“Ɛ́mɔhyire Bɔ Ɛmɔkɔso Ye Ɔ”

1. Sɛ yɛnye kɔgye paa a, nzu yeɛ odikyɛ yɛyɛ ɔ, na nzuati ɔ? (Yesaya 48:​17, 18)

YƐ BABA bɔ ɔwɔ anwuro ne kuro yɛ dwirɛ paa, na ɔpena kyɛ yɛnye gye ɛnnɛ ne kyẽabie. (Nwo. 3:​12, 13) Kyɛbɔ ɔbɔle yɛ nati, yɛnu biala le adom akyɛdeɛ, yeti yɛkora yɛyɛ nningyein pee maa ɔyɛ nwanwa. Nakoso wammɔ yɛ kyɛ yɛbɔbɔ yeli yɛnwo so, anaa yehyire yɛnwo atee wɔ y’asetena nu. (Nwo. 8:9; Yer. 10:23) Yehowa se kyɛ sɛ yɛnye kɔgye paa a, sana yɛsõ ye, na yedi ye akwangyerɛ so.—Kenga Yesaya 48:​17, 18.

2. Adwene beni yeɛ Satan pena kyɛ yenya ye ɔ, na nzu yeɛ Yehowa ayɛ afa ɛhe anwo ɔ?

² Satan pena kyɛ yenya adwene kyɛ yenhia Yehowa wɔ y’asetena nu, na mmom sɛ yɛbɔbɔ yedi yɛnwo so a, okosi yɛ yé. (Gye. 3:​4, 5) Bɔ Yehowa ayɛ ye wɔ edwirɛ he anwo yeɛ ole kyɛ, wama atee kyɛ mmenia bɔbɔ beli bɛnwo so oodwu mmerɛ bie. Yɛmu yɛnye ta bɔ wafi ɛhe anu wawa ɔ; sona awaen ali yɛ hwamɔ. Nakoso, Bible ne kã mmrienzua ne mmrasua biemɔ bɔ bɛsone Yehowa maa osili bɛ yé nanwo dwirɛ. Benu kõ yeɛ ole Yesu Kristo. Ɛmɔma yelimoa yɛnea bɔ ɔmaa osili gyinayɛɛ kyɛ ɔkɔsõ Yehowa ɔ. Afei yɛkɔnea bɔ yeti yeɛ odikyɛ yɛsõ Yehowa bɔ ɔte yɛ Baba ne. Ye korakora ne, yɛkɔnea nningyein biemɔ bɔ wamaa yasi gyinayɛɛ kyɛ yɛkɔsõ Yehowa ɔ.

BƆ ƆMAA YESU SILI GYINAYƐƐ KYƐ ƆKƆSÕ YEHOWA Ɔ

3. Nzu yeɛ Satan hane kyɛ ɔkɔfa kɔma Yesu ɔ, nakoso nzu yeɛ Yesu yɛle ɔ?

³ Mmerɛ bɔ né Yesu wɔ aseɛ he aso ne, né odikyɛ okyire bɔ ɔkɔsõ ye ɔ. Ɔbɔle asu ne, wangyɛ biala Satan hahyirele ye kyɛ, sɛ ɔbɔ yenu ase sõ ye kaamba bie po a, ɔkɔfa ewiase ahennie mukoraati kɔma ye. Yesu buale ye kyɛ, “Dwɔso berɛ kɔ dɔ, Satan! Ofikyɛ bahyerɛ kyɛ, ‘sɔne Awurade wɔ Nyameɛ, na ye ngome twe yeɛ so ye ɔ.’” (Mat. 4:​8-10) Bɔ ɔmaa Yesu sili sɔ gyinayɛɛ ne, ɛmɔma yesusu nu biemɔ nwo.

4-5. Bɔ yeti yeɛ Yesu sili gyinayɛɛ kyɛ ɔkɔsõ Yehowa ne, ebie yeɛ ole beni?

