Kɔso Nya Ɔdɔ Ma Yehowa Ɔne Aliemaamɔ

1. Ɛhyɛle yebo kyɛ esũa Bible ne, nahorɛ dwirɛ benimɔ yeɛ enwuni ɔ?

EDWIRƐ benimɔ yeɛ ɛkae mmerɛ bɔ ɛhyɛle yebo kyɛ esũa Bible ne ɔ? Ebia mmerɛ bɔ enwuni kyɛ Nyameɛ le dumaa ne, ɔyɛle wɔ nwanwa. Afei enwuni kyɛ Nyameɛ nyɛ mmenia ayayadeɛ wɔ Abɔnzam sẽe nu, na ɛhẽne maa w’ahõne tɔle wɔ kunu. Afei koso, mmerɛ bɔ ɛtele yebo kyɛ ekosá konwu w’adɔfo bɔ bawuwu ne biekũ wɔ Paradise aseɛ so ne, ɔmaa wɔnye gyele paa.

2. Ɛhyɛle yebo kyɛ esũa Bible ne, ngɔsoɛ beni yeɛ enyane ɔ? (Ɛfesofoɛ 5:1, 2)

² Mmerɛ bɔ ɛhyɛle yebo kyɛ esũa Bible ne, enyane ɔdɔ mane Yehowa. Ɔnate sɔ ɔdɔ bɔ enya mane Yehowa nati, ɛhyɛle yebo kyɛ ɛfa bɔ asũa ne bɔ wɔ bra. Afei, Bible ne bokale wɔ maa esisili gyinayɛɛ pá, ɛsesãne wɔ subaen, na ɛyerele wɔnwo kyɛ ɛkɔyɛ bɔ Nyameɛ kuro ɔ. Ɛhe mukoraati kyire kyɛ, né ɛpena kyɛ ɛsuesũa Yehowa, yɛ Baba bɔ ɔwɔ anwuro ne, kyɛbɔ akwalaa suesũa ye awofoɛ bɔ ɔdɔ bɛ ne.—Kenga Ɛfesofoɛ 5:1, 2.

3. Edwirɛ beni yeɛ yɛkɔhora yekobisa yɛnwo ɔ?

³ Yenu biala kɔhora kobisa yenwo kyɛ: ‘Ofi mmerɛ bɔ mmale asafo nanu ne, nningyein bɔ né meyɛ mefa mekyire kyɛ medɔ Yehowa ne, aso mayakyi anaa? Ofi mmerɛ bɔ mmɔle asu ne, kyɛbɔ medɔ Yehowa ɔne aliemaamɔ ne, wahɔ ase anaa?’ “Ɔdɔ bɔ elili moa” nya mane Yehowa ɔne aliemaamɔ ne, sɛ enwu kyɛ wahɔ ase a, nnɛmaa w’abanu bu. Sɔ dwirɛ he bie tole tete Kristofoɛ nemɔ. Nakoso Yesu hɔleso nyane bɛnwo aboterɛ, na ɔbokale bɛ. Sɔ ala yeɛ yɛkoso, ɔkɔboka yɛ ɔ. (Nye. 2:4, 7) Ɔdɔ bɔ né yele ye ahyɛaseɛ ne, Yesu se paa kyɛ sɛ yɛyere yɛnwo a, yekosá yekonya ye biekũ.

4. Nzu yeɛ adesũa he kɔmaa yekonwu ye ɔ?

⁴ Wɔ adesũa he anu ne, yekonwu bɔ yɛyɛ a, ɔkɔmaa yɛkɔhɔso yekonya ɔdɔ yɛkɔma Yehowa ɔne aliemaamɔ ɔ. Afei yekosá yekonwu nhyiraa bɔ yekonya ye mmerɛ bɔ yayɛ sɔ ne.

KƆSO NYA ƆDƆ MA YEHOWA

5-6. Ɔhaw ahoroɛ benimɔ yeɛ ɔtole Pɔɔlo wɔ Yehowa sõen nu ɔ, nakoso nzu yeɛ ɔbokale ye maa ɔhɔleso so sõne Yehowa ɔ?

