Tsamba Yakubuluka Kwa Mathubo Akutonga
Anzathu A Mboni Za Yahova Akufunika:
Ndi midzidzi yakutsanzayisa tani! Na ndi kukomerwa tani kuli na ife! Mwandimomwene tiri akukomerwa kuphata basa pabodzi na imwe ‘phewa na phewa,’ abale na alongo athu akufunika—munapereka ife umboni ukulu kakamwe wa ndzidzi onsene kwa Babathu wakudzulu, Yahova.—Sof. 3:9, Tradução do Novo Mundo; Jwau 14:12.
Kukomerwa kwathu mu kutumikira Yahova nee kusabveka kuti ife nkhabe kuthimbana na pinentso. Nkati mwa caka ca basa cidamala, anango mwa imwe athabuka na nyatwa za piteketeke, kudzala kwa madzi, pyonzi, na pidengwa pinango pyacibaliro. (Mat. 24:7) Azinji ntsiku zonsene asathimbana na mautenda pabodzi na kukalamba. Ife tonsene tisafunika kuthimbana na kuthimizirika kwa “nyatwa.” (Mat. 24:8) M’madziko mazinji, ninga Armeniya, Eritreya na Koreya Wakubangwe, abale athu azinji ali n’kaidi thangwi ya cikhulupiro cawo.—Mat. 24:9.
Ndi ninji cinatiphedza toera kupitiriza kukhala na manyerezero adidi mwakukhonda kutsalakana pinentso pyenepi? Lemba ya caka ca 2010 yatikumbusa cinthu cibodzi cakufunika: ‘Kufuna kusapirira mu pinthu pyonsene. Kufuna kunamala tayu.’ (1 Akor. 13:7, 8) Inde, kufunana kwathu unango na nzace—ninga munafuna ife Yahova—kusatiwangisa toera kupirira na kupembera.
Anthu azinji analonga kuti ndi Akristu asadzumatirwa na basa yathu ya kumwaza mphangwa ndzidzi onsene. Ngakhale kuti iwo nkhabe kutawira pikhulupiro na pipfunziso pyathu, anango asadzuma kakamwe mbalonga kuti “Imwe mukucita basa ikhafunikira ife kucita!” Kodi ndi cinthu cipi cisacitisa Mboni za Yahova kupitiriza kumwaza mphangwa ntsiku na ntsiku? Ndi thangwi ya ufuni. Ninga Babathu wakudzulu, ife nee tisafuna kuti munthu m’bodzi afudzwe. (2 Ped. 3:9) Cifuno cathu cakuti anthu onsene afike pa kutcinyuka capangizika mukuthimizirika kwa amwazi mphangwa akukwana 7.508.050 nkati mwa caka ca basa cidamala. Kodi ndi gulu ipi inango yauphemberi iri na atumiki aphinga azinji anacita basa ya ufuni, akuperekeka toera kuphedza anango mwauzimu?
Tiri kutsanzaya mu kuona kukwanirisika kwa profesiya idalembwa na Izaiya: ‘Ntsiku zinafuna kudza, phiri idamangwa nyumba ya Mbuya inakula kupita mapiri onsene, mbikwizika padzulu pa andzache onsene. Anthu a madziko azinji anadzaithamangira.’ (Iza. 2:2-4) Pakati pa mwinji ukulu unafika pa nyumba ya Yahova alipo anthu akukwana 294.368 akuti abatizwa nkati mwa caka ca basa cidamala. Tiri kupereka bweraniko kwa anthu akufunika anewa ku gulu yathu. Ufuni wathu Wacikristu utikulumize toera kupitiriza kuaphedza kuthimbana na nyamalwa wathu Sathani Dyabo.—1 Ped. 5:8, 9.
Kuthimizirika kwa ndzidzi onsene kwa anthu adagumanika pa Cikumbuso akukwana 18.706.895, pa Cikumbuso cidacitwa n’Cipiri, ntsiku 30 ya nthanda ya Murope ya 2010, kusapangiza kuti aciripo anthu akukwana pikwi na pikwi toera kuphatana na ife mu kulambira kwathu Yahova. Ndi kutsanzaya tani kunakhala na ife kuti Yahova adzati kufudza makhaliro ano akuipa a pinthu! Mu ndzidzi uno, ufuni wathu usatiphedza toera kupitiriza kupirira.—2 Ates. 3:5.
Misonkhano ya Gawo yakuti “Continue Achegado A Jeová!” yacitwa mu dziko yonsene mu caka ca 2010, yawangisa uxamwali wathu na Babathu, Yahova. Ndi andimomwene tani mafala a nyamasalmo: “Yakutsandzaya ndi mbumba, Mulungu wache ndi Mbuya [Yahova]!” (Sal. 144:15) Mwakukhonda kutsalakana pinafuna kucitika ntsogolo, ife tisapibva kukhala na cinyindiro cakuti tiri na Yahova pa khundu yathu, nkhabe cinthu cibodzi cinafuna ife kugopa. (Sal. 23:4) Mwakukhonda dembuka, Yahova mukuphatisira Mwanace, ‘anadzafudza mabasa a Dyabo.’ (1 Jwau 3:8) Mwandimomwene, tiri kufunisisa kufika kwa ntsiku ineyi! Mbwenye mu ndzidzi uno tiri na basa yakuti nkhabe kutisiya na ndzidzi.—1 Akor. 15:58.
Khalani na cibaso cakuti “ntsiku zonsene” ife tisalonga thangwi ya imwe m’maphembero athu. (Arom. 1:9) “Khalani pyadidi mu kufuna kwa Mulungu, dikhirani ntsisi za Mbuya Yezu Kristu mpaka moyo wakukhaliratu.”—Yuda 21.
Tisakufunani imwe monsene!
Abale anu,
Mathubo Akutonga a Mboni za Yahova