Yehowa Dumaa Ne, Sɛɛ Yeɛ Yenwo Hia Yesu Ɔ?

1-2. (a) Kɔngɔen bɔ aleɛ kye maa bekũ Yesu ne, nzu yeɛ ɔyɛle ɔ? (b) Edwirɛ benimɔ yeɛ yekonya yenwo mmuayɛɛ wɔ adesua he anu ɔ?

NÉ ƆTE Wuhue kɔngɔen, Nisan 14, afoɛ 33 Y.B (Yɛ Aberɛ So). Sɔ mmerɛ ne, né Yesu ne ye asomafoɛ bɔ bedi nahorɛ ne ayianu wɔ abɔrosaen bie aso, na né bali Awurade nɔsoa aleɛ ne bayie. Ne ɔse kyɛ ɔngɔhyɛ Yudase kɔye ye kɔma maa bɛkɔyɛ ye ayayadeɛ bekohũ ye. Yeti ɔhyɛle asomafoɛ nemɔ ngunaen na ɔne bɛ lili ngraa. Koraka befite befi sua nanu ne, Yesu bɔle mbaeɛ bie bɔ ne ɔkã ahone paa ɔ. Siɛ ye, somafoɛ Yohane hworɔle sɔ mbaeɛ ne tole berɛ, na ɔwɔ Yohane yeti 17.

² Sɔ mbaeɛ bɔ Yesu bɔle ne, nzu yeɛ ɔmaa yenwu ye yɛfa bɔ ne ɔdwene yenwo sɔ mmerɛ nanwo ɔ? Sɛɛ yeɛ sɔ mbaeɛ ne maa yenwu bɔ ne yenwo hia Yesu paa mmerɛ bɔ ne ɔwɔ aseɛ he aso ne ɔ? Yekonya sɔ dwirɛ hemɔ nwo mmuayɛɛ wɔ adesua he anu.

“MALA WƆ DUMAA ALI MAHYIRE BƐ”

3. Nzu yeɛ Yesu hafale Yehowa dumaa nanwo ɔ, na nzu yeɛ né ɔpena kyire ɔ? (Yohane 17:​6, 26)

³ Yesu hane ye wɔ ye mbaeɛ nanu kyɛ: “Mala wɔ dumaa ali mahyire bɛ.” Né sɔ dwirɛ nanwo hia Yesu paa, yeti osili so pɛen nyɔ wɔ ye mbaeɛ nanu. (Kenga Yohane 17:​6, 26.) Yede, nzu yeɛ ne ɔpena kyire ɔ? Aso né bɛnze Nyameɛ dumaa nati yeɛ ɔmaa ɔhane sɔ anaa? Né Yesu asuafoɛ nemɔ te Yudafoɛ yeti ne bɛse kyɛ Nyameɛ dumaa li Yehowa. Sɔ dumaa ne fitele Hebri Tworɔnzɛm nanu mmerɛ pee. Yeti nna Nyameɛ dumaa Yehowa ne, yeɛ ne ɔpena kyɛ benwu ye ɔ, na mmom ne ɔpena kyɛ benwu bɔ sɔ dumaa ne kyire ɔ. Yesu se Yehowa yé paa tra ebiala. Yeti ɔmaa ye asuafoɛ nemɔ nwuni Yehowa subaen ahoroɛ, nningyein bɔ wayɛ, ɔne bɔ wabɔ yetianu kyɛ ɔkɔyɛ ɔ.

4-5. (a) Sɛ bɛkã kyɛ ɛse ebie yé paa a, mvandoho beni yeɛ ɛkɔfa kohyirehyire nu ɔ? (b) Sɛɛ yeɛ Yesu asuafoɛ nemɔ nwuni Yehowa yé paa ɔ?

⁴ Ma yɛnea mvandoho he. Fa ye kyɛ w’asafo nu panyi bie li David, na ɔte dɔktaniɛ. Ɛne ye atena asafo nu afoɛ pee, yeti ɛse ye paa. Ɛlɛhõ bie anwonyerɛ bie hyele wɔ komapɛ bɔ ne ɛpena wu ɔ. Yeti bele amirika bɛfale wɔ bɛhɔle hɔspitel, na sɔ aliemaa ne yeɛ ogyinane wɔ so neane wɔ maa wɔnwo tɔle wɔ ɔ. Ofi sɔ mmerɛ ne bɔ ɔkɔ ne, sɛ ɛte sɔ aliemaa ne dumaa a, nzu yeɛ ɔkɔwa wɔ tianu ɔ? Ɔwɔ nu, ɛse kyɛ David te asafo nu panyi de, nakoso kesaalae de, ɔnate kyɛ olɛle wɔ ngoa nati, ekonwu ye wɔ atee foforɛ so koraa.