⁵ Somafoɛ Pɔɔlo nye gyele paa wɔ Yehowa sõen nu, nakoso ɔhaw pẽe yeɛ ɔtole ye ɔ. Né Pɔɔlo taa tu atẽe paa. Sɔ mmerɛ ne, né ɔlla ase kyɛ ebie kotu atẽe ɔ. Sɛ odwu mmerɛ bie ná Pɔɔlo tu atẽe a, né ɔtaa “di amia wɔ nzue so” ɔne “awuefoɛ sanu.” Afei koso, bɛbɔ né bɛnye ngye edwirɛ bɔ Pɔɔlo kã nanwo ne, né bɛkora bɛbo ye. (2 Kor. 11:23-27) Sɛ ɛhẽne la ahãmeɛ a, adwuma serɛ bɔ né Pɔɔlo yɛ ne, né aliemaa biemɔ bɔ bɛwɔ asafo nanu ne nye nzɔ, na mmom né bɛkekã yenwo dwirɛ tɛ́ɛ.—2 Kor. 10:10; Flp. 4:15.

⁶ Ɔhaw bɔ ɔtole Pɔɔlo ne mukoraati sĩ ne, nzu yeɛ ɔbokale ye maa ɔhɔleso sõne Yehowa ɔ? Né Pɔɔlo sũa Tworɔnzɛm ne paa, na ɛhẽne maa onwuni Yehowa subaen ahoroɛ ne. Afei koso, onwuni kyɛbɔ né Yehowa aboka ye wɔ ye asetena nu ɔ. Ɛhe mukoraati bɔ Pɔɔlo yɛle ne, ɔmaa onwuni kyɛ Yehowa ye Nyameɛ kuro ye dwirɛ. Ɛhẽne yeɛ ɔbokale ye maa ɔhora gyinane ɔhaw bɔ ɔtole ye ne noa ɔ. (Rom. 8:38, 39; Ɛfe. 2:4, 5) Ɛhe maa Pɔɔlo hɔleso nyane ɔdɔ mane Yehowa, na ɔyele ɔdɔ ali hyirele anwoteefoɛ nemɔ.—Heb. 6:10.

7. Sɛ yɛkɔhɔso yekonya ɔdɔ yɛkɔma Yehowa a, nzu yeɛ odikyɛ yɛyɛ ɔ?

⁷ Sɛ yɛkɔhɔso yekonya ɔdɔ yɛkɔma Yehowa a, odikyɛ yɛyere yɛnwo yesũa Bible ne. Sɛ ɛkenga Bible ne a, to wɔ boase dwenedwene bɔ akenga nanwo. Afei, bɔ akenga ne, nea kyɛbɔ ɔfa Yehowa nwo ɔ. Ɛhẽne sĩ ne, bisa wɔnwo kyɛ: ‘Edwirɛ he bɔ makenga ne, sɛɛ yeɛ ɔmaa menwu kyɛ Yehowa kuro me dwirɛ ɔ? Na nzu yeɛ mekoso ngɔyɛ ngɔfa ngohyire kyɛ medɔ Yehowa ɔ?’

8. Sɛ yɛbɔ mbaeɛ a, sɛɛ yeɛ ɔkɔboka yɛ maa yɛkɔhɔso yekonya ɔdɔ yɛkɔma Nyameɛ ɔ?

⁸ Nikyee foforɛ bɔ ɔkɔmaa yɛkɔhɔso yekonya ɔdɔ yɛkɔma Yehowa yeɛ ole kyɛ, yɛkɔhã y’ahõne nu dwirɛ yekohyire ye, mmerɛ biala bɔ yɛbɔ mbaeɛ ne. (Edw. 25:4, 5) Sɛ yɛyɛ sɔ a, Yehowa koso kɔmaa yekonya yɛ mbaeɛ nanwo mmuayɛɛ. (1 Yoh. 3:21, 22) Aliemaa brasua bie bɔ bɛfrɛ ye Khanh, bɔ ɔwɔ Asia ne hãne kyɛ: “Ahyɛaseɛ ne, Yehowa nwo nikyee bɔ né masũa ne yeɛ ɔmaa nyane ɔdɔ mmane ye ɔ. Nakoso, mmerɛ bɔ nwuni kyɛ wama me mbaeɛ nanwo mmuayɛɛ ne, ɛhẽne maa ngɔleso nyane ɔdɔ mmane ye paa. Yeti, mmɔle mmɔden kyɛ ngɔyɛ bɔ Yehowa kuro ɔ.”b

