NSOLO WA REVISTA
Kodi Mboni za Yahova Mbani?
“Ndisadziwa Mike kwa pyaka pizinji. Iye ndi m’bodzi wa Mboni za Yahova. Mbwenye nee ndisabvesesa mwadidi uphemberi wace. Yahova mbani? Thangwi yanji Mboni za Yahova nkhabe kucita maphwando a mafiriyadu? Kodi Mike abvungazikana na nsoka unango wa uphemberi?”—Becky, California, E.U.A.
“Mudatoma anyakuendekana anga kupfundza Bhibhlya na Mboni za Yahova, ine ndabvundzika: ‘Kodi dzina ineyi yakuti Mboni za Yahova, isabvekanji? Kwa ine ukhali uphemberi wacilendo.”—Zenon, Ontario, Kanada.
“Ine na nkazanga tikhanyerezera kuti Mboni za Yahova zabwera panyumba pathu toera kubandza mabvero athu akupasika mulando thangwi nee tikhaenda ku gereja. Taona kuti khala magereja mazinji nee ali napyo pinasaka ife, panango Mboni za Yahova nee ali napyombo.”—Kent, Washington, E.U.A.
“Mwandimomwene nee ndikhadziwa kuti iwo mbani na asakhulupiranji.”—Cecilie, Esbjerg, Dinamarka.
Panango imwe musaaonambo mbakamwaza mphangwa nyumba na nyumba peno mbuto zapakweca, kugawira mabukhu akubuluswa m’Bhibhlya na kucitisa mapfundziro a Bhibhlya akukhonda lipa. Panango mwatambira revista ino na m’bodzi wa izo. Ngakhale tenepo, panango musabvundzika kuti mwandimomwene Mboni za Yahova mbani. Manyerezero anu panango ndi akulandana na a anthu adalongwa padzulu apa.
Khala muli nayo mibvundzo ineyi, munagumana kupi matawiro? Munadziwa tani pinakhulupira Mboni za Yahova mwandimomwene, basa yawo yakumwaza mphangwa na mbuto zakulambira pisaphedzerwa tani, pontho thangwi yanji asabwera m’manyumba mwanu na kucedza na imwe m’mbuto zapakweca?
Cecilie adalongwa padzulu alonga: “Ndaleri kakamwe pya Mboni za Yahova mu Interneti. Ndabva mphekesera zakuipa na mphangwa zizinji za kupwazwa kwawo. Na thangwi ineyi, ndakhala na maonero akuphonyeka thangwi ya Mboni za Yahova.” Mbwenye patsogolo pace, acedza na Mboni za Yahova mbagumana matawiro akutsandzayisa ku mibvundzo yace.
Kodi musafuna kugumana matawiro andimomwene a mibvundzo yanu thangwi ya Mboni za Yahova? Tisakuwangisani toera kulonga na phata yakunyindirika—Mboni za Yahova, anabulusa revista ino. (Misangani 14:15) Tisadikhira kuti misolo inatowerera inadzakuphedzani toera kudziwa kuti ndife ani, pontho tisakhulupiranji na tisacitanji.