BHIBHLYA ISACINJA UMASO WA ANTHU

Ndatsandzaya Na Matawiro a Bhibhlya Akubveka Mwadidi Na Akukhonda Nentsa

Yakulongwa na Ernest Loedi

CAKA CAKUBALWA: 1948

DZIKO YAKUBALWA: HUNGRIA

MBIRI: KUFUNA MATAWIRO A MIBVUNDZO YAKUFUNIKA KAKAMWE YA UMASO

MBIRI YANGA: Ndabalwa ku Székesfehérvár, Hungria, nzinda wa mbiri za pinthu pidacitika mu pyaka pyakupiringana 1.000. Mwakutsukwalisa, ndiciri kukumbuka pinthu pyakuipa pidacitika mu nzinda unoyu pa nkhondo yaciwiri ya dziko yonsene yapantsi.

Mu uwana wanga, ndakuzwa na ayavu anga. Ndisaambuka mwaufuni​—makamaka mbuyanga Elisabeth. Iye andicitisa kukhulupira Mulungu mwakuwanga. Kutomera mukhali ine na pyaka pitatu, maulo onsene ndikhacita phembero mwakubwereza-bwereza pabodzi na iye yakuti m’midzidzi inango isacemerwa Phembero ya Mbuya. Mbwenye, ndabvesesa mabvekero a phembero ineyi mukhali ine cifupi na pyaka 30 pyakubalwa.

Ayavu anga anditsalakana mu uwana wanga thangwi yakuti anyakubalanga akhaphata basa masiku na masikati, na cidikhiro cakuti anakhala na kobiri izinji toera kugula nyumba yadidi. Mbwenye, Sabudu yonsene yaciwiri, banja yonsene ikhagumanyikana toera kudya pabodzi. Ndisakumbuka mwadidi m’midzidzi ineyi ikhali ife pabodzi.

Mu caka 1958, anyakubalanga akwanisa pikhafuna iwo; agula nyumba toera atatu mwa ife tikhalemo. Pakumalisira, ndadzakhala na anyakubalanga​—pyenepi pikhali pyakutsandzayisa kakamwe! Mbwenye, nthanda zitanthatu patsogolo pace, mwakukhonda dikhira kutsandzaya kweneku kwamala. Babanga alowa na utenda wa câncer.

Ndatsukwala kakamwe. Ndisakumbuka kuti ndaphembera tenepa: “Mulungu, ndakudembeterani kuti muwangise babanga. Ine ndisanfuna. Thangwi yanji nee mwatawira maphembero anga?” Mwakusowa cidikhiro ndikhafuna kudziwa kuti babanga ali kupi. Ndabvundzika: ‘Kodi iye aenda kudzulu? Peno nkhabe kudzaonekabve?’ Ndikhacita bibvu na ana anango akhali na ababawo.

Kwa pyaka pizinji, kazinji kene ndikhaenda kumasiye. Ndikhagodama pa nthumbi ya babanga mbindiphembera: “Ndaphata miyendo Mulungu, ndisafuna kudziwa kuti babanga ali kupi.” Pontho ndikhaphemba ciphedzo toera kudziwa mabvekero a umaso.

Mukhali ine na pyaka 13, ndatonga kupfundza Cialemanya. Ndikhanyerezera kuti m’mabukhu mazinji Acialemanya, panango mbindidagumana matawiro a mibvundzo yanga. Mu caka 1967, ndatoma kupfundza mu nzinda wa Jena, Kumabulukiro dzuwa a dziko ya Alemanya. Mwaphinga ndaleri mabukhu a mafilozofiya a Alemanya, makamaka ale analonga pya mabvekero a kukhalapo kwa anthu. Maseze ndagumana maonero mangasi adidi, nkhabepo adandiphata ntima. Ndapitiriza kuphembera toera kugumana matawiro.

BHIBHLYA YACINJA TANI UMASO WANGA: Mu caka 1970, ndabwerera ku Hungria, kudadziwana ine na Rose wakuti adzakhala nkazanga. Mu ndzidzi unoyu, Hungria akhali pantsi pa utongi Wacikomunista. Ndzidzi pang’ono pidamala ife kumanga banja, ine na Rose tathawira ku Áustria. Cifuno cathu cikhali cakuti mu kupita kwa ndzidzi tithawire ku Sydney, Australya, kukhakhala yavu wanga.