KƆSO NYA ƆDƆ MA MMENIA

9. Nzu yeɛ Timoteo yɛle bɔ okyire kyɛ né okuro aliemaamɔ dwirɛ ɔ?

⁹ Mmerɛ bɔ Pɔɔlo ɔɔyɛle Kristoniɛ ne sĩ ne, oyiale abrandeɛ bie bɔ bɛfrɛ ye Timoteo. Né Timoteo dɔ Yehowa paa, na né okuro mmenia dwirɛ koso. Ɛhẽne ati, Pɔɔlo hãhyirele Filipifoɛ nemɔ kyɛ: “Ebiala nne berɛ bɔ ɔne m’adwene te kõ kyɛ ye, bɔ ɛmɔ yéeyɛlɛ hia ye ɔ.” (Flp. 2:20) Ɔwɔ nu kyɛ né Timoteo se dwudwo, nakoso nna ɛhẽne anwo dwirɛ yeɛ né Pɔɔlo kã ɔ. Mmom kyɛbɔ né Timoteo si kuro aliemaamɔ dwirɛ ne, yeɛ né ɔkã ɔ. Ɛhe ati, mmerɛ biala bɔ aliemaamɔ kɔte kyɛ Timoteo baasra bɛ ne, né bɛnye agye paa.—1 Kor. 4:17.

10. Nzu yeɛ Anna ne ohũ yɛle bɔ okyire kyɛ bekuro aliemaamɔ dwirɛ ɔ?

¹⁰ Yɛ koso, odikyɛ yɛnea kyɛbɔ yɛkɔboka yeliemamɔ ɔ. (Heb. 13:16) Anna, bɔ yalimoa yahã yenwo dwirɛ wɔ adesũa bɔ wapɛ nu nanu ne, ɛmɔma yesa yɛnea ye dwirɛ ne biekũ. Mmerɛ bie, nzue pirikua bie tɔle, na otuli mvrama paa wɔ nekaa bɔ bɛwɔ ne. Ɛhẽne sĩ ne, Anna ne ohũ hɔle aliemaa bie awuro. Mmerɛ bɔ bedwuli berɛ ne, benwuni kyɛ nzue ne atu aliemaa ne sua naso. Afei, né nzue ne ahwi afa bɛ ndaadeɛ so maa ye mukoraati ayɛ fĩɛ. Anna hãne kyɛ: “Mmerɛ bɔ yenwuni sɔ ne, yɛsesale bɛ ndaadeɛ ne yɛɛpole, na yɛtole ye mukoraati so yɛbobɔle ye kama yɛfa yɛbrɛle bɛ. Sɔ nikyee bɔ yɛyɛle ne, né y’adwene yɛ yɛ kyɛ ɔte nikyee kãa bie, nakoso ɔhãne sɔ aliemaa ne, ɔne ye abusũa ne ahõne paa. Ɛhe ati, sɔ abusũa ne afa mene me hũ adamvoa wadwu ɛnnɛ.” Né Anna ne ohũ kuro aliemaamɔ dwirɛ, na ɛhẽne yeɛ ɔhãne bɛ maa bɛbokale sɔ abusũa ne ɔ.—1 Yoh. 3:17, 18.

11. (a) Sɛ yɛyɛ mmenia pá a, ɔkã bɛ sɛ́? (b) Kyɛbɔ Anyandera 19:17 maa yenwu ye ne, sɛ yɛyɛ mmenia pá a, nzu yeɛ Yehowa kɔyɛ kɔma yɛ ɔ?

