Sɛ W’adwene Nu Yɛ Wɔ Naa A, Nzu Yeɛ Odikyɛ Ɛyɛ Ɔ?

1-2. (a) Edwirɛ benimɔ yeɛ ebia bɛbɔ bɛsõ Yehowa ne kobisa bɛnwo ɔ? (b) Nzu yeɛ yekosusu yenwo wɔ adesua he anu ɔ?

ƆMVA yenwo kyɛ yɛte akwalaa anaa panyi ne, sɛ odwu mmerɛ bie a, y’adwene nu kora yɛ yɛ naa.a Ebie yeɛ ole kyɛ, ebia Yehowa Danzeniɛ abrandeɛ anaa taluwa bie konya adwene kyɛ Yehowa ndwene yenwo. Sɛ ɔba sɔ a, ɔkɔhora kɔyɛ se kɔma ye kyɛ ɔkɔbɔ asu ɔ. Anaa wɔde susu sɔ aliemaa he anwo nea. Mmerɛ bɔ né ɔte abrandeɛ ne, ɔfale Yehowa lilimoa wɔ ye asetena nu tra kyɛ ɔkɔpena anwonyadeɛ pee wɔ ewiase he anu ɔ. Nakoso mmerɛ bɔ ɔyɛle panyi ne, esikaa kaa bie yeɛ né ole ye bɔ ɔfa nea ye abusua ɔ. Ɔba sɔ a, ebia okobisa yenwo kyɛ yeti nzili gyinayɛɛ pá ne? Anaa susu aliemaa brasua bie bɔ wayɛ panyi, ná olle anwoserɛ pee nanwo nea. Ebia ye abanu kobu, ofikyɛ okonya adwene kyɛ ɔngora nyɛ pee tekyɛ dáa ne. Abisa wɔnwo le kyɛ: ‘Mmɔden bɔ mebɔ ye, aso Yehowa anwu ye ɛɛn? Mvasoɛ wɔ so kyɛ mafa nningyein mabɔ afɔleɛ mama Yehowa anaa? Aso me nwo té hia Yehowa?

² Sɛ yele edwirɛ biemɔ bɔ ɔte sɔ, na yambena yenwo mmuayɛɛ a, ɔkɔhora kɔmaa yɛ gyidie kɔyɛ mmerɛ na yayakyi Yehowa soen po. Adesua he anu ne, yɛkɔnea kyɛbɔ Bible nu dwirɛ kɔhora kɔboka yɛ, mmerɛ bɔ y’adwene yɛ yɛ kyɛ: (1) Yehowa ndwene yɛnwo, (2) yanzi gyinayɛɛ pá mmerɛ bie bɔ wapɛ nu, anaa (3) yɛnwo nhia Yehowa ne.

SƐ W’ADWENE NU YƐ WƆ NAA A, NZU YEƐ ƆKƆBOKA WƆ Ɔ?

3. Sɛ y’adwene nu yɛ yɛ naa a, nzu yeɛ ɔkɔhora kɔboka yɛ ɔ?

³ Sɛ y’adwene nu yɛ yɛ naa wɔ edwirɛ biemɔ nwo a, Bible ne bɔ yɛkɔkenga ne kɔboka yɛ maa yekonya yenwo mmuayɛɛ. Sɛ yɛyɛ sɔ a, Yehowa nu gyidie bɔ yele ye ne, nu kɔyɛ se, na yɛne ye afia koso kɔyɛ kama. Ɛhene kɔmaa ‘yekogyina pindinn wɔ gyidie nanu.’—1 Kor. 16:13.

4. Yɛkɔyɛ sɛɛ né ‘yaso nningyein mukoraa yanea’? (1 Tɛsalonikafoɛ 5:21)

⁴ Kenga 1 Tɛsalonikafoɛ 5:21. Kae kyɛ Bible ne tu yɛ foɛ kyɛ ‘yɛso nningyein amukoraa yɛnea.’ Sɛɛ yeɛ yɛkɔyɛ ɛhe ɔ? Sɛ yɛ tianu ndengyɛ yɛ wɔ edwirɛ bie nwo a, odikyɛ yɛnea bɔ Bible ne kã fa yenwo ɔ. Wɔde ma yɛnea abrandeɛ anaa taluwa bɔ ye adwene yɛ ye kyɛ Nyameɛ ndwene yenwo ne. Aso odikyɛ obu yenye gua sɔ adwene bɔ wanya naso anaa? Daabi, na mmom ɔsɛ kyɛ ‘oso nningyein amukoraa nea,’ na wamaa wanya Yehowa adwene wɔ edwirɛ nanwo.

