Mibvundzo Inacitwa na Anyakuleri

Pidalonga Sathani kuna Eva kuti angadya muti wakudziwisa pyadidi na pyakuipa nee mbadafa, kodi iye ampanga pya cipfundziso cinadziwika kakamwe lero ca umaso wakukhonda kufa?

Mwandimomwene nkhabe. Dyabo nee apanga Eva kuti angadya nsapo udakhondesa Mulungu, iye mbadafa, mbwenye khundu inango ya manungo ace mbidapitiriza kukhala maso ku mbuto inango (ninga pinalonga anthu azinji lero). Mbwenye mukuphatisira nyoka, Sathani apanga Eva kuti angadya nsapo wa muti unoyu, ‘mwandimomwene iye nee mbadafa.’ Na mafala anewa, Sathani akhalonga kuti Eva mbadapitiriza kukhala maso, pontho mbatsandzaya na umaso wadidi pa dziko yapantsi, mwakukhonda tsogolerwa na Mulungu.—Gen. 2:17; 3:3-5.

Khala cipfundziso ceneci ca umaso wakukhonda kufa cinadziwika lero nee catoma mu Edheni, mphapo catoma lini? Ife nkhabe kupidziwa mwadidi. Pinadziwa ife ndi pyakuti ulambiri onsene wauthambi wafudzwa pa Cigumula ca ntsiku za Nowa. Nakuti adapulumuka pa Cigumula ndi Nowa na banjace basi, pontho onsene akhalambira Yahova, nee pakhali na munthu unango akhafuna kupfundzisa pipfundziso pyauphemberi wauthambi.

Natenepa, pisaoneka kuti cipfundziso ca umaso wakukhonda kufa catoma pakumala kwa Cigumula. Pidasiyanisa Mulungu cilongero ku Bhabheli, anthu mbabalalika ‘pa dziko yonsene yapantsi,’ mwakukhonda penula, iwo akhakhulupira kale kuti anthu ali na umaso wakukhonda kufa. (Gen. 11:8, 9) Mbwenye mwakukhonda tsalakana ndzidzi udatoma cipfundziso ceneci, ife tiri na cinyindiro cakuti Sathani Dyabo wakuti ndi “baba wa uthambi,” ndiye anatsogolera cipfundziso cauthambi, pontho asakomerwa kakamwe angaona anthu mbacimwaza pa dziko yonsene.—Juw. 8:44.