¹¹ Sɛ yefi y’ahõne nu yɛyɛ nningyein biemɔ yɛma yeliemamɔ yɛfa yekyire kyɛ yekuro bɛ dwirɛ a, ɔmaa bɛnye gye. Afei koso, ɔmaa benwu kyɛ yesuesũa Yehowa. Sɛ yɛyere yɛnwo yɛyɛ sɔ a, aliemaamɔ wora ngofi bɔ yayɛ yama bɛ ne llé. Aliemaa brasua Khanh, bɔ yalimoa yahã yenwo dwirɛ ne, ɔkae kyɛbɔ aliemaamɔ bokale ye ne. Ɔhãne kyɛ: “Aliemaa mmrasua biemɔ bokale me paa. Né bɛbafa me befi awuro maa mene bɛ kɔ asɛnga, na sɛ odwu eyia a, né yɛkɔtena nekaa bie yedidi. Afei, sɛ yɛpɔno asɛnga a, né besa bɛfa me bɛkɔ awuro. Meda bɛ ase paa wɔ bɔ bɛyɛ bɛmane me nanwo. Manwu kyɛ, né ɔlla ase mma sɔ aliemaa nemɔ kyɛ bɛkɔyɛ sɔ. Nakoso ɔnate kyɛ né bekuro me dwirɛ nati, ɛhẽne yeɛ ɔmaa befi b’ahõne nu bɛyɛle sɔ ɔ.” Nahorɛ dwirɛ yeɛ ole kyɛ, nna mmenia mukoraati yeɛ sɛ ebie yɛ bɛ pá a, bɛkae bɛda sona ne ase ɔ. Bɛbɔ bɛbokale Khanh ne, ɔhãne bɛnwo dwirɛ kyɛ: “Bɛbɔ bɛbokale me ne, menze bɛ mukoraati awuro, ahãa ngɔhɔ ngɔɔla bɛ ase. Nakoso, Yehowa de ɔse bɛ, yeti mebɔ Yehowa mbaeɛ kyɛ oyira bɛ mukoraati.” Bɔ Khanh hãne ne te nahorɛ. Yehowa de, nikyee kãa bɔ yefi y’ahõne nu yɛyɛ yɛfa yɛboka mmenia ne, onwu ye, na obu ye kyɛ yayɛ yama ye. Yeti, ɔkɔma yɛ akatuaa wɔ bɔ yayɛ nanwo.—Kenga Anyandera 19:17.

12. Mmrandeɛ bɔ bɛwɔ asafo nanu ne, bɛkɔyɛ sɛɛ né bahyire kyɛ bekuro aliemaamɔ dwirɛ? (Nea foto ne koso.)

¹² Sɛ ɛte abrandeɛ a, ɛkɔyɛ sɛɛ né ahyire kyɛ ekuro aliemaamɔ dwirɛ, na ɛpena kyɛ ɛboka bɛ? Abrandeɛ bie bɔ bɛfrɛ ye Jordan bisale asafo nu panyi bie kyɛ, aliemaamɔ bɔ bɛwɔ ye asafo nanu ne, nzu yeɛ ɔkɔhora kɔyɛ kɔfa kɔboka bɛ ɔ? Asafo nu panyi ne kãmvole Jordan wɔ edwirɛ bɔ obisale ye nanwo. Afei, otuli Jordan foɛ kyɛ ɔkɔhora kɔyɛ nningyein pẽe kɔfa kɔboka aliemaamɔ. Ɔhãhyirele Jordan kyɛ ɔkɔhora kodwu Ahennie Asa so ndɛ, ná wayɛ bɛbɔ bɛba ne akwaaba. Ebiekũ koso, ɔmaa onwuni kyɛ odikyɛ osũa nikyee, kyɛbɔ ɔkɔyɛ a, ɔkɔhora kɔma mmuayɛɛ kɔhyɛ aliemaamɔ ngunaen ɔ. Asafo nu panyi ne sá hyɛle ye ngunaen kyɛ ɔbɔ mmɔden kyɛ ɔne asɛnga kue bɔ ɔwɔ nu ne kɔhɔ asɛnga daa, ná ɔyɛ nningyein pɔtẽe bie fa boka aliemaamɔ. Sɔ afutuo bɔ Jordan fa yɛle adwuma ne, ɔbokale ye, na ɔmaa onyane ɔdɔ mane aliemaamɔ paa. Jordan anwu kyɛ, sɛ ebie tte asafo nu somvoɛ pó a, ɔkɔhora kɔhyɛ yebo kɔboka aliemaamɔ. Afei, sɛ ɔbayɛ asafo nu somvoɛ koso a né oyielle, na mmom odikyɛ ɔkɔso boka bɛ.—1 Tim. 3:8-10, 13.

