Basa Yakutsanzayisa Kakamwe
1. Kodi ndi basa ipi yakuwangisa mwauzimu yakuti ikucitwa mu ntsiku zathu zino?
1 Kutsanzaya kukulu kwadzadza mitima ya ale adaona kuwangiswa kwa anthu mu pyaka dzana yakutoma. (Luka 5:24-26) Mu ntsiku zathu, tisatsanzaya m’basa yakuwangisa mwauzimu. (Apok. 22:1, 2, 17) Ndi kukomerwa tani kuleri pyakugumana napyo pinapangiza kuti Mafala a Yahova na nzimu wakucena usacinja umaso wa anthu! Mbwenye, kucita khundu m’basa ineyi mu kucitisa mapfunziro a Bhibhlya akuenda kutsogolo ndi kwakuphindulisa kakamwe.
2. Kodi ndi kutsanzaya kupi kunakhala na ife tingapfunzisa munthu undimomwene?
2 Kodi dzina ya Mulungu ndi ipi? Thangwi yanji iye asalekerera pinenso? Kodi Umambo wa Mulungu unadzacitanji kwa anthu? Tisakomerwa basi tayu mukutawira mibvunzo ineyi mbwenye mukuona nyakupfunza Bhibhlya mbakasekera thangwi ya kutsanzaya kunagumana iye pa kupfunza undimomwene. (Mis. 15:23; Luka 24:32) Nyakupfunza angaenda kutsogolo, iye panango anatoma kuphatisira dzina ya Yahova, mbacinja makhaliro na mabvaliro ace, mbalimira kucita pinthu pyakuphekesa na kutoma kupereka umboni kwa anango. Khala iye athambaruka toera kuperekeka na kubatizwa, iye anadzakhala m’bale wathu na nzathu wa basa. Mathanyo adidi anewa ndi mathangwi anacitisa kutsanzaya.—1 Ates. 2:19, 20.
3. Kodi ndi mathanyo api akuphata basa akuti tinakwanisa kuacita toera kutomesa pfunziro ya Bhibhlya?
3 Munakwanisa Tani Kucita Khundu? Khala musafuna kucita khundu m’basa ineyi yakutsanzayisa kakamwe, phembani Yahova kuti akupaseni mwai wakucitisa pfunziro ya Bhibhlya, na wangisirani mwakubverana na maphembero anu. (1 Jwau 5:14) Mwazani mphangwa ku mbuto na ndzidzi unagumanika anthu. Gawirani pfunziro ya Bhibhlya pa ndzidzi onsene wakuthema. (Koel. 11:6) Mungagumana munthu wakufuna, dzwalani mbeu ya undimomwene, citani ulendo wakubwerezera toera kuthirira cifuno.—1 Akor. 3:6-9.
4. Thangwi yanji tisafunika kugawira mapfunziro a Bhibhlya mwakucimbiza?
4 Aciripo anthu azinji akuti ali na njala pontho na nyota ya ulungami. Kodi mbani anafuna kuaphedza toera kukwanirisa pyakufuna pyawo pyauzimu mu kucita pfunziro ya Bhibhlya pabodzi na iwo? (Mat. 5:3, 6) Tendeni tiperekeke mwakufuna toera kuphedza mwakukwana basa ya kumwaza mphangwa na kucita anyakupfunza, kubvuna mbakudzati kumala.—Iza. 6:8.