Má Wɔnye La Berɛ Ná Angɔ Nzɔhwɛ Nu

1-2. (a) Kɔkɔbɔ beni yeɛ Yesu fa mane ye asuafoɛ nemɔ ɔ? (b) Nzu yeɛ ɔmaa asuafoɛ nemɔ nwati yakyili Yesu ɔ? (Nea foto ne koso.)

“SUNZUM ne kuro de, nakoso anwoɔnaen ne yɛ mmerɛ.”a (Mat. 26:41b) Yesu nate sɔ dwirɛ bɔ ɔhane naso hyirele kyɛ, ɔnate kyɛ bɔne wɔ yɛnwo nati, yɛkɔhora yekoli mvomsoɛ. Nakoso sɔ dwirɛ ne sa te kɔkɔbɔ ma yɛ. Yeɛ ole kyɛ, ɔnzɛkyɛ yede yɛnwo yedi soma. Koraka Yesu ka sɔ dwirɛ ne sɔ kɔngɔen ne, né ye asuafoɛ nemɔ alimoa ata ndaen kyɛ bɛngɔyakyi ye nu lle. (Mat. 26:35) Sɔ adwene bɔ benyane ne, né ɔte adwene pá. Nakoso né bɛnze kyɛ sɛ odwu bɔ ɔyɛ se a, bɛngɔhora yenoa gyina ɔ. Ɛhene ati yeɛ Yesu bɔle bɛ kɔkɔ kyɛ: “Ɛ́mɔwɛne ná ɛ́mɔbɔ mbaeɛ, ná ɛmɔangɔ nzɔhwɛ nu” ne.—Mat. 26:41a.

² Bɔ ɔyɛ aworabɔ yeɛ ole kyɛ, asuafoɛ nemɔ angora wɛne. Mmerɛ bɔ bɛhyele Yesu ne, nzu yeɛ osili ɔ? Bangora banni ndaen bɔ bɛtale naso. Ɔnate kyɛ banna bɛnwo so nati, esuronyi hane bɛ maa bemukoraati bɛyakyili ye berɛ bɛnwatili.—Mat. 26:56.

3. (a) Sɛ yɛkɔhɔso yekoli nahorɛ yɛkɔma Yehowa a, nzuati yeɛ ɔnzɛkyɛ yedé yɛnwo yedi soma ɔ? (b) Nzu yeɛ yekosusu yenwo wɔ adesua he anu ɔ?

³ Ɔnzɛkyɛ yedé yɛnwo yedi soma. Ɔwɔ nu, yasi yɛ hue kyɛ yɛngɔyɛ nikyee biala bɔ Yehowa nguro ɔ. Nakoso, yɛte mmenia bɔ bɔne wɔ yɛnwo ɔ; afei nningyein pee kɔhora kɔsɔ yɛ kɔnea. (Rom. 5:12; 7:​21-23) Yeti, sɛ yannea yé a yɛnye kɔwa yɛnwo so ne, né yayɛ bɔne. Sɛ yɛkɔhɔso yekoli nahorɛ yɛkɔma Yehowa ne Ɔwa ne a, afutue bɔ Yesu famane yɛ kyɛ yɛma yɛnye la berɛ ne, odikyɛ yɛfa yɛyɛ adwuma. Yekosusu kyɛbɔ yɛkɔyɛ sɔ nanwo wɔ adesua he anu. Bɔ olimoa ne, yɛkɔnea nningyein biemɔ bɔ odikyɛ yɛnea yɛnwo yé paa wɔ yenwo ɔ. Yesi ne, yɛkɔnea bɔ yɛkɔyɛ na yangɔ nzɔhwɛ nu ɔ. Afei yɛkɔnea kyɛbɔ yɛkɔhɔso yɛkɔmaa yɛnye kɔla berɛ ɔ.

NWU NEKAA BƆ ƐYƐ MMERƐ Ɔ

4-5. Bɔne biemɔ bɔ ebia yebu ye kyɛ ɔte kaa ne po, nzuati yeɛ odikyɛ yɛnea yé wɔ yenwo ɔ?

⁴ Bɔne biemɔ bɔ ebia yebu ye kyɛ ɔte kaa ne po, ɔkɔhora kɔsɛkye yɛne Yehowa afia, na ebia ɔkɔmaa yɛkɔɔyɛ bɔne pirikua po.