13. Nzu yeɛ ɔbokale aliemaa bie bɔ bɛfrɛ ye Christian maa osá ɔɔyɛle asafo nu panyi ɔ?

¹³ Sɛ yenwo atẽe bɔ né ele ye kyɛ asafo nu somvoɛ anaa asafo nu panyi ne afi wɔsa a, nzu yeɛ odikyɛ ɛyɛ ɔ? Kae kyɛ adwuma serɛ bɔ ɛyɛle, ɔne ɔdɔ bɔ né ele ma aliemaamɔ ne, Yehowa wora filli. (1 Kor. 15:58) Afei koso mmɔden bɔ ɛbɔ kyɛ ɛkɔhɔ so konya ɔdɔ kɔma Yehowa ne, onwu ye mukoraati. Né Christian te asafo nu panyi. Nakoso, nziɛen, yenwo atẽe bɔ ɔte sɔ ne fili yesa, na ɛhẽne maa ye abanu buli paa. Ɔhãne kyɛ: “Ɔnate kyɛ medɔ Yehowa nati, ngɔyere menwo ngɔsõ ye, ɔmva yenwo kyɛ nnde asafo nu panyi kõ ne.” Nziɛen, Christian ɔɔyɛle asafo nu panyi biekũ. Ɔhãne kyɛ: “Mmerɛ bɔ bɛhãne kyɛ nza nyɛ asafo nu panyi ne, né me kunu tete me. Nakoso, nwuni kyɛ Yehowa yeɛ wanwu me anwumvoin bɔ wasa wafa yenwo atẽe bɔ ɔte sɔ ne wama me ɔ. Yeti ngɔyɛ sɔ adwuma ne ngɔfa ngohyire kyɛ medɔ Yehowa, na mekuro aliemaamɔ dwirɛ.”

14. Edwirɛ bɔ aliemaa brasua bɔ ofi Georgia ne hãne ne, nzu yeɛ esũa fi nu ɔ?

¹⁴ Bɛbɔ bɛsõ Yehowa ne, bekuro ebiala dwirɛ. (Mat. 22:37-39) Ɛhe anwo nneasoɛ yeɛ ole edwirɛ bɔ aliemaa brasua bie bɔ bɛfrɛ ye Elena bɔ ɔwɔ Georgia ne hãne ne. Ɔhãne kyɛ: “Mmerɛ bie bɔ wapɛ nu ne, nikyee kõmaapɛ yeɛ né ɔkã me maa mekɔ asɛnga ɔ. Ɛhẽne yeɛ ole kyɛ medɔ Yehowa. Mmerɛ bɔ ngɔleso nyane ɔdɔ bɔ ɔte sɔ mane Yehowa ne, ɔmaa nyane ɔdɔ mane mmenia koso. Ɛhẽne ati, sɛ mebaahɔ asɛnga a, mebɔ mmɔden medwene ɔhaw bɔ mmenia fa nu nanwo, kyɛbɔ ɔkɔyɛ a ngɔhã edwirɛ bɔ ɔkɔhã bɛ ahõne ɔ. Mmerɛ bɔ nyɛle sɔ ne, ɔmaa menye gyele yenwo kyɛ ngɔboka bɛ.”—Rom. 10:13-15.

SƐ YƐYƐ NNINGYEIN BIEMƆ YƐFA YƐBOKA MMENIA A, YENYA NHYIRAA

15-16. Kyɛbɔ yenwu ye wɔ foto nanu ne, sɛ yefi y’ahõne nu yɛboka aliemaamɔ a, nzu yeɛ ofi nu ba ɔ?

¹⁵ Sɛ yefi y’ahõne nu yɛboka aliemaamɔ yɛfa yekyire kyɛ yɛdɔ bɛ a, nná bɛ ngome yeɛ ɔboka bɛ ɔ. Mmerɛ bɔ COVID-19 anwonyerɛ ne hyɛle yebo ne, aliemaa bie bɔ bɛfrɛ ye Paolo, ɔne ɔye yɛle b’adwene kyɛ bɛkɔboka aliemaamɔ mmrasua bɔ b’afoɛ ahɔ anyunu bɔ bɛwɔ asafo nanu ne. Bɔ bɛyɛle yeɛ ole kyɛ, bɛbokale bɛ maa benwuni kyɛbɔ bɛkɔfa bɛ fon ɔne bɛ tablɛt bekoli mmenia adanzeɛ ɔ. Sɔ aliemaa mmrasua nemɔ nu kõ de, né ɔyɛ se ma ye paa kyɛ ɔkɔfa fon ne koli adanzeɛ ɔ. Nakoso ayieleɛ koraa ne, ɔhora yɛle sɔ, na ɔfale fon ne lili ye abusũafoɛ adanzeɛ. Ɔtole yesa frɛle bɛ kyɛ bɛbra maa bɛkae Yesu wue ne. Aliemaa brasua ne abusũafoɛ 60 yeɛ bɛfale video call so bɛwale dwumadie naso ɔ. Yeti mmɔden bɔ Paolo ne ɔye bɔle kyɛ bɛkɔboka aliemaa brasua ne, ɔbokale mmeni pẽe. Nziɛen, aliemaa brasua ne hworɔle krataa ɔɔmane Paolo kyɛ: “Meda wɔ ase paa kyɛ enyane yɛbɔ y’afoɛ ahɔ anyunu nanwo aboterɛ ná ɛbokale yɛ ɔ. Amaa manwu kyɛ Yehowa dwene yɛnwo paa, na mewora ngofi mmokalɛ bɔ Yehowa nate wɔ so famane yɛ ne llé.”