5. Yɛkɔyɛ sɛɛ né yanwu Yehowa adwene wɔ edwirɛ biemɔ nwo?

⁵ Sɛ yɛkenga Bible ne a, ɔte kyɛbɔ Yehowa dwudwo kyire yɛ ne. Nakoso, sɛ yekonya Yehowa adwene wɔ edwirɛ bie anwo a, odikyɛ yɛyɛ bɔ ɔtra sɔ ɔ. Edwirɛ pɔtee bɔ yɛpena yenwo mmuayɛɛ ne, ɛhene yeɛ odikyɛ yɛfa y’adwene yesie so paa mmerɛ bɔ yɛkenga Bible ne. Yɛkɔhora yɛkɔfa asafo nwomaa ahoroɛ yɛkɔyɛ edwirɛ nanwo nhwehwɛmuɛ yɛkɔhɔ siɛ. (Any. 2:​3-6) Edwirɛ bɔ yɛpena yenwo mmuayɛɛ ne, yɛkɔhora yɛkɔsrɛ Yehowa kyɛ ɔboka yɛ ma yenwu ye adwene wɔ yenwo. Yɛkɔhora koso yɛkɔpena Bible nu dwirɛ bie, anaa edwirɛ foforɛ bie bɔ ɔfa yɛ haw nanwo bɔ ɔkɔboka yɛ ɔ. Afei koso, mmenia bɔ Bible ne kã kyɛ bɛhɔle sɔ haw nanu bie ne, sɛ yɛkenga bɛnwo dwirɛ a, ɔkɔhora kɔhyɛ yɛ ngunaen.

6. Sɛ yɛkɔ adesua a, sɛɛ yeɛ ɔboka yɛ ɔ?

⁶ Sɛ yɛkɔ adesua a, Yehowa nate nningyein ahoroɛ bɔ yesua naso dwudwo kyire yɛ. Yeti sɛ yɛkɔ adesua daa a, dwudwolɛ ahoroɛ bɔ yetie ɔne mmuayɛɛ bɔ aliemaa bie kɔma ne, ɔkora boka yɛ maa yenya edwirɛ biemɔ bɔ ɔkye y’adwene nanwo mmuayɛɛ. (Any. 27:17) Yede, ɛmɔma yɛnea edwirɛ biemɔ bɔ ɔkora maa y’adwene nu yɛ yɛ naa, ɔne bɔ yɛkɔyɛ wɔ yenwo ɔ.

MMERƐ BƆ W’ADWENE YƐ WƆ KYƐ YEHOWA NDWENE WƆNWO NE

7. Edwirɛ beni yeɛ ebia ebiemɔ kobisa bɛnwo ɔ?

⁷ Abisa wɔnwo le kyɛ: ‘Mmɔden bɔ mebɔ ye, aso Yehowa anwu ye ɛɛn? Sɛ yebu yɛnwo kyɛ mvasoɛ biala nne yɛ so a, ɔkɔmaa yekonya adwene kyɛ bɔ ɔbɔle nningyein mukoraa ne, yɛne ngɔhora ngɔfa adamvoa lle. Sɔ dwirɛ he bie tole Ɔhene Dawide. Né ɔyɛ ye nwanwa kyɛ Yehowa dwene kuro mmenia bɔ yɛnzɛ hwee nanwo ɔ. Yeti obisale kyɛ: “Ao AWURADE, dasaniɛ te nzu koraa bɔ wɔ nye ku ye nwo ye, yeɛ kuro sona te nzu bɔ ɛdwene ye nwo ye?” (Edw. 144:3) Yede, nisua yeɛ ɛkɔhora konya edwirɛ he anwo mmuayɛɛ ɔ?

