Madimonyo Asapha!

Sathani na madimonyo ndi ausumankha na akugopswa. Kale Sathani apha pifuyo na anyabasa a Yobe. Buluka penepo, iye acitisa ‘mphepo ikulu’ mbifudza nyumba na kupha ana khumi a Yobe. Patsogolo pace, Sathani acitisa Yobe kukhala na ‘pironda m’manungo mwace monsene, kubulukira kumanyalo mpaka pa nsolo wace.’—Yobe 1:7-19; 2:7.

Mu ntsiku za Yezu, madimonyo acitisa anthu anango kukhala mabewewe na maboliboli. (Mateu 9:32, 33; 12:22) Iwo athabusa mamuna m’bodzi mbancitisa kutemeka ekhene na miyala. (Marko 5:5) Iwo acitisambo m’phale m’bodzi kukhuwa, mbaponyeka pantsi ‘mbatetemera kakamwe.’—Luka 9:42.

Lero, Sathani na madimonyo asapha anthu azinji kakamwe. Mwandimomwene, mabasa awo akuipa athimizirika kutomera mu ndzidzi udathamangiswa iwo kudzulu. Mphangwa zinalongwa pa dziko yonsene yapantsi zisapangiza kuti iwo ndi ausumankha. Mwacitsandzo: iwo asabweresa utenda kuna anthu, asaaonesa nyatwa namasiku mbacimwana kugona, asaalotesa pinthu pyakugopswa, pontho asapita m’mabonde na anango. Asacitisambo anango kukhala anyansala, kupha peno kupheka okhene.

Lintina, anakhala ku Suriname, alonga kuti dimonyo, peno nzimu wakuipa, wapha anthu 16 a banja yace, pontho athabusa manungo ace na manyerezero mu pyaka 18. Iye adzindikira kuti madimonyo “asatsandzaya angathabusa anthu mpaka kuapha.”

Mbwenye Yahova ali na mphambvu ya kutsidzikiza atumiki ace pakuthimbana na Sathani.—Misangani 18:10.