Khundu 4
Mulungu Asatipanga Pya Pifuniro Pyace
1, 2. Kodi tisadziwa tani kuti Mulungu asatawira ale anabvunza mwakuona ntima?
MULUNGU wakufuna asadziwisa pifuniro pyace kwa anthu akuona ntima anansaka. Iye asatawira anthu anacita mabvunzo ninga akuti thangwi yanji iye asalekerera nyatwa.
2 Biblya isalonga: “Ungansaka [Mulungu] unadzamuona.” “[Alipo] Mulungu wa kudzulu basi anakwanisa kutchulula pyakubisala.” “Mbuya ene nkhabe kuchita chinthu mbadzati kuchipanga kuli alongeri, atumiki ache.”—1 Pya dziko ya Israele [Mbiri] 28:9; Danyele 2:28; Amosi 3:7.
Kodi Matawiro Ali Kupi?
3. Kodi tinagumana kupi ntawiro wa mbvunzo wakuti thangwi yanji Mulungu asalekerera nyatwa?
3 Matawiro a mabvunzo ninga akuti thangwi yanji Mulungu asalekerera nyatwa na pinafuna cita iye thangwi ya pyenepi asagumanika m’pyakulembwa pidalembesa iye towera kutiphindulisa. Pyakulembwa pyenepi ndi Mafalace, Biblya Yakucena. “Malembo onsene ndiye Mulungu adaalembesa towera aphedze anthu pa kupfundisa, pa kuzuza [peno kusumula], pa kusandika na pa kudziwisa pyakulungama pyonsene. Tenepa munthu wa Mulungu anakhala wa maso kakamwe, wakukwanisa kuchita pinthu pyadidi pyonsene.”—2 Timoti 3:16, 17.
4, 5. Kodi ndi ninji cinacitisa Biblya kukhala bukhu yakupambulika?
4 Mwandimomwene Biblya ndi bukhu yakupambulika. Iri na pyakulembwa pyakulinganira kakamwe pya mbiri ya anthu na isalonga pinthu pyakale kakamwe anthu mbasati kucitwa. Iyombo ndi ya m’nzidzi wathu, thangwi maprofesiya ace asabverana na pinthu pinacitika m’nzidzi wathu na pinafuna kudzacitika kutsogolo kwakuti kuli cifupi.
5 Nkhabepo bukhu inango yakuti ndi yakunyindirika thangwi ya ulinganiri wa mbiri. Mwacitsanzo, pana pyakulembwa na manja (manuscritos) pang’ono basi pya alembi adidi a m’nzidzi wakale. Mbwenye piripo pyakulembwa na manja pizinji pya Biblya, pinango pyamumphu na pinangombo ndi maphindi basi: cifupi na 6.000 pya Malemba Acihebere (mabukhu 39 a “Unthaka Wa Kale”) na cifupi na 13.000 pya Malemba Acigerego (mabukhu 27 a “Unthaka Upswa”).
6. Thangwi yanji tingakwanise kukhala na cinyindiro cakuti Biblya ya lero ndi sawasawa na ire ya m’nzidzi udailembesa Mulungu?
6 Mulungu wamphambvu zonsene, ule adalembesa Biblya, acitisa kuti umumphu wa malemba ukoyiwe mwadidi m’pyakulembwa na manja pyenepi. Natenepa Mabiblya athu lero ndi sawasawa na pyakulembwa pidalembeswa m’nzidzi wakale. Cinthu cinango cinatiphedza kudzindikira pyenepi ndi cakuti makopya anango a pyakulembwa na manja pya Malemba a Cigerego Acikristu asalonga pinthu pya m’madzana a piaka a m’nzidzi udalembwa ipyo pakutoma. Makopya akucepa a pyakulembwa na manja a alembi akale adziko akuti aciripo kazinji kene nkhabe longa pinthu pidacitika madzana mazinji a piaka alembi akutoma mbadamala kale kulemba.
Muoni Wa Mulungu
7. Kodi kugawirwa kwa Biblya kwafika mpaka papi?
7 Biblya ndi bukhu inagawirwa kakamwe kupiringana mabukhu anango m’mbiri ya anthu. Cifupi na makopya mabiliyau manayi amala kudindwa. Nkhabepo bukhu inango yakuti iri cifupi na cilengeso ceneci. Biblya yamumphu peno khundu yayo yathumburuzwa m’pilongero pyakupiringana 2.250. Natenepa, pisaoneka ninga mapurusento 90 a anthu m’planeta yathu angakwanise kukhala na Biblya.
8-10. Kodi ndi api mangasi a mathangwi anapangiza kuti Biblya yathema kudingwa na ife?
8 Mwandimomwene bukhu inalonga kuti ndi yakubuluka kwa Mulungu mbikhala na pipangizo pyonsene pyakunja na pyankati pyakulinganira kwayo ndi yakuthema kuidinga.a Isafokotoza cifuniro ca umaso, mabvekero a makhaliro adziko na pinafuna citika kutsogolo. Nkhabepo bukhu inango yakuti ingakwanise kucita pyenepi.
9 Inde, Biblya ndi njira inaphatisira Mulungu towera kulonga na banja ya anthu. Iye atsogolera kulembwa kwayo na mphambvu yace yakuphata basa, peno nzimu, mbaphatisira amuna 40 towera kuilemba. Natenepa, Mulungu asalonga na ife m’kuphatisira Mafalace, Biblya Yakucena. Mpostolo Paulu alemba: “Mwatambira mafala a mphangwa zadidi za Mulungu, zidafotokoza ife; hamudaatambira tayu ninga mafala a anthu mbwenye ninga mafala a Mulungu.”—1 Atesalonika 2:13.
10 Abrahamu Lincoln, prezidenti wacikhumi nacitanthatu wa Estados Unidos, athula Biblya kuti ndi “muoni wadidi kakamwe udapasa Mulungu anthu . . . Mbitidaisowa nee mbitidadziwa cadidi na cakuipa.” Kodi muoni unoyu ukulu kakamwe usatipanganji pya matomero a nyatwa, thangwi yanji Mulungu asazilekerera, na kuti iye anadzacitanji thangwi ya pyenepi?
[Pidzindikiro pyapantsi]
a Towera kugumana mphangwa zakuthimizirika za kulinganira kwa Biblya, onani bukhu yakuti A Bíblia—Palavra de Deus ou de Homem?, yakubuluswa m’1989 na Sociedade Torre de Vigia de Bíblias e Tratados.
[Foto pa tsamba 10]
Biblya, yakulembeswa na Mulungu, ndi njira inalonga iye na banja ya anthu