⁵ Sɔ ala yeɛ Yesu asuafoɛ nemɔ koso, ne bɛse Yehowa dumaa ne dada. Nakoso, kyɛbɔ Yesu bɔle ye bra nati, ɔmaa benwuni kyɛbɔ Yehowa si te ɔ. Nzuati yeɛ yɛkã sɔ ɔ? Ofikyɛ Yesu suesuane ye Baba wɔ edwirɛ biala bɔ ɔhane, ɔne nikyeebiala bɔ ɔyɛle nanu. Yeti mmerɛ bɔ asomafoɛ nemɔ nwuni Yesu ngyerɛkyerɛ, ɔne kyɛbɔ ɔne mmenia si tenane ne, ɔmaa ‘benwuni’ Yehowa yé paa.—Yoh. 14:9; 17:3.

‘WƆ́ DUMAA BƆ AFA AMA ME NANU’

6. Atee beni aso yeɛ né Yehowa afa ye dumaa ne ama Yesu ɔ? (Yohane 17:​11, 12)

⁶ Mmerɛ bɔ ne Yesu bɔ mbaeɛ ma ye asuafoɛ nemɔ ne, ɔhane kyɛ: ‘Fa bɛ sie wɔ wɔ́ dumaa bɔ afa ama me nanu.’ (Kenga Yohane 17:​11, 12.) Ɛhene kyire kyɛ afei de, ne bɛbaafrɛ Yesu Yehowa hɔ ɔ? Daabi, ofikyɛ mmerɛ bɔ ne Yesu kã Yehowa dumaa nanwo dwirɛ ne, ɔhane kyɛ ‘wɔ bɔbɔ wɔ dumaa.’ Yeti ne Yesu ngyire kyɛ, kesaalae de, bɛfrɛ ye Yehowa. Yede, mmerɛ bɔ Yesu hane kyɛ Nyameɛ afa ye dumaa ne ama ye ne, nzu paa yeɛ ne ɔpena kyire ɔ? Bɔ olimoa, ye yeɛ né ogyi Yehowa gyanu odwudwo ma ye ɔ. Ɔwale aseɛ he aso ne, ɔfale ye Baba dumaa ne yɛle anwanwadeɛ pee. (Yoh. 5:43; 10:25) Bɔ ɔtɔ nyɔ, Yesu dumaa ne, bɔ okyire yeɛ ole kyɛ “Yehowa Yeɛ Odé Ngoa Ɔ.” Yeti Yesu dumaa ne bɔbɔ po, opingye Yehowa dumaa ne paa.

7. Nzuati yeɛ né Yesu kɔhora kogyina Yehowa gyanu kodwudwo kɔma ye ɔ? Ma yenwo mvandoho.

⁷ Ɛmɔma yɛnea mvandoho he. Sɛ ɔhene bie tu ɛbɔfoɛ maa okosi ye gyanu wɔ nekaa bie a, odwudwo wɔ ɔhene ne dumaa nu. Ɔnate kyɛ ɔhene ne yeɛ wasoma ye nati, edwirɛ biala bɔ ɔkɔhã ne, ɔte kyɛbɔ ɔhene ne bɔbɔ yeɛ wahã ne. Sɔ ala yeɛ Yesu koso te ɔ. Ɔnate kyɛ Yehowa yeɛ ɔsomane ye nati, né ɔkɔhora kogyina ye gyanu kodwudwo kɔma ye.—Mat. 21:9; Luka 13:35.

8. Koraka Yesu ba aseɛ he aso ne, nzuati yeɛ Yehowa hane kyɛ ‘ye dumaa la ye so’ ɔ? (Ɛksadɔso 23:​20, 21)

⁸ Bible ne frɛ Yesu Edwirɛ ne, ofikyɛ ye yeɛ Yehowa nate ye so fa akwangyerɛ ma abɔfo bɔ bɛwɔ anwuro, ɔne mmenia bɔ bɛwɔ aseɛ he aso ɔ. (Yoh. 1:​1-3) Mmerɛ bɔ né Yisraelfoɛ nemɔ nate ɛserɛ so ne, ɔkɔyɛ kyɛ Yesu yeɛ ole abɔfo bɔ Yehowa somane ye maa olili benyunu ne. Yehowa maa Yisraelfoɛ nemɔ nwuni bɔ yeti yeɛ odikyɛ betie sɔ abɔfo ne ɔ. Ɔhane kyɛ: “Ofikyɛ me dumaa la ye so.”a (Kenga Ɛksadɔso 23:​20, 21.) Bɔ yeti yeɛ Yehowa hane sɔ yeɛ ole kyɛ, Yesu yeɛ ogyina Yehowa gyanu dwudwo ma ye ɔ. Afei, ye yeɛ ɔmaa ebiala nwu ye kyɛ Yehowa dumaa ne te krongron ɔ.

