Psaume
Na mokonzi ti azo ti pikango mozoko; ti pika ni alingbi na bia “Futi mbi pëpe.” Psaume ti David. Mictam.*
58 Amolenge ti azo, ala lingbi ti sara tënë ti ye so ayeke mbilimbili tongana ala zi yanga ape?+
Ala lingbi ti fâ ngbanga mbilimbili?+
2 Ala leke na bê ti ala ti sara ye so ayeke mbilimbili pëpe,+
nga maboko ti ala asara ye ti ngangu na zo na yâ ti kodro ni.+
3 Ngbene ye so a dü azo ti sioni,* ala gue yongoro,*
ala sara ye kirikiri nga ala yeke azo ti mvene ngbene ye so a dü ala.
4 Ngu ti yanga ti ala ayeke tongana ngu ti yanga ti angbo;+
mê ti ala akanga tongana ti cobra so akanga mê ti lo,
5 lo ke ti mä go ti azo ti handango angbo,
atâa ala yeke na kode mingi.
6 Nzapa, fâ pembe ti ala na yâ ti yanga ti ala!
Jéhovah, kungbi bio ti ngbangba ti akoli-bamara so!
7 Zia si ala girisa tongana ngu so asua ague na mbeni ndo nde.
Zia si Lo gboto yâ ti kokora ti lo, lo pika ala na alê ti kokora ni si ala tï.
8 Zia si ala ga tongana escargot so azia dongo ti lo na sese na ngoi so lo yeke hon juska lo kui,
nga tongana molenge so a dü lo na kuâ ni so, lâ oko pëpe, lo bâ lâ.
9 Kozo si keke ti sisi asara si atawa ti ala achauffé,
lo yeke hon na kete keke so angbâ fini nga na ti so ayeke gbi, tongana ti so kota pupu ahon na ye.+
10 Zo ti mbilimbili ayeke duti na ngia ndali ti so lo bâ so a kiri na azo peko ti ye ti sioni so ala sara.+
Mênë ti azo ti sioni ayeke mû terê ti gere ti lo kue.+
11 Na pekoni, azo ayeke tene: “Ti tâ tënë ni, futa ayeke dä ndali ti azo ti mbilimbili.+
Mbeni Nzapa ayeke biani dä so ayeke fâ ngbanga na ndö ti sese.”+