⁴ Né Yesu kuro ye Baba dwirɛ paa, na ɛhene titire paa ti yeɛ ɔmaa osili gyinayɛɛ kyɛ ɔkɔsõ ye ɔ, ofikyɛ né ɔmbena kyɛ nikyefee tete b’afia. (Yoh. 14:31) Afei né ɔse kyɛ Yehowa yeɛ ɔfata kyɛ yɛsõ ye ɔ. (Yoh. 8:​28, 29; Nye. 4:11) Né osa se kyɛ Yehowa yeɛ ngoa fi ye ɔ, odi nahorɛ, na ofia ye kunu boka mmenia. (Edw. 33:4; 36:9; Yak. 1:17) Né Yehowa kã nahorɛ kyire Yesu mmerɛ biala, na bɔ ole ye biala ne, Yehowa yeɛ ɔfa mane ye ɔ. (Yoh. 1:14) Satan de ɔtte sɔ, na mmom ɔte ngondomboniɛ, yenye boro nikye, na osa te pɛsɛmangomenya. (Yoh. 8:44) Né Yesu se ɛhe amukoraati, yeti wamma yetianu lle kyɛ odwɔso tia Yehowa kyɛbɔ Satan yɛle ne.—Flp. 2:​5-8.

⁵ Nikyee foforɛ koso yeɛ ole kyɛ, né Yesu se kyɛ sɛ osi gyinayɛɛ kyɛ ɔkɔsõ Yehowa a, nningyein pá pee kofi nu kɔwa. (Heb. 12:2) Ebie yeɛ ole kyɛ, sɛ né odi nahorɛ a, ɔkɔte ye Baba dumaa nanwo, na wasa waye ɔhaw bɔ Abɔnzam afa awa ne mukoraati wafi berɛ.

BƆ YETI YEƐ ODIKYƐ YƐSÕ YEHOWA Ɔ

6-7. Nzuati yeɛ mmeni pee nzo Yehowa ɛnnɛ ɔ, na nzuati yeɛ odikyɛ yɛsõ ye ɔ?

⁶ Mmeni pee nzo Yehowa, ofikyɛ ye subaen bɔ ɔyɛ nyemene ne, benya benwunni ye. Afei nningyein bɔ wayɛ wama bɛ ne koso, bɛnze yenwo hwee. Mmenia bɔ somafoɛ Pɔɔlo hane nzɛmba ne hyirele bɛ wɔ Atense ne sɔa, sɔ yeɛ né bɛte ɔ.—Aso. 17:​19, 20, 30, 34.

⁷ Pɔɔlo hahyirele Atensefoɛ nemɔ kyɛ nahorɛ Nyameɛ ne “yeɛ ɔma sona biala ngoa ne nwomeɛ ne nikyee biala ɔ.” Osa hane kyɛ: “Ye nu yeɛ yɛte ase, yɛkɔ yɛba, ná yɛnya ngoa ɔ.” Nyameɛ yeɛ ɔbɔle nikyeebiala ɔ. Yeti ye yeɛ “ɔbɔle mmenia bɔ bɛwɔ maen amukoraa nu fili sona komapɛ nu ɔ.” Ɛhene ati odikyɛ yɛsõ ye.—Aso. 17:​25, 26, 28.

8. Nzu yeɛ Yehowa ngɔyɛ ye lle ɔ? Kyirekyire nu.

⁸ Yehowa yeɛ ɔbɔle nningyein mukoraati ɔ, yeti ole nikyeebiala so tumi. Ɛhene ati, ahaa ɔkɔhora kɔhyɛ mmenia maa bɛkɔsõ ye. Nakoso ɔngɔyɛ sɔ lle. Na mmom bɔ wayɛ yeɛ ole kyɛ, wama yɛ adanzeɛ bɔ okyire kyɛ ɔwɔ berɛ, na okuro yɛnu biala dwirɛ. Ɔpena kyɛ mmeni pee fa ye adamvoa. (1 Tim. 2:​3, 4) Ɛhene ati wafa ndeteyɛɛ wama yɛ, na wamaa yahora yahyirehyire mmenia maa banwu nningyein pá bɔ ɔbaayɛ ne. (Mat. 10:​11-13; 28:​19, 20) Yehowa ama yɛ asafo ahoroɛ ne mbanyi bɔ bɛdwene yɛnwo bɔ bɛboka yɛ maa yɛsõ ye ɔ.—Aso. 20:28.