Mwakukhonda dembuka ndagumana basa mu Áustria. Ntsiku inango, nyabasa ndzanga andipanga kuti ndinakwanisa kugumana matawiro a mibvundzo yanga yonsene m’Bhibhlya. Iye andipasa mabukhu mawiri akuti akhalonga pya Bhibhlya. Mwakucimbiza ndamala kuleri mabukhu anewa mbindifuna anango. Natenepa, ndalembera Mboni za Yahova, adabulusa mabukhu anewa, mbindiphemba mabukhu anango.

Ntsiku ibodzi, pikhakwanirisa ife caka ninga anyakumanga banja, ine na Rose tacedzerwa na Mboni waciphale wa ku Australya. Iye abweresa mabukhu adaphemba ine mbandiphemba kuti ndipfundze naye Bhibhlya. Nakuti ndikhafuna kakamwe kupfundza, tikhapfundza kawiri pa sumana​—pa pfundziro ibodzi na ibodzi tikhamala midzidzi cifupi na minai!

Ndikhakomerwa na pikhandipfundzisa Mboni za Yahova kubulukira m’Bhibhlya. Pidandipangiza iwo dzina ya Mulungu, Yahova, m’Bhibhlya yanga Yacihungara, pyandinentsa kupitawira. Mu pyaka 27 pya uphemberi wanga, cipo ndabva dzina ya Mulungu mbilongwa nee kabodzi kene. Ndatsandzaya na matawiro a Bhibhlya akubveka mwadidi na akukhonda nentsa ku mibvundzo yanga. Mwacitsandzo, ndapfundza kuti anyakufa nkhabe dziwa pinthu, akhala ninga ali n’citulo cikulu. (Koelete 9:5, 10; Jwau 11:11-15) Pontho ndapfundza pya mapikiro a Bhibhlya a dziko ipswa yakuti ‘kufa hakunadzakhalapo pontho tayu.’ (Apokalipse 21:3, 4) Ndisadikhira kuona pontho babanga, thangwi mu dziko ipswa ineyi, ‘munadzaoneka kulamuka muli akufa.’​—Machitiro 24:15.

Rose atomambo kupfundza Bhibhlya pabodzi na ine na ntima wace onsene. Tathambaruka mwakucimbiza, tamalisa bukhu ya pfundziro mu nthanda ziwiri basi! Tikhagumanika m’misonkhano yonsene ikhacita Mboni za Yahova pa Nyumba ya Umambo. Tikhadzumatirwa kakamwe na ufuni, citsalakano na cibverano pakati pa Mboni za Yahova.​—Jwau 13:34, 35.

Mu caka 1976, ine na Rose tatawiriswa kuenda ku Australya. Mwakucimbiza tasaka Mboni za Yahova kweneku. Mboni za Yahova za cisa ceneci zatitambira na manja mawiri. Mu caka 1978, tadzakhala Mboni za Yahova.

NDAPHINDULA TANI: Pakumalisira ndagumana matawiro a mibvundzo ikhandidzudzumisa mu pyaka pizinji. Mukufendedzera Yahova Mulungu, ndagumanambo Baba wadidi kakamwe wakukhonda landanisika. (Tyago 4:8) Cidikhiro canga cakuona pontho babanga wandimomwene mu dziko ipswa cisandibalangaza kakamwe.​—Jwau 5:28, 29.

Mu caka 1989, ine na Rose tatonga kubwerera ku Hungria toera tikapange axamwali na acibale athu thangwi ya pikhulupiro pyathu, kuphatanizambo anango. Ife takhala na mwai wakupfundzisa madzana a anthu pya Bhibhlya. Mwa iwo, anthu 70 asatumikira Yahova pabodzi na ife, kuphataniza mai wanga wakufunika.

Ndamala pyaka 17 mbindikaphembera toera kugumana matawiro a mibvundzo yanga. Pyaka pinango 39 pyapita na ndiciri kuphembera​—basi ene cincino ndinakwanisa kulonga, “Takhuta kwa imwe Baba wanga wakufunika wakudzulu, thangwi yakutawira maphembero a uwana wanga.”