“BABA, HYƐ WƆ DUMAA ANIMNYAM”

9. Sɛɛ yeɛ né Yehowa dumaa nanwo hia Yesu ɔ? Kyirekyire nu.

⁹ Kyɛbɔ yalimoa yanwu ye ne, koraka Yesu ba aseɛ he aso ne po, né Yehowa dumaa nanwo hia ye. Ɛhene ati mmerɛ bɔ ɔwale aseɛ he aso ne, nikyeebiala bɔ ɔyɛle ne, ɔfa hyirele kyɛ dumaa nanwo hia ye paa. Waha kãa maa Yesu yie ye adwuma wɔ aseɛ he aso ne, ɔhahyirele Yehowa kyɛ: “Baba, hyɛ wɔ dumaa animnyam.” Ɛberɛ nala, ye Baba fale komviɛ pirikua lɛle so fili anwuro kyɛ: “Mahyɛ ye animnyam dada, na ngɔhyɛ ye animnyam bieku.”—Yoh. 12:28.

10-11. (a) Sɛɛ yeɛ Yesu hyɛle Yehowa dumaa ne animnyam ɔ? (Nea foto ne koso.) (b) Nzuati yeɛ odikyɛ bɛte Yehowa dumaa nanwo, na bɛsa ye ti ɔ?

¹⁰ Yesu koso hyɛle ye Baba dumaa ne animnyam. Ɔyɛle ye sɛ? Ɔmaa mmenia nwuni Yehowa subaen bɔ ɔyɛ nyemene, ɔne kyɛbɔ ɔyɛ ye nikyee nanwo dwirɛ. Nakoso nna ɛhene ngome yeɛ ɔyɛle ɔ, na mmom osa maa benwuni kyɛ odikyɛ bɛmaa Yehowa dumaa nanwo te, na bɛsa ye ti.b Ne Yesu pena kyɛ ye asuafoɛ nemɔ nwu ye kyɛ ɛhe anwo hia paa. Ɛhene ati, mmerɛ bɔ okyire bɛ kyɛbɔ bɛkɔbɔ mbaeɛ ne, ɔhane kyɛ: “Yɛ Baba bɔ ɛwɔ nyameɛso ɔ, Wɔ dumaa nwo te.”—Mat. 6:9.

¹¹ Yede, nzuati yeɛ odikyɛ bɛte Yehowa dumaa nanwo, na bɛsa ye ti ɔ? Ofikyɛ Satan Abɔnzam sɛkyele Yehowa dumaa ne wɔ Eden turo nanu dɔ, na ɔmaa Adam ne Hawa nyane adwene kyɛ Yehowa nga nahorɛ na ɔfa nikyee pá fea bɛ. (Gye. 3:​1-5) Bɔ ne Satan pena kyire yeɛ ole kyɛ, sɛ ebie tie Yehowa a, ɔngɔboka ye. Ɛhene amaa mmenia anya adwene kyɛ Nyameɛ tianu yɛse. Wɔ Yob aberɛ so ne koso, Satan hane kyɛ bɛbɔ bɛsõ Yehowa ne, bɔ benya befi ye berɛ nati yeɛ ɔmaa bɛsõ ye ɔ. Osa fabokale so kyɛ, ɔdɔ bɔ bele bɛma ye ne, offi b’ahone nu. Yeti sɛ edwirɛ bie to bɛ a, bɛngɔsõ ye kõ. (Yob 1:​9-11; 2:4) Né ɔkɔhyɛ paa kora ne yanwu nahorɛ bɔ ɔwɔ edwirɛ nanu ɔ, kyɛ ebiaa Yehowa yeɛ ɔnga nahorɛ anaa Abɔnzam.

“MEFA ME NGOA METO BERƐ”

12. Ɔnate kyɛ ne Yehowa dumaa nanwo hia Yesu paa nati, nzu yeɛ ne okuro kyɛ ɔyɛ ɔ?