9. Nzu yeɛ ɔmaa yenwu ye kyɛ Yehowa kuro ebiala dwirɛ ɔ?

⁹ Mmenia bɔ benne benni kyɛ Yehowa wɔ berɛ ne po, nningyein bɔ ɔyɛ ma bɛ ne maa yenwu kyɛ ole ɔdɔ amba. Wɔde susu ɛhe anwo nea: Ofi tete yeɛ mmenia pee ayɛ b’adwene kyɛ bɔ ɔte pá wɔ bɛnye so ne yeɛ bɛkɔyɛ ɔ. Nakoso ɛhene po ne, Yehowa maa benya bɔ behia, kyɛbɔ ɔkɔyɛ a bɛkɔtena ngoa nu, na bɛnye agye ɔ. (Mat. 5:​44, 45; Aso. 14:​16, 17) Afei ɔmaa bɛkora bɛfa nnamvoa, begya bɛwo mmaa, na benya bɛ fɛɛ so akatuaa. (Edw. 127:3; Nwo. 2:24) Ɛhe maa yenwu kyɛ yɛ Baba bɔ ɔwɔ anwuro ne, okuro ebiala dwirɛ. (Ɛks. 34:6) Yede, bɔ yeti yeɛ yasi gyinayɛɛ kyɛ yɛkɔsõ Yehowa ne, ɛmɔma yɛnea bie. Afei yɛkɔnea nhyiraa bɔ Yehowa afa ama yɛ ɔ.

BƆ YETI YEƐ YASI GYINAYƐƐ KYƐ YƐKƆSÕ YEHOWA Ɔ

10. (a) Nzuati paa yeɛ yɛsõ Yehowa ɔ? (Mateo 22:37) (b) Aboterɛ bɔ Yehowa le ye ne, sɛɛ yeɛ anya so mvasoɛ ɔ? (Edwein 103:​13, 14)

¹⁰ Yɛ koso yekuro Yehowa dwirɛ paa tekyɛ Yesu, na ɛhene ati yeɛ yɛsõ ye ɔ. (Kenga Mateo 22:37.) Sɛ yesua Yehowa subaen ahoroɛ nanwo nikyee a, ɔmaa yepingye ye paa. Ɛhe anu kõ yeɛ ole kyɛbɔ osi le yɛnwo aboterɛ ne. Yisraelfoɛ nemɔ sɔa, mmerɛ bɔ bɛyɛle ye so asoserɛ ne, ɔhahyirele bɛ kyɛ: ‘Mesrɛ ɛmɔ, ɛmɔsakyera befi ɛmɔ bɔne atee ne anwo.’ (Yer. 18:11) Yehowa se kyɛ yɛte mvuture, yeti onwu yɛ anwumvoin. (Kenga Edwein 103:​13, 14.) Kyɛbɔ Yehowa si le yɛnwo aboterɛ, ná onwu yɛ anwumvoin ne, sɛ ɛdwenedwene yenwo a, aso ɔnga w’ahone kyɛ ɛsõ ye anaa?

