Lundi 28 juillet
Lo so ayeke beoko na ala ayeke kota ahon lo so ayeke beoko na dunia so.—1 Jean 4:4.
Tongana mbeto asara mo, gbu li na ndö ti aye so Jéhovah ayeke sara ande tongana Satan ayeke dä encore ape. Mbeni démonstration so a sara lani na ngoi ti kota bungbi ti lango ota ti ngu 2014 afa mbeni babâ na azo ti sewa ti lo asara lisoro ti bâ tongana nyen la atënë so ayeke na 2 Timothée 3:1-5 apeut ti changé tongana ayeke sara tënë ti gigi ti azo na yâ ti Paradis. Lo tene: “Na yâ ti fini dunia, ngia ayeke duti ande dä mingi, ngbanga ti so azo ayeke ndoye ande amba ti ala, ala yeke ye ti hinga ye na ndö ti Nzapa, ala yeke bâ terê ti ala kete, ala yeke sara terê ti ala kete, ala yeke gonda Nzapa, ala yeke mä yanga ti ababâ na amama ti ala, ala yeke hinga ti kiri singila, ala yeke duti be-ta-zo, ala yeke ye mingi azo ti sewa ti ala, ala yeke ye ti mä terê na amba ti ala, ala yeke tene lakue nzoni tënë ti mba, ala yeke kanga nzara ti bê ti ala, ala yeke duti anzoni zo, ala yeke ndoye nzoni ye, zo apeut ti sara confiance na ala, li ti ala akpengba ape, ala yeke azo ti wuma ape, ala yeke ndoye Nzapa ahon ti ndoye ngia, ala yeke voro Nzapa na bê ti ala kue; ga nduru na mara ti azo tongaso.” Eskê mo na azo ti sewa ti mo wala amba ti mo aChrétien asara lisoro awe ti hinga gigi ayeke duti ande tongana nyen na yâ ti fini dunia? w24.01 6 par. 13-14
Mardi 29 juillet
Bê ti mbi anzere na mo mingi. —Luc 3:22.
Bê ti e adë mingi ti hinga so awakua ti Jéhovah azia ngia na bê ti lo. Bible atene: “Bê ti Jéhovah anzere na terê ti azo ti lo.” (Ps. 149:4). Me na ambeni ngoi, ambeni adécouragé mingi na ala peut ti hunda terê ti ala: ‘Eskê mbi zia ngia na bê ti Jéhovah?’ Gbâ ti awakua ti Jéhovah so Bible asara tënë ti ala so asara na lo be-ta-zo ayeke tiri lani na mara ti bibe so na ambeni ngoi (1 Sam. 1:6-10; Job 29:2, 4; Ps. 51:11). Bible afa polele so azo so ayeke mbilimbili-kue ape apeut ti zia ngia na bê ti Jéhovah. Na lege wa? E doit ti mä na bê na Jésus Christ nga e wara batême (Jean 3:16). Tongana e sara tongaso, e yeke fa na azo so e changé bê ti e awe nga e mû zendo ti sara ye so bê ti Nzapa aye (Kus. 2:38; 3:19). Jéhovah ayeke na ngia tongana e sara aye so ti ga akamarade ti lo. Tongana e ngbâ ti sara kue ti sara ye alingbi na yanga so e mû ti sara na Jéhovah, e yeke zia ngia na bê ti lo nga lo yeke bâ e tongana akamarade ti lo.—Ps. 25:14. w24.03 26 par. 1-2
Mercredi 30 juillet
E lingbi ti kaï pëpe ti sara tënë na ndö ti aye so e bâ na e mä.—Kus. 4:20.
Tongana akota zo ti kodro ahunda na e ti zia ti fa tënë, e peut ti sara ye tongana ti so adisciple asara lani. E peut ti hinga na bê ti e kue so Jéhovah ayeke aidé e ti sara kua ti e ti fango tënë. Tongaso sambela Jéhovah ti sara ye na mbeto ape nga na ndara nga ti aidé mo ti gbu ngangu atâa akpale so mo wara. Mingi ti e ayeke gbu ngangu na yâ ti akpale wala e découragé: Na tapande kpale ti seni, kuâ ti mbeni zo so e ye lo, kpale ti sewa, sarango ye ti ngangu na zo wala mbeni kpale nde. Akobela so ayeke mû ndo nga na abira asara si a yeke même ngangu mingi ti gbu ngangu na yâ ti mingi ti akpale so. Zi bê ti mo na Jéhovah. Fa na lo ye so asi na mo tongana ti so mo yeke fa ni na mbeni kota kamarade ti mo. Duti na confiance so Jéhovah ‘ayeke sara ye ndali ti mo.’ (Ps. 37:3, 5). Tongana e ngbâ ti sambela ayeke aidé e ti “gbu ngangu na yâ ti aye ti vundu.” (aRom. 12:12). Jéhovah ahinga akpale so awakua ti lo ayeke gbu ngangu dä, “lo mä toto so ala toto na lo ti mû maboko na ala”.—Ps. 145:18, 19. w23.05 5-6 par. 12-15