8. Kyɛbɔ 1 Samuel 16:​6, 7, 10-12 kã ne, nzu yeɛ Yehowa nea ye wɔ sona nwo ɔ?

⁸ Bible ne maa yenwu kyɛ bɛbɔ mmenia mva bɛ nyɛ hwee ne, Yehowa de bɛnwo hia ye. Ebie yeɛ ole kyɛ, Yehowa somane Samuel kyɛ ɔhɔ Yese awuro, ná ɔɔpopa ye mmaa nemɔ anu ko bɔ ɔkɔyɛ Yisrael hene kyẽabie ɔ. Yese frɛle ye mma mmrienzua mmɔtwɛ nanu nzoo maa beeyiale Samuel. Dawide bɔ né ɔte kãa ne de, wamvrɛ ye bie.b Nakoso ye mmom yeɛ né Yehowa aye ye ɔ. (Kenga 1 Samuel 16:​6, 7, 10-12.) Né Yehowa se ye paa kyɛ Dawide te abrandeɛ bɔ okuro ye dwirɛ ɔ.

9. Nzuati yeɛ ɛkɔhora konya gyidie kyɛ wɔnwo hia Yehowa ɔ? (Nea foto ne koso.)

⁹ Bɔ Yehowa ayɛ afahyire kyɛ wɔnwo hia ye ne, wɔde dwene yenwo nea. Ɔma wɔ afutue bɔ ɛkɔhora kɔfa kɔbɔ wɔ bra ɔ. (Edw. 32:8) Ɛhe te adanzeɛ bɔ okyire kyɛ ɔse bɔ ehia ɔ. (Edw. 139:1) Sɛ ɛfa afutue bɔ ɔfa ma wɔ ne yɛ adwuma, na enwu kyɛbɔ waboka wɔ a, ɔmaa enwu ye paa kyɛ ɔdwene wɔnwo. (1 Abe. 28:9; Aso. 17:​26, 27) Mmɔden bɔ ɛbɔ kyɛ ɛkɔyɛ bɔ Yehowa kuro ne, onwu ye mukoraati. Osa nwu subaen pá bɔ ɔwɔ wɔnwo ne, na ɔpena kyɛ ɔyɛ wɔ damvo. (Yer. 17:10) Yenwo atee bɔ ɔte sɔ ne, sɛ edé to nu a, ɔkɔmaa yenye kɔgye paa.—1 Yoh. 4:19.

MMERƐ BƆ W’ADWENE YƐ WƆ KYƐ ANZI GYINAYƐƐ PÁ MMERƐ BIE BƆ WAPƐ NU NE

10. Sɛ yesusu gyinayɛɛ biemɔ bɔ yesili nanwo a, ebia edwirɛ benimɔ yeɛ yekobisa yɛnwo ɔ?

¹⁰ Ɔwɔ nu alaa a, ebiemɔ kora susu gyinayɛɛ bie bɔ besili nanwo bɛnea kyɛ aso ɔte pa kyɛ besili sɔ gyinayɛɛ ne anaa. Ebia bɛfale nningyein biemɔ bɔ ahaa ɔkɔmaa bekonya bɛnwo ne bɛbɔle afɔleɛ, na wamaa banya mmerɛ pee basõ Yehowa. Yɛkã ye, ebia bɛyɛle sɔ ne, wahyɛ paa. Nakoso ɛnnɛ sɛ bɛnea bɛ mmangomɔ bɔ bɛne bɛ sili so ne a, benwu ye kyɛ banya bɛnwo. Ɛhene ati ebia bekobisa bɛnwo kyɛ: ‘Aso ɔte pá kyɛ mvale nningyein mmɔle afɔleɛ mmane Yehowa ɔ? Anaa ahaa odikyɛ mefa me mmerɛ pee meyɛ adwuma me pena esikaa hɔ ɔ?’

11. Sona bɔ ɔhworɔle Edwein 73 ne, nzuati yeɛ né ye aba nu abu ɔ?

¹¹ Sɛ anya sɔ adwene ne bie a, yede sona bɔ ɔhworɔle Edwein 73 ne, nea bɔ yekoso ɔhɔle nu ɔ. Onwuni kyɛ bɛbɔ bɛnzo Yehowa ne, bele anwoserɛ, banya bɛnwo, na ɔhaw biala ndo bɛ. (Edw. 73:​3-5, 12) Mmerɛ bɔ onwuni ye sɔ ne, onyane adwene kyɛ ye anwoserɛ bɔ ɔfa sõ Yehowa ne, wafɛ wagua mbaen. Ɛhene maa ɔhane kyɛ: “Daa biala, ɛhawo angome yeɛ ɔba me so ɔ.” (Edw. 73:​13, 14) Yede, nzu yeɛ ɔbokale ye maa ɔhora gyinane yenoa ɔ?