11. Nikyee foforɛ bɔ ɔmaa yɛsõ Yehowa ne, ebie yeɛ ole beni?

¹¹ Nikyee foforɛ bɔ ɔmaa yɛsõ Yehowa yeɛ ole kyɛ, yɛse kyɛ sɔ yeɛ odikyɛ yɛyɛ ɔ. (Mat. 4:10) Afei koso, sɛ yɛsõ ye nahorɛ nu a, yɛse kyɛ nningyein pá pee yeɛ ofi nu ba ɔ. Ebie yeɛ ole kyɛ, ɔmaa Yehowa dumaa nanwo te, ɔmaa ebiala nwu ye kyɛ Abɔnzam te ngondomboniɛ, na osa maa yɛ Baba ne ahone tɔ ye kunu. Sɛ yɛsõ Yehowa ɛnnɛ a, ɔkɔmaa yekonya yenwo atee yɛkɔsõ ye daa kyẽabie.—Yoh. 17:3.

12-13. Nzu yeɛ yesua yefi Jane ne Pam dwirɛ nanu ɔ?

¹² Sɛ yɛte ngwalaa oo, yɛte mbanyi oo, yɛkɔhora yɛkɔhɔ so yekonya ɔdɔ yɛkɔma Yehowa. Sɔ yeɛ Jane ne oliema Pam yɛle ɔ.a Bɛhyɛle yebo kyɛ besua nikyee ne, né Jane ali afoɛ 11, yeɛ né Pam koso ali afoɛ 10. Bɛ maame ne bɛ baba de, né bɛnye ngye yenwo kyɛ bekosua bie. Nakoso bɛhã behyirele ngwalaa nemɔ kyɛ, sɛ bɛne bɛ kɔhɔ asɔre de a, yede bɛkɔma b’atee maa bɛne aliemaa nemɔ kosua nikye. Jane hane kyɛ: “Bible nu dwirɛ bɔ Yehowa Adanzefoɛ nemɔ fa hyirehyirele me nati, ɔmaa manni me damvo nemɔ si manno nnubɔne, na mammɔ adwaman koso.”

¹³ Afoɛ kãa bie si ne, bɛ munyɔ bɛɛyɛle adawurubɔfoɛ. Siɛ ye, bɛɛyɛle ateepakyelɛfoɛ mmerɛ po né bɛnea b’awofoɛ bɔ bayɛ mbanyi ne. Bɔ Yehowa ayɛ ama bɛ ne, Jane hane yenwo dwirɛ kyɛ: “Manwu ye kyɛ Yehowa boka ye damvomɔ paa. Afei kyɛbɔ 2 Timoteo 2:19 ne kã ne, ‘Yehowa se bɛ bɔ bɛte ye deɛ’ amba.” Yɛkora yenwu ye paa kyɛ, bɛbɔ bɛdɔ Yehowa na bɛsõ ye ne, ye koso ɔnea bɛ.

14. Sɛɛ yeɛ yɛnate yɛnoa dwudwolɛ ne yɛ nneyɛɛ so yɛte Yehowa dumaa nanwo ɔ? (Nea foto ne koso.)

¹⁴ Nahorɛ bɔ ɔfa Yehowa nwo ne, yɛpena kyɛ yɛmaa mmenia nwu ye yɛfa yɛte ye dumaa nanwo. Yɛfa ye kyɛ ele wɔ damvo bie bɔ yetianu nyɛ se, na ɔfa bɔne koso kyɛ. Yeɛ ɛlɛho bie ɛtele kyɛ ebie nwa wɔ damvo ne, yetianu yɛ se, na ɔnga nahorɛ. Ɔba sɔ a, nzu yeɛ ahaa ɛkɔyɛ ɔ? Ahaa ɛkɔsa wɔ damvo ne ti. Sɔ ala yeɛ sɛ yɛte kyɛ mmenia kekã Yehowa nwo dwirɛ bɔ ɔtte nahorɛ a yɛyɛ ɔ. Yɛmaa benwu ye kyɛ nna sɔ yeɛ ɔte ɔ. (Edw. 34:1; Yes. 43:10) Yɛnate yɛnoa dwudwolɛ ne yɛ nneyɛɛ so yɛmaa mmenia nwu ye kyɛ, yefi y’ahone mukoraati nu yeɛ yɛsõ Yehowa ɔ.

