Ɔhalle Yɛ Ngome

1-2. (a) Sɛ ɔhaw bie to yɛ a, nzuati yeɛ ɔnzɛkyɛ yenya adwene lle kyɛ waha yɛ ngome ɔ? (b) Nzu yeɛ yekosusu yenwo wɔ adesua he anu ɔ?

SƐ ƆHAW pirikua bie to yɛ a, ebiaa yekonya adwene kyɛ waha yɛ ngome tekyɛ bɔ yamini wɔ ɛhɔaeɛ bie nu ne. Nakoso, ɔnzɛkyɛ yenya sɔ adwene ne lle. Ofikyɛ yɛ Baba bɔ ɔwɔ anwuro ne, nna yɛ haw ne ngome yeɛ onwu ye ɔ, na mmom wahyɛ bɔ kyɛ ɔkɔboka yɛ maa yekogyina yenoa. Ɔnate kyɛ Yehowa kuro yɛ dwirɛ nati, ɔkã kyire yenu biala kyɛ: “Ngɔboka wɔ.”—Yes. 41:10.

² Adesua he kɔmaa yekonwu nningyein biemɔ bɔ Yehowa yɛ faboka yɛ ɔ: (1) okyire yɛ atee, (2) ɔnea yɛ, (3) ɔbɔ yɛnwo waen, na (4) ɔkyekye yɛ wora. Yehowa ahyɛ yɛ bɔ kyɛ ɔmva yenwo ne ɔhaw biala bɔ ɔkɔto yɛ ne, ye wora ngofi yɛ, na ɔngɔyakyi yɛnu lle. Yeti yenwu ye paa kyɛ ɔhalle yɛ ngome.

YEHOWA KYIRE YƐ ATEE

3-4. Sɛɛ yeɛ Yehowa kyire yɛ atee ɔ? (Edwein 48:14)

³ Kenga Edwein 48:14. Yehowa se kyɛ yɛbɔbɔ yɛngɔhora yengohyire yɛnwo atee. Yede sɛɛ yeɛ okyire bɛbɔ bɛsõ ye nahorɛ nu ne atee ɛnnɛ ɔ? Atee kõ bɔ ɔfa so yɛ sɔ yeɛ ole Bible ne. (Edw. 119:105) Yehowa nate Bible naso boka yɛ maa yesi gyinayɛɛ pá, yenya subaen biemɔ bɔ ɔkɔmaa yɛnye kɔgye ɛnnɛ, na yasa yanya daa ngoa kyẽabie.a Ebie yeɛ ole kyɛ, ɔmaa yenwu kyɛ sɛ ebie fõ yɛ a, nnɛmaa yɛfa yenwo dwirɛ yewura yɛnu, yeli nahorɛ wɔ nikyee biala nu, na yefi y’ahone nu yehuro mmenia dwirɛ. (Edw. 37:8; Heb. 13:18; 1 Pet. 1:22) Sɛ yɛda sɔ subaen hemɔ ali a, ɔmaa yɛbayɛ awofoɛ pá, sɛ yagya koso a, yenya anigye wɔ yɛ agyaa nu, na yɛne yɛ damvomɔ koso afia yɛ kama.

⁴ Afei koso, mmenia biemɔ bɔ bɛfale ɔhaw ahoroɛ nu ne, Yehowa amaa bahworɔ bɛnwo dwirɛ wɔ Bible nanu bama yɛ. Bɛ koso, né bɛte sona kyɛ yɛ ala. (1 Kor. 10:13; Yak. 5:17) Yeti sɛ yɛkenga bɛnwo dwirɛ na yesua nikyeebie yefi bɔ ɔtole bɛ nanu a, ɔkɔboka yɛ wɔ atee nyɔ bie aso. Bɔ olimoa ne, yekonwu ye kyɛ, nna yɛ ngome yeɛ ɔhaw bɔ ɔte sɔ ne ato yɛ ɔ. Na mmom, ebie tole mmenia biemɔ, nakoso bɛhora begyinane yenoa. (1 Pet. 5:9) Bɔ ɔtɔ so nyɔ ne, ɔkɔmaa yekonwu kyɛbɔ yekogyina yɛ haw ne noa ɔ.—Rom. 15:4.