12. Kyɛbɔ Edwein 73:​16-18 kã ne, nzu yeɛ ɔhyɛle edweintolɛniɛ ne ngunaen ɔ?

¹² Kenga Edwein 73:​16-18. Edweintolɛniɛ ne hɔle Yehowa asɔre awuro berɛ, na ɛhene maa ɔhora susuli nningyein nwo yé paa. Onwuni kyɛ sɔ mmenia bɔ bɛgye bɛnye wɔ b’asetena nu ne, sãa belle anyelasoɛ biala, na begyi nekaa bɔ ɛberɛ yɛ ndono ɔ. Ɛhene maa onyane asomdwee, na onwuni kyɛ mvasoɛ wɔ so paa kyɛ ɔ́fa ye mmerɛ sõ Yehowa ɔ. Osa bokale ye maa osili ye hue kyɛ ɔkɔhɔso kɔsõ Yehowa.—Edw. 73:​23-28.

13. Sɛ afa nningyein biemɔ abɔ afɔleɛ ama Yehowa a, nzu yeɛ ɔkɔboka wɔ na w’aba nu ammu ɔ? (Nea foto ne koso.)

¹³ Kyɛbɔ edweintolɛniɛ ne yɛle ne, wɔ koso ɛkɔhora kɔye w’adwene kofi nningyien bɔ ɔkɔhora kobu w’aba nu naso. Ɛkɔyɛ ye sɛ? Susu nhyiraa bɔ ɔnate Yehowa bɔ ɛsõ ye nati anya ye nanwo. Afei fa ɛhene toto bɔ ɔkɔto bɛbɔ bɛnzo Yehowa bɔ bɛgye bɛnye wɔ ewiase he anu nanwo. Sɔ mmenia nemɔ de, bɔ ohia bɛ ala yeɛ ole b’adwuma ɔne anwonyadeɛ bɔ bekonya ye ɔ, ofikyɛ belle anyelasoɛ biala. Nakoso, wɔde kesaalae po, Yehowa ayira wɔ, na bɔ ɔkɔfa kɔma wɔ kyẽabie ne koso ɔtra nikyee biala. (Edw. 145:16) Sa susu ɛhe anwo nea: Sɛ amva nningyein ammɔ afɔleɛ anzo Yehowa a, ahaa ɛnnɛ w’abrabɔ te sɛɛ? Nahorɛ nu, ebiala nne berɛ bɔ ɔnate ɔdɔ bɔ ole ma Nyameɛ ne ye mmango sona nati, wafa nningyein wabɔ afɔleɛ bɔ yesa kosi ase llé ɔ.

MMERƐ BƆ W’ADWENE YƐ WƆ KYƐ WƆNWO NHIA YEHOWA NE

14. Ɔhaw beni yeɛ aliemaa biemɔ wɔ nu ɔ, na nzu yeɛ ebia bekobisa bɛnwo ɔ?

¹⁴ Bɛbɔ bɛsõ Yehowa ne, benu biemɔ ayɛ mbanyi, anwonyerɛ ha bɛ, anaa bali nnɛen. Ɛhene ati bɛngora bɛnyɛ pee wɔ asafo nanu. Yesɔ nati, bɛkɔhora bekonya adwene kyɛ bɛnwo nhia Yehowa. Ebia bekobisa bɛnwo kyɛ, ‘Aso menwo té hia Yehowa?’

15. Bɔ ɔhworɔle Edwein 71 ne, nzu yeɛ ne odé di ɔ?

¹⁵ Bɔ ɔhworɔle Edwein 71 ne koso, né ole sɔ haw ne bie. Yeti ɔbɔle mbaeɛ kyɛ: “Sɛ menyi meyɛ mmerɛ a, nnɛpo me.” (Edw. 71:​9, 18) Ɔmva yenwo kyɛ né edweintolɛniɛ ne le sɔ adwene ne, né odé di kyɛ sɛ ɔkɔso di nahorɛ ma Yehowa a, ye koso ɔngɔyakyi ye. Edweintolɛniɛ ne oonwuni kyɛ bɛbɔ bɛyere bɛnwo bɛsõ Yehowa ɔmva yenwo ne ɔhaw biala bɔ bɛwɔ nu ne, onni bɛnwo angorɛ koraa.—Edw. 37:​23-25.

