Josué

11 Gï so Jabin, gbia ti Hazor, amä tënë ti aye so asi, lo tokua ndo na Jobab gbia ti Madon,+ na gbia ti Shimron nga na gbia ti Acshaph,+ 2 agbia so ayeke na nord ti ando so ahoto ayeke dä, ala so ayeke na akpangbala ndo* so ayeke na sud ti Kinnéreth, ala so ayeke na Séphélah nga na ali ti akete hoto ti Dor+ na mbage ti ouest. 3 Lo tokua ndo nga na azo ti Canaan+ na mbage ti est nga na ouest, azo ti mara ti Amori,+ azo ti mara ti Heth, azo ti Périzzi nga na azo ti mara ti Jébus so ala kue ayeke na yâ ti ando so ahoto ayeke dä, azo ti Hévi+ so ayeke na gbe ti Hoto ti Hermon+ na sese ti Mizpah. 4 Tongaso, ala ga na aturugu ti ala kue, wungo ti ala ayeke gbani gbani tongana mbutu ti yanga ti ngu-ingo, ala ga legeoko na gbâ ti ambarata nga na apuse ti mbarata. 5 Agbia so kue amä terê, ala ga ala sara camp ti ala na terê ti Ngu ti Mérom ti sara bira na azo ti Israël.

6 Jéhovah atene na Josué: “Mo sara mbeto ti ala pëpe,+ ngbanga ti so kekereke na oko ngbonga so, mbi yeke zia ala kue na maboko ti azo ti Israël, na azo ti Israël ayeke fâ ala. Mo yeke fâ akamba ti gere+ ti ambarata ti azo so na mo gbi apuse ti mbarata ti ala.” 7 Josué na akoli kue so ayeke tiri bira so ayeke na terê ti lo atï na ndö ti ala gï gbagburu na terê ti Ngu ti Mérom. 8 Jéhovah azia ala na maboko ti azo ti Israël,+ azo ti Israël asö benda na ndö ti ala, ala tomba peko ti ala juska na Sidon+ so gbâ ti azo ayeke dä, na Misréphoth-Maïm+ nga na Popo-hoto ti Mizpéh na mbage ti est, ala fâ ala juska zo oko asö kuâ pëpe.+ 9 Josué asara na ala gï tongana ti so Jéhovah amû yanga na lo, lo fâ kamba ti gere ti ambarata ti ala nga lo gbi apuse ti mbarata ti ala.+

10 Na pekoni, Josué akiri ague amû gbata ti Hazor na lo fâ gbia ni na épée,+ ndali ti so Hazor ayeke ândö na li ti aroyaume so kue. 11 Azo kue* so ayeke na yâ ti gbata ni ala fâ ala na épée.+ Zo oko angbâ na fini pëpe,+ lo gbi nga gbata ti Hazor. 12 Josué amû agbata ni kue na lo fâ agbia ni kue na épée.+ Lo futi ala,+ gï tongana ti so Moïse, wakua ti Jéhovah, amû yanga lani ti sara. 13 Me, agbata kue so ayeke na li ti akete hoto, azo ti Israël agbi ni pëpe gï Hazor awe. Gï Hazor oko la Josué agbi ni. 14 Azo ti Israël amû akungba nga na anyama ti yâ ti agbata so na aga ti ala.+ Me ala fâ azo kue na épée juska ala hunzi ala kue.+ Ala zia mbeni zo oko angbâ na fini pëpe.+ 15 Gï tongana ti so Jéhovah amû yanga lani na Moïse wakua ti lo, Moïse nga amû yanga na Josué,+ na Josué asara ye alingbi na ni. Lo zia mbeni tënë ni angbâ senge pëpe, lo sara ye kue so Jéhovah amû yanga lani na Moïse ti sara.+

16 Josué amû sese so kue, ando so ahoto ayeke dä, lo mû Négueb kue,+ sese ti Goshen kue, Séphélah,*+ Arabah,+ ando so ahoto ayeke dä na Israël nga na akpangbala ndo so ayeke na terê ni.* 17 Lo mû sese kue so alondo na Hoto ti Halac si amonté na Séir juska na Baal-Gad+ so ayeke na Popo-hoto ti Liban na gbe ti Hoto ti Hermon,+ lo gbu agbia ni kue lo fâ ala. 18 Josué asara bira na agbia so kue na yâ ti alango mingi. 19 Mbeni kodro ti leke tënë ti siriri na azo ti Israël ayeke dä pëpe gï azo ti Hévi so asara kodro na Gabaon.+ Tanga ti akodro ni kue ala mû ni na bira.+ 20 A yeke Jéhovah la azia si li ti ala akpengba+ tongaso si ala sara bira na azo ti Israël, ti tene lo futi ala sân ti bâ mawa ti ala.+ A hunzi ala kue, gï tongana ti so Jéhovah amû yanga lani na Moïse.+

21 Na ngoi ni so, Josué aneka amolenge ti Anak+ so ayeke na ando so ahoto ayeke dä, ti londo na Hébron, Debir, Anab nga na ando kue so ahoto ayeke dä na Juda nga na Israël. Josué afâ azo ni nga lo futi akodro ni.+ 22 Mbeni molenge ti Anak oko ti ngbâ na sese ti Israël ayeke dä pëpe. Ala ngbâ+ gï na Gaza,+ na Gath+ nga na Ashdod.+ 23 Josué amû akodro ni kue, gï tongana ti so Jéhovah amû zendo ni lani na Moïse,+ na pekoni Josué amû sese ni na héritage na azo ti Israël tongana mbage ti ala oko oko na lege ti mara ti ala. Lo kangbi ni na popo ti amara ti Israël.+ Kodro ni aduti na siriri, na bira ayeke dä pëpe.+