15. Nzakrayɛɛ bɔ somafoɛ Pɔɔlo yɛle ne, mvasoɛ beni yeɛ onya fili so ɔ? (Filipifoɛ 3:​7, 8)

¹⁵ Yɛnye gye yenwo kyɛ yɛkɔyɛ nzakrayɛɛ biala bɔ yenwo hia na wamaa yahora yasõ Yehowa kyɛbɔ okuro ɔ. Somafoɛ Pɔɔlo sɔa, né ole dibea paa wɔ Yudasom nu. Nakoso ɔnate kyɛ ne ɔpena kyɛ ɔyɛ Kristo suaniɛ, na ɔsõ Yehowa nati, ɔyakyi tole berɛ. (Gal. 1:14) Bɔ ɔyɛle ne maa yenye gyele paa wɔ ye asetena nu, na kyẽabie koso ɔne Kristo koli bia wɔ anwuro. Wannu yenwo lle kyɛ osili sɔ gyinayɛɛ ne ɔ, na yɛ koso sɛ yɛsõ Yehowa a, yengonu yɛnwo lle.—Kenga Filipifoɛ 3:​7, 8.

16. Nzu yeɛ yesua yefi Julia dwirɛ nanu ɔ? (Nea foto ne koso.)

¹⁶ Sɛ yɛmaa Yehowa som nwo hia yɛ tra nikyeebiala a, yɛnye kɔgye ɛnnɛ ne kyẽabie. Ɛmɔma yɛnea aliemaa brasua bie bɔ bɛfrɛ ye Julia. Mmerɛ bɔ ne onnya suanne Bible bɔ ne ɔte akwalaa ne, sɛ bɛkɔ asɔre a, né bɛmaa ɔto dwein. Ebie bɔ ɔto dwein nwuni kyɛ ole adom akyɛdeɛ, yeti ɔfale ye kyɛ ɔtete ye wɔ edweintolɛ nu. Wangyɛ biala Julia oolɛle dumaa paa, yeti ne ɔkɔto dwein wɔ dwumadie mbirimbiri mɔ bo. Odwuli mmerɛ bie ne, ɔhɔle dweintolɛ nwo sukuu bie bɔ wale dumaa paa. Ye mmango sukuuniɛ bie hane Nyameɛ nwo dwirɛ hyirele ye wɔ berɛ, na ɔmaa onwuni kyɛ Nyameɛ dumaa li Yehowa. Wangyɛ biala Julia hyɛle yebo kyɛ ɔne aliemaamɔ kosua nikye pɛen nyɔ dapɛen biala. Osili gyinayɛɛ kyɛ ɔkɔyakyi dweintolɛ ne, na wafa ye mmerɛ mukoraati wasõ Yehowa. Né ɔlla ase kyɛ ɔkɔyɛ sɔ. Ɔhane kyɛ: “Mmeni pee hahyirele me kyɛ gyinayɛɛ bɔ masi ne, ɔngɔboka me, nakoso né mepena kyɛ mesõ Yehowa mmom.” Julia sili sɔ gyinayɛɛ ne, kɔbo afoɛ 30 ɛhe. Aso kesaalae wanu yenwo anaa? Ɔhane kyɛ: “Mesoanu adwo me, na medé medi kyɛ bɔ ɔla m’ahone so biala ne, Yehowa kɔyɛ ye mukoraati kɔma me kyẽabie.”—Edw. 145:16.