16. Bɛbɔ bayɛ mbanyi ne, nzu yeɛ ɔma yenwu kyɛ bɛnwo hia Yehowa ɔ? (Edwein 92:​12-15)

¹⁶ Sɛ ɔnate kyɛ ayɛ panyi nati ayɛ mmerɛ a, nwu ye kyɛ Yehowa dwene wɔnwo paa. Yeti ɔkɔboka wɔ maa ɛkɔhɔso kɔsõ ye nahorɛ nu. (Kenga Edwein 92:​12-15.) Kyɛ ahaa ɛkɔdwenedwene nningyein bɔ ɛngora nyɛ nanwo ne, fa w’adwene sie bɔ ɛkora yɛ ye kesaalae naso. Ebie yeɛ ole kyɛ, ma mmenia nwu ye kyɛ ɛdwene bɛnwo, na fa nahorɛ bɔ edi ma Yehowa naso hyɛ bɛ ngunaen. Afei koso, bɔ Yehowa ayɛ ama wɔ afoɛ pee bɔ wapɛ nu, ɔne ye bɔhyɛ bie bɔ ɛnea atee kyɛ ɔkɔwa nu ne, ɛkɔhora kɔhã yenwo dwirɛ kohyire bɛ. Asa koso, kae kyɛ sɛ efi w’ahone nu bɔ mbaeɛ ma mmenia a, ɔyɛ adwuma paa. (1 Pet. 3:12) Yeti, ɔmva yenwo ne bɔ yɛfa nu biala ne, yɛkɔhora yɛkɔyɛ nikyeebie yɛkɔma Yehowa ne mmenia.

17. Nzuati yeɛ ɔnzɛkyɛ yɛfa yɛnwo yɛtoto ebiemɔ nwo ɔ?

¹⁷ Sɛ w’aba nu abu ɔnate kyɛ ɛngora nyɛ pee mma Yehowa a, nya gyidie kyɛ bɔ ɛkora yɛ ma ye biala ne, yenye sɔ paa. Sɛ odwu mmerɛ bie a, annea a ɛkɔfa bɔ ɛkora yɛ ne kɔtoto ebiemɔ deɛ nwo. Nakoso, ɔnzɛkyɛ ɛyɛ sɔ! Nzuati ɔ? Ofikyɛ Yehowa mva wɔ ndoto ebie nwo. (Gal. 6:4) Bɔ ɔmaa yenwu ye sɔ yeɛ ole kyɛ, Maria fale sakyeɛfona bɔ ye nyɔboɛ yɛ se paa popale Yesu gya bo. (Yoh. 12:​3-5) Nakoso braa kunaniɛ ehianiɛ ne de, mmerɛ bɔ ɔhɔle asɔre wuro berɛ ne, esikaa kaamba bie yeɛ ɔhora fa yele ndoboa ɔ. (Luka 21:​1-4) Yesu kamvole benu biala kyɛ ole gyidie. Yesu Baba Yehowa koso, nikyeebiala bɔ ɛkɔyɛ kɔma ye ne, sɛ ebu kyɛ ɔte kãa po a, yede ɔsombo ma ye paa. Ofikyɛ ɔdɔ ne gyidie bɔ ele ma ye nati, yeɛ ɔmaa ɛyɛle sɔ ɔ.

18. Sɛ y’adwene nu yɛ yɛ naa a, nzu yeɛ ɔkɔboka yɛ maa yekoli so ɔ? (Kenga edwirɛ bɔ ɔwɔ alaka nanu bɔ yenwa: “Sɛ W’adwene Nu Yɛ Wɔ Naa A, Bible Ne Kɔboka Wɔ Maa Ekoli So.”)

¹⁸ Sɛ odwu mmerɛ bie a, yenu biala adwene nu kora yɛ ye naa. Nakoso kyɛbɔ yanwu ye ne, Nyameɛ Dwirɛ ne kɔhora kɔboka yɛ maa yekoli so. Yeti sɛ edwirɛ bie kye w’adwene a, bɔ mmɔden pena yenwo mmuayɛɛ, na ɛhene kɔmaa w’ahone kɔtɔ wɔ kunu. Yehowa se wɔ paa, na nningyein bɔ afa abɔ afɔleɛ ama ye ne mukoraati ne, yenye sɔ. Yeti bɔ ɔte biala, okotua wɔ kerɛ. Nya gyidie kyɛ bɛbɔ bɛsõ Yehowa nahorɛ nu ne mukoraati ne, okuro benu biala dwirɛ paa.