Kuthimizira Maluso Athu Mu Utumiki—Kugawira Bukhu Bhibhlya Isapfundzisanji
Thangwi Yanji Mphyakufunika: Bukhu Bhibhlya Isapfundzisanji ndi feramentu yathu yakufunika kakamwe pakupfundzisa. Mbwenye, mbatidzati kuiphatisira toera kupfundza na munthu, pakutoma tisafunika kun’gawira. Na thangwi ineyi, tonsene tisafunika kuwangisira toera kukhala aluso pakugawira bukhu Bhibhlya Isapfundzisanji mu utumiki. (Mis. 22:29) Pana maonero mazinji, pontho amwazi mphangwa asafunika kuphatisira maonero akuphata basa kuna iwo.
Tinacita Tani Pyenepi:
• Citani mbvundzo wakulamusa cifuno unagumanika mu nsolo udasankhula imwe m’bukhu pakufuna kulonga na mwanaciro nyumba. Munakwanisa kusankhula ubodzi mwa mibvundzo inagumanika pa nsolo ubodzi na ubodzi. Mungamala kubva ntawiro wa mwanaciro nyumba, lerini lemba yakuthema na mpangizeni ndima inatawira mbvundzo unoyu, pontho pingakwanisika dingani naye mwacigwagwa.
• Maonero anango ndi kuphatisira matsamba akutoma toera kulamusa cifuno, buluka penepo pangizani mwanaciro nyumba nsolo unapereka ntawiro wa Bhibhlya. Mwacitsandzo, munakwanisa kulonga pya cidengwa cidalongwa cincino m’matsamba a mphangwa, pontho fokotozani kuti azinji asabvundzika kuti anagumana kupi matawiro a mibvundzo iri pa tsamba 3. Peno munakwanisa kulonga kuti mukucedza na anyakuendekana anu toera kuapangiza maonero adidi thangwi ya tsogolo. Buluka penepo mpangizeni pithundzithundzi pa tsamba 4-5 mbamumbvundza, “Ndi ipi mwa mapikiro awa yakuti mbamudakomerwa kuona kukwaniriswa kwayo?” Maonero anango ndi kulonga kuti muli kucedza mwacigwagwa na anthu toera kuaphedza kugumana matawiro a mibvundzo yakufunika mu umaso. Buluka penepo, pangizani mwanaciro nyumba mibvundzo inagumanika pa tsamba 6, pontho mbvundzeni kuti ndi upi udakomerwa na iye.
• Phatisirani maonero akukhonda nentsa toera kutomesa pfundziro ya Bhibhlya. Munakwanisa kulonga: “Tikupangiza anyakuendekana athu bukhu iyi inaphedza toera kupfundza Bhibhlya. Mwatoma kale kuiona? [Dikhirani ntawiro.] Khala muli na ndzidzi pang’ono, mbandidakomerwa kukupangizani kuti munaiphatisira tani na Bhibhlya yanu.”
Yeserani Kucita Ipi Nkati Mwa Nthanda:
• Yeserani maonero adalongwa, pa kulambira kwanu kwa pabanja.
• Mu utumiki, cedzani na amwazi mphangwa anango pidakhunganyika imwe toera kulonga. (Mis. 27:17) Cinjani maperekero anu a umboni khala nee anaphedza.