⁵ Yemukoraati yele nningyein biemɔ bɔ ɔkɔhora kɔfa yɛ kɔhɔ nzɔhwɛ nu ɔ. Nakoso, ole ebiala ne nningyein bɔ ɔsɔ ye nea kyɛ ɔɔyɛ bɔne ɔ. Ebie wɔ berɛ a, ɔyere yenwo kyɛ ɔkɔhwe yenwo kofi adwamamɔ nwo. Yeɛ ebie koso yere yenwo kyɛ ɔkɔyakyi abrabɔ fiɛ biemɔ tekyɛ ponografi nealɛ, ɔne ebie bɔ ɔtwetwe ye brienzua anaa brasua bɔ ɔfa yesa wurowura ye gyanu maa yenwo ba ɔ. Ebie koso suro mmenia, okuro fanwodie, ole ahone, ɔne pee bɔ ɔboka so ɔ. Yakobo hane kyɛ: “Sona bɔbɔ ye akɔnnɔ yeɛ odiedie ye ná ɔlakalaka ye oso ye nea ɔ.”—Yak. 1:14.

6. Nzu yeɛ odikyɛ yede yɛtonu ɔ?

⁶ Aso ɛse nningyein biemɔ bɔ ɛyɛ a, ɔsɔ wɔ nea anaa? Ɔyɛ suro paa kyɛ yekobu yɛnye yekogua sɔ nningyein naso, na yanya adwene kyɛ yɛde nikyeefee ngɔhora ngɔma yɛngɔyɛ bɔne. (1 Yoh. 1:8) Pɔɔlo hane kyɛ, ‘bɛbɔ bɛte sunzum nufoɛ ne’ po, sɛ bannea bɛnwo yé a, ɔkɔyɛ se kyɛ sɛ nzɔhwɛ bie to bɛ a, bɛkɔhora yenoa gyina ɔ. (Gal. 6:1) Yeti sɛ yɛneanea yenu na yenwu ye kyɛ mmerɛyɛlɛ bie wɔ yɛnwo a, odikyɛ yede yɛto nu.—2 Kor. 13:5.

7. Nzu yeɛ odikyɛ yɛmaa yɛnye kɔ yenwo paa ɔ? Ma yenwo nhwɛsoɛ.

⁷ Sɛ yenya yenwu nekaa bɔ yɛyɛ mmerɛ paa ne a, nzu yeɛ odikyɛ yɛyɛ ɔ? Ɔnzɛkyɛ yɛtenatena yenwo, na mmom odikyɛ yetu yenwo agyirɛ ndɛ! Ɛhe anwo nhwɛsoɛ yeɛ ole kyɛ tete ne, nekaa bɔ né pɔfoɛ mɔ fa wura kuro bie nu ndɛ paa yeɛ ole ye anoa. Yeti, né bɛmaa sogyafoɛ gyina berɛ mmerɛ biala fa bɔ yenwo waen. Sɔ ala yeɛ yɛkoso sɛ yenwu nekaa bɔ yɛyɛ mmerɛ a, odikyɛ yɛmaa yɛnye kɔ yenwo paa ɔ.—1 Kor. 9:27.

BƆ ODIKYƐ YƐYƐ NA YANGƆ NZƆHWƐ NU Ɔ

8-9. Abrandeɛ bɔ yenwo dwirɛ wɔ Anyandera yeti 7 ne, nzu yeɛ sɛ ɔyɛle a, ahaa ɔngɔyɛ sɔ bɔne pirikua ne ɔ? (Anyandera 7:8, 9, 13, 14, 21)

⁸ Yede, yɛkɔyɛ sɛɛ né yanea yenwo yé, na yangɔ nzɔhwɛ nu? Bɔ ɔtole abrandeɛ bɔ yenwo dwirɛ wɔ Anyandera yeti 7 nanu ne, ɛmɔma yɛnea bɔ yɛkɔhora yekosua yekofi nu ɔ. Sɔ abrandeɛ ne, ɔne brasua tuutuuniɛ bie bɔle adwaman. Ngyekyɛmuɛ 22 ne ka kyɛ, ‘ɛberɛ ne ala,’ abrandeɛ ne lili braa ne si. Nakoso, sɛ yɛnea ngyekyɛmuɛ ahoroɛ bɔ oli ɛhene nyunu ne a, yenwu ye kyɛ abrandeɛ ne tuli agyirɛ biemɔ kora yeɛ ngakangaka ɔkwaayɛ sɔ bɔne ne ɔ.