¹⁶ Sɔ dwirɛ ne maa Paolo nwuni kyɛ, sɛ ele nimdeɛ anaa adom akyɛdeɛ bie a, odikyɛ ɛfa boka aliemaamɔ. Sɛ ɛyɛ sɔ a yeɛ okyire kyɛ ekuro bɛ dwirɛ ɔ. Paolo toale ye dwirɛ naso kyɛ: “Dwudwolɛ ahoroɛ bɔ mmane mmerɛ bɔ né nde manzin soneafoɛ ne, ebia aliemaamɔ wora afi. Nakoso, nningyein pɔtẽe bɔ nyɛ mva mmokale bɛ ne de, bɛkae.”

17. Sɛ yefi y’ahõne nu yɛyɛ nikyeebie yɛfa yekyire kyɛ yekuro aliemaamɔ dwirɛ a, sɛɛ yeɛ ɔboka yɛ bɔbɔ ɔ?

¹⁷ Sɛ yefi y’ahõne nu yɛyɛ nikyee bie yɛfa yekyire kyɛ yekuro aliemaamɔ dwirɛ a, ɔboka yɛ bɔbɔ koso. Jonathan bɔ ɔwɔ New Zealand ne nwuni kyɛ sɔ dwirɛ ne te nahorɛ. Fue eyia bie, onwuni kyɛ atẽepakyelɛniɛ bie ngome nate asɛnga nu. Yeti Jonathan yɛle ye adwene kyɛ ɔkɔyɛ nhyehyɛɛ na sɛ odwu Fue eyia biala a, ɔne atẽepakyelɛniɛ ne ahɔ asɛnga. Sɔ nikyee bɔ Jonathan yɛle ne, né ɔnze kyɛ ɔkɔboka ye bɔbɔ. Jonathan hãne kyɛ, “Sɔ mmerɛ ne, né mekɔ asɛnga a, menye ngye. Nakoso mmerɛ bɔ nwuni atẽe bɔ aliemaa ne fa so kyirekyire ne, ɔhãne m’ahõne, na ɔmaa menye gyele asɛnga adwuma nanwo. Ɛhẽne ati, nyɛle m’adwene kyɛ ngɔyere menwo ngɔyɛ asɛnga adwuma ne. Kesaalae sɔ atẽepakyelɛniɛ ne, waayɛ me damvo paa, na ɔboka me maa mesõ Yehowa yé. Asɛnga adwuma ne koso, ye yɛlɛ ayɛ me fɛ́.”

18. Nzu yeɛ Yehowa pena kyɛ yɛyɛ ɔ?

¹⁸ Yehowa pena kyɛ yɛkɔso yenya ɔdɔ yɛma ye, na yekuro mmenia dwirɛ. Kyɛbɔ yanwu ye wɔ adesũa he anu ne, sɛ yɛkɔhɔso yekonya ɔdɔ yɛkɔma Yehowa a, sana yɛkenga Bible ne daa na yɛdwenedwene yenwo. Afei koso, odikyɛ yɛbɔ Yehowa mbaeɛ kyẽa biala. Aliemaamɔ koso, sɛ yɛyɛ nningyein pɔtẽe bie yɛfa yɛboka bɛ a, ɛhẽne yeɛ okyire kyɛ yekuro bɛ dwirɛ ɔ. Sɛ yɛkɔso yenya ɔdɔ yɛma Yehowa, ná yekuro aliemaamɔ dwirɛ a, ɛhẽne kɔmaa yekopingyé Yehowa paa, na yɛne aliemaamɔ afĩa kɔyɛ kama. Sɛ yɛyere yɛnwo yɛyɛ sɔ a, ɔkɔmaa yɛnye kɔgye daa.