¹² Ɔnate kyɛ ne Yesu kuro Yehowa dwirɛ paa nati, ne ɔpena kyɛ ɔyɛ bɔ ɔkɔhora biala te ye dumaa nanwo, na osa sa ye ti. Yeti ɔhane kyɛ: “Mefa me ngoa meto berɛ.” (Yoh. 10:​17, 18) Ne Yehowa dumaa nanwo hia Yesu alaa maa ne okuro kyɛ owu fa te sɔ dumaa nanwo po.c Adam ne Hawa bɔ bɛte mmenia bɔ belimoa ne, ne bɔne biala nne bɛnwo. Nakoso, bɛkakyili besi bɛmane Yehowa, na bɛɛtale Satan si. Yesu de, wanyɛ sɔ, na mmom ne okuro kyɛ ɔba aseɛ he aso bakyire kyɛbɔ osi kuro Yehowa dwirɛ ɔ. Ɔyɛle sotie mane Yehowa wɔ nikyeebiala nu fahyirele sɔ. (Heb. 4:15; 5:​7-10) Osa lili nahorɛ oodwuli kyɛ behuni ye wɔ asɛnnua naso ɔ.—Heb. 12:2.

13. Yesu yeɛ né ɔfata paa kyɛ ɔmaa yenwu kyɛ Satan te ngondomboniɛ ɔ, nzuati ɔ? (Nea foto ne koso.)

¹³ Kyɛbɔ Yesu si bɔle ye bra ne, ɔnate so hyirele kyɛ, Satan mmom yeɛ ɔnga nahorɛ ɔ, na ɔtte Yehowa! (Yoh. 8:44) Yesu de, ɔse Yehowa tra ebiala. Yeti edwirɛ bɔ Satan hatole Yehowa so ne, sɛ né ɔte nahorɛ a, ahaa Yesu konwu ye. Ɛhene ati, Yesu sili ye hue kyɛ ɔkɔta Yehowa si, na wate ye dumaa nanwo. Mmerɛ po bɔ ɔɔyɛle kyɛ Yehowa ayakyi ye nu ne, né okuro kyɛ ɔkɔhɔso koli nahorɛ kɔma ye Baba koodwu ewue nu, tra kyɛ ɔkɔkakyi ye si kɔma ye ɔ.—Mat. 27:46.d

“MAYIE ADWUMA BƆ ƐFA MANE ME KYƐ NYƆ NE”

14. Ɔnate nahorɛ bɔ Yesu lili nati, akatuaa beni yeɛ Yehowa fa mane ye ɔ?

¹⁴ Kɔngɔen bɔ aleɛ kye maa bekũ Yesu ne, ɔhane ye wɔ ye mbaeɛ nanu kyɛ: “Mayie adwuma bɔ ɛfa mane me kyɛ nyɔ ne.” Né odé di kyɛ sɛ ɔkɔso di nahorɛ ma Yehowa a, okoyira ye. (Yoh. 17:​4, 5) Yehowa koso amma yesa anzi ase, ofikyɛ wamma wanga ewue kumaa nu. (Aso. 2:​23, 24) Otingyele Yesu, na ɔmane ye poos kandinga wɔ anwuro dɔ. (Flp. 2:​8, 9) Yesi ase ne, Yesu hyɛle yebo lili Nyameɛ Ahennie naso hene. Yede, nzu yeɛ sɔ Ahennie ne kɔyɛ ɔ? Mbaeɛ bɔ Yesu hyirele ye asuafoɛ nemɔ kyɛ bɛbɔ ne, ɔmaa yenya ɛhe anwo mmuayɛɛ. Ɔhane kyɛ: “W’ahennie ɔbra, Ma w’apɛdeɛ yɛ berɛ wɔ aseɛ so, kyɛbɔ ɔte wɔ anwuro ne.”—Mat. 6:​10, NWT.

15. Nzu bieku yeɛ Yesu kɔyɛ ɔ?

¹⁵ Ɔngɔhyɛ, Yesu ne Nyameɛ pɔfoɛ mɔ kɔhõ wɔ Amagedon kõɛ nanu, na ɔkɔsɛkye bɛ. (Nye. 16:​14, 16; 19:​11-16) Ɛhene si ne, okogyi Satan kɔto “kumaa kuronguronn” nanu, kyire kyɛ ɔkɔyɛ tekyɛ bɔ wawu bɔ ɔngora hwee yɛ ne. (Nye. 20:​1-3) Afei Yesu kɔfa asomdwee kɔwa aseɛ he aso mukoraati, na waye bɔne wafi sona nwo wɔ ye Afoɛ Apee Ahennie nanu ne. Okotingye bɛbɔ bawu ne, na ɔkɔmaa aseɛ ne kɔyɛ paradise. Sɛ ɔba sɔ a, bɔ Yehowa abɔ yetianu ne mukoraati kɔwa nu!—Nye. 21:​1-4.