⁹ Sɔ agyirɛ bɔ abrandeɛ ne tuli ne, ebie yeɛ ole beni? Bɔ olimoa ne, ɔɔfale “nekaa bie bɔ opingye braa [tuutuuniɛ] n’awuro” mmerɛ bɔ né aleɛ asa ɔ. Afei, ɔfale atee bɔ ɔkɔ braa n’awuro berɛ naso. (Kenga Anyandera 7:​8, 9.) Asa koso, yenye bɔle braa naso ne, ahaa odikyɛ ɔtwe yenwo, nakoso wanyɛ sɔ, na mmom ogyinane berɛ maa ɔɔfele yenoa. Mmerɛ bɔ né braa ne ka kyɛ wabɔ asomdwee afɔleɛ ne, abrandeɛ ne gyinane berɛ tiele ye. Nakoso né ɔlakalaka ye maa onya adwene kyɛ ɔtte nnipa bɔneniɛ. (Kenga Anyandera 7:​13, 14, 21.) Sɛ abrandeɛ ne andu agyirɛ bɔ ɔyɛ suro hemɔ a, ahaa wangɔ sɔ nzɔhwɛ bɔ ɔmaa ɔyɛle bɔne nanu.

10. Mvomsoɛ bɔ abrandeɛ ne lili ne, nzu yeɛ ɔkɔhora kɔmaa ebie kɔyɛ sɔ ɛnnɛ ɔ?

¹⁰ Bible nu dwirɛ he maa yenwu bɔ ɔkɔhora kɔto bɛbɔ bɛso Yehowa nanu biala ɔ. Sɛ ebie yɛ bɔne pirikua bie a, ebia ɔkɔha kyɛ, “Ɛhe de ofuni me nu” anaa “Né menye nne menwo so koraa.” Nakoso sɛ sona ne susu bɔ wasi nanwo a, okonwu ye kyɛ olimoa tuli agyirɛ biemɔ bɔ né ɔttemaye, kora yeɛ ɔkwaayɛ sɔ bɔne ne ɔ. Ebie yeɛ ole kyɛ, ebia ɔfale yenwo bɔle mmenia bɔ bɛ bra asɛkye, ɔfale nningyein bɔ ɔttemaye gyele yenye, ɔhɔle nekaa bie bɔ ɔnzɛkyɛ Kristoniɛ kɔ, anaa wɛbsait biemɔ bɔ ɔnzɛkyɛ Kristoniɛ kɔ so ɔ. Afei koso, ebia né wayakyi mbaeɛ bɔlɛ, ɔngenga Bible ne ko, anaa wayakyi adesua ne asɛnga hɔlɛ po. Tekyɛ abrandeɛ bɔ yenwo dwirɛ wɔ Anyandera nwomaa nanu ne, sɛ sɔ sona ne kɔyɛ bɔne a, ɔngɔhora ngɔha kyɛ ‘ofuni ye nu’.

11. Nzu yeɛ odikyɛ yɛyɛ kyɛbɔ ɔkɔyɛ a, yɛngɔyɛ bɔne ɔ?

¹¹ Nzu yeɛ yesua yefi nu ɔ? Nna bɔne ne ngome yeɛ odikyɛ yɛtwe yɛnwo yefi yenwo ɔ, na mmom nningyein bɔ ɔkɔmaa yɛkɔɔyɛ sɔ bɔne ne koso boka ye. Sɔ pɛpɛɛpɛ yeɛ Solomon hane ɔ, mmerɛ bɔ ɔhane abrandeɛ ne, ɔne brasua tuutuuniɛ nanwo dwirɛ yiele ne. Ɔhane braa nanwo dwirɛ kyɛ: “Nnɛdi makyebu kɔfa ye atee so.” (Any. 7:25) Osa hane kyɛ: “Twe wɔ nwo fi sɔ brasua ne anwo, na nnɛpingye ye awuro anoa ne.” (Any. 5:​3, 8) Nahorɛ dwirɛ yeɛ ole kyɛ, nningyein bɔ ɔkɔmaa yɛkɔyɛ bɔne ne, sɛ yɛtwe yɛnwo yefi yenwo koraa a, ɔkɔboka yɛ paa.b Ebie yeɛ ole kyɛ nningyein biemɔ wɔ berɛ a, ahaa ɔtte mvomsoɛ kyɛ Kristoniɛ kɔyɛ ɔ, nakoso sɛ yenwu ye kyɛ ɔkɔsɔ yɛ kɔnea a, yede ɔnzɛkyɛ yɛyɛ.—Mat. 5:​29, 30.