5. Nwamɔ yeɛ Yehowa nate bɛso kyire y’atee ɔ?

⁵ Aliemaamɔ koso, Yehowa nate bɛ so kyire yɛ atee.b Ebie yeɛ ole kyɛ, manzini soneafoɛ nemɔ kɔsõ asafo ahoroɛ ne, na bɛhyɛ yɛ ngunaen. Dwudwolɛ ahoroɛ bɔ bɛma ne, ɔmaa yɛ gyidie yɛ se, na ɔboka maa yɛne aliemaamɔ yɛ kõ. (Aso. 15:40–16:5) Asafo nu mbanyi nemɔ koso, yɛnu biala nwo dwirɛ hia bɛ paa. (1 Pet. 5:​2, 3) Afei koso, awofoɛ boka bɛ mmaamɔ maa benya ɔdɔ bɛma Yehowa, na ɛhene maa besi gyinayɛɛ pá, na bɛ subaen yɛ kama. (Any. 22:6) Mmrasua bɔ bɛbɔ bɛnwo mmɔden wɔ asafo nanu ne koso, bɛfa b’abrabɔ bɛyɛ nhwɛsoɛ bɛma ndaluwa nemɔ, betu bɛ foɛ, na bɛhyɛ bɛ ngunaen.—Tito 2:​3-5.

6. Akwangyerɛ bɔ Yehowa fama yɛ ne, yɛkɔyɛ sɛɛ né yanya so mvasoɛ?

⁶ Akwangyerɛ biala bɔ yehia na wamaa yahora yasi gyinayɛɛ pá na yɛnye agye ne, Yehowa afa ama yɛ. Yede yɛkɔyɛ sɛɛ ne yahyire kyɛ yɛnye sɔ bɔ wayɛ wama yɛ ne? Anyandera 3:​5, 6 kã kyɛ: “Fa wɔ wora amukoraa wura AWURADE nu, na nnɛfa wɔ nwo to wɔ bɔbɔ wɔ nworɛ so.” Sɛ yɛyɛ sɔ a, ‘okohyire yɛ atee maa yɛkɔfa so.’ Ɛhe kyire kyɛ, ɔkɔboka yɛ maa yɛkɔhwe yɛnwo yekofi ɔhaw pee nwo, na wamaa yɛnye agye wɔ y’asetena nu. Ɔyɛ yɛ fɛ paa kyɛ, ɔnate kyɛ Yehowa kuro yɛnu biala dwirɛ nati otu yɛ foɛ ɔ!—Edw. 32:8.

YEHOWA NEA YƐ

7. Atee beni yeɛ Yehowa faso nea yɛ ɔ?

⁷ Kenga Filipifoɛ 4:19. Sɛ akwangyerɛ bɔ Yehowa fama yɛ ne la ahameɛ a, osa boka yɛ maa yenya bɔ yekoli, bɔ yekowura, ɔne nekaa bɔ yɛkɔfa yeti yɛkɔto ɔ. (Mat. 6:33; 2 Tɛs. 3:12) Ɔwɔ nu ɔtte mvomsoɛ kyɛ yɛkɔdwenedwene sɔ nningyein nemɔ nwo, nakoso Yehowa nguro kyɛ yɛkɔdwenedwene yenwo maa ɔkɔbo so. (Mat. 6:25) Nzuati ɔ? Ofikyɛ bɛbɔ bɛsõ Yehowa nahorɛ nu ne, sɛ bɛnwo kyere bɛ a, ɔngɔyakyi bɛ lle. (Mat. 6:8; Heb. 13:5) Yeti sɛ ɔkã kyɛ ɔkɔnea yɛ a, nikyefee nne berɛ bɔ okosi ye atee ɔ.

8. Nzu yeɛ Yehowa yɛ mane Dawide ɔ?

⁸ Kyɛbɔ Yehowa bokale Dawide ne, ɛmɔma yesusu yenwo kãa. Né Sɔɔlo pena ye kũ ye, na ɛhene ati ɔnwatili. Ɔwale sɔ ne, ne nningyein nu ayɛ se ama ye paa. Nakoso Yehowa maa ɔne mmrienzua bɔ bɛboka ye so ne sa hane bɔ behia ɔ. Mmerɛ bɔ Dawide dwenedwene kyɛbɔ Yehowa bokale ye sɔ mmerɛ nanwo ne, ɔhane kyɛ: “Mayɛ akwadaa le, na kesaala ye de manyi, nakoso nnwuni ye le kyɛ Nyameɛ apo teneneeniɛ ɔ, anaakyɛ ye boso ama bɛsrɛsrɛ aleɛ ɔ.” (Edw. 37:25) Ebiaa akae kyɛbɔ Yehowa bokale wɔ, anaa aliemaa bie mmerɛ bɔ ɔhɔle anwokyere nu ne.