16. Yesu Afoɛ Apee Ahennie ne si ne, nzu yeɛ okosi ɔ?

¹⁶ Yesu Afoɛ Apee Ahennie ne si ne, nzu yeɛ okosi ɔ? Sɔ mmerɛ ne, bɔne bɔ ɔwɔ sona nwo ne, ne ye mukoraati afi berɛ. Yeti yenwo ngohia kyɛ mmenia kɔsrɛ Yehowa kyɛ ogyina Yesu wue naso fa bɛ bɔne hyɛ bɛ kõ. Yeɛ bengohia ebie bɔ okogyina bɛ gyanu kyɛ sɔfo panyi kɔsrɛ kɔma bɛ wɔ Yehowa nyunu ɔ. Afei ewue bɔ ɔte yɛ ‘pɔfoɛ bɔ ɔpɛ ye bo koraa ne, bekoli ye so ngonim.’ Bɛbɔ bawu ne koso, né batingye bɛ, na bɔne ngɔwa ebiala nwo kõ.—1 Kor. 15:​25, 26.

17-18. (a) Afoɛ Apee Ahennie ne si ne, nzu yeɛ okosi ɔ? (b) Sɛ mmerɛ bɔ Yesu kɔfa koli bia ne ba ayieleɛ a, nzu yeɛ ɔkɔyɛ ɔ? (1 Korintofoɛ 15:​24, 28) (Nea foto ne koso.)

¹⁷ Sɛ Yesu Afoɛ Apee Ahennie ne ba ayieleɛ a, nzu bieku yeɛ okosi ɔ? Sɔ mmerɛ ne, nikyee titire bie kɔhɔso. Yeɛ ole kyɛ, edwirɛ bɔ Satan hatole Yehowa so fa sɛkyele ye dumaa ne, ne banwu nahorɛ bɔ ɔwɔ nu ɔ. Atee beni aso? Eden turo nanu berɛ ne, Satan hane kyɛ Yehowa nga nahorɛ, na onguro mmenia bɔ odi bɛso ne dwirɛ. Ofi sɔ mmerɛ ne, bɛbɔ bedi nahorɛ bɛma Yehowa ne, bayɛ bɔ bɛkɔhora biala kyɛ bɛkɔmaa mmenia konwu ye kyɛ bɔ Satan hane ne, ɔtte nahorɛ. Yeti oodwu kyɛ Afoɛ Apee Ahennie ne kɔwa ayieleɛ ne, ne Yehowa dumaa nanwo ate bɔkɔɔ, na né wamaa ebiala anwu ye kyɛ ɔte yɛ Baba bɔ okuro yɛ dwirɛ paa ɔ.

¹⁸ Yeti okodwu sɔ mmerɛ ne, ne ebiala anwu ye kyɛ Satan te ngondomboniɛ. Yede, sɛ mmerɛ bɔ Yesu kɔfa koli bia ne ba ayieleɛ a, nzu yeɛ ɔkɔyɛ ɔ? Aso okosuesua Satan, na wadwɔso watia Yehowa anaa? Ɔngɔyɛ sɔ lle! (Kenga 1 Korintofoɛ 15:​24, 28.) Yesu kɔkakyi Ahennie ne kɔma ye Baba, na wabrɛ yenwo ase wawura yebo. Yede ɔtte kyɛ Satan, na mmom ɔdɔ Yehowa, yeti ɔngɔyɛ se ngɔma ye kyɛ ɔkɔkakyi nikyeebiala kɔma ye ɔ.

19. Yehowa dumaa ne, sɛɛ yeɛ yenwo hia Yesu ɔ?

¹⁹ Ɔnyɛ yɛ nwanwa kyɛ ne Yehowa kuro kyɛ ɔkɔfa ye dumaa ne kɔma Yesu ɔ! Ofikyɛ Yesu hyirele kyɛ amba, ɔse ye Baba yé paa tra ebiala. Yede, Yehowa dumaa ne, sɛɛ yeɛ yenwo hia Yesu ɔ? Bɔ ɔte yeɛ ole kyɛ, onni yenwo angorɛ koraa. Yesɔ nati, ne okuro paa kyɛ okowu kɔma sɔ dumaa ne po. Afei koso, sɛ ye Afoɛ Apee Ahennie ne ba ayieleɛ a, ɔkɔkakyi nikyeebiala kɔma Yehowa. Yede, yɛkɔyɛ sɛɛ ne yasuesua bɔ Yesu yɛle ne? Yekonya yenwo mmuayɛɛ wɔ adesua bɔ oli berɛ nanu.