12. Nzu yeɛ ne Yob asi ye hue kyɛ ɔkɔyɛ ɔ, na sɛɛ yeɛ ɔbokale ye maa wangɔ nzɔhwɛ nu ɔ? (Yob 31:1)

¹² Odikyɛ yesi yɛ hue paa kyɛ nikyee biala bɔ ɔkɔmaa yɛkɔyɛ bɔne ne, yɛkɔhwe yɛnwo yekofi yenwo. Sɔ yeɛ Yob yɛle ɔ. Ɔne ‘ye nye yɛle apam,’ kyɛbɔ ɔkɔyɛ a, ɔngɔnea brasua biala ngonnya yenwo akɔnnɔ ɔ. (Kenga Yob 31:1.) Sɛ né Yob yere yenwo yɛ sɔ a, né ɔkɔboka ye maa ɔkɔhwe yenwo kofi agyaasɛkyelɛ nwo koraa. Yɛkoso odikyɛ yesi gyinayɛɛ kyɛ nikyee biala bɔ ɔkɔhora kɔsɔ yɛ kɔnea ne, yengopingye ye koraa.

13. Nningyein bɔ yɛdwene yenwo ne, nzuati yeɛ odikyɛ yɛnea ye yé ɔ? (Nea foto ahoroɛ ne koso.)

¹³ Nningyein bɔ yɛdwene yenwo ne, odikyɛ yɛnea ye yé. (Ɛks. 20:17) Ebiemɔ adwene yɛ bɛ kyɛ sɛ bɛdwenedwene nningyein tɛɛ nwo a, ɔtte hwee ofikyɛ bɛyɛlle sɔ nikyee ne. Nakoso, ɔtte nahorɛ, ofikyɛ sɛ ebie kɔso dwenedwene nningyein tɛɛ nwo a, ɔmaa ye komvi ba so paa kyɛ ɔkɔyɛ sɔ nikyee ne. Sɛ ɔba sɔ a, né wasua yenwo ngaen, bɔ odikyɛ ɔyere yenwo paa kora né wahora wale yenwo ɔ. Ɔwɔ nu, odwu mmerɛ bie a nningyein tɛɛ nwo adwene kora ba ye tianu. Nakoso, sɛ ɔba ye sɔ a, yenwo hia paa kyɛ yɛye yefi yɛ tianu ndɛ, na yɛdwenedwene nningyein pá nwo. Sɛ yɛyɛ sɔ a, yɛngɔdwenedwene nningyein bɔ ɔttemaye nwo, na wamaa yahɔ yaayɛ bɔne pirikua bie.—Flp. 4:8; Kol. 3:2; Yak. 1:​13-15.

14. Nikyee foforɛ beni yeɛ ɔkɔboka yɛ, ná yangɔ nzɔhwɛ nu ɔ?

¹⁴ Nikyee foforɛ beni yeɛ yɛkɔhora yɛkɔyɛ ná yangɔ nzɔhwɛ nu ɔ? Odikyɛ yede yɛtonu paa kyɛ sɛ yɛfa Yehowa mmraa yɛbɔ yɛ bra a, yɛ bɔbɔ yeɛ ɔkɔboka yɛ ɔ. Sɛ odwu mmerɛ bie a, ɔkora yɛ se kyɛ nningyein bɔ yɛdwene yenwo, bɔ yekuro, ɔne bɔ ogyi yɛnye so ne, ɔkɔyɛ bɔ Nyameɛ de tonu ɔ. Nakoso, sɛ yɛyere yɛnwo yɛyɛ sɔ a mvasoɛ pee wɔ so, ofikyɛ ɔkɔmaa yɛso anu kodwo yɛ.

15. Sɛ yɛmaa yɛnye gye yenwo kyɛ yɛkɔyɛ bɔ ɔte pá a, sɛɛ yeɛ ɔkɔboka yɛ ɔ?

¹⁵ Odikyɛ yɛyere yɛnwo kyɛ yɛkɔyɛ bɔ ɔte pá ɔ. Sɛ yesua kyɛ ‘yekohyi bɔne ná yahuro bɔ ɔte paa’ a, ɔkɔmaa yɛ hue bɔ yasi kyɛ yɛkɔyɛ nningyein pá ne, nu kɔyɛ se. Afei nningyein bɔ ɔkɔmaa yɛkɔyɛ bɔne ne koso, yɛkɔhwe yɛnwo yekofi yenwo. (Amo. 5:15) Sɛ yɛmaa yɛnye gye yenwo kyɛ yɛkɔyɛ bɔ ɔte pá a, ɔkɔboka yɛ maa sɛ nzɔhwɛ bie fu yenu po a, yɛkɔhora yekogyina yenoa.