9. Sɛ atorɛngyɛm bie si a, sɛɛ yeɛ Yehowa maa ye mmenia sa kã bɔ behia ɔ? (Nea foto ne koso.)

⁹ Sɛ atorɛngyɛm bie si a, Yehowa maa ye mmenia sa kã bɔ behia ɔ. Asomafoɛ nemɔ aberɛ so sɔa, Kristofoɛ bɔ ne bɛwɔ nekaa ahoroɛ biemɔ ne, bɛfale nningyein bɛɛbokale beliemamɔ bɔ né bɛnwo ahyere bɛ wɔ Yudea ne. (Aso. 11:​27-30; Rom. 15:​25, 26) Kristofoɛ bɔ bɛwɔ berɛ ɛnnɛ ne koso, sɛ beliemamɔ nwo kyere bɛ a, bɛboka bɛ. Sɛ atorɛngyɛm si a, Yehowa nate aliemaamɔ so boka bɛbɔ bɛnwo ahã ne maa benya nningyein biemɔ tekyɛ aleɛ, nzue, ndaadeɛ, ɔne ayire. Bɛbɔ besisi asafo sua ne koso, besiesie aliemaamɔ nemɔ awuro, ɔne Ahennie Asa ahoroɛ bɔ ɔkɔsɛkye ne. Sɛ ɛhene la ahameɛ a, aliemaamɔ fa Bible nanu dwirɛ bɛhyɛ bɛbɔ bɛnwo ahã ne ngunaen, na bɛkyekye bɛ wora.c

10-11. Nzu yɛ esua fili Borys dwirɛ nanu ɔ?

¹⁰ Bɛbɔ bɛnzo Yehowa ne po, ɔmaa bɛsa kã bɔ behia ɔ. Yɛpena kyɛ yesuesua Yehowa, yeti bɛbɔ bɛnne asafo nanu ne po, yɛfa atee ahoroɛ so yɛboka bɛ. (Gal. 6:10) Ɛhene bɔ yɛyɛ ne, ɔmaa yɛkora yedi mmenia adanzeɛ. Borys te sukuu bie nu panyi wɔ Ukraine, ɛmɔma yɛnea nikyeebie bɔ ɔyɛle ɔ. Ɔwɔ nu, ɔtte Yehowa Danzeniɛ, nakoso Yehowa Adanzefoɛ ngwalaa bɔ bɛwɔ ye sukuu nanu ne, okuro bɛ dwirɛ paa, na ondwudwo ndia bɛ. Né ngondii kɔso wɔ nekaa bɔ ɔte ne, yeti otu hɔle maen ne nekaa foforɛ bɔ ngondii ne dwulli berɛ ɔ. Oodwuli dɔ ne, aliemaamɔ bokale ye paa. Siɛ ye bɛtole bɛsa bɛfrɛle ye maa ɔhɔle Yesu Wue Aluolue nabo. Mmerɛ bɔ ne Borys dwenedwene bɔ osili nanwo ne, ɔhane kyɛ: “Yehowa Adanzefoɛ nemɔ bokale me paa, na ɛhene maa nwuni kyɛ bekuro me dwirɛ. Menye sɔ bɔ bɛyɛ bɛmane me ne paa.”

¹¹ Sɛ ebie te Yehowa Danzeniɛ oo, sɛ ɔtte Yehowa Danzeniɛ oo, yɛkɔhora yɛkɔla ɔdɔ ali yekohyire ye yɛkɔfa yekosuesua yɛ Baba bɔ ɔwɔ anwuro bɔ ɔse anwumvoin ne. (Luka 6:​31, 36) Yedé yedi kyɛ sɛ yɛyɛ sɔ a, ɛhene kɔhã bɛ maa bɛkɔɔyɛ Kristo asuafoɛ.(1 Pet. 2:12) Sɛ wamma sɔ po a, ɔnate bɔ yayɛ nati yɛnye kɔgye, ofikyɛ ɔte saleɛ pee kyɛ ɛkɔma tra kyɛ ekole ɔ.—Aso. 20:35.

