonda. Iye andiphedza kakamwe kutsalakana mai wanga mpaka kulowa kwace. Mukupita kwa ndzidzi, ine na Aarhonda taenda Kuxikola ya Bhibhlya ya Gileade Torre de Vigia, na tatumizwa ku Panama, kudatumikira ife ninga amisionaryo.
Kutomera pa ubatizo, ndathimbana na makhaliro mazinji akuti mbadandicitisa kucita pinthu mwauphanga. Ndapfundza kukhala kutali na anthu akhayesera kundisosa peno kukhurudzika munjira inango. Anthu azinji, kuphataniza nkazanga, andisimba thangwi yakutsalakana pinthu munjira ineyi. Ngakhale ine ene ndadzumatirwa! Ine nkhabe simbika thangwi ya macinjo anewa a umunthu wanga. Mbuto mwace, ndisakhulupira kuti iwo ndi umboni wamphambvu ya Bhibhlya yakucinja umaso.—Ahebere 4:12.
NDAPHINDULA TANI: Bhibhlya yapasa cifuniro umaso wanga na yandipfundzisa kukhala na ntendere wandimomwene. Nkhabe kumenyabve anthu; mbuto mwace, ndisaaphedza kukhala akuwanga mwauzimu. Ndapfundzisambo Bhibhlya nyamalwa wakale wa kuxikola! Pidamala iye kubatizwa, takhala n’nyumba ibodzi ene mu ndzidzi wakucepa. Mpaka lero, ndife axamwali a ponda ndipondembo. Mu ndzidzi uno, ine na nkazanga taphedza anthu akupiringana 80 kukhala Mboni za Yahova mukupfundza nawo Bhibhlya.
Ndisapereka takhuta wankulu kwa Yahova thangwi yakundipasa umaso wakudzala na mabvekero na wakutsandzayisa pakati pa ubale wandimomwene.
[Ntsonga ikulu pa tsamba 11]
Ndikhafunika kucinja manyerezero anga tayu basi toera kucita pinthu mwantendere mbwenye kuona kuti ineyi ndi njira yadidi ya umaso