16. Nningyein bɔ ɔkɔmaa yekopingye Yehowa ne, sɛ yɛyere yɛnwo yɛyɛ a, ɔkɔboka yɛ sɛ́? (Nea foto ahoroɛ ne koso.)

¹⁶ Yede yɛkɔyɛ sɛɛ ne yahora yayɛ bɔ ɔte pá ɔ? Yeɛ ole kyɛ, yɛkɔyere yɛnwo yɛkɔyɛ nningyein bɔ ɔkɔmaa yekopingye Yehowa ɔ. Sɛ yɛkɔ adesua anaa yɛwɔ asɛnga nu a, ɔyɛ se kyɛ nikyee bie kɔso yɛ kɔnea kyɛ yɛyɛ bɔne ɔ. Ofikyɛ sɔ mmerɛ ne, bɔ Yehowa nye gye yenwo ne mmom, yeɛ yɛfa y’adwene yɛkɔso ɔ. (Mat. 28:​19, 20; Heb. 10:​24, 25) Afei koso, sɛ yɛkenga Bible ne, na yɛdwenedwene yenwo a, ɔboka yɛ maa yɛyere yɛnwo kyɛ yɛkɔyɛ bɔ ɔte pá, na yahyi bɔne. (Yos. 1:8; Edw. 1:​2, 3; 119:​97, 101) Yesu hahyirele ye asuafoɛ nemɔ kyɛ: “Ɛ́mɔwɛne ná ɛ́mɔbɔ mbaeɛ, ná ɛmɔangɔ nzɔhwɛ nu.” (Mat. 26:41) Yeti, sɛ yɛbɔ yɛ Baba bɔ ɔwɔ anwuro ne mbaeɛ a, okyire kyɛ yɛpena kyɛ ɔboka yɛ maa yɛyɛ bɔ okuro ɔ.—Yak. 4:8.

KƆSO MA WƆNYE LA BERƐ

17. Mmerɛyɛlɛ beni yeɛ né ɔyɛ se ma Petro kyɛ okoli so ɔ?

¹⁷ Mmerɛyɛlɛ biemɔ wɔ berɛ a, yɛkɔhora yekotu yebo, nakoso ebiemɔ de, yɛngɔhora. Ɛmɔma yɛnea bɔ ɔtole somafoɛ Petro ɔ. Ɔnate kyɛ né osuro sona nati, ɔhane ye pɛen nza kyɛ ɔnze Yesu. (Mat. 26:​69-75) Nziɛen ɔfale akokoduro lili adanzeɛ wɔ Sanhedrin badwa ne nyunu po. Yeti né waayɛ kyɛ wahora wali sɔ mmerɛyɛlɛ naso ne. (Aso. 5:​27-29) Nakoso afoɛ pee si ne, ɔnate kyɛ né osuro bɛbɔ bapɛ bɛ brienzua nati, ɔne Kristofoɛ bɔ bɛte maenmaensofoɛ ne annidi ko. (Gal. 2:​11, 12) Mmerɛyɛlɛ bɔ né ɔwɔ Petro nwo ne, yeɛ wasa waye ye ti ne oo. Ɔkɔyɛ kyɛ wangora wandu yebo.

18. Sɛ yɛkora yedi mmerɛyɛlɛ bie so po a, nzu yeɛ ɔkɔhora kosi ɔ?

¹⁸ Yɛkoso sɔ dwirɛ ne bie kɔhora kɔto yɛ. Atee beni aso? Ebia né yesusu kyɛ yahora yali mmerɛyɛlɛ bie aso, nakoso yekonwu ye ne, né wasa waye ye ti. Aliemaa bie hane kyɛ: “Nyakyili ponografi nealɛ afoɛ buru, yeti né m’adwene yɛ me kyɛ mahora mali sɔ mmerɛyɛlɛ naso koraa. Nakoso saa né waafea nekaa bie bɔ ɔnwondɛ kyɛ okosa kɔye ye ti ɔ.” Yeliema ne yɛle nikyee paa, ofikyɛ wamma ye aba nu ammu. Onwuni kyɛ sɔ mmerɛyɛlɛ ne, wawa atenaseɛ. Yeti odikyɛ ɔyere yenwo kyɛ okoli so ye ngoa ngyẽa mukoraati wɔ ewiase he anu. Ye asafo nu mbanyi ne ɔye bokale ye paa, yeti kesaalae ɔyere yenwo kyɛ ɔkɔhwe yenwo kofi ponografi nwo ɔ.