YEHOWA BƆ YƐNWO WAEN

12. Sɛɛ yeɛ Yehowa ahyɛ bɔ kyɛ ɔkɔbɔ yɛnwo waen kyɛ mmenikue ɔ? (Edwein 91:​1, 2, 14)

¹² Kenga Edwein 91:​1, 2, 14. Ɛnnɛ, Yehowa bɔ yɛnwo waen fi nikyeebiala bɔ ɔkɔhora kɔsɛkye yɛne ye afia nanwo. Ɔngɔma Satan atee maa ongotu nahorɛ soen bo lle. (Yoh. 17:15) Yɛkɔhora yekonya Yehowa nu gyidie paa kyɛ sɛ “amaneɛnwunɛ piri” ne hyɛ yebo a, ɔkɔboka yɛ maa yɛ gyidie kɔyɛ se, na okosa kole yɛ ngoa.—Nye. 7:​9, 14.

13. Atee beni yeɛ Yehowa faso bɔ yenu biala nwo waen ɔ?

¹³ Sɛɛ yeɛ Yehowa bɔ yɛnu biala nwo waen ɔ? Ɔnate Bible naso boka yɛ maa yenwu bɔ ɔte pá, ɔne bɔ ɔttemaye ɔ. (Heb. 5:14) Sɛ yɛfa Bible nu afutue yɛbɔ yɛ bra a, ɔmaa yɛne Yehowa afia yɛ kama, na yɛbɔbɔ koso yɛnwo tɔ yɛ. (Edw. 91:4) Asa koso, Yehowa nate asafo naso bɔ yɛnwo waen. (Yes. 32:​1, 2) Aliemaamɔ dɔ Yehowa na bɛfa ye dwirɛ ne bɛbɔ bɛ bra. Yeti sɛ yɛfa yɛnwo yɛbɔ bɛ a, ɔkɔboka yɛ maa yɛkɔhwe yɛnwo yekofi nikyee biala bɔ ɔkɔsɛkye yɛne ye afia nanwo.—Any. 13:20.

14. (a) Nzuati yeɛ nna ɔhaw biala yeɛ Yehowa ye yɛ fi nu ɔ? (b) Edwirɛ bɔ ɔwɔ Edwein 9:10 ne, sɛɛ yeɛ ɔhyɛ yɛ ngunaen ɔ? (Nea yebo berɛ dwirɛ ne koso.)

¹⁴ Tete ne, sɛ odwu mmerɛ bie a, né Yehowa kora bɔ ye mmenia nwo waen fi bɛbɔ bɛpena kyɛ bɛyɛ bɛ bɔne, anaa bekũ bɛ ne sanu. Nakoso nna mmerɛ biala yeɛ ne ɔyɛ sɔ ɔ, ofikyɛ ‘asane kora to sona biala.’ (Nwo. 9:11) Afei koso, ofi tete yeɛ bɛbɔ bɛsõ Yehowa ne, wama atee maa benu biemɔ anwu amaneɛ, anaa bahũ bɛ ɔ, na ɛhene amaa Satan ayɛ ngondomboniɛ. (Yob 2:​4-6; Mat. 23:34) Ɛnnɛ koso sɔ ala yeɛ ɔte ɔ. Ɔwɔ nu, ebiaa ɔhaw bɔ yɛfa nu ne, Yehowa ngɔye ngofi berɛ, nakoso yɛkɔhora yekonya gyidie kyɛ, bɛbɔ bedi nahorɛ bɛma ye ne, ɔngɔyakyi benu lle.d—Edw. 9:10.

