Krataa Bɔ Ofi Akwangyerɛ Kue Ne Berɛ

Aliemaamɔ:

Yele ɔdɔ yɛma Nyameɛ ne mmenia. Yeti, Yesu dwirɛ bɔ ɔkã kyɛ, “ɛmɔhɔ . . . bɛɛyɛ maen maen mukoraa m’asũafoɛ, ná ɛ́mɔbɔ bɛ asu” ne, yɛfa yɛyɛ adwuma. (Mat. 28:​19, 20; Mak. 12:​28-31) Sɛ yefi y’ahõne nu yɛdɔ mmenia paa a, yɛkɔboka bɛbɔ ‘bɛpena kyɛ benya daa ngõa’ ne.—Aso. 13:48.

Mmerɛ bie bɔ wapɛ nu ne, bɔ né ohia yɛ alaa yeɛ ole kyɛ yekoli mmenia adanzeɛ, na yama bɛ nwomaa. Nakoso kesaalae de, yɛpena kyɛ yesũa kyɛbɔ yɛne mmenia kɔbɔ ngɔmmɔ kora né yali bɛ adanzeɛ. Yɛpena kyɛ mmenia nwu kyɛ yɛdɔ bɛ, yeti bɔ bɛnye gye yenwo ne, ɛhẽne yeɛ yɛne bɛ kɔbɔ yenwo ngɔmmɔ ɔ. Sɛ yekonwu bɔ sona ne nye gye yenwo a, sana yɛfa yɛnye yɛto ase. Yede, sɛɛ yeɛ nwomaa he kɔboka yɛ maa yɛkɔyɛ sɔ ɔ?

Adesũa buru ne nyɔ (12) yeɛ ɔwɔ nwomaa he anu ɔ. Enu biala kɔmaa yekonwu subaen bɔ sɛ yenya ye a, ɔkɔmaa yekonya ɔdɔ yɛkɔma mmenia, na yaboka bɛ maa baayɛ Yesu asũafoɛ ɔ. Adesũa ne bie kɔmaa yekonwu subaen pɔtẽe bie bɔ Yesu lale yali mmerɛ bɔ né ɔyɛ asɛnga adwuma ne. Na enu bie koso kɔmaa yekonwu subaen pɔtẽe bie bɔ tete Kristofoɛ nemɔ nu bie lale yali ɔ. Kesaalae de, yenguro kyɛ yɛtwẽ edwirɛ bie yegua yɛ tianu mbaen, na yɛfa yɛkɔ asɛnga. Na mmom, yɛpena kyɛ mmenia nwu kyɛ yɛ dwene bɛnwo. Subaen ahoroɛ pẽe yeɛ ɔboka yɛ mmerɛ bɔ yɛyɛ asɛnga adwuma ne. Nakoso enu biemɔ bɔ ɔkɔboka yɛ maa yɛne mmenia kɔhyɛ yebo kɔbɔ ngɔmmɔ, yɛkɔyɛ sakɔnea, ɔne Bible adesũa ne, ɛhẽne yeɛ nwomaa he kã yenwo dwirɛ ɔ.

Adesũa biala bɔ ekodwu so ne, ɛyɛ a to wɔ boase susu yenwo. Afei nea kyɛbɔ ɛkɔla sɔ subaen ne ali mmerɛ bɔ ɛne ebie bɔ ngɔmmɔ wɔ nekaa bɔ ɛte ne. Ɔdɔ bɔ ele ma Yehowa ne mmenia ne, bɔ mmɔden kyɛ ɛkɔmaa enu kɔyɛ se. Ofikyɛ sɛ ele ɔdɔ ma mmenia a, ɛkɔyere wɔnwo kɔboka bɛ maa bɛkɔɔyɛ Yesu asũafoɛ.

Ɔyɛ yɛ fɛ paa kyɛ yɛne wɔ bonu yɛ asɛnga adwuma ne ɔ. (Sef. 3:9) Yehowa yira ɛmɔ paa kyɛ ɛmɔyere bɛnwo bɛdɔ mmenia, na ɛmɔ boka bɛ maa bɛ bayɛ Yesu asũafoɛ ɔ!