19. Sɛ yele mmerɛyɛlɛ bie bɔ ɔyɛ se kyɛ yekoli so a, nzu yeɛ odikyɛ yɛyɛ ɔ?

¹⁹ Sɛ yele mmerɛyɛlɛ bie bɔ ɔyɛ se kyɛ yekoli so a, nzu yeɛ odikyɛ yɛyɛ ɔ? Yeɛ ole kyɛ yɛkɔfa Yesu afutue he yɛkɔyɛ adwuma ɔ. Yenwa, “ɛ́mɔwɛne,” kyire kyɛ yɛnea yé na yangɔ nzɔhwɛ nu. Yeti sɛ w’adwene yɛ wɔ kyɛ nikyeefee ngɔhora wɔ po a, nningyein bɔ ɔkɔmaa ɛkɔyɛ bɔne ne, kɔso twe wɔnwo fi yenwo. (1 Kor. 10:12) Nningyein bɔ waboka wɔ maa ali wɔ mmerɛyɛlɛ naso ne koso, nnɛyakyi ye yɛlɛ. ‘Bɔ mmɔden’ kyɛ ɛkɔmaa wɔnye kɔla berɛ mmerɛ biala, na angɔ nzɔhwɛ nu.—2 Pet. 3:14.

MVASOƐ BƆ ƆWƆ SO KYƐ YƐKƆMAA YƐNYE KƆLA BERƐ Ɔ

20-21. (a) Sɛ yɛmaa yɛnye da berɛ na yangɔ nzɔhwɛ nu a, mvasoɛ bɔ ɔwɔ so ne bie yeɛ ole beni? (b) Sɛ yɛyɛ y’afa nu deɛ a, nzu yeɛ Yehowa koso kɔyɛ kɔma yɛ ɔ? (2 Korintofoɛ 4:7)

²⁰ Yedé yedi paa kyɛ sɛ yɛmaa yɛnye da berɛ na yangɔ nzɔhwɛ nu a, yekonya so mvasoɛ. Sɛ yɛyɛ bɔne a, ebia ‘yekoli fɛɛ mmerɛ kãa bie.’ Nakoso, sɛ yɛyɛ bɔ Yehowa kuro a, yɛnye kɔgye daa. (Heb. 11:25; Edw. 19:8) Ofikyɛ ɔbɔle yɛ kyɛ yɛfa ye mmraa yɛbɔ yɛ bra. (Gye. 1:27) Sɛ yɛyɛ sɔ a, yekonya tiboa pá, na afei yekonya daa ngoa kyẽabie.—1 Tim. 6:12; 2 Tim. 1:3; Yuda 20, 21.

²¹ Ɔte nahorɛ kyɛ “anwoɔnaen ne yɛ mmerɛ,” nakoso ɛhene ngyire kyɛ bakyekye yɛsa bagua yesi. Yehowa aboa yenwo kyɛ ɔkɔma yɛ tumi anaa anwoserɛ bɔ yehia ɔ. (Kenga 2 Korintofoɛ 4:7.) Hyɛ ye nzorɛ kyɛ Nyameɛ de, tumi totohyia anaa tumi bɔ ɔbo sona anwoserɛ so ne, yeɛ ɔfa ma yɛ ɔ. Nakoso yɛbɔbɔ yeɛ odikyɛ yɛyere yɛnwo kyɛ yɛkɔhwe yɛnwo yekofi nikyee biala bɔ ɔsɔ yɛ nea nanwo ɔ. Sɛ yɛyɛ y’afa nu deɛ, na yɛsrɛ Yehowa kyɛ ɔma yɛ anwoserɛ pee a, yede yedi kyɛ okotie yɛ. (1 Kor. 10:13) Amba, Yehowa kɔboka yɛ maa yɛnye kɔla berɛ na yangɔ nzɔhwɛ nu.