YEHOWA KYEKYE YƐ WORA

15. Sɛɛ yeɛ mbaeɛ, Bible ne, ɔne aliemaamɔ kora kyekye yɛ wora ɔ? (2 Korintofoɛ 1:​3, 4)

¹⁵ Kenga 2 Korintofoɛ 1:​3, 4. Ɔtɔ mmerɛ bie a, yedi aworabolɛ, adwenedwene hyɛ yɛ so, na y’aba nu kora bu. Ebiaa ɛfa ɔhaw bie nu kesaalae na ɛhene amaa anya adwene kyɛ elle ebiala bɔ ɔkɔboka wɔ ɔ. Sɛ ebiala nde bɔ ɛfa nu nabo po a, nwu ye kyɛ Yehowa de, ɔte yebo. Ɔhaw bɔ yɛfa nu ne, ɔnyɛ ye yea mbaen, na mmom “ɔkyekye yɛ wora wɔ y’amaneɛnwunɛ mukoraa nu.” Yede ɔyɛ ye sɛ? Sɛ yɛbɔ ye mbaeɛ a, ɔmaa yenya “Nyameɛ asomdwee bɔ ɔbo ndeaseɛ amukoraa so ne.” (Flp. 4:​6, 7) Bible ne koso te Yehowa dwirɛ bɔ wafa wama yɛ ɔ, yeti sɛ yɛkenga a, ɔkyekye yɛ wora. Edwirɛ bɔ ɔwɔ nu ne, ɔmaa yenwu kyɛ Yehowa kuro yɛ dwirɛ. Afei koso, ɔmaa yenwu nworɛ, na yenya anyelasoɛ. Sɛ yɛkɔ adesua a, yenya yenwo atee yɛne aliemaamɔ bɔ ngɔmmɔ, yetie dwudwolɛ bɔ ogyi Bible so, na ɛhene hyɛ yɛ ngunaen paa.

16. Nzu yeɛ asua afi Nathan ne Priscilla dwirɛ nanu ɔ?

¹⁶ Bɔ ɔkɔyɛ ne yanwu kyɛbɔ Yehowa nate Bible naso kyekye yɛ wora ne, ɛmɔma yɛnea edwirɛ bie bɔ ɔtole Nathan ne Priscilla bɔ bɛwɔ United States ne. Mmerɛ bie, bɛyɛle kyɛ bekotu bɛkɔhɔ nekaa bɔ behia adawurubɔfoɛ pee maa bɛkã nzɛmba ne ɔ. Nathan hane kyɛ: “Né yele gyidie kyɛ Yehowa koyira gyinayɛɛ bɔ yasi naso.” Nakoso beedwuli dɔ ne bɛfokyɛle, na bɛnwo sikaa mukoraati koso yiele. Ɔwale sɔ ne, ne odikyɛ besa bɛkɔ bɛ kuro. Nakoso bɛhɔle ne po, né esikaa nwo té yɛ se ma bɛ. Nathan toale so kyɛ: “Né ɔyɛ me nwanwa paa kyɛ Nyameɛ ammoka yɛ kyɛbɔ ne yɛnea atee ne ɔ. Yeti né medwene yenwo kyɛ, aso mayɛ bɔne bie anaa?” Siɛ ye, Nathan ne Priscilla nwuni kyɛ sãa ne Nyameɛ yakyilli benu. Nathan hane kyɛ: “Wɔ sɔ mmerɛ bɔ ne nu ayɛ se nanu ne, Bible ne ɔɔyɛle kyɛ yɛ damvo bie bɔ ɔse nworɛ bɔ ɔhyɛ yɛ ngunaen, ná otu yɛ foɛ ɔ. Ɔnate kyɛ yɛfale y’adwene yesiele Yehowa so yɛtrale yɛ haw nati, wamaa yanya gyidie kyɛ, ɔmva yenwo ne ɔhaw biala bɔ ɔkɔto yɛ kyẽabie ne, Yehowa kɔboka yɛ.”