KƆSO SÕ YEHOWA

17. Ewiase ne ayieleɛ bɔ wapingye ne, ɔfa bɛbɔ bɛsõ Yehowa, ɔne bɛbɔ bennya bɛɛsone ye nanwo sɛ?

¹⁷ Ewiase ne ayieleɛ apingye paa. Somafoɛ Pɔɔlo hane kyɛ: “Waha kãa bie, né bɔ ɔ́ba ne wawa; na ɔngɔhyɛ biala.” (Heb. 10:37) Ɛhe fa yɛnwo sɛ? Ɔmaa yenwu kyɛ, mmerɛ bɔ mmenia le ye kyɛ bɛkɔfa bekosi gyinayɛɛ kyɛ bɛkɔsõ Yehowa ne, ɛso ate koraa. (1 Kor. 7:29) Sɛ yɛsõ Yehowa dada koso a, yɛse kyɛ ɔhaw biala bɔ yɛfa nu ne, “waha kãa bie” né so apɛ.

18. Nzu yeɛ Yesu ne Yehowa pena kyɛ yɛyɛ ɔ?

¹⁸ Yesu hahyirele ye asuafoɛ nemɔ kyɛ, sɛ bɛhyɛ yebo kyɛ bedi yesi a né beyielle, na mmom odikyɛ bɛkɔso bɛyɛ sɔ. (Mat. 16:24) Yeti sɛ yasõ Yehowa afoɛ pee ɛhe po a, odikyɛ yesi yɛ hue kyɛ yɛngɔyakyi ye soen lle. Ɔlla ase kyɛ yɛkɔhɔ so yɛkɔsõ Yehowa. Nakoso sɛ yemia yɛnye yɛyɛ sɔ a, yɛnye kɔgye paa, na Yehowa koso koyira yɛ.—Edw. 35:27.

19. Nzu yeɛ yesua yefi Gene dwirɛ nanu ɔ?

¹⁹ Ebiemɔ le adwene kyɛ sɛ ɛsõ Yehowa a, ɛngɔhora ngɔgye wɔnye. Sɛ ɛte abrandeɛ anaa taluwa bɔ ɛsõ Yehowa a, aso wɔ koso ele sɔ adwene ne bie hɔ ɔ? Abrandeɛ bie bɔ bɛfrɛ ye Gene hane kyɛ: “Ne menwu ye kyɛ sɛ ɛte Yehowa Danzeniɛ a, wɔnwo kyere wɔ soma. Bɛbɔ mene bɛ sili so ne, né bɛkora bɛyɛ bɔ bekuro biala. Kyɛ ebiaa bɛkɔhɔ paati, bɛkɔhwe somaa, anaa bɛkɔbɔ game bɔ awudie wɔ nu ɔ. Nakoso, mede sɛ nne asɛnga nu a, né nwɔ adesua bo.” Nzu yeɛ ɛhe maa Gene yɛle ɔ? Ɔhane kyɛ: “Me koso nyɛle bɔ né bɛyɛ ne bie. Ahyɛaseɛ ne, né mese kyɛ megye menye, nakoso wangyɛ ɔtele menye so. Afei de Bible nu dwirɛ bɔ né memva menyɛ húu ne, nza nzusuli yenwo. Yeti nzili gyinayɛɛ kyɛ ngofi m’ahone mukoraati nu ngɔsõ Yehowa. Ofi sɔ mmerɛ ne, menwu ye kyɛ sɛ mebɔ mbaeɛ a, Yehowa tie.”

20. Nzu yeɛ odikyɛ yesi yɛ hue kyɛ yɛkɔyɛ ɔ?

²⁰ Edweintolɛniɛ bie hahyirele Yehowa kyɛ: “Bɛ bɔ ɛneanea nu ɛtwe bɛ bata wɔ nwo, kyɛ bɛɛtena w’abrannaa nu ne, benya saleɛ.” (Edw. 65:4) Yeti ɛmɔma yesi yɛ hue kyɛ yɛkɔhɔso yɛkɔsõ Yehowa. Yɛyɛ sɔ a, né yesuesua Yosua bɔ ɔhane kyɛ: ‘Me ne m’awuro ama de, yɛkɔso AWURADE’ ne.—Yos. 24:15.