Bokosi Ya Mbvundzo

◼ Ninji pinafunika ife kudinga khala tisafuna kuti tingafa khundu ya mpfuma yathu peno mpfuma yathu yonsene iperekwe ku gulu ya Yahova?

Anthu angafa, nkhabe kwanisa kuyang’anira mpfuma zawo. (Koel. 9:5, 6) Natenepa, mbadzati kufa, anthu azinji asalemba tsamba yakutawirika na mwambo inalonga pifuno pya magawiro a mpfuma zawo. (2 Am. 20:1) Tsamba ineyi yakutawirika na mwambo, kazinji kene isapangiza kuti mbani anafunika kuimirira mpfuma. Khala tsamba ineyi nee yalembwa, m’madziko mazinji mautongi anadzatonga kuti mpfuma za nyakulowa zinagawirwa tani. Natenepa, khala tisafuna kuti khundu ya mpfuma yathu, peno mpfuma yathu yonsene ipaswe munthu peno iperekwe ku gulu ya Yahova, mphyadidi tilembe tsamba yakutawirika na mwambo inalonga pyenepi mbatisankhula mwadidi munthu anafunika kuimirira.

Muimiriri ali na basa ikulu kakamwe. Pisanyindira kunjipa kwa kobiri peno kwa mpfuma idasiya nyakulowa, toera kugumanyiza na kugawira mpfuma ineyi kunaphataniza pinthu pizinji, pontho kunakwanisa kubvunga ndzidzi uzinji. Mwakuthimizira, mautongi a dziko kazinji kene ali na pitsogolero pyakuti pisafunika kutowezerwa. Si anthu onsene m’mpingo anakwanisa kukhala aimiriri adidi. Munthu anasankhula ife asafunika kukhala munthu wakuti tisandziwa kuti anakwanisa, wakunyindirika, na wakufunisisa towezera pifuno pyathu.—Onani nsolo wakuti “Por que é bom e sensato preparar um testamento,” mu Despertai! ya 8 de Dezembro de 1998.

Mungaphembwa toera Kukhala Muimiriri: Mungaphembwa toera kuimirira cinthu consene ca munthu wakuti adzati kufa, cakutoma sakani kudziwa ntengo wace na citani phembero toera kuona khala munakwanisa kucita basa ineyi. (Luka 14:28-32) Munthu angalowa, musafunika kudziwisa onsene ale adalembwa toera kugawirwa mpfuma. Nakuti imwe muli na cidzo cakucita pyenepi, inadzakhala basa yanu kugawira mpfuma mwakubverana na mwambo, pontho mwakubverana na pidalonga nyakulowa. Mwakukhonda tsalakana kucepa peno kunjipa kwa mpfuma, muimiriri nee asafunika kupwaza pidalembwa pa tsamba. Pyonsene pinaperekwa mwakutawirika toera kuphatisirwa na Mboni za Yahova ndi mpfuma ya gulu ya Yahova.—Luka 16:10; 21:1-4.