17. Sɛɛ yeɛ Yehowa kyekyele Helga wora ɔ? (Nea foto ne koso.)

¹⁷ Yeliemamɔ Kristofoɛ koso kora kyekye yɛ wora wɔ atee foforɛ so. Yede bɛyɛ ye sɛ? Helga te aliemaa brasua bɔ ɔwɔ Hungary. Ɛmɔma yɛnea bɔ ɔtole ye ɔ. Ɔfale ɔhaw nu afoɛ pee, na ɛhene maa ye wora bɔle, na onyane adwene kyɛ ye so lle mvasoɛ. Sɛ ɔdwenedwene bɔ ɔtole ye nanwo a, onwu ye kyɛ Yehowa nate aliemaamɔ so bokale ye paa. Ɔhane kyɛ: “Ɔhaw pee yeɛ mefa nu ɔ. Ebie yeɛ ole kyɛ, nné baa brienzua kõ bɔ ɔnde apɔ bɔ menea ye ɔ, me komapɛ nala koso odikyɛ mesa meyɛ adwuma. Nakoso mmerɛ biala bɔ Yehowa konwu ye kyɛ m’anwoserɛ so ate ne, ɔboka me. Kɔyɛ afoɛ 30 ɛhe ne, ɛlɛhomapɛ po nne berɛ bɔ ɔkyekyelle me wora ɔ. Yehowa nate ebiemɔ noa dwudwolɛ ne bɛ ngunaenhyɛ so maa menya anwoserɛ. Mmerɛ biala bɔ me wora kɔbɔ ne, ebiemɔ sɛnde me tɛs mɛssage, na ebiemɔ koso tworɔ edwirɛ gua krataa so bɛbrɛ me.”

18. Yɛkɔyɛ sɛɛ ne yakyekye mmenia wora?

¹⁸ Yele yenwo atee kyɛ yekosuesua Yehowa ná yakyekye mmenia wora. Yede yɛkɔyɛ ye sɛ? Sɛ bedwudwo a, odikyɛ yɛto yɛboase yetie bɛ, yɛkã edwirɛ bie yɛfa yɛkyekye bɛ wora, na yɛyɛ nningyein pɔtee biemɔ yɛfa yɛboka bɛ. (Any. 3:27) Bɛbɔ benwu amaneɛ bɔ bɛnne asafo nanu ne po, odikyɛ yɛkyekye bɛ wora. Yeti mmenia bɔ yɛne bɛ te mandanu ne, sɛ bɛ wora bɔ, bɛfokyɛ, anaa adwenedwene hyɛ bɛ so a, odikyɛ yɛkɔnea bɛ boso yɛne bɛ bɔ ngɔmmɔ, na yɛfa Bible nu dwirɛ bie yɛkyekye bɛ wora. Sɛ yesuesua Yehowa bɔ ɔte “aworakyekyerɛ mukoraa Nyameɛ” ne a, nna aliemaamɔ ngome yeɛ ɔkɔboka bɛ maa bekogyina bɛ haw noa ɔ, na mmom bɛbɔ bɛnne asafo nanu ne po, ɔkɔhã b’ahone maa bekosua Yehowa nwo nikye.—Mat. 5:16.

YEHOWA NGƆYAKYI YƐNU LLE

19. Nzu yeɛ Yehowa yɛ ma yɛ ɔ, na yɛkɔyɛ sɛɛ ne yasuesua ye?

¹⁹ Bɛbɔ bɛdɔ Yehowa ne mukoraati ne, bɛ dwirɛ la ye ahone so paa. Yeti sɛ ɔhaw bie to yɛ a, ɔnyakyi yɛ nu. Kyɛbɔ awofoɛ bɔ okuro ɔwa dwirɛ bɔ mmɔden kyɛ ɔkɔnea ye ne, sɔ ala yeɛ Yehowa nea bɛbɔ bedi nahorɛ bɛma ye ne ɔ. Yehowa kyire yɛ atee, ɔnea yɛ, ɔbɔ yɛnwo waen, na ɔkyekye yɛ wora. Sɛ yɛboka bɛbɔ bɛfa ɔhaw nu ne, ná yɛhyɛ bɛ ngunaen a, né yesuesua yɛ Baba bɔ ɔwɔ anwuro bɔ ole ɔdɔ ne. Ɔwɔ nu, ebiaa ɔhaw bie kɔhora kɔto yɛ maa yɛ wora kɔbɔ paa, nakoso yɛkɔhora yekonya gyidie kyɛ bɔ okosi biala ne, Yehowa boka yɛ so. Wahyɛ yɛ bɔ kyɛ: “Nnɛsuro, ofikyɛ ngyi wɔ si.” (Yes. 41:10) Sɔ dwirɛ he hyɛ yɛ ngunaen paa, na ɔmaa yenwu ye kyɛ, amba, ɔhalle yɛ ngome!