Ife Nkhabe Kulimira Na Basa Yathu
1. Tisadziwa tani kuti amwazi mphangwa a pyaka dzana yakutoma cipo akhaona kuti akhafunika kulimira na basa yawo?
1 Amwazi mphangwa aphinga a pyaka dzana yakutoma amwaza mphangwa zadidi “nee kupuma” ku mbuto zonsene zikhagumanika anthu. (Mach. 5:42) Nee tinakwanisa kunyerezera kuti mukhaenda iwo nyumba na nyumba akhagumanika na anthu mbakhonda kuamwazira mphangwa. Iwo nee mbadasiya mwai wakupereka umboni mwantsusukano ngakhale pa kugula pinthu m’mbuto zamalonda pakumala utumiki wawo wa m’munda. Ninga Yezu, iwo cipo akhaona kuti akhafunika kulimira na basa yawo.—Mko. 6:31-34.
2. Pisaphatanizanji kukhala maso mwakubverana na dzina yathu?
2 Ndzidzi Onsene Tikhale Akukhunganyika: Dzina yathu yakuti Mboni za Yahova, nee basi ene isafokotoza pinacita ife; mbwenye isafokotozambo kuti ndife ani. (Iza. 43:10-12) Natenepa, ndzidzi onsene tiri dzololo toera kutsidzikiza cidikhiro cathu, ngakhale pa ndzidzi wakuti nee tikucita basa ya nyumba na nyumba. (1 Ped. 3:15) Kodi musanyerezera mwanyapantsi makhaliro akuti anakutawirisani kupereka umboni wantsusukano na kunyerezera kuti munalonganji? Kodi musakhala na mabukhu toera kugawira ale anapangiza cifuno? (Mis. 21:5) Kodi musamwaza mphangwa basi ene nyumba na nyumba, peno musamwazambo kwa anthu a mbuto zinango khala makhaliro asatawirisa?
3. Ndi fala ipi yakuthema kakamwe toera kulonga kumwaza mphangwa mu nseu, m’mbuto yakukoyera miotokala, m’maparki, m’mbuto za malonda na mbuto zinango?
3 Kupereka Umboni Wa ‘Pa Kweca:’ Mpostolo Paulu alonga kuti iye akhamwaza mphangwa ‘pa kweca’ pontho na nyumba na nyumba. (Mach. 20:20, Mphangwa Zadidi) Natenepa, kupereka umboni ‘pa kweca’ ndi fala yakuthema kakamwe toera kulonga kumwaza mphangwa mu nseu, m’mbuto yakukoyera miotokala, mu parki, m’mbuto za malonda na mbuto zinango. Ndimomwene kuti utumiki wa nyumba na nyumba usapitiriza kukhala njira yakutoma na yakuphindulisa toera kufikira anthu na mphangwa Umambo. Na thangwi ineyi, amwazi mphangwa a pyaka dzana yakutoma akhasaka anthu, tayu zinyumba. Iwo akhabandza miyai yonsene toera kulonga pya undimomwene—pa kweca, mwantsusukano, na nyumba na nyumba. Ife tisafunikambo kusaka anthu toera kukwanirisa utumiki wathu mwakukwana